San Mateo 17
17
Jesús onixpatlak para okiteititij iueyilis
(Mr. 9.2-13; Lc. 9.28-36)
1Chikuasen tonajli más sakin*, Jesús okuikak Pedro niman on iknijtin Santiago niman Juan, niman inseltimej oyajkej ipan sen tepetl ueyi. 2Niman ompa imixpan onixpatlak. Ixayak onokau petlanki ken tonaltsintli, niman itlaken sanoyej kualtsin opetlankaistayak. 3Nimatsin ouajnonextijkej Moisés niman Elías yejuan tlajtlajtojuayaj iuan Jesús. 4Kemaj Pedro okijlij Jesús:
—NoTEKO, ¡sanoyej kuajli ika nikan tinemij! Tla tikneki, ma nikchijchiua yeyi kalmatsitsimej, se para tejua, se para Moisés niman okse para Elías.
5Chika Pedro ijkon tlajtouaya, sen moxtli yejuan sanoyej istak okintlapachoj. Niman kemaj ipan on moxtli okakistik sen tlajtojli yejuan okijtoj:
—In yejua notlajsojkaKoneu yejuan nechpaktia. Yejua xtenkakikan.
6Ijkuak on nomachtijkej* ijkon okakkej, nimantsin onotlakuantelketskej ikan inxayak hasta ipan tlajli, niman sanoyej nomojtiayaj. 7Kemaj Jesús okinnisiuij, okinminmatokak, niman okinmijlij:
—Xmotelketsakan, maka xmomojtikan.
8Niman ijkuak onotelketskej, xok yakaj okitakej, yej san Jesús iselti.
9Chika uajtemotiayaj de on tepetl, Jesús okinnauatij:
—Maka yakaj xtlajtlajtouilikan on tlen onenkitakej, hasta ijkuak nejua yejuan oninochiu Tlakatl yoniyoliu* niman yoninoketsteu ipan notlalkon.
10Kemaj on nomachtijkej* okitlajtoltijkej Jesús:
—¿Tline* tej, on temachtijkej ikan itlanauatil Dios kijtouaj ika Elías ika onkaj achtoj uajlas xken tejua yejuan Dios omitstlapejpenij para techmakixtis?
11Jesús okinmijlij:
—On melauak ika Elías achtoj uajlas niman nochi tlajtlamach* kiyektlalis. 12Pero nejua nemechijlia ika Elías youajlaka, niman xokixmatkej, yej okichiuilijkej nochi tlen xkuajli ken yejuamej okinekkej. No ijki nejua yejuan oninochiu Tlakatl nechtlajyouiltiskej.
13Ijkuakon, on nomachtijkej* okajsikamatkej ika Jesús kinnojnotstikatka de Juan on tlakuatekijketl.
Jesús okipajtij sen telpochtli yejuan kipiyaya sen xkuajli espíritu
(Mr. 9.14-29; Lc. 9.37-43)
14Ijkuak oajsikej tlatsintlan de on tepetl kampa nemiyaj on tojlamej tlakamej, sen tlakatl okinisiuij Jesús niman ixpan onotlakuantelkets, niman okijlij:
15—NoTEKO, xkikneli notelpoch niman xpaleui. Yejua ajakayoj niman sanoyej temojtij tlajyouiya. Miyekpa onuetsi ipan tlitl niman miyekpa ipan atl. 16Nejua onikuajuikak intech monomachtijkauan, pero yejuamej xouelkej okipajtijkej.
17Jesús okijtoj:
—¡Ay, tlakamej yejuan xtlaneltokaj niman xmelajki tlanemiliaj! ¿Hasta kamanon más nemouan ninemis? ¿Hasta kamanon nemechxikos? Nikan xkuajuikakan on telpochtli.
18Kemaj Jesús okajuak on xkuajli espíritu, niman on xkuajli espíritu okis ipan on telpochtli. Kemaj nimantsin on telpochtli opajtik.
19Más sakin*, on nomachtijkej* okinotskej Jesús san iselti, niman okitlajtoltijkej:
—¿Tline* tejuamej xotiuelkej otikixtijkej on xkuajli espíritu?
20Jesús okinmijlij:
—Xonenuelkej pampa onenometlamatkej* tla ueliskia pajtis noso ka. Ika tlen melauak nemechijlia ika tla nenkipiyaj nemotlaneltok, maski pitentsin ken iteyo mostaza, uelis nenkijliskej on tepetl: “Xmejkuani nikan niman xuiya oksekan”, niman on tepetl nejkuaniskia. Ijkon tej, nochi uelis nenkichiuaskej tla melauak nenkipiyaskiaj nemotlaneltok. 21Pero ken in xkuajli espíritu uelis nenkitekixtiliskej san ikan oración niman nesauajli.
Jesús oksejpa okinmijlij on inomachtijkauan* ika kimiktiskej
(Mr. 9.30-32; Lc. 9.43-45)
22Chika kistinemiyaj san sekan ipan iueyitlalpan Galilea, Jesús okinmijlij:
—Nejua yejuan oninochiu Tlakatl nechtemaktiliskej intech on tlakamej, 23niman nechmiktiskej, pero ipan yeyi tonajli niyoliuis* niman ninoketsteuas ipan notlalkon.
Niman ijkuak yejuamej ijkon okakkej, sanoyej onajmankej.
Jesús okitlaxtlau on impueso yejuan kitlajtlanij para on ueyitiopan
24Ijkuak Jesús niman inomachtijkauan* oajsikej ipan on kalpan Capernaúm, on yejuan tlacobrarouayaj para on ueyitiopan, oyajkej itech Pedro niman ijkin okitlajtoltijkej:
—¿On nemotemachtijkau xkitlaxtlauas on tomin para on ueyitiopan?
25Pedro okijlij:
—Kemaj.
Kemaj ijkuak Pedro okalakito ne ipan on kajli, Jesús achtoj yejua okinots, niman okijlij:
—¿Ken tiknemilia Simón? In reyes ipan in tlaltikpaktli, ¿akinomej kincobrarouaj on impuestos? ¿Kincobrarouaj yejuamej on chanejkej noso on yejuan xchanejkej?
26Pedro okijlij:
—On yejuan xchanejkej.
Kemaj Jesús okijlij:
—Tla ijkon, on chanejkej xkitocaroua para kitlaxtlauaskej. 27Pero para maka yakaj tikualaniskej, xuiya ne ipan mar para xkajsi sen michin. Niman on yejuan achtoj michin tikajsis, ipan ikamak tiknextis sen tomin yejuan kajxilis para tiktlaxtlauas on kech techtlajtlaniaj nejua niman tejua para on ueyitiopan. Xkikti tej, on tomin niman xkintlaxtlauiliti.
© 1987, 2012 Wycliffe Bible Translators, Inc. All rights reserved.
