Chenesis 20
20
1Mihma Eblaham ʋt yʋmma ʋttʋt apoyua cha toshowʋt oka mahli pilla yakni yo̱ ia mʋt, Katesh micha Shu itin takla ak o̱ ʋttʋt, cheki itin takla Kela ak o̱ ai ʋtta tok.
2Mihmʋt Eblaham ʋt tekchi Salah ya̱, An tek oke, achi tok. Mihma Kela i̱ mi̱ko Abimelek ʋt Salah ya̱ pit hoyo cha, ishi tok.
3Yohmi tuk kia Abimelek ʋt ninak a̱ holhpokuna ho̱, Chitokaka yʋt im ona cha, Yakeh! ohoyo yʋmma ish ishi tuk pulla kak osh hatak illi chia hoke: hatak tekchi yoka, im achi tok.
4Yohmi kia Abimelek ʋt i̱ bili̱ka ik ono ke tuk atok: mihmʋt Chitokaka ma, oklushi aiʋlhpiesa yak kia ish ba chi̱ cho?
5An tek oke, ʋm achi tuk keyu cho? mihma ilap fehna ak kia, A̱ nakfi oke, achi tuk oke; sa chu̱kʋsh ʋt aiʋlhpiesa hosh, micha sʋbbak ʋt nana okpʋni keyu hosh ilʋppa yʋmihchi li tuk oke, achi tok.
6Mihma Chitokaka yʋt holhpokuna ho̱, A̱hli, chi chu̱kʋsh ʋt aiʋlhpiesa hosh ish yʋmihchi tuk a̱ ithana lishke; chik sa̱ yoshubo ka chi̱ ka̱, ʋno ak kia chi halanli li tuk oka: yʋmohmi kak o̱ ik potolí, ak chim ahno tuk oke.
7Yʋmohmi hoka himak a̱ hatak ash tekchi ya̱ ish i̱ falʋmmichashke; hopaii yoka, mikma anumpa ilbʋsha ishit chi anumpulikma, chi okcha̱yashke; atuk o̱ chik i̱ falʋmmechokmʋt, chishno, micha nana hosh chimmi moma ka̱ aienʋt chilli pulla chi̱ kʋt ish ithaiyanashke, im achi tok.
8Yʋmohmi na Abimelek ʋt onnahinli fehna ho̱ wakaya cha, in tishu ʋhleha moma ka̱ hoyo cha, nana ilʋppa moma ka̱ im anolit haklochi tok: mihma hatak ʋhleha hash osh nukshopa fehna tok.
9Yohmi ma Abimelek ʋt Eblaham a̱ hoyo cha, Nanta mak o̱ ish pi yʋmihchi tuk oh cho? micha nanta ho̱ chim ashʋchi li tuk o̱, ʋno, micha ʋm apehlichika ya̱ nanashʋchi chinto ish pi onochi tuk oh cho? nana kʋt a yʋmohma he ʋlhpesa keyu ho̱ is si yʋmihchishke, im achi tok.
10Micha Abimelek ʋt Eblaham a̱, Nanta ho̱ ish pisa hosh nana ilʋppa ish yʋmihchi tuk oh cho? im achi tok.
11Mihma Eblaham ʋt, Yakni ilʋppa Chitokaka ya̱ i̱ nukwia kʋt iksho pullʋshke; micha sa tekchi pulla kak o̱ sʋ ba chi̱ hoke, ahni li kak atuk oke.
12Atuk o̱ yohmi kia an tek o̱ mʋhlishke; a̱ki yo̱ ushetik, yohmi kia hʋshki ya̱ ushetik keyu hoke: atuk osh sa tekchi toba tok.
13Atuk o̱ yakohmi tok, Chitokaka yʋt a̱ki in chuka ya̱ issʋchit fullohlihinchit sʋsht a̱ya ma, Ilʋppak o̱ is sa̱ kana kʋt ish otʋnichashke; yakni moma kanima yo̱ il onakma, ʋno ya̱, A nakfi yoke, is si achashke, im achi li tuk oke, achi tok.
14Mihma Abimelek ʋt chukfʋlhpoa micha wak, micha hatak tishu, micha ohoyo tishu aiena ka̱ ishi cha, Eblaham a̱ ima mʋt tekchi Salah ya̱ i̱ falʋmmichi tok.
15Micha Abimelek ʋt, Yakeh, a̱ yakni ʋt chi tikba itoyulʋshke: kanima yo̱ chim ʋlhpiesakmʋt, ish ai ahantashke, achi tok.
16Micha Salah ya̱, Yakeh! chi̱ nakfi ya̱ tʋli hʋta tushahli tahlepa sipokni achʋfa ho̱ ima lishke: yakeh, chi apeha moma, micha inla aiena moma ka̱ yʋmmʋt nishkin ishit chim ompoholmo ya̱ chi̱ hoke, im achi tok: yʋmihchi ho̱ Salah ʋt nan ashʋchi tuk ʋt nukfohka tok.
17Yʋmohmi ma Eblaham ʋt Chitokaka ya̱ im ilbʋshʋt isht anumpuli tok: mihma Chitokaka yʋt Abimelek, micha tekchi, micha in tishu ohoyo moma ka̱ hlakofichi tok: mihma ʋlla okla eshi tok.
18Chihowah yʋt Eblaham tekchi ak atuk pulla kak o̱ Abimelek in chuka achʋfa im oshʋtto moma ka̱ katalichit im okshita tuk oka.
Published by the American Bible Society 1848-1886, reprinted 1913
