Pomulanya 9
9
Sarita Tempo i Pue Allah Mangika Parajanji Resi i Nuh
1Wali roo see i Pue Allah mampakasanang katuwu i Nuh pasi ananya, Ia manganto’o, “Kasimesemo danakaboros muni tau see wiyaa ngkomi damaroo ri sambawo lino. 2Pasi yako tempo si’i samparia anu to tuwu manosa Aku mansarumakaka resi komi see komi semo to mangkuasang. See naka samparia binatang dasakarongko saba meka mangkita komi. Pasi ewa see seja samparia tonsi, pasi anu to tuwu to mandonggo pasi to manjoyo ri wawo ntana, pasi bau, kasamparianya etu paka dameka kojo resi komi saba komi semo to mangkuasang.
3Pasi samparia to etu Aku mangawaika resi komi damawali seja pangkonimu. Ane tempo ruyu, tempo etu ojo anu to tuwu to maira pasi to mawua to Kuwaika komi darakoni, pei si’i-si’i Aku mangawaika komi mangkoni samparia anu to tuwu. 4Pei ne’e mangkoni wombo nu binatang to tiroowa re’e raanya, apa raanya etu semo pu’u ngkatuwunya#Ayat 4 Naka pei raa nu binatang etu rato’oka pu’u ngkatuwunya apa ane tamore raanya, binatang etu taa maya tuwu. Pasi ewa see seja ane tau.. Wali see naka ane mansambale yau binatang, biaka ruyu naka tisi raanya panewa roo see maya rakoni wombonya.
5-6Wali ane binatang etu, maya nupopate yau ngkomi darakoni. Pei ane yunu ngkomi to lino, ne’e mampopate yau, apa to lino inikangKu sewaju ta’anya ewa lengkengKu, wali bae wo’u angganya pei binatang. Wali see naka ane re’e tau to mampopate yau yununya, ane ewa see tau etu darahuku mate panewa danapopate yau nsa’e. Pasi ane binatang to mampopate tau, binatang etu darahuku mate seja. Etu semo porentangKu resi komi.”
7Roo see Ia manganto’oka wo’u sira, to’oNya, “Wali ane komi, Aku Kuporani komi kasimesemo danakaboros anamu see yako etu kanjo’u-njo’u kaboro-boros wiyaamu to maroo ri sambawo lino.”
8Wali ojo karoonya i Pue Allah manganto’oka i Nuh pasi ananya gombo to etu, Ia manganto’oka wo’u sira, to’oNya, 9“Si’i-si’i Aku mampakaroso parajanjingKu resi komi, pasi resi wiyaamu, 10pasi resi samparia anu to tuwu to re’e ri lino, etumo tonsi, binatang to yole pasi to maila, pasi songonya to masuwu yako ri raya nu bangka bae sangkani-ngkani pei komi. 11Wali si’i semo parajanjingKu resi komi: Yako ri tempo si’i, Aku tamo damampakaja’aka yau samparia anu to tuwu mangampake samal ue. Wali tamo kojo damawali samal ue to damampakaja’aka yau lino. 12-13Pasi Aku mangika tondong to damampatiendoka komi mangkonong parajanjingKu etu. Tondong etu, etu semo pinuraingKu to Aku mamposaka ri limu. Wali tempo komi mangkita pinurai etu, komi damangendo wo’u parajanjingKu resi komi pasi resi songonya anu to tuwu sindara-ndara pei komi si’i-si’i, pasi resi samparia wiyaamu rataka ri singkasaenya. 14Wali tempo Aku mangaba’aka limu lino si’i pei pinurai miyala ri limu etu, 15-17batuanginya Aku taa mangkalingan parajanjingKu resi komi pasi resi songonya anu to manosa mpangaya-ngaya. Apa tempo Aku damangkita pinurai ri limu etu, Aku damampobuuka muni parajanji to singkasaenya etu to Aku mangika resi samparia anu to tuwu ri lino. Wali see naka tamo re’e samal ue to damampakaja’aka yau samparia anu to manosa. Wali pinurai si’i semo tondong mparajanjingKu anu Kuparajanjika samparia anu to manosa ri lino.” Etu semo gombo i mPue Allah tempo Ia mangika parajanji resi i Nuh sira sana.
Sarita Mangkonong i Nuh Pasi Ananya
18Wali ana i Nuh to masuwu yako ri raya nu bangka bae etu sanganya i Sem, i Yapet, pasi i Ham. I Ham etu, ia mawali pa’a i ngKana’an. 19Wali tau togo etu, sira semo ngana i Nuh. Pasi samparia tau ri sambawo lino si’i, kasamparianya paka wiyaa ntau togo etu.
20Wali yako etu i Nuh mawali to ponawu pei mampomuya anggur nja’u nawunya. 21Wali tempo wua anggur etu matasam, ia mangoko pei mangika tule anggur. Yako etu re’e seore ia manginu tule anggur etu pei mawali kayangu. Tempo ia kayangu etu ia malambe yau panewa maturu ri raya ntendanya. 22Wali yako etu i Ham, pa’a i ngKana’an, ia masua ri raya ntenda i Nuh pei mangkita kalambe mpa’anya. Ojo pangkitanya etu ia yau mangansaritaka tukakanya ri sambali ntenda. 23Wali i Sem sira dua i Yapet mamposabi sanja’i ronto, panewa sira malinja mpayu masua ri raya ntenda yau mangabombong pa’anya lambe etu. Lio nsira tondo ri wombo see taa damangkita kalambe mpa’anya etu. Wali sira dua mangabombongika ronto pa’anya etu panewa masuwu muni yako ri tendanya.
24Wali yako etu i Nuh mangendo muni pei masilonga muni pampobuukanya. Tempo etu re’e tau to mangansaritaka resi ia mangkonong palaong to nawali tempo ia kayangu etu. Wali ojo pandonge i Nuh palaong to naika i Ham, ana leinya etu, resi ia, 25ia masusa kojo rayanya. Wali see naka ia mangantanaa yau i Kana’an, ana i Ham, ia manganto’o, “I Kana’an daratanaa yau. Ia damawali to papolaong i nSem sira dua i Yapet, pei ia semo to papolaong nsira to kodi kojo angganya.”
26Roo see i Nuh manganto’o wo’u, “Barongi i Pue Yawe, etu semo Allah to napue i nSem! Aku mamporapika resi Ia see i Kana’an damawali yau to papolaong i nSem.
27“Pasi kuporapika seja resi i Pue Allah see kanjo’u-njo’u tiduga-dugang tana to nakaroos mbiyaa i Yapet. Pasi aku mamporapi seja see wiyaa i Yapet etu damaroo masingkatao pei wiyaa i nSem ri tempo to darata. Pei ane i Kana’an, kuporapika resi i Pue Allah see ia damawali yau to papolaong i Yapet seja.” Wali ewa wetu gombo i Nuh.
28Wali yako karoonya samal ue, i Nuh ia datogo atuwa pei lima mpuyu nto’u kasaenya ia tuwu. 29Wali i Nuh ia sio atu pei lima mpuyu to’unya panewa ia mate.
© 2018 New Tribes Mission, Sanford, FL 32771-1487, USA.
Printed in the United States of America