Marcos 3
3
Nai Jesus fun kode artuub iid, nii leolbaan Sabdu
(Mateus 12:9-14; Lucas 6:6-11)
1Nii leolbaan sabdu kiid, Jesus suil siil laa nii uum kreda. Nii uum kreda lala, Ura fei artuub iid ni lima seri mate. 2Nii hati kidura meit nei roo seir nae bael saal naha nee sala la Jesus. Room fei bak-bako Jesus, oid nae taad Ura naha fun kode artuub idura nii leolbaan Sabdu, ka tais.
3Toom maa, Jesus haah artuub iid lima seri mate too, dega, “O maa mrii nii uri.”
4Ura meit tuuk la roo hailagaa, “Tuir iit lei relijiaun, iit leob fun sabiid nii leolbaan Sabdu? Iit leob fun naam kode, ka naam klao? Iit fun kode la roo ka, loet roo?” Mahee room hailagaa noto lea.
5I Jesus ni hua-lala muit tustus, deslaa room anoin oid fun tuir lea fee room lei, i room ba anoin roo lima seri mate too. I Jesus fei room hailagaa meit i bruis. Toom maa Ura ruu artuub too, dega, “Alool o lima maa!” Artuub idura lool ni lima i ura ni lima kode enene. 6Meit telo ura, roo Farizeu room sai telo ois uum kreda lala. I room la deo-loor nor partidu Erodes ni, oid nae saal la loet Jesus.
Nai Jesus fun kode roo rini nii taes gugu
7-8Toom maa, Jesus nor ni eskolanti room laa siil nii taes gugu Galileia. Roo rini fliik soub sabiid fee Jesus fun. Des manura fee roo rini maa daas aldeia-aldeia oid toom Ura. Room maa ois provinsia Galileia, Judeia nor Idumeia. Roo seir maa ois sidadi Jerusalem, Sidon nor Tiru. I roo selu des maa ois sloog Jordaun ni seri leol-sae. 9Deslaa roo rini tustus, Jesus ruu Ni eskolanti room laa nae bero iid, oid Ura leob sae nii bero lala oid noir, manura roo ba leob seen-loor nor Ura.
10Deslaa Jesus fun kode soub artuub moras rini, manura fee agora roo moras hailagaa krau-loor naha een Ura, i manura room leob kode siil.#Marcos 4:1; Lucas 5:1-3 11Nii hati kidura nei roo bae fee espiritu klao room tafae nii room hua-lala. Arfiil espiritu klao room fei Jesus, room fun roo seirgaa mou ta ahe la rae nii Jesus ni ahe. I espiritu klao room kriis dega, “O uri, Nai Maromak ni Ana didi!”
12Mahee Jesus baud makaas room dega, “Iim ba leob tafaar la roo enlaa seen fee Au.”
Nai Jesus loi ni apostlu ubu saguul-resi-ruu
(Mateus 10:1-4; Lucas 6:12-16)
13Faklau telo, Jesus sae la nii rae lau kiid. Ura haah roo seir bae fee mou nii Ura ni hua-lala. I room meit maa la Ura. 14Toom maa, Ura loi roo ubu saguul-resi-ruu. I Ura dega la room, “Au loi iim oid sai Au apostlu room nor lolai futu nor Au. Au meit hii ruu iim laa nee sai Nai Maromak ni Teor-hua Kode la roo selu. 15I Au hii nee kbiit la iim oid toeh sai espiritu klao ois roo hua-lala.”
16-19Room ubu saguul-resi-ruu too, room gala, fee:
Simão (iid bae fee Jesus nee gala, Pedro),
Tiago,
João, (Tiago ni kau. Room ubu ruu, Zebedeu ni ana. Jesus fois room gala ‘Boanerjes’, ura dega ‘man toon ludu’.)#3:16-19Eskritura tero Gregu hlai dega, ‘toon ludu ni ana’, idura dega, ‘hahalok man fee toon ludu’. Biblia matenek ubu seir anoin dega, Tiago nor João room tero makaas man fee toon ludu, ka, arfiil room bruis man fee toon ludu.
Andre,
Filipi,
Bartolomeu,
Mateus,
Tomé,
Tiago, (Alfeu ni ana),
Tadeu,
Simão (ura toom partidu Zelote)#3:16-19Partidu Zelote too nae saal la roo Judeu room sai ois estadu Roma ni ukun, oid ukun lolo. Partidu idura meit gala, ‘Patriota’.
nor Judas Iscariotes (ura fee seo Jesus la roo klao seirgaa).
Mestri room enlaa lei Judeu ni nee sala la Nai Jesus dega, Satanaas fee nee forsa la Ura oid toeh sai espiritu klao
(Mateus 12:22-32; Lucas 11:14-23; 12:10)
20Faklau telo ura, Jesus nor ni eskolanti room duu siil ois rae lau too maa, i room laa tafae nii uum iid. Mahee roo rini maa duuk Ura, fun Jesus room ba nei tempu la aa. 21Arfiil Jesus ni familia room fliik manura, room maa naha huu Ura oid suil, deslaa room dega, “Iim fei kook Jesus. Ura ni anoin lako meit.”
22Nii tempu kidura, mestri room enlaa lei Judeu ni maa ois Jerusalem. Mestri room kase ba doloo la roo seirgaa, dega, “Fliik maa! Satanaas bae fee roo haah Belzebu, tafae soub heer Jesus ni hua-lala. Belzebu fee tuu i ukun espiritu klao room, ura fee nee kbiit la Jesus oid toeh sai espiritu klao room.”#Mateus 9:34; 10:25
23Jesus fliik manura, Ura meit haah room hailagaa, oid tafaar la room nor lela-teor iid, “Ba tafae ni iit ulu hatu! Fun mansaba Satanaas leob toeh siil ni eta lolo rasik! 24Se nei reun iid ura ni povu room aloor, reun idura ba tama. 25I se familia nii uum lala kiid sii loor, familia kidura ba tama. 26Manura meit Satanaas, arfiil ura kontra ni eta lolo rasik, room baskari, i afo.”
27Se artuub iid naha maa fnao naam seir nii artuub forti kiid ni uma, ura tenki eis muun telo artuub forti ura laed. Toom maa, hina leob huu ni namo.#3:27:Manura, Jesus nee sai dega, Jesus forsa reis diaub, bae fee room adada haah ‘Belzebu’.
28Des manura, Au tafaar enene la iim: se roo fun sala ka kase klao artuub selu, Nai Maromak prontu amoo ura ni sala seirgaa. 29Mahee se roo kase klao enlaa Nai Maromak ni Espiritu Santu, Maromak ba amoo ura ni sala, i ura hii ba eot perdaun raat toon la toon.”#Lucas 12:10
30Jesus dega manura, deslaa roo seir dega, “Artuub iduri, espiritu klao tafae nii Ura ni hua-lala.”
Seen fee fun tuir Nai Maromak ni akar, room ura fee, Nai Jesus ni familia doloo
(Mateus 12:46-50; Lucas 8:19-21)
31Idura faklau telo, Jesus ni ina nor ni kau room maa nii uum idura, naha asour Ura. Raat nii uum, room mrii lea nii hooh, i room ruu roo laa haah Jesus. 32Nii leolbaan idura, Jesus medei kase bael nor roo rini. Roo seir tafaar la Jesus, dega, “Am-Nai! Iit Tuu ni ina nor Iit Tuu ni kau room her bael hooh. Room akar asour Iit Tuu.”
33Mahee Jesus ataan la room dega, “Seen fee Au ina, i seen fee Au kau room?”
34I Jesus fei la roo seir bae fee medei hleu bael Ura too, i dega, “Iim sergia fee Au ina nor Au kau doloo. 35Deslaa seen fee fun tuir Nai Maromak ni akar, room seirgaa fee Au ina, Au kau nor Au tofoo doloo.”
© 2023 Wycliffe Bible Translators Inc
