Hechos 3
3
Paralïticu runata aliyäsiyashqan
1Juk junaqmi malway inti kaykaptin Tayta Diosta manakuyänanpaq Pedruwan Juan templuman aywayarqan. 2Templu punkuchömi yurishqanpita pasa mana puriq runa jamaraykarqan. Say runatami waran waran apayaq Kuyaylapaq niyashqan punkuman. Saychömi templu patiuman yaykuqkunata caridäta manakuq. 3Pedruwan Juan yaykuykaqta rikarmi paykunatapis caridäta manakurqan. 4Manakuptinmi say runata rikapäriyashpan Pedro nirqan: <<¡Rikayämay!>>
5Saymi paykunata kushish rikararqan imalawanpis yanapänanpaq kashqanta yarpashpan. 6Saymi Pedro nirqan: <<Manami qellaynïpis ni qorïpis kansu. Sayno kaptinpis yanapäshaykimi. ¡Nazaretpita Jesucristupa jutincho jukla sharkur puriy!>>
7Sayno nirmi Pedro aluq kaq makinpita jancharkur sharkasiptin jinan höra chaki moqunkunapis aliyaskirqan. 8Saymi jukla sharkurkur puriyta qalaykurqan. Nirkurmi saltar Tayta Diosta alabashpan paykunawan templu patiuman yaykurqan. 9Tayta Diosta alabar puriykaqta rikarmi lapan runakuna 10admirakur niyarqan: <<¡Payqa Kuyaylapaq niyashqan punkucho caridäta manakuq runami kaykan!>>
11Say aliyaq runaqa Pedrutawan Juanta manami kacharqansu. Salomónpa Alarnin niyashqancho paykuna kaykäyashqanta musyayashpanmi runakuna admirakur sayman cörrila rikaq aywayarqan.
Pedro wilakushqan
12Chäyaptinnami Pedro nirqan: <<Israel runakuna, ¿imanirtaq noqakunata rikapaykäyämanki? ¿Imanirtaq yarpäyanki kikïkunapa munaynïwan o jusaynaq kaynïwan kay runata aliyäsiyashqäta?
13<<Abrahampa, Isaacpa, Jacobpa y unay ayllunsipa Diosninmi#Éxo. 3.15. sirviqnin Jesústa churash lapanpitapis mas munayyuq kananpaq.#Isa. 52.13; Fil. 2.7-9. Sayno kaykaptinmi qamkunaqa wanusiyänanpaq autoridäkunapa makinman churayashkanki. Pilato kachariyta munaptinpis manami munayashkankisu. 14Jusaynaq santu runata kacharinanpaq manakuyänaykipa trukan wanusikuq runata kacharinanpaqmi manakuyashkanki.#Mat. 27.15-23; Mar. 15.6-14; Luc. 23.13-23. 15Saynöpami mana ushakaq kawayta qomaqninsita wanusiyashkanki. Paytami Tayta Dios kawarisimush. Kawarirkamur yuripäyämaptinmi noqakuna rikayashkä. 16Paymi kay reqiyashqayki runata aliyäsish. Jesucristuman yärakuyaptïmi rikayashqaykinöpis kanan kachakashna kaykan.
17<<Wawqikuna, Jesús salvamaqninsi Cristo kashqanta mana musyarmi qamkunapis autoridäninsikunapis wanusiyashkanki. 18Sayno kaptinpis profëtankunawanmi Tayta Dios musyasimarqansi Cristuta wanusiyänanpaq kashqanta. Saytami Tayta Dios cumplish.
19<<Kananqa perdonayäshunaykipaq jusalikuyta wanakur Tayta Diosta cäsukuyay. 20Saynöpami Jesucristuta Tayta Dios yapay kachamunqa. Paytami salvamaqninsi Cristo kananpaq unaypita pasa akrarqan. 21Kutimunan junaq chämushqanyaqmi Jesucristuqa jana pasacho kanqa. Kutimurnami lapantapis churanqa Tayta Dios munashqannöna kananpaq. Sayno kananpaq kashqantaqa Tayta Diospa santu profëtankuna unaypita pasami wilakuyarqan.
22<<Moiséspis [unay ayllunsikunatami] nirqan: <Tayta Diosmi qamkunapita juk runata churanqa noqano profëta kananpaq. Pay niyäshushqaykita cäsukuyanki. 23Pipis pay nishqanta mana wiyakuq kaqqa qarqushqami kanqa>.#Deut. 18.15-19; 34.10.
24<<Samuel wilakushqanpita pasami Tayta Diospa lapan profëtankunapis wilakuyarqan kanan wisan päsaykashqankunata. 25Profëtakuna wilakuyashqan promësakuna noqansi chaskikunansipaqmi kaykan. Saynöpis unay ayllunsikunawan Tayta Dios pactu rurashqanpis noqansipaqmi kaykan. Say pactuta rurarmi Abrahamta Tayta Dios nirqan: <Qampita miraqpitami kay pasacho pïmay runakunapis bendicionta chaskiyanqa>.#Gén. 12.3; 22.18. 26Abrahamta promitishqanta cumplirmi sirviqnin#3.26 Say palabraqa griëgucho sirviqnin o wamran ninanmi. Jesústa kawarirkasimur noqansiman Tayta Dios kachamurqan. Sayno kachamurqan jusalikuyta wanakurqa puntata noqansi say bendicionta chaskinansipaqmi>>.
© 2003, Wycliffe Bible Translators, Inc. All rights reserved.
