เลห 5
5
ลอง อาโมวแซ ฆาย อาโรน ฮาว โดง กอย คูนดีคัม
1วาย อัน ตี อาโมวแซ ฆาย อาโรน ฮาว ฌัม โดง กอย คูนดีคัม พาโรว. ฆาย ต็อห ดี คูนดีคัม, “เฌาพรา อี มูห เฌาพรา ปี กรึบ เฆ ดูอี อีซาเรลัะ, อัน ต็อห ดี แม, ‘แม โลว ควาง อาโมยว ดูอี โอว แตห เฆ ฮาว เลห แคง มืง แม, เลห ฮาว แคง แปร ง็อง แตห เฆ ปึอน ดี โบง บลอย กรึบ โอว.’”
2คูนดีคัม พาโรว ยี ต็อห, “เฌาพรา ปี ต็อห บาย, อาเซ อัน มูห? เหมา อึณ ปาย ปี โลว โอว โทม ปี จัร อัน? เหมา อึณ ปาย ปี โลว โอว ควาง เฆ ดูอี อีซาเรลัะ ฮาว เลห แคง มืง โอว? โอว ตู นับ เฌาพรา ตี. โอว ตู แตห เฆ ดูอี อีซาเรลัะ ฮาว ดอ เหมา.”
3ฆาย วี ต็อห, “เฌาพรา ปี กรึบ เย ดูอี แฮแบร, อัน แฮะ ตัห ฌัม โดง กอย ยาย. โคว, ยาย หมาณ แตห แม แตห เย ฮาว แคง แปร ง็อง, ฮาว โดบ อึณเตณ อาดา โอย ซีแง, แตห เย ปึอน ดี หลู ปี ดี โลว หลู เย ดี เฌาพรา ปี กรึบ เย. เซ เย ตู โบง ปาย ตี เย โยว เฌาพรา ดี แตห เย ยัม ดี เซา รอฆา. เย บอ โยว เฌาพรา ดี ง็อห แวน เย, แตห เย ยัม ดี มาปัวะ ลาง.”
4-5คูนดีคัม วี ต็อห, “อึย อาโมวแซ บาย อาโรน, ปี โบง บาย อึณ แตห เฆ ดูอี ตู โบง ซีคยา ฆาน ปี โลว โบง เฆ. เฆ ดูอี อาโมยว บาย, เฆ แฮะ แบร, แฮะ กืน กาเซา. บาย ยี กาซูห เฆ, แกวะ ฮู แตห เฆ โบง ฆาน เฆ. บาย ฮาว เวณ ดอ ตี นี, แตห เบ บอกาเฆลียด โบง ฆาน เบ.”
6อึณ ยี มึห ดูอี อี อึบ ดูอี อี รัณ ฆาน, อี มูห ดูอี แอฆึบ. อึณ บอ มึห เฆ ดูอี แยต รัณ ฆาน อี มูห ดูอี อีซาเรลัะ. วาย แฮะ ฮอต เลห อาโมวแซ ฆาย อาโรน โดง กอย คูนดีคัม ตึอน, คูนดีคัม วี แดะ เฆ ดูอี อี อึบ ดูอี อี รัณ ฆาน บอ เฆ ดูอี อี แยต รัณ ฆาน ตึอน, แตห เฆ ตัห ฌัม โดง กอย อัน. 7อัน ต็อห ดี เฆ, “จูห ปูง อาตึร นี, ดอ โบง เฆ มาอูด, แกวะ ฮู ดัว เหรียง ดี เฆ, แตห เฆ บอ ฮาว เหรต ราง เฆ เหรียง ปี โลว เฆ, แกวะ แตห เบ จอย มาเซ. 8เบ ยี โลว จัร เฆ โบง มาว มาอูด แคะ ปี ดึอม โลว เฆ โบง. แกวะ แตห อึณ โยม ปี โลว โบง เฆ ดอ เหมา. โคว, เฆ มูห หมาย อี โบง ฆาน ตี. เฆ ยี แฮะ กราน. เฆ แฮะ หมาณ แตห เฆ เลห ฮาว, หลู ดี เฌาพรา ปี กรึบ เฆ. 9เบ โลว แตห ฆาน เฆ กืน หลึอม คา อาต. แกวะ แตห เฆ ดัน โทม โฆรห ปี กาโลว ดูอี เฮา ดี เฆ.” 10คูนดีคัม แฮะ ฮอต กาลาง โฆรห ตี, เฆ ดูอี อี อึบ ดูอี อี รัณ ฆาน บอ เฆ ดูอี อี แยต รัณ ฆาน, เฆ มืร เลห, กาลาง โฆรห ปี กาลาง คูนดีคัม พาโรว ดี เฆ, แตห เฆ ดูอี บอกาเฆลียด ปึอน ดี โทม. เฆ ต็อห, “คูนดีคัม พาโรว ตู วี ดัว เหรียง ดี เบ, แตห เบ ปึอน ดี โบง มาว มาอูด. 11อัน จัร เบ ฮาว เหรต ราง เบ, แตห เบ เหรต โดง อี มึห เหรียง ปี โลว เบ ตี. อัน ยี ตู แตห เบ รัณ โยม ฆาน. โยม คอ อี แจก มืร, อัน ตู แตห.” 12ปัน ตี เฆ ดูอี บอ โลว ฮาว วีน ดี แล แคง มืง บอ มืง, แตห เฆ เหรต ดัง เหรียง ปี โลว เฆ, แตห อึณ กาดาง เหรียง ปี ดึอม ตา เฆ. 13เฆ ดูอี อี อึบ ดูอี อี รัณ ฆาน, เฆ บอ คาหนาบ ดูอี อีซาเรลัะ. จัร เฆ โบง แคะ ปี ดึอม โลว โบง เฆ. เฆ ต็อห ดี ดูอี อีซาเรลัะ, “แตห เบ โบง แคะ ปี ดึอม ปึอน เบ ดอ แฮะ มึห เบ เหรียง. แกวะ แตห มาว มาอูด โยม.” 14อึณ บอ มึห ดูอี อี แยต รัณ ฆาน ปี ดาง เฆ ดูอี แอฆึบ. ดูอี เฆ ตี, เฆ บอ กาดูห ดูอี แอฆึบ มัห เฆ. เฆ ดูอี แอฆึบ บอ ต็อห ดี เฆ, “บอ อาหมึร บอ อาตึร เบ ตู โบง มาว มาอูด แคะ ปี โลว โบง เบ. เหมา อึณ ปาย ปี โบง เบ แตห อึณ โยม โลง?”
15ปัน ตี เฆ ดูอี อี แยต รัณ ฆาน ตึอน, เฆ บอ ฮาว ฌัม โดง กอย คูนดีคัม พาโรว. เฆ วี ต็อห ดี อัน, “มาเซ ปี โบง แม ดี เย ดูอี อี แฮะ แบน หมาย แม นี? 16เย อาว ฮู ปึอน เหรียง ปี คา อาต. เฆ ยี จัร เย โบง มาว มาอูด แคะ ปี ดึอม โบง เย. เฆ ดูอี อี อึบ เย, เฆ บอ มัห เย. อึณ ยี ตู มูห หมาบ เย. อึณ มูห หมาบ เฆ ดูอี อึบ. เฆ คาหนาบ เย โบง แคะ ตู แป หมาย แม โบง.”
17คูนดีคัม พาโรว วี เวียะ โฆรห เฆ ตี. อัน ต็อห, “อาว มูห, เบ ตู คัม ดี โบง. ยี มูห, เบ กราน ดี โบง. โคว อัน ตี, เบ แฮะ ดัน ดี หมาณ, แตห โอว ควาง เบ เลห ฮาว หลู ดี เฌาพรา. เซ เบ ตู กราน เบ ตู ดัน ดี เฌณฌา ฌึร ตี. 18โอว ตู วี จัร ดูอี แตห เฆ วี ดัว เหรียง ดี เบ. เบ ยี โลว โบง มาว มาอูด แคะ ปี ดึอม โลว โบง เบ. อาว ปึอน แตห อึณ โยม. ฮาว, เบ ฮาว, โบง แคะ ปี จัร ดูอี อี อึบ เบ โบง.”
19เฆ ดูอี อี โลว แยต รัณ ฆาน ตึอน, ดอ โทม เฆ โฆรห ปี กาลาง คูนดีคัม ดี เฆ, เฆ บอ นับ, เฆ แฮะ กาดูห ดูก ตาง หลึอม คา อาต. คูนดีคัม แฮะ ต็อห ซีคยา ดี เฆ, เฆ โลว โบง มาว มาอูด แคะ ปี ดึอม โบง เฆ เซเซ. 20เฆ แฮะ ฮอต เลห โดง กอย คูนดีคัม พาโรว ตึอน, เฆ วี ยึร อาโมวแซ ฆาย อาโรน. ฆาย แฮะ หน็อะ เฆ วี ตัห ฌัม โดง กอย ฆาย. 21เฆ วี ต็อห ดี อาโมวแซ ฆาย อาโรน, “เฌาพรา โลว ซูงพยาด อามู ตี. แตห อัน ดัม หมาบ ดี บาย. บาย แฮะ โบง แตห บอ คูนดีคัม บอ เฆ อามู อามาด อัน รู ดี เย. บาย แฮะ โบง แตห เฆ ดี บอ ดึห มาปัวะ ลาง เฆ, แตห เฆ ง็อห ยัม เย บอกาเฆลียด.”
22อาโมวแซ วี ฮาว ซาคึร ดี เฌาพรา อู เฌณ. อัน ต็อห, “อึย แม เฌาพรา, เหมา อึณ ปาย ปี ดัว แม ดูก ตาง ดี ดูอี เฆ นี? เหมา อึณ ปาย ปี ตึย แม ดี โอว, แตห โอว จอย ดูอี เฆ นี? 23อู ซีณ ดอ ฮาว โอว โดง กอย คูนดีคัม พาโรว, กาลาง โฆรห แม ดี อัน, อัน แฮะ ดัว ดูก หลึอม คา อาต ดี เฆ. แม ยี ตู โบง มาเซ ปี ดึอม กาลาง แม แตห เฆ ดูอี เลห แคง ดูก ตาง ปี กาดูห เฆ.”
© 2021, Wycliffe Bible Translator, Inc. All rights reserved.
