GENESIS 10
10
Noah Tapate Suante
(1 Kro 1.5-23)
1Hiaite Noah tapa Shem, Ham leh Japheth suante ahi uh. Tuichim tun nung in tapate anei chiat uhi.
2Japheth tapate: Gomer, Magog, Madai, Javan, Tubal, Meshek leh Tiras ahi uh. 3Gomer tapate: Ashkenaz, Riphath leh Togarmah ahi uh. 4Javan tapate: Elishah, Tarshish, Kittim leh Dodanim ahi uh. 5Huaite a kipan in Zentelte, amau pau leh amau nam dungzui zel in, amau chite omna tuikulh gam, amau gamte ah akikhenzak uhi.
6Ham tapate: Kush, Mizraim, Put leh Kanaan ahi uh. 7Kush tapate: Seba, Havilah, Sabtah, Raamah leh Sabtekhah ahi uh. Raamah tapate: Sheba leh Dedan ahi uh. 8Kush in tapa Nimrod anei hi. Amah leitung ah mihattak ahong hi panta hi. 9Toupa ma ah sabengmi hattak ahi a; huaiziak in ahi, “Toupa ma a sabet hattak Nimrod bang ahi,” achih zel uh. 10Alal patna Shinar gam a Babel khua, Erek khua, Akkad khua leh Shinar gam a Kalneh khua ahi uh. 11Huai gam a kipan apawt a, Assuria gam ah alut a, Nineveh khua, Rehoboth-Ir khua leh Kalah khua asat hi. 12Nineveh leh Kalah kikal ah Resen khua asat a, huai Resen khua thupitak ahi.
13Mizraim in Ludte, Anamte, Lehabte, Naphtuhte, 14Pathruste leh Kasluhte, Philistiate leh Kaphtorte pawtna asuang hi.
15Kanaan in tapa masa Zidon anei a, Heth leng anei lai a, 16Jebuste, Amorte, Girgaste; 17Hivte, Arkate, Sinte; 18Arvadte, Zemarte, Hamathte asuang; huai nung in Kanaan namte akithehzakta uhi. 19Kanaante gamgi Zidon a kipan Gerar, Gaza, Sodom leh Gomorrah, Admah, Zeboim leh Lasa khua tan ahi. 20Huaite, anamte dungzui zel leh apaute, agamte leh anamte lak ua dungzui zel in Ham suante ahi uh.
21Shem, Eber ta tengteng suangpa, Japheth upa'n leng tate anei hi. 22Shem tapate: Elam, Asshur, Arpakshad, Lud leh Aram ahi uh. 23Aram tapate: Uz, Hul, Gether leh Mash ahi uh. 24Arpakshad in tapa Shelah anei a; Shelah in tapa Eber anei hi. 25Eber in tapa nih anei a: khat min Peleg ahi a, adam lai a leitung akikhen ziak in; anau min Joktan ahi. 26Joktan in tapa Almodad, Seleph, Hazarmaveth, Jerah; 27Hadoram, Uzal, Diklah; 28Obal, Abimael, Sheba; 29Ophir, Havilah leh Jobab anei a; huai tengteng Joktan tapate ahi uh. 30Atenna uh Mesha a kipan suahlam tang Sephar tan ahi. 31Huaite Shem suante ahi ua; anamte dungzui zel leh apaute dungzui zel in, agamte ah leh achite dungzui zel in.
32Huaite Noah suan namte ahi ua, asuante uh dungzui zel in achite uh lak ah; tuichim tun nung in huaite a kipan ahi a; lei a chi chih khenkhiak ahi uhi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.