ỌMWỤ ỌDADA 3
3
Ọlẹng bala Ọnyang nya Ọgbanyẹ la Egbeju-ọngịrị
1Ilo a ri iyo ọlẹ kọ la ịjẹẹhị kpá gụ anyị-iyo ịkịla ịlẹ wuu ká Amkpaa Ohe Oluhye họ lẹlẹ. Ẹnụtụrụ ookpokpo ọhẹ juwa ká ilo ọwẹ kele ka ẹga nya Iivu ọnyang nya ọgbanyẹ ọwẹ. Ọ tọọ ịtọ yẹkẹẹ, “Ohe Oluhye byinu yẹkẹẹ, anụ nyị ri ugbe nya okoji ọhẹ-lọhẹ ọlẹpwụ nya ẹrụ ọlẹ kpong-kpong ka-á?” 2Ọnyang ọwẹ wẹ byoo yẹkẹẹ, “Ehe, Ohe Oluhye wụ ọnụ hahị yẹkẹẹ, ahị nyị ri egbe nya ekeji myị ekeji ịlẹ kịị nyị jam ẹ-ẹrụ ọlẹ wuu. 3Okoji ookpokpo ọlẹ ká Ohe Oluhye dahị ehile u-uhye nyamwụ a ri okoji ọlẹ kọ rịrị ẹ-ẹpwarịrị nya ẹrụ ọlẹ lẹlẹ. Ọ byihi yẹkẹẹ, ahị nyị́ hyọọ ri lee ọdọmwụ yụbwọ gwoo gu kpong-kpong ka. Ó-ri kaahị nyị́ kpoye nya ehile ọwẹ aalẹ, ahị nyị ka gbu!” 4Ilo wẹ byi ọnyang ọwẹ yẹkẹẹ, “Ọ mẹ ọnụ, ọ́-ri kanụ ri ugbe nya okoji ọwẹ, ánụ juwa ka gbu ịlẹhị ka.” 5Ilo myịmyị byi ọnyang ọwẹ yẹkẹẹ, “Ang odudu ká Ohe Oluhye danụ ehile ọwẹ ịnyị ri chajị Ohe Oluhye ayịdang jẹ yẹkẹẹ, ọ́-ri kaanụ nyị́ ri ugbe nya okoji ọwẹ, ká ahị nyanụ nyị́ chịnụ gboo lẹ aalẹ, anụ ayịdang nyaa tịtị ka jẹ ang ọnyịịla bala ang ọtịpyọ datị hi awụlẹ lala ọwa-ọwa Ohe Oluhye ịnyịnyị lẹlẹ.”
6Ụka ká ọnyang ọwẹ wo ẹla ọọwa kpá, ọ yẹ jaabwọ ká ugbe nya okoji ọọwa chẹhị gbọgbọ lụmẹ. Ọ myịmyị yẹ jaabwọ ká ugbe nya okoji ọọwa ka há oriri bala jaabwọ kọ ka hu ẹla ọjẹ́jẹ họọ lẹ, ọ hyọọ ri lẹlẹ. Ọ hu ugbe nya okoji ọọwa ha ọrụmwụ ri ịnyịnyị. 7Ahyaahị kị ri ugbe nya okoji ọọwa kpá lẹ, ahị a taa gilele lẹlẹ. Ị jẹ yẹkẹẹ, ịwa nyị ji lọhị-lọhị. Ọọwa lẹ, ị kele kaka mwụ apwụ nya okiledu jụ ọgọrị lẹlẹ.
8Lụka nya obyi ẹnụtụrụ ọọwa, Amkpaa Ohe Oluhye juwa ye ọhụ kele ka ẹga nya ọlẹng nya ọgbanyẹ ọwẹ bala ahụ nyamwụ. Ụka kọọwa bala ahụ nyamwụ wo anụ nya Ohe Oluhye, ị kpa ịlaa rụ kele kaka kpịbaa ẹ-ẹkpẹ nya ekeji ịlẹpwụ nya ẹrụ ọọwa hi Ohe Oluhye. 9Ịnyị lẹ, Amkpaa Ohe Oluhye a be ẹkọ wụrụ ọlẹng ọwẹ yẹkẹẹ, “Adam ee! Adam ee! Ale a tị́ ji-īì?” 10Adam wẹ byoo yẹkẹẹ, “Ụka ká m wo anụ nyang ká juwa warị lẹ, ọọwa, m rụ kaka kpịbaa hing lẹ, chajị m̀ ji lọhị-lọhị.” 11Ohe Oluhye byoo yẹkẹẹ, “Oowo a tị́ ya jeng yẹkẹẹ, ahụ nyị ji lọhị-lọhị ene-è? Lee, a tị́ hya ugbe nya okoji ọlẹ kam dang ehile u-uhye nyamwụ ri lẹ?” 12Adam wẹ byoo yẹkẹẹ, “Me ọnyang ọlẹ ká hu ham ya nyị dam ụbwọ, a tị́ hya ugbe nya okoji ọọwa ham ri!” 13Amkpaa Ohe Oluhye tọ ọnyang ọwẹ wo yẹkẹẹ, “Ịịyẹ a tị́ du ká họ ịnyị kpong-kpong?” Ọnyang ọwẹ wẹ byoo yẹkẹẹ, “Me ilo ọwẹ a tị pịrịm ju, a tị́ du kam hyọọ ri!”
Ohe Oluhye Gọlọ ju Ilo
14Ịnyị lẹ, Amkpaa Ohe Oluhye a gọlọ ju ilo yẹkẹẹ, “Ahụ ilo ọwẹ, wo mẹ! Chajị nya ang onyobyi nyang ọwẹ ká họ wẹ lẹ, bwu alẹ kele kịlahị, ahụ ilo ọwẹ a ka ri ọlịnyịribyi ụbwọng-ụbwọng ẹ-ẹpwarịrị nya anyị-iyo ịkịla ịlẹ wuu kam Ohe Oluhye họ tụ iyo ịlẹpwa bala iyo ịnyẹẹgẹga ịlẹpwamẹ wuu lẹlẹ. Ẹpwụ-ẹpwụ nyang a ka kpa gbileji bwu alẹ kele kịlahị lẹlẹ. Ịpyị a ka ri ang oriri nyang ịnyịnyị gbee ká ka gbu lẹlẹ.” 15Ohe Oluhye myịmyị byi ilo yẹkẹẹ, “Am ka hu uji ojuju da wẹ ẹpwarịrị nyang ahụ ilo ọwẹ bala ọnyang ọlẹ lẹ. Anyị nyanụ, anụ angị imiiye ịwẹ ka yẹ ri aluji nya awụlẹ pyịyọọ ịnyịnyị lẹ. Ọnyị nya ọnyang ọlẹ ka be egbeju nyang ahụ ilo ene. Ahụ ilo ọwẹ ayịdang tị ka chị ọnyị ọọwa angịrị i-ichẹtẹ nyamwụ ịnyịnyị.” 16Amkpaa Ohe Oluhye gọlọ ju ọnyang ọwẹ byoo yẹkẹẹ, “Am ka họ ká ka yẹ akama ọtụka-ọtụka ẹ-ẹpwụ nya ang ọjụjụ ụ-ụwa o-okube ene ká ka ma ọnyị pyii lẹ. Ma, ọ tị la ịnyị la lẹ, iwoo nya ọrụng tị ka wung lụmẹ-lụmẹ ụka wuu. Ọrụ nyang a ka ri olegbeju nyang lẹlẹ.” 17Amkpaa Ohe Oluhye gọlọ ju Adam yẹkẹẹ, “Adam, wo mẹ. Chajị nyọlẹ ká ke ụrụ la ẹla nya ahụ nyang gụ ehile nyam am Ohe Oluhye a du ká myị ri ugbe nya okoji ọlẹ kam dang ehile u-uhye nyamwụ lẹ. Chajị nya ọọwa lẹ, Am gọlọ ju ịpyị ká ịpyị a ka há ang nya ẹrụ kaka lẹ. A ka yẹ akama ọtụka-ọtụka, họ ụkụrwọ bwu inwu ẹ-ẹngịrị pyịyọọ ene ká ka ye ang oriri ri ẹ-ẹpwụ nya ọhịhị nyang wuu. 18Bwu alẹ ọlẹ kele kịlahị, ịpyị ka bwu ịkwọ bala ejwo datị-datị chajị nyang lẹ. Apwụ ịlẹpwamẹ ịlam-ịlam ịwẹ a ka ri ang oriri nyang ịnyịnyị lẹlẹ. 19A ka họ ang la inwu i-itochi nyang ene ká ka ye ang oriri ri. Ịịwẹ a ka yẹ akama gbee pwụ ụka ká ka gbu lẹlẹ. Ụka ọọwa, ọpyị-ọpyị ọlẹ kị kpa họng, a ka rụ kaka tọ ịnyịnyị lẹ.”
20Adam wụrụ ẹnyị nya ahụ nyamwụ ọọwa Iivu, chajị ọwa-à ri ịnịna nya angịnyị ehe wuu lẹ. 21Ụka ọọwa, Amkpaa Ohe Oluhye kpa egba nya iyo họ ang ọkụrụ-kụrụ lẹ, ọ gyaa kụrụ Adam bala Iivu, ahụ nyamwụ lẹlẹ.
Ị Ku Adam bala Iivu Rụ Bwu Ẹrụ Ọla Idẹn
22Amkpaa Ohe Oluhye yẹkẹẹ, “Ọngịnyị ehe jẹ ang ọnyịịla bala ang ọtịpyọ datị hi awụlẹ lala ahị-ahị lẹ. Chajị nya ọọwa lẹ, ọ́-ri kam hú ọngịnyị ehe ujiji, kọ hya ugbe nya okoji nya ọhịhị ọwẹ ri lẹ aalẹ, ọ́ ka gbu kpá ẹnẹnẹhẹ kaka. Lẹ, M̀ ka kwoo rụ kpehe hi ẹpwụ nya ẹrụ ọlẹ pyii lẹ.” 23Ịnyị a du, ká Amkpaa Ohe Oluhye ku Adam bala ahụ nyamwụ rụ kpehe hi ẹpwụ nya ẹrụ ọla Idẹn ọọwa, chajị ká Adam ka rụ kaka wu ẹrụ ọ-ọpyị ọlẹ ká Ohe Oluhye kpa họọ lẹ. 24Ụka ká Amkpaa Ohe Oluhye ku angịnyị ịwẹ rụ kpehe hi ẹrụ ọọwa kpá, Ọ du alegu iCherubu kele kaka gbe ẹrụ ọọwa. Oge ọtụka-ọtụka ọhẹ ọlẹ kọ juwa wuru lala ẹlẹlẹ ila juwa da hyaahyaahyaa ụ-ụwa juwa gbe okoji nya ọhịhị ọọwa. Oge ọtụka ọọwa bala alegu-icherubu ịịwa juwa o-oye nya ọmwẹnụ-ụtụrụ nya ẹrụ ọla Idẹn ọọwa.
Igede Bible © The Bible Society of Nigeria, 2019.
