Chenesis 19
19
1Atuk o̱ opia ma, enchel tuklo kash osh Sotom a̱ ona tok; mihma Lot ʋt Sotom holihta okhissa ya̱ bininli tok; mihmʋt Lot ʋt pisa mʋt, wakayʋt afamʋt ia tok: micha nashuka ya̱ isht akachunolit aka hlipia tok.
2Mihmʋt, Yakeh, a̱ shahli ma! himak a̱ fullotʋt hʋchin tishu im aboha ya̱ hʋsh chukowa cha, hʋsh a̱shwa na onnashke; micha hʋch iyi ya̱ hʋsh achefashke; atuk mʋt onnahinli fehna hʋsh wakaya cha, hʋchi̱ hina ya̱ hʋsh a̱yashke, achi tok. Mihma, Ahá, amba aiitʋnowa ak o̱ il a̱shwa na onna chi̱ hoke, achit okla tok.
3Mihma im achunanchi fehna tok: mihma im a fullota cha, im aboha ya̱ chukowa tok; mihma impʋchi im ikbi cha, pʋska ik shatʋmmo i̱ nunachi ma, impʋt okla tok.
4Yohmi kia okla ik tʋshko ki̱sha ho̱, tʋmaha holihta hatak ʋhleha, Sotom hatak ʋhleha fehna kʋt sipokni, micha himita aiena okla moma kanima moma ka̱ minti hosh aboha yash apakfoyubli tok.
5Micha Lot a̱ i̱ howa mʋt, Himak ninak a̱ hatak ʋt chim ʋla tuk mʋto? kohchit isht ish pim ʋla na, il ithʋnashke, okla im achi tok.
6Mihma Lot ʋt okhissa ya̱ kohchʋt im ona cha, okhissa isht ʋlhkʋma yash okhi̱shtʋt kohcha mʋt,
7Itibapishi li ʋhleha ma! nanashʋchi ilʋppa chohmi ka̱ hʋch ik yʋmohmo kashke, hʋchim asilhha lishke.
8Yakeh, himak a̱ sʋso tek tuklo kʋt hatak haleli keyu hosh ʋm a̱shwʋshke; hʋchim asilhha lishke, isht ak hʋchi̱ kohchi na, kaniohmi kak osh hʋchim ʋlhpiesakmʋt hʋsh yʋmihchashke: peh hatak ilʋppak okʋno nana hʋchik kaniohmecho kashke; yʋmohmi kak o̱ ʋm aboha ishitholmo a hoshonti ka̱ nuta ya̱ ʋla hatuk oka, achi tok.
9Mihma, Misha hikiá, okla achi tok. Micha anonti, Hatak achʋfa ilʋppʋt cheki itintakla pi takla anta chi̱ hosh ʋla tuk ʋt nanapesa ya chi̱ hotuma? Himak a̱ chishno ak o̱ yʋmma e yʋmihcha hetuk i̱ shahlichi hosh e chi yʋmihcha chi̱ hoke, okla achi tok. Mihmʋt hatak Lot ash okla i̱ kʋllo fehna tok; micha okhissa ya̱ tiʋbla chi̱ hosh bili̱ka ai ʋla tok.
10Yohmi tuk kia hatak ash osh ilap ibbak a̱ pit weli cha, Lot a̱ halʋllit aboha ya̱ fohki cha, okhissa yash okhishta tok.
11Micha hatak okhissa aiasha kash hochito, micha chipunta moma ka̱ nishkin a̱ lʋblichit okla tok: yohmi ho̱ okhissa ya̱ ahayuchi bʋnnʋt okla ile tikambichi tok.
12Mihma hatak ash osh Lot a̱, Ilʋppa inla kʋt chim a̱sha moma cho? chiyup, micha chiso ʋhleha, micha chisotek ʋhleha, micha nana hosh tʋmaha holihta ya̱ chim a̱shakmʋt, ilʋppa isht ish kohchashke.
13Ishit pa̱ha̱ya kʋt Chihowah itikba ya̱ chito fehnʋt taha hatuk o̱, tʋmaha holihta ilʋppa okpʋnit e kancha chi̱ hoke; mikma okpʋnit e kancha chi̱ ho̱, Chihowah yʋt et pi pila tuk oke, im achi tok.
14Mihma Lot ʋt kohchʋt ia cha, iyup ʋhleha hʋt ushetik ʋhleha ha̱ itauwaya tuk a̱ ont im anumpulit, Ho wakayá, ilʋppa hʋsh kohchashke; Chihowah yʋt tʋmaha holihta ilʋppa okpʋnit tahla chi̱ hoke, achi tok: yohmi kia yopula nana ho̱ iyup ʋhleha hʋt im itilaui tok.
15Atuk o̱ onnʋt minti ma, enchel ash osh Lot a̱ tu̱shpalechit, Wakaya cha, chi tekchi, micha chisotek tuklo ilʋppa a̱shwa hokʋno pehlichí, yohmi hosh tʋmaha holihta nanashʋchika iba ta̱kla luʋt ik hʋchi tamoo kashke, achi okla tok.
16Atuk o̱ sʋlaha ma, hatak ash osh ibbak a̱ halʋlli mʋt, tekchi ibbak a̱ halʋlli mʋt, ushetik tuklo ibbak a̱ halʋllit okla tok: Chihowa yʋt i̱ nukha̱klo hatuk o̱; micha tʋmaha holihta ya̱ ishit kohchit hilechit okla tok.
17Atuk o̱ kocha ya̱ isht ona ma yakohmi tok, Malelit chi okcha̱yashke: chim asha̱ka ya̱ filemʋt ish pisa ná, micha yakni patali kanima chik anto kashke; malelit nʋnih ha̱ ish onashke, luʋt chi taha ná, achi to̱k.
18Mihma Lot ʋt, Ikikkeh, ik yohmo kashke, an Chitokaka ma!
19Yakeh, himak a̱ chin tishu hʋt chi tikba ya̱ chi holhponayo hanta ai ahayuchishke, micha ʋm ilhfiopak a̱ ish okchalinchi, yʋmma ish yʋmihchi kʋt nan ish i̱ nukha̱klo ʋt ish chitolichishke: atuk o̱ malelit nʋnih ha̱ ona la he keyushke, nan ik achukmo kia si onʋtola cha, sʋlli yoba na.
20Himak a̱ yakeh, tʋmaha holihta ilʋppʋt olanlosi, malelit ona hinla hoke; micha iskitinesishke: ikikkeh, yʋmmak o̱ malelit ona lashke, (iskitinesi keyu cho?) mikma ʋmi shilombish ʋt okcha̱ya chi̱ hoke, im achi tok.
21Mihma, Yakeh, nana ilʋppa chim aiokpanchi li ak inli hokʋt, isht ish anumpuli tuk tʋmaha holihta ilʋppa okpʋnit ak kancho ka chi̱ hoke.
22Tu̱shpá, malelit yʋmmak o̱ ish onashke: yʋmma chik ono ki̱sha ka̱ nana kaniohmichi la he keyu hoka, im achi tok: yʋmohmi hoka tʋmaha holihta yʋmmʋt Soa hohchifo tok.
23Lot ʋt Soa ya̱ ont chukowa ma, hʋshi ʋt kohchʋt yakni ya̱ on tommi tuk atok.
24Yohmi ma Chihowah yʋt hituk lakna micha luak Chihowah ya̱ a minti Sotom micha Komollah aiena ka̱ ʋba et ai on umbʋchi tok.
25Micha tʋmaha holihta yʋmma puta kash, micha yakni patali moma, micha tʋmaha holihta yʋmma puta kash okla moma, micha yakni ai offo aiena ka̱ okpʋnit kanchi tok.
26Amba tekchi ʋto im asha̱ka a̱yʋt olbʋl pit hopo̱koyo cha, hʋpi hikia tobʋt hikia tok.
27Mihma Eblaham ʋt onnahinli fehna ho̱ wakaya cha, Chihowah itikba ya hikia tuk ash osh ona tok.
28Mihmʋt Sotom pilla, micha Komollah pilla, yakni patali moma pilla ka̱ pit hopo̱koyʋt pisa ma, yakeh, yakni yash shobulli kʋt tʋli abila shobulli chiyuhmit ʋba ma̱ha̱ya tok.
29Atuk o̱ yakohmi tok, Chitokaka yʋt yakni patali tʋmaha holihta puta ka̱ okpʋnit tahli mʋt, Eblaham a̱ ithaiyana tok; micha tʋmaha holihta puta Lot ʋt ai ʋtta yash okpʋnit tahli mʋt, nana okpulot taha kash im itin takla ya̱ ai ishit Lot a̱ kohchi tok.
30Mihma Lot ʋt Soa ya̱ kohchʋt ushetik tuklo ka̱ pehlinchit nʋnih ha̱ ont ai ʋtta tok: Soa ya̱ ʋtta kʋt nukshopa hatuk okʋt; micha ushetik tuklo kash aienʋt hichukbi yo̱ a̱sha tok.
31Atuk o̱ akni ash osh nakfish a̱, Pi̱ki ʋt sipoknishke, mikma yakni moma a yʋmohmi chatuk a̱ yʋmohmit piba tʋshka hi ʋt hatak nana kia yakni paknaka ya̱ ikshoske.
32Inta pi̱ki ya̱ oka pa̱ki il ipeta cha, il iba tʋshkashke, yʋmohmi hosh pi̱ki im ishtatiaka ya̱ il apoanchashke, im achi tok.
33Micha mih ninak a̱ i̱ki ya̱ oka pa̱ki ipetʋt okla tok; micha akni hʋt i̱ki ya̱ iba chukowa cha, iba tʋshki tok; mihma itola tuk osh tani ka̱ ik akostinincho tok.
34Atuk o̱ ont onna ma yakohmi tok, akni hʋt nakfish a̱, Yakeh, pilashash okhlili ma a̱ki ya̱ iba tʋshki li tuk oke: himak ninak ak kia oka pa̱ki il ipetashke; mikma ish iba chukowa cha, ish iba tʋshkashke, yʋmohmi hosh pi̱ki im ishtatiaka ya̱ il apoanchashke, im achi tok.
35Micha ninak yʋmmak kia i̱ki ya̱ oka pa̱ki ipetʋt okla tok; mihma nakfish ash osh wakayʋt ont iba tʋshki tok; mihma itola tuk osh tani ka̱ ik akostinincho tok.
36Yakohmi hosh Lot ushetik ita tuklo kʋt i̱ki ya̱ ʋlla i̱ shalit okla tok.
37Atuk osh akni hʋt ʋlla nakni yo̱ sholi cha, hohchifo ka̱ Moab achi tok: mihi yosh Moabait okla ha̱ i̱ki yosh himak nitak a̱ ant ai ʋhli hoke.
38Mihma nakfish yʋmmak kia ʋlla nakni yo̱ sholi cha, hohchifo ka̱ Ben‐ammi achi tok: yʋmmak osh Ammon im ʋlla ʋhleha ha̱ i̱ki yosh himak nitak a̱ ant ʋhli hoke.
Published by the American Bible Society 1848-1886, reprinted 1913
