เกาตีนา 12
12
เอาซาง ไล อับราม เริล ปะเทด คานาอัน
1แทะ เทรา เปิล แลว เยโฮวา ก็ ไล อับราม ฮุนเน “อับราม เฮย มัห พระ เอา พระ เม พระ ควน นไจ ออ เริล เจ็น เมือง เน ดาย เอิญ ไล มัห เริล ตี แมะ ตี เอิญ อน ตัก มัห บัดนะ ดาย 2บัดนะ นโดน เอิญ ก็ แอง ระ มัห เป็น กรอก จ็อง นังเลาะ เอิญ ก็ อวยพอน มัห แอง เลาะๆ เคิบ มัห เอิญ ก็ ระ ครำ ทัว มด นับทือ มัห บัดนะ อัหซอ ดก ล็อง ก็ กุญ เลาะ ญอน มัห บัดนะ วัล ดาย 3ครำ ตัก แอง เลาะ ซิห มัห เอิญ ก็ แอง เลาะ ซิห อัห วัล ครำ ตัก แอง ไอ มี เลาะ ซิห มัห เอิญ ก็ จม งวย อัห วัล ครำ จูกรอกๆ ทัว โลก แพนซิก เน อัห ก็ กุญ เลาะ ญอน มัห ฮัก” เอาซาง อัง
4อับราม เม็จ เยโฮวา ไล ออ จังนะ แลว นำ ก็ เริล เจ็น เมือง ฮาราน ฮุน เยโฮวา ไล อน นัน ญาม นัน อับราม อาญุ เจ็ดซิบ ฮา ปี แลว ควัน นจะ นำ ตัก โลด ก็ เริล เลิม 5อับราม ก็ เอิด ซาราย เคิบ โลด นัน ญาย เริล ปะเทด คานาอัน นำ เอิด คัว เอิด วะ เริล มด เป็น เงิน เป็น ทอง เป็น ปึง ลูกนอง ตัก นำ กุญ ตัก ฮาราน นัน นำ ก็ เอิด เริล เลิม มด 6เล็ห ตัก คานาอัน แลว อับราม ก็ เริล ติกๆ จำปอ โตะ ตัก เมือง เซเคม นำ โตะ ตัก ลำ กุด จ็อง เคิง โมเร นัน เคิง นัน มี ครำ คานาอัน อุ แลว
7ทาเน นำ เล็ห ตัก ลำ กุด นัน แลว เอาซาง ก็ มแบละ นัง ออ ระ นำ เม็จ เอาซาง ก็ ไล นำ คือเน “ตี ซิก เน เอิญ อน ตัก ควัน งา มัห ดาย เอิญ ญ็อก อน ตัก ควัน งา มัห มด” เอาซาง อัง อับราม เม็จ เอาซาง ไล ออ จังนะ แลว นำ ก็ ลด แอง ตี ทวาย ซะ อน ตัก เอาซาง
8เจ็นนัน อับราม ก็ ญาย เริล งคม วัล นำ ญาย เริล ตัก ญวัง ลัห โตะ งิ งคม คาม งวัล เบ็ดเอล งคม นัน งวัล เบ็ดเอล อุ ลัห เซอะ งวัล อัย อุ ลัห งคม วัล นำ อุ เคิง ล็อง นำ ก็ ลด แอง ตี ทวาย ซะ เคิง นัน นำ ก็ ไว งกีจ็อง เยโฮวา ตัก นัน ลด 9เจ็นนัน นำ ก็ ญาย เริล นเซอะ ตัก ตี แลง เนเกบ#ค 9 เนเกบ ซีแล็ม เค็ย “เซอะ” กัน อุ ตัก ปะเทด คานาอัน เริล ตี แลง นัน ต็อง เริล นเซอะ ดอม แพนที คานาอัน
อับราม ปัด เริล ปะเทด อียิบ
10แทะ นัน วัล ก็ แร็ง เกิ๊ด ซีอ็อจ ตัก ปะเทด คานาอัน นัน ไอ มี ซีวะ ป็อง เตาะ อับราม ก็ ลด ญาย เริล อุ ตัก ปะเทด อียิบ วาล 11แต วาล นำ โตะ ตัก ปะเทด อียิบ นัน นำ ก็ เพีย ไล ยัห ออ วาล ฮุนเน “ซาราย มัห อำ เค็ย ออ เป็น ยัห เอิญ ดาย เอิญ เม็จจึด แลว มัห เป็น ครำ เลาะลัห ซีเละ 12กัน ครำ อียิบ เม็จจึด มัห เป็น ยัห เอิญ อัห ก็ มเบิล แอ็ม เอิญ อัห ลด เอิด มัห เป็น ยัห ออ ไอ มี อัห มเบิล มัห ซัง 13ทาเน เอิญ ก็ ครอ ระ มัห ไล อัห เค็ย มัห เป็น ควน เอิญ ดาย กัน มัห เค็ย ออ เป็น ควน เอิญ อัห ก็ ตอนฮับ เอิญ เลาะ อัห ไอ มี มเบิล เอิญ เตาะ” อับราม ไล ยัห ออ จังนะ
14เจ็นนัน อับราม ก็ เริล เล็ห ตัก ปะเทด อียิบ แลว ครำ อียิบ ก็ เม็จ ปาม อัห เม็จ ซาราย อัห ก็ เค็ย นำ เลาะลัห ซีเละ 15ปึง ซะ แกะ คอง ฟาโร เม็จ ซาราย อัห ก็ เค็ย นำ เลาะลัห อัห ก็ โตะ เลามุน อน ฟาโร ปัง ฟาโร เม็จ แลว นำ ก็ ไล อัห เอิด ซาราย ซับ ตัก เจิง ออ 16ฟาโร กุญ ซาราย อุ ตัก เจิง ออ แลว นำ ก็ แอง เลาะ ซิห อับราม ญอน ซาราย นัน เป็น ตัก นำ มัก ซาราย ซีเละ นำ ก็ อน ลูกนอง ตัก อับราม ดก ล็อง อัหเม ก็ นำ อน อัหคล็อง ก็ นำ อน นำ ก็ อน แปะ แกะ งัว นำ อน อูด อน ลา ตึง นัง ลัง ตึง นัง เม็ย ตัก อับราม ดก ซีเละ 17แต ซาราย นัน ควะ เป็น ยัห อับราม อุ เยโฮวา เม็จ ฟาโร เอิด ยัห อับราม ฮุนนัน นำ ก็ ไอ มี เลาะใจ เตาะ นำ ก็ แอง ซิห โรก ราย ดก มบลึ ตัก ฟาโร เคิบ ครำ ใน เจิง นำ นัน
18ทาเน ฟาโร ก็ เคาใจ เค็ย ตี อัห เป็น โรก ราย นัน ก็ ญอน เลือง ยัห อับราม ฮัก นำ ก็ ลด ซัง อับราม โตะ และ ออ นำ ก็ โป อับราม ฮุนเน “ซีวะ มัห แอง ตัก เอิญ ฮุนเน เต็ห 19ซีวะ มัห ไอ มี ไล เอิญ ซือๆ เค็ย ซาราย เป็น ยัห ออ ซีวะ มัห จุ เค็ย ซาราย เป็น ควน ออ เอิญ ไอ มี เม็จจึด ดุห เอิญ ก็ บัก และ เอิด นำ เป็น ยัห ออ เจ็นเน มัห ต็อง เอิด ยัห ออ เริล นทึห เตาะ” ฟาโร อัง 20ฟาโร ก็ ไล ลูกนอง ออ ซับซง อับราม เคิบ ยัห วัล ตี ออ เลาะๆ ปึง ลูกนอง นำ ก็ ซับซง อับราม เคิบ ซาราย ซะ จู มบลึ ตี เป็น คอง อับราม นัน อับราม ก็ เอิด เริล มด
Global Partners
