Matyu 4
4
Satan tok Yesus
(Mak 1.12-13 e Luk 4.1-13)
1E Ano Itau mgo ke Yesus ke omur ka dong adai vala ma Satan tok iye. 2Yesus dong oklou epmes isapanal e ngen ngangon kovok e sapanga due. 3E gute tonari ka waiki tok iye me wai ke iye langane. “Langka wom Ida Tapolngon Otno Arang amwai ke opmu ane ma tipolou bret.” 4E Yesus koli wai langane. “Gute sogo Ida Tapolngon ila pelengon palma langane.
‘Osep tidong e tidue urok mosongon ke bret vala kovok. Aurou. Ida Tapol-ngon ila pelengon ma kar urok mosongon ke isak.’”
5Deka Satan paur iye la ke Jerusalem e due dong ke Ida Tapolngon ila ninu tona ka egim lokono. 6E wai langane. “Langka wom Ida Tapolngon Otno Arang omkopiuk omduru kesua gute sogo Ida Tapolngon ila pelengon palma langane.
‘Iye wai ke ila ensel ma tiplau wom.’
E pelengon palma silang langane.
‘Ma tikalke wom ke limsak ma kevep napar ke opmu kovok.’”
7E Yesus koli wai langane. “E gute silang sogo pelengon palma langane.
‘Ma omtok Ngap Puda ka Ngap Tapolngon kovok.’”
8Deka Satan paur Yesus ke gigri ka tito lokono e nis iye ke omur ka pula keniye ke taklak e nis iye ke wan ka itau lokono ka tidong ke omur tonari. 9E Satan wai langane. “Ma ngakar wan ka pula keniye ka amvati ke wom langka omgrum kevep e omlotuim ngong.” 10Deka Yesus koli wai langane. “Satan amla. Kesua gute sogo Ida Tapolngon ila pelengon palma langane.
‘Omlotuim Ngap Puda ka Ngap Tapolngon e due ila bokongon vala.’”
11Deka Satan songon iye e ensel me tilua iye ke ngangon e langane.
Yesus nogrum ila bokongon ke omur Galili
(Mak 1.14-15 e Luk 4.14-15)
12Mase iye klingen omon osep tidue Jon sep ke kalabus deka iye songon omur are e la ke omur Galili. 13Iye songon Nasaret e polou ke armok Kaperneam. Kaperneam dong olwo boto ke misuon ke omur Sebulun e omur Naptali. 14Iye due elio ane ma pelengon ke gute napaprangan ina Aisaia wai ine polou lokono. Aisaia wai langane.
15“Omur Sebulun e omur Naptali tidong olwo boto ke misuon e tidong ke aki Jordan burla. Omur Galili ka osep ka isak osep Yuda ina kovok tidong ine. 16Osep ka tidong ke aivoro tivati bublongon omba e osep ka tidong langka ansak timete bublongon omba polou ke isak.”
Yesus rere osep apanal ma tididi iye
(Mak 1.16-20 e Luk 5.1-11)
17Alo ari Yesus nogrum e napapra langane. “Umabauluk aitno lumu ke lumu elio epmes ina kesua omur ka Ida Tapolngon plaue isuk boto polou.”
18Oklou kene iye lila ke elim Galili ina dingen batne. E iye vati osep orwo Saimon ka angaine silang Pita e ina tovro Andru. Tiuri omdu lodu ina ke misuon kesua urok bokongon tikngo lodu. 19Yesus vati isak e wai ke isak langane. “Umedidi ngong e langka oku ane umoboko ma umodue lodu ma ngaparere umu ke elio ka mase ma umodue osep tididi ngong.” 20E lokono tisongon urok omdu e tididi Yesus. 21Yesus lila la e iye vati osep leklou. Gute Sebedi kap titno Jems e Jon. Tidong ke bot kap pmarak Sebedi e timosi urok omdu lodu ina. E Yesus gi ke isak. 22Iye gi ke isak deka lokono tisongon pmarak ke bot e tididi iye.
Yesus wai pelengon e lua osep ka tipaia
(Luk 6.17-19)
23E Yesus lila lelei ke omur Galili e parere osep Yuda ina ke urok duningen ina ninu. Iye napapra omon itau ka la ke omur ka Ida Tapolngon plaue. E iye due osep ka tipaia ke paiangan bitna bitna e osep ka pampamu lisak soulu tipolou itau blang. 24E omon ke wan ka Yesus due la ke provins Siria ka pula keniye. E osep tikalke osep ka wan sasi due isak ke iye. Langka osep ka paiangan bitna bitna due isak e osep ka tarna lisak doro doro e osep ka angelo soulu due isak e osep ka tipaia e tigene e tinakarkar adai e osep ka kamsak e limsak timete. E Yesus due osep tonari tipolou itau blang. 25E osep pula pula ka tidong ke omur Galili e omur Dekapolis e omur Judia e Jerusalem e ke aki Jordan burla tididi Yesus.
copyright 2003 New Tribes Mission, Sanford, FL 32771
