Chenesis 18
18
1Atuk o̱ Chihowah yʋt baiyi ʋt Mamli a hieli ka̱ ai i̱ haiaka tok: mihmʋt nitak lʋshpʋt taha ho̱ ʋlhtipo okhissa ya̱ bininli tok.
2Atuk osh akachakali cha, hopo̱koyo ma, yakeh, hatak tuchina kʋt bili̱ka hieli tok: atuk o̱ pisa mʋt, ʋlhtipo okhissa yash hikiʋt malelit ont afama cha, aka pit hlipia mʋt,
3A̱ shahli ma, himak a̱ holhponayo hanta ha̱ chi tikba ai ahayuchi likma, chin tishu ha̱ i̱ filʋmmit chik aiyo kashke, chim asilhha lishke:
4Oka kanomosi ka̱ isht ʋla na, hʋch iyi ya̱ hʋsh achifa cha, iti nuta ya̱ chieyʋt hʋsh fohashke, hʋchim asilhha lishke:
5Mikma pʋska ʋpa achʋfa isht ʋla likma, hʋchi chu̱kʋsh a̱ hʋsh fihoblashke; yohmi ha yosh hʋsh a̱yashke: yʋmohma chi̱ kak o̱, hʋchin tishu ha̱ hʋsh im ʋla tuk okʋt, achi tok. Mihma, Ish achi tuk mak osh ish yʋmohmashke, okla achi tok.
6Mihma Eblaham ʋt tu̱shpʋt ʋlhtipo ya̱ ont chukowʋt, Salah ya̱ im ona cha, Tu̱shpʋt atahlit bota tohbi lepihbi ʋlhpisa tuchina ho̱ yamʋsli cha, luak ituksita pʋska lumboa ya̱ ai apushli, achi tok.
7Mihmʋt Eblaham ʋt malelit wak aiasha ka̱ ona cha, wak ushi nipi ik kʋllo achukma ho̱ ont isht ʋla cha, hatak himita yo̱ ima tok; mihma tu̱shpʋt atahli tok.
8Mihmʋt pishukchi nia, micha pishukchi, micha wak ushi atahli kash aiena ka̱ ishi cha, itikba talohli tok: micha bili̱ka iti nuta ya̱ hikia ma, okla impa tok.
9Mihmʋt, Chi tekchi Salah mʋto? okla im achi tok. Mihma, Yakeh, ʋlhtipo ya̱ a̱shʋshke, achi tok.
10Mihma, Aiokcha̱ya̱ he nitak ʋt takanlik mak o̱ falamʋt chim a̱ya li pulla hi oke; mikma yakeh, Salah chi tekchi ʋt ʋlla nakni yo̱ esha hi oke, achi tok. Mihma ʋlhtipo okhissa ʋt im asha̱ka yatuk o̱, Salah ʋt anu̱kaka ya̱ a̱sha hosh haklo tok.
11Yohmi ka̱ Eblaham, micha Salah ʋt sipoknit nitak in lauʋt taiyaha hatok; mikma Salah ʋt ohoyo nana im a kaniohmi ʋt issa tok atok.
12Yʋmohmi hatuk osh Salah ʋt ilap inlit yukpʋt, Sa sipokni hay ʋt ʋm achukma hinla? a̱ shahli hʋt sipokni akinli ka̱, achi tok.
13Mihma Chihowah yʋt Eblaham a̱, Nanta katiohmi ho̱ Salah ʋt, Sa sipokni kʋt ʋlla eshi li pulla chi̱ ho̱, achit yukpa cho?
14Nana kia Chihowah ya̱ i̱ kʋllo kʋt im atampa hinla cho? Nitak ʋlhpisa yʋt ont ai ʋlhpiesa ka̱ aiokcha̱ya he nitak ʋt takanlikmak o̱ falamʋt chim a̱ya li pulla hi oke, mikma Salah ʋt ʋlla nakni yo̱ esha hi oke, im achi tok.
15Yohmi ma Salah ʋt holabit, Yukpa li tuk keyu, achi tok; nukshopa hatuk okʋt. Mihma, Aha̱, yohmi kia ish yukpa tuk oke, achi tok.
16Mihma hatak ash osh yʋmma chieya tuk ʋt wakaya mʋt, Sotom pilla ho̱ pit hopo̱koyo tok: mihma Eblaham ʋt hina fohkit pila chi̱ hosh awant ia tok.
17Mihma Chihowah yʋt, Nana yʋmihchi la chi̱ kʋt Eblaham a̱ in luhmi la chi̱ cho?
18Eblaham ʋt oklushi chito, micha kʋllo hosh toba pullakma, oklushi puta moma yakni paknaka aiasha kʋt yʋmmak o̱ a yukpa hi oka.
19Yʋmmak ash osh im ʋlla ʋhleha ha̱, micha in chuka achʋfa et iakaiya ka̱ im api̱hi̱sakma, Chihowah i̱ hina ya̱ holitoblit aiʋlhpiesa ai atokowa kak o̱ yʋmihcha hi ya̱ ithana lishke; yʋmohmi ho̱ Chihowah yʋt Eblaham a̱ isht anumpuli tuk ʋt im aia̱hlicha hi oke, achi tok.
20Mihmʋt Chihowah yʋt Sotom, micha Komollah ya̱ ishit pa̱ha̱ya kʋt chito, micha i̱ nanashʋchi ʋt weki fehna hatuk o̱.
21Himak a̱ akowa lish, ishit pa̱ha̱ya na ʋm ahanla tuk mak osh a̱hli bieka yomohmi tuk okmá pisa lashke; amba keyu hokmá ithʋna lashke, achi tok.
22Mihma hatak ash osh yʋmma hielit nashuka ya̱ filimmi mʋt, Sotom pilla ha̱ itiachi tok: amba Eblaham ʋt Chihowah itikba ya̱ hikia moma tok.
23Mihmʋt Eblaham ʋt bili̱ka ona cha, Aiʋlhpiesa ak kia hatak haksi aieninchit ishit ish kancha chi̱ cho?
24Tʋmaha holihta anu̱kaka ya̱ aiʋlhpiesa ʋt pokoli tahlapi hosh a̱sha yoba hokmʋno; aiʋlhpiesa pokoli tahlapi kʋt yʋmma a̱sha pulla kak o̱, tʋmaha holihta ya̱ chik apoancho hosh ishit ish kanchi hak inla hinla cho?
25Aiʋlhpiesa ya̱ hatak haksi aieninchit ʋbi, yʋmma chohmi ka̱ chi ahalaia he keyu hoke; micha aiʋlhpiesa ʋt hatak haksi ya̱ itilaua he, yʋmmak okʋt chi ahalaia he keyushke: yakni moma Nan im apesa yʋt aiʋlhpiesa kak o̱ yʋmihcha he keyu cho? achi tok.
26Mihma Chihowah yʋt Sotom a̱ tʋmacha holihta anu̱kaka ya̱ hatak aiʋlhpiesa pokoli tahlapi ho̱ ai ahayuchi likmʋt, yʋmmak atuk pulla mak o̱ tʋmaha holihta ya̱ mominchit apoanchi la chi̱ hoke, achi tok.
27Mihma Eblaham ʋt afalamichit, Yakeh, himak a̱ lukfi pushi, micha hituk chubbi ak o̱ sia hakinli kia Chihowah ya̱ im anumpulit pisa lishke:
28Aiʋlhpiesa pokoli tahlapi kash tahlapi hosh isht ik ono yoba hokmʋno, tahlapi hosh ik ono ma, tʋmaha holihta ya̱ mominchit okpʋnit ish kancha hinla cho? achi tok. Mikma Pokoli ushta akucha tahlapi ho̱ yʋmma ai ahayuchi likmʋt, okpʋnit kanchi la he keyushke, achi tok.
29Mihma anonti im anumpulit, Pokoli ushta hosh yʋmma a̱sha yoba hokmʋno, achi tok. Mihma, Pokoli ushta hatuk pulla mak o̱ yʋmihchi la he keyu hoke, achi tok.
30Ikikkeh, Chitokaka yʋt ik a nukhobelo kashke, mikma anumpuli lashke: Pokoli tuchina hosh yʋmma a̱sha yoba hokmʋno, achi tok. Mihma, Pokoli tuchina ho̱ yʋmma ai ahayuchi likmʋt, yʋmihchi la he keyu hoke, achi tok.
31Mihma, Yakeh, himak a̱ Chihowah ya̱ im anumpulit pisa lishke: Pokoli tuklo hosh yʋmma a̱sha yoba hokmʋno, achi tok. Mihma, Pokoli tuklo hatuk pulla mak o̱ okpʋnit kanchi la he keyushke, achi tok.
32Mihma, Ikikkeh, Chitokaka yʋt ik a nukhobelo kashke, mikma himakma himonna illa ho̱ anumpuli lashke: Pokoli hosh yʋmma a̱sha yoba hokmʋno, achi tok. Mihma, Pokoli hatuk pulla mak o̱ okpʋnit kanchi la he keyushke, achi tok.
33Mihmʋt Chihowah yʋt Eblaham a̱ itim anumpulit issa mʋt ia tok: mihma Eblaham ʋt falamʋt aiʋtta ya̱ ona tok.
Published by the American Bible Society 1848-1886, reprinted 1913
