Matta 7
7
Ɓe hwun aa ɓashidə imi
(Luka 6.37,38,41,42)
1“Ɓe hwunaa ɓashidə imi, sə mgban myaa dɨ ɓashidəwnə. 2Gə ka wule ɓashite hwuna dɨ ɓashiyə ɓwaare, sə mgban ka wule ɓashitɨngɨn mya ɓashiyəwnə, gə wule sə-kənshe hwuna dɨ kənə ɓwaare shee kan, ka wule sə-kənshingɨn mgban mya kənəwnə.
3“Ɓə ya hye dɨ naa kiɗəte a diitɨ kpeyəsa, tee naa gbɨlə kada a diisa? 4Hye ɓa ɗa ya hye sa kpeyəsa atɨ, ‘Wa, na dɨɗəwgə kiɗəte a diisa,’ a hye, hyenə nza ka gbɨlə kada a diisa? 5Hye nzə-kwakpeye, tiya ka nanga, dɨɗagə gbɨlə kada a diisa mbəə, də hye ɓa shea naa haa pepe hye ɓə dɨɗagə kiɗəte a diitɨ kpeyəsa.
6“Ɓe hwunaa por shee ɗəmɗəm a və sakye, təna shea virwa a sərtəwnə nyatak-nyatak. Ɓe hwunaa kəjidə fare fawne dəwnə a humwa gusune. Hwun kana ɗaasə, tən ɓa gbaa ka mbwayingrən.
Nyisəm, ɨləm, kwaləm haa
(Luka 11.9-13)
7“Zə nyisəm, mya vəwnə. Ɨləm, hwun ɓa ɗɨmə. Kwaləm haa, mye ɓa wunəwnə a kwa-haa. 8Gələ ma nyishi kat, mye ɓa vən, ma ɨli, ɓa ɗɨmə, ma kwal-haa, mye ɓa wunan a kwa-haa. 9Ɓə wonə a vorsəwnə, a ma nzəngɨn ɓa nyisən buroditə, nda vən fara? 10Naasə mgban, wonə ma nzəngɨn ɓa nyisən vaake nda vən nzə-mgbəndye? 11Anda hwun myee hwun mi hashi, hwuna kwaa lee vətə və jingəwnə həmte pepe, sə mgban mbak-mbak Baagəwnə arə a vor pwa ɓa və myee dɨ nyisən həmtɨ pepete wula pɨri. 12Shee kat hwuna dɨ mwo atɨ ɓwaare a ɗəwnə, hwun mgban, hwuna ɗarən sə. Sɨnə naarə la ɓashita Musa ka kpalye da Həmɨnpwa a dɨ boyo.
Kwatɨfə gungulunge
(Luka 13.24)
13“Zə koɗəm dɨ kwatɨfə gungulunge, hwuna pɨrəsə. Gəkɨlə kwatɨfa dɨ muɗi zə ka ma a wa kaaru-kaaru nə bwang, tɨfəngɨn mgban nə piili-piili, ɓwaare hananang nə dɨ koɗi sə. 14Shezə kwatɨfa dɨ zə haa ɗɨm myentə nee gungulung, tɨfa dɨ zə də nee 'wi-'wi. Myee dɨ koɗi dɨ kwatɨfəngɨn aa furo.
Kada ka mbosən
(Luka 6.43-45)
15“Bəmdə myensəwnə ka kpali jeronye. Təna dɨ shi hakəwnə ka sɨlarə mbage, shezə a voti tən alehawyi hashi. 16Hwun ɓa leetɨrən dɨ ha mbwosərən. Ɓwaare aa dɨ tawa mbwotɨ rɨnne dɨ sɨtɨ kada ruwe, myaa dɨ tawa mbwotɨ nggwale mgban dɨ sɨtɨ kada hwole. 17Sə gən, kada pepeye mbwosən ɓa wula, kada hase mgban mbwosən aa dɨ wula. 18Kada feme, mbwosən aa dɨ hasə, sə mgban kada hase, mbwosən aa dɨ wula. 19Kadaa kat mbwosə aa wula, mya ɗawgən a ɗongə ɗiye. 20Gə-angɨn mgban hwun ɓa leetɨrən dɨ ha mbwosərən.
21“Aa kat ma dɨ boyi ka kwaamɨngɨn atɨ, ‘Həmɨmiye, Həmɨmiye nə,’ ɓa pɨrə həmnə pwa, myee dɨ koddə kanata Baagi gaarə a vor pwa nə ɓa pɨrə. 22A fərəngɨn ɓwaare hananang ɓa se atɨ, ‘Həmɨmiye, Həmɨmiye, hinaa kpalə vor kwakɨnga a dɨmdə pɨle ji-dwatə a vor kwakɨnga, a vor kwakɨnga mgban hina ɗa shikoshopye hananang?’ 23Də hɨn ɓa sarən bwang atɨ, ‘Taa ndaga lerəwnə. Təkəməsə ke, muɗəm sɨrə a hwun ji-ɗa səhase.’
Ma gɨme ka nzə-lele
(Luka 6.47-49)
24“Gə-angɨn ma kat dɨ kɨl ləməgye de, dɨ koddərən, sɨnə ɓətɨ nzə-lela nwo hwodan a nə fara. 25Ɓoole a njima, haɓye a shi, pəltə a bə, hawe a tuwa a lyeb nə hwoɗingɨn, kat ka angɨn hwoɗingɨn aa fukə, gəkɨlə mya kwak mgba hwoɗingɨn a nə fara. 26Ma mgban dɨ kɨl ləməgye de ndaawa koddərən, sɨnə mye ɓa kanarən ka ma gɨma nwo hwodan a nə tiye. 27Ɓoole a njima, haɓye a shi, pəltə a bə, hawe a tuwa a lyeb nə hwoɗingɨn, təna fukə gurum a fələ.”
28Ite Yesu a byelə a mbəə, təkə-təkətɨ ɓwaaree kɨltən a ɗa ndəle ka wule kəndəshe dan, 29gəkɨlə nda kənərənshe ɓətɨ ma ka gətə kan, aa ɓətɨ hɨnggə ji-lee kəndə ɓashita Musa nə.
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
