Matio 16
16
E nataweritamawakaniwitc Cecoc kitci mata kackitatc
(Natawapata kaie Mark 8.11-13; Luc 12.54-56)
1 Pharisien iriniwok kirika Sadducéen iriniwok ki pe natcikapowictawewok Cecoca. Wikokwe paciwirewakopan arotc kitci iteritci, ke ki otci itactahorakaniwiritci.#16.1 ke ki otci itactahorakaniwiritci: Kata takoniw meka kitci itactahorakaniwitc, kecpin pitoc itete kirika cota aiamihe irakonikewiniw. Ekoni tca e ici nataweritamawatcik kitci mata kackitaritci kitci wapatahikotcik Kice Manitowa e ki mirikoritci aniheriw ka ici kackitaritci. 2Aric ohweriw itikowok Cecoca: “E iti pakicimotc pisimw, kit itwanawaw: ‘Kata miro kicikaw. Micta mikwaw osko.’ 3Minawatc wipatc e kicepawok kit itwanawaw: ‘Kata kimiwon ke kicikak. Rikoskon meka. Mikwaw kaie osko.’ Ki kackitanawaw e nisitowinamekw e icinakok icpimik. Nama aric ki kackitanawaw kitci nisitowinamekw e iti isparik mekwata. 4Iriniwok anotc, ka matci iriniwitcik kaie aka ka nosanehwatcik Kice Manitowa, nataweritamok kitci mata kackitawak kitci kiskeritakik tapwe e atoskectawak Kice Manito. Nama aric kata mirakaniwiwok, tepirak mitowiriw aniheriw Jonas ka ki ici mirakaniwitc.”#16.4 Jonas: Natawapata anihe mamitcitc ka acotcictek Matio 12.39 otci.
Minawatc ki nakatew anihi iriniwa Cecoc, e matcatc.
Ociwockitcitcikaniwaw Pharisien acitc Sadducéen iriniwok
(Natawapata kaie Mark 8.14-21)
5Cecoc kirika owitcewakana ka acohamwakopanen sakihikanik, ki onikewakopan pakwecikana kitci pe matcewiratcik. 6Aci Cecoc itew: “Aiekwamisikw aka kitci apatcihimekw ociwockitcitcikaniwaw Pharisien acitc Sadducéen iriniwok.”
7Aci aniki Cecoc owitcewakana aititowok: “Pot wetci itetc aniheriw, osam aka e ki otci pe iciwirimiko pakwecikana.”
8Kiskeritam Cecoc e aiteritci. Aci kokwetcimew: “Kekwan ni wetci aititoekw anihe: ‘Osam aka e ki otci pe iciwirimiko pakwecikana.’ Nama micaw kit asperimowiniwaw! 9Nama ia ni moci ki nisitotenawaw? Nama ia ki mikaweritenawaw e ki acamakaniwitcik niaranaw kice mitato mitana iriniwok, tepirak tca e niaraniwaspan pakwecikanak, tan kaie e tatikipan pakitenakana pakwecikan ka ki matcewirekok e ki ickoparik ka ickwa kaskina mitcisotcik? 10Nama ia kaie ki mikaweritenawaw anihi newaw kice mitato mitana iriniwok ka ki acamakaniwitcik, nicowaso#16.10 nicowaso: (7) tepirak e taciwaspan pakwecikanak kaie tca tato pakitenakan pakwecikan ka ki matcewirekok e ki ickoparik, ka ickwa mitcisotcik kaskina iriniwok? 11Kekwan wetci aka ki nisitotamekw ohwe: namaiew ni tcipaw ka arimomakipan, ka ititakok: ‘Aiekwamisikw aka kitci apatcihimekw ociwockitcitcikaniwaw Pharisien acitc Sadducéen iriniwok’?”
12Aci aniki Cecoc owitcewakana ki iti nisitotamok aka e ki otci itakaniwitcik kitci ekwamictowatcik anihi ciwockitcitcikana, pakwecikanik ka arakaniwiritci, aric aniheriw kitci ekwamictakik aka kitci nosanetatcik okiskinohamakewiniwariw anahweriw Pharisien acitc Sadducéen iriniwa.
Pien itew: enko naha Cecoc, Kice Manito ka ki itespan kitci pe iciticohwatc ota askik kitci akwacimiweritci
(Natawapata kaie Mark 8.27-30; Luc 9.18-21)
13Cecoc nete ki icaw askik, neta e ici takonik otenaciciriw Césarée de Philippe ka icinikaterik. Aci kokwetcimew owitcewakana: “Iriniwok e arimomatcik anihi Ka ki pe iriniwihitisoritci,#16.13 Ka ki pe iriniwihitisotc: Arimomitiso ota Cecoc. awiriw ka iterimatcik?”
14Itiko owitcewakana: “Atita itewok: ‘Capatis anahwa.’ Kotakihik: ‘Élie na.’ Minawatc kotakihik itewok: ‘Jérémie kekotc ma kotak weckatc ka ki pe nikan tipatcimotc.’”
15Itikowok Cecoca: “Aric kirawaw, awin ka iterimiekw?”
16Simo Pien itew: “Kir anihi ka ki itespan Kice Manito kitci pe iciticohwatc ota askik kitci akwacimiweritci,#16.16 anihi ka ki itespan Kice Manito kitci pe iciticohwatc ota askik kitci akwacimiweritci: Mia itemakan: Krist. kir Kice Manito ka pimatisitc Okosa.”
17Aci itiko Cecoca: “Ki caweritakosin,#16.17 Ki caweritakosin: Itemakan atita masinahikanik: Ki mireriten. Simo, Jean okosa. Namaiew meka iriniw ka ki witamask aniheriw tapwewiniw, aric Notawi, wakwek ka taciketc. 18Nin tca ki witamatin: kir Pien mia asini kit iteritakosin. Ekota neta asinik ke ici mawotcihakik kaskina ka nosanehwitcik. Nama kata ki cakotcihakaniwiwok, nama wawatc nipowiniw#16.18 nipowiniw: Peikon kata ki ici nisitotakon: l'Hadès. kata cakotcihikowok. 19Ki ka miritin cehikana nete otci Kice Manito Okimawinik. Anihe tca ke acotinamasoan ota askik, kata acotinamasonaniwon kaie nete wakwek. Anihe kaie ke ici naheritaman kitci totcikatek ota askik, peikon kaie wakwek kata ici naheritcikatew.”
20Minawatc kaketin itew owitcewakana Cecoc aka awiriwa kitci witamawaritci wir aniheriw ka ki itetc Kice Manito kitci pe iciticohwatc kitci akwacimiweritci.
E nikan witak Cecoc ke iciwepasitc
(Natawapata kaie Mark 8.31–9.1; Luc 9.22-27)
21Aci Cecoc werihew e witamawatc owitcewakana tan ke iciwepasitc, e itetc: “Actew kitci icaian nete Jérusalem otenak kirika kitci micta nekatcihitcik cota aiamihe okimawok acitc cota makatewokorewok ka tiperitakik kaie ka kiskinohamaketcik cota aiamihe irakonikewiniw. Ni ka nipahikowin, minawatc ickwa nicto kickokake ni ka apitcipan.”
22Tipan iciwirew Pien Cecoca, kaketin e aimihatc, e tca itatc: “Teperitcikein, nama wiskat nte kata icinakon! Ki ka nanakatcihikw Kice Manito!”
23Kiwekapowiw Cecoc, e itatc Piena: “Matca matca nete warawik Matci Manito,#16.23 Matci Manito: Satan icinikatakaniwiw Matci Manito ota. ponihici! Ki kipickowin aka kitci takocinian nete ke icaian. Nama meka kit iteriten mia wir Kice Manito e iteritak, aric mia iriniwok e iteritakik.”
24Minawatc Cecoc itew owitcewakana: “Kecpin awik wi pe nosanehwite, kata ponitaw wir tepirak e mamitonerimitisotc. Kata miwirew otcipaiatikoma kitci pe nosanehwitc. 25Anahwe tepirak ka iteritak kitci kanaweritak ota askik opimatisiwin, kata onitaw. Aric anahwe ke pakiteritak opimatisiwin nin otci, kata mirakaniwiw kitci kiwe pimatisitc.”
26“Ceckwat awik kata wi tatamopan kaskina kekociciriw ota askik, kecpin wir tipirawe onicimitisote. Kecpin awik onitate opimatisiwin, takoniw ia kekociciriw ke ki meckotinamaketc, kitci ki pe kiwe mirakaniwitc aniheriw opimatisiwin?#16.26 opimatisiwin: Itemakan atita masinahikanik: otcitcakoca. Nama! 27Anahwe meka Ka ki pe iriniwihitisotc kata pe takociniw Otawiwa oticperitakosiwinik kirika otacerimiriw kitci pe witcewikoritci. Kata tca mirew kaskina papeikw iriniwa ka ki ici kackitamatisoritci, kotc ka ki ici totamiritci. 28Tapwe ohwe ka witamatakok: atita ota ka taciketcik nama kata nipowok epwamoci wapamatcik anihi Ka ki pe iriniwihitisoritci e pe nta okimawiritci.”
Canadian Bible Society, 2014
