MATIUS 5
5
Dimiida Make Etopita Mana
1Jesus me kotuu to kodo edojake dimi katouda patikai. Okai animakijake etope-taido okaapa mei.
2Okai mana godajawijake mana etopeete, kii dani etii:
Ideide Mana
3„Ideide no, mijo kegepa jago bagee; epaawado ka jakimakita makiida okei ipuwe kouja.
4Ideide no, dimi gaduwai bagee; okeija gaduwata dimi jamaipajawii kouja.
5Ideide no, debee kegepa jago bagee; okei makiida jakimakaitai kouja.
6Ideide no, maakodo bokouto naidi ma jowee ma bagee; okei nojake mobu kaitai kouja.
7Ideide no, ipa dimi gata bagee; okei ipa bokouto go-mo-tiitai kouja.
8Ideide no, kegepa jimubeu bagee; okei Ugatame edomakaitai kouja.
9Ideide no, dagi duwa-tai bagee; okei Ugatame jokaane eebataitai kouja.
10Ideide no, maakodo bokouto maida make peepu etita bagee; epaawado ka jakimakita makiida okei ipuwe kouja.
11Ikii ke ideide no, me ka kiwidogipai ma, daana peepu kitipai ma, daana puja kijakubajawipai ma, ani maida make.
12Ikii ideide tiwei, umina ideide kodo; epaawado ikiija ka petege ibo kouja. Kou dani maija ikii beu gaa ka tikauwa ka gokobaki tijawiidaiga wegai tita bagee peepu etei tita kouja.
Makiida ka Diga
13Ikii ke makiida ka diga. Kou danite diga kodo igi beu ki-toojogo ko, kawe dani tijake digaigijo awija? Okai epa beu kidoke, kojoka emigimakijake me ka bado daimai to.
Makiida ka Aweida
14Ikii ke makiida ka aweida. Dimiida ka maki okogoona te boonimake.
15Me ka lampu etakijake kakate mijo te makija, kodeja lampu make-tai wado makija. Tijake owaa duba tota bagee eganimakija.
16Kou dani maija ikiija ka aweida kodo me jumaapa eganimakai to. Tijake ikiija enaa kei te-taido kijadojake epaawado ka Ikiitai muta etuwa-tita.
Musaja Dijo Douja Mana Maida Make Jesus Etopai
17Musaja dijo douja mana ma, tikauwa ka gokobaki tijawiidaiga wegai tita bagee ka mana ma kou beu awiine ko ani meta dimi te nagai. Ani beu awiine mei ko beu, kodeja boko duwajawiine meta.
18Beu maa kou ani kitii, epa ma maki ma beu kaitaida to, mijo mana mutoona juwa, puugeena juwa te igaita; Musaja dijo douja mana utoma boko duwajawiitaida to.
19Okai kouja meija nitimakita mana mijo mana mutoona ekagumijake kou danite meepa etopipi, epaawado ka jakimakita makiida mijo daba eebataitai. Kodeja meija nitimakita mana dijo dopi ma, etopipi ma, epaawado ka jakimakita makiida okai ibo eebataitai.
20Ani kitiine kouja, kou danite ikiija ka maakodo boko ko kapogeije epi bagee ma, Parisi bagee ma ka maakodo boko te etigadoki-toojogo, beu ma ko beu, ikii epaawado ka jakimakita makiida wadoujo te kaita.
21Tikauwa ka bageepa etita mana ikii juweetega, kou ko: Me te wagii. Daana meija me wagipi boko petadoke taitagi.
22Kodeja ani kitii, me gakita gakita meija kenekame emoge egapi, okai boko petadoke taitagi. Daana meija kenekame ’Ei, dimi beu’ etipi, boko peta-tai kotuuda kaitagi. Daana meija kenekameepa ’Aki enija’ etipi, boko petajake kadaga bodija duba kaitagi.
23Okai kouja akija menija agijo mene-taida meniine ga-toojogo ko, daana kouda kodaa aki keneka be kagata mana gadoke tipe ko,
24Kouda kodaa akija menija agijo mene-taidaapa jaikidokijake keneka ma enaimo dagi duwai tiga tigou. Tijake joko mejake akija menija agijo menii.
25Aki egaa kodo akaije kateegi me ma dagi aaduwai, ikai enaimo ita auweetigo gaa. Tijake akaije kateegi me kidaa boko peta-tai jumaapa te kaekega-tita, daana boko peta-tai me kidaa douto-tai meepa te kaekega-tita, tijake aki wanee owaa duba kaawidoke na kojoka.
26Beu maa kou ani katii, aki kouda kodaa make te podomaitage, ebé jamenijawiitageida to.
27Kii dani wegata mana muto ikii juweetega: Mogai te tai.
28Kodeja ani kitii, me gakita gakita meija jagamo idaana edojake okaija tine jigi ga-toojogo okai kegepa duba mogai teete.
29Kou danite akija etikaato peka peu mejawipi, gobajake emigimakai. Akija má idikima kodo kadaga bodija kaemigimakai ma ko, aki má tineena igadoke tai ko enaa.
30Daana kou danite akija etikaato gane ka peu mejawipi, duwajawijake emigimakai. Akija má idikima kodo kadaga bodijaapa uwii ma ko, aki ma tineena igadoke tai ko enaa.
31Daana kii dani etita: Meija jagamome ejaikipi, okai mege badii kapogeije tiga jaebijamakai.
32Kodeja ani kitii, meija jagamome ejaikipi, kodeja mogai maida make ko beu, okai mogai te-tai jagamo eeweete. Daana meija ejaikita jagamo kodo waka ebukipi, okai maija mogai.
33Daana tikauwa ka bageepa etita mana ikii juweetega: Puja mana baita te makii, kodeja akija baita utoma Tuhanpa eti-menii to.
34Kodeja ani kitii, ikii baita te makido-tai, epa maida juwa, okai kou ko Ugatameja jegeenaka animakaida kouja;
35daana maki maida juwa, okai kou ko okaija bado makijawijaida kouja; daana Jerusalim maida juwa, okai kou ko ibo jakimake-tai meja maki kouja.
36Daana akija dagi maida maija baita te makii, akija dagi maida ka ijo ena ma apeijo awii juwa, buna awii juwa, aki kaga kojoka.
37Akija wegaja mana kidi ii kipi ’ii’ wegai, beu kipi ’beu’ wegai. Abuma wega-toojogo peu epautouda.
38Kii dani wegata mana muto ikii juweetega: Peka komoka ma, egó komoka ma mana.
39Kodeja ani kitii, peu bagee ma akaije te ootai. Kodeja meija etikaato amaimu tabee kitipi, enakaato amaimu maija menii.
40Kou danite me idaana ka ijeije katijake akija badju kagaba kaamotipi, akija egaupe-tai kagaba kaamote-tita ejaikai.
41Daana meija ita kaboona eumigo-tijake uwi-uwi katipi, wijaago ma eumigou.
42Kadiimai bageepa menii to, daana kedaa gaa naimi katija bagee te ekonai.
43Kii dani wegata mana muto ikii juweetega: Aki watija bagee ipa egai, daana be kigai bagee be egai.
44Kodeja ani kitii, ikii ma jape bagee ipa egai, daana peepu kitita bagee sembahjang jatai.
45Tijake ikii epaawado ka Ikiitai jokaane ke-tita. Okaija meuka ko peu bageepa ma, enaa bageepa ma jaganijawii kouja, daana okaija edi ko maakodo bageepa ma, utoopa bageepa ma jawejawii kouja.
46Kou danite ikii ipa kigata bagee ipa egapa ko, má petege gouta? Mege kotuu te-tai bagee maija kou kei te-tai beu, mee?
47Daana ikiija kenekaapa to kipo emotei tipa, joko ka bagee ma ko ikiija ka kei tai ko kawi ka ki ibo? Beu, mee? ojaa bagee maija kou kei te-tai kodo.
48Okai kouja ikii enauto bokouto duwajawii to, epaawado ka Ikiitai enauto bokouto jago me danite.
@LAI1971
