Pomulanya 15
15
Sarita Tempo i Pue Allah Mamparajanjika i Abram Mangkonong Ananya
1Wali yako etu, re’e seore i Pue Yawe mampogomboka i Abram ri raya mpangkitanya, i Pue Yawe manganto’o, “Ne’e meka Abram, apa Aku mangararamaka korom ewa naika ngkantar mangararamaka tau tempo yau mamusu. Pasi Aku damangawaika korom ntanapa to bae kojo.” Etu semo gombo i mPue Yawe resi i Abram.
2-3Pei i Abram mangansono, ia manganto’o, “O Pue Yawe, Allahngku, tare batuanginya anu to daNuwaika ngKomi aku etu, apa Komi tare mangawaika aku ana. Wali tamo masae aku damate yau taa riana, see naka ojo to papolaongingku, i Elieser yako kota Damsyik, ia semo damangantima panta pasi kasugingku.” Wali etu semo gombo i Abram mangansono i Pue Yawe.
4Pei yako etu i Abram mangandonge wo’u loo i mPue Yawe manganto’o, “Si’a to papolaongimu etu to damangantima panta ngkorom. Ana ngkoromu semo damangantima panta pasi kasugimu.” 5Wali ojo karoonya i Pue Yawe manganto’oka i Abram gombo etu, Ia mangkeni i Abram ri sambali ntenda pei manganto’o, “Lo’aka batu’e malagi kojo ndate yangi. Wali wimba, korom bara nukurang mangabilang batu’e etu? Taa kojo apa boros pu’u! Wali ewa wetu seja kaborosinya wiyaamu ri tempo to darata!” Etu semo parajanji i mPue Yawe resi i Abram.
6Wali i Abram mansarumaka i Pue Yawe, see naka i Pue Yawe manganto’o i Abram ia tau to singkonong pei Ia.
7Wali yako etu i Pue Yawe manganto’oka wo’u resi i Abram, to’oNya, “Aku semo i Pue Yawe. Aku semo to nangkeni yau korom yako ri kota Ur ri tana Babilonia seore ma’i ri tana Kana’an si’i. Naka pei Aku nangika ewa wetu apa tana Kana’an si’i daKuwaika resi korom damawali yau korom puenya.” Wali etu wo’u parajanji i mPue Yawe resi i Abram.
8Wali i Abram mampotanaka resi i Pue Yawe, ia manganto’o, “O Pue Yawe, Allahngku, kesaa tondong to daNuwaika aku see aku damanasa monso pu’u tana si’i damawali aku puenya?”
9Wali i Pue Yawe mangansono, Ia manganto’o, “Kenika Aku samba’a sapi to tina to togo nto’u. Pasi keni seja samba’a bembe to tina pasi samba’a domba to pongka sewaju umurinya, paka togo nto’u. Pasi keni seja samba’a tonsi tagou pasi samba’a tonsi merpati to mangurawa.”
10Wali ojo pangandonge i Abram gombo i mPue Yawe etu, ia yau mangoko samparia to Naporapi i mPue Yawe etu. Roo see ia mansambale yau panewa mangagoa dua yau sapi, bembe, pasi domba etu yako ri wo’onya rataka ri ikunya. Roo mangagoa yau binatang to togo etu, ia mamposaka ri wawo ntana sanggoa pei sanggoa, wali sanggoa ri sambalinya tondo ngkii pei sanggoa ri sambalinya tondo ngkana, mangika dua njaya. Yako etu ia mansambale yau tagou pasi merpati pei tonsi to etu ia taa mangagoa yau. 11Yako etu ma’i tonsi papaa matodo ri wawo nu binatang to rasambale yau etu rani mangantungku yau, pei i Abram mangarubak yau.
12Wali yako etu, ojo karedenya eo, i Abram yore yau leta kojo. Ri raya ngkayorenya etu, kodi majoli ia mawali meka kojo rayanya naika mpangipinya. Kameka ndayanya etu mapari kojo, raporapaka ewa tau to malinja ri raya mburi kiji to mangangkumut yau ia. 13Wali tempo etu i Pue Yawe mampogomboka i Abram ri raya mpangipinya etu, Ia manganto’o, “Padongeka kojo gombongKu si’i see manasa resi korom. Apa Aku manganto’oka yami korom palaong to damawali resi wiyaamu ri tempo to darata. Tempo etu sira damawali tau rata nja’u tana to si’a sira puenya. Nja’u ria sira danapowatua ntau pei darapasiasika kojo opo atu nto’u kasaenya. 14Pei ojo kagananya opo atu nto’u etu Aku damangahuku tau to mampasiasika sira etu, panewa wiyaamu damasuwu muni mampiyaika yau tana etu. Tempo sira miyai etu bae kojo kasugi to nakeni nsira. 15-16Wali wiyaamu anu ka’opo ntapinya etu#Ayat 15-16. Ane tempo etu, nempo opo atu nto’umo pei tiroowa re’e wiyaanya to kaopo ntapinya etu. , sira damawolili muni ri tana to Aku mangawaika korom si’i. Ane tempo si’i, tau Amori tiroowa maroo rire apa tawa rata temponya Aku mangarubak yau sira. Pei tempo to darata, tempo wiyaamu mawolili muni ri tana si’i, tempo etu panewa Aku damangarubak yau tau Amori etu apa ane rata tempo etu, bae kojo kaja’a nu lengko ntau etu, wali masipato sira rahuku. Wali wiyaamu semo damangabolos sira mangangkaroos tana si’i.” Etu semo gombo i mPue Yawe mangkonong palaong to damawali resi wiyaa i Abram.
Yako etu i Pue manganto’oka wo’u i Abram, Ia manganto’o, “Etu semo palaong to damawali resi wiyaamu, pei ewa si’i to damawali resi korom, i Abram. Korom damasanang katuwumu wali ane tu’a kojomo korom damate ri raya kasanang ndaya panewa darapongkeli yau.”
17Wali ojo karoonya i Pue Yawe mampogomboka i Abram pasi ojo kawurinya rao, kodi majoli ri raya mpangipinya etu i Abram mangkita loya to la’u ruti to kangkumbu-ngkumbu pasi suyu to mawea. Loya pasi suyu etu liu ri oyo nu binatang-binatang to roomo nagoa yau i Abram to iposakanya ri tana etu. 18Wali tempo i Abram mangkita palaong to etu mawali, tempo etu semo i Pue Yawe mamparajanjika i Abram pei manganto’o, “Aku mangawaika wiyaamu tana si’i, tana to ri oyonya koro nue ri tana Mesir rata nja’u koro nue bae to rato’oka Efrat. 19Kamonsonya ri tempo si’i tana si’i tiroowa nakaroos ntau to yusa, etu semo to Keni, to Kenas, to Kadmon, 20to Het, to Peris, to Repa, 21to Amori, to Kana’an, to Girgasi, pasi to Yebus. Pei ri tempo to darata wiyaamu semo to damangkaroos tana si’i.” Etu semo parajanji to nato’oka i mPue Yawe resi i Abram to ipakarosoNya mangampake loya to la’u ruti to kangkumbu-ngkumbu pasi suyu to mawea etu.
© 2018 New Tribes Mission, Sanford, FL 32771-1487, USA.
Printed in the United States of America
