Mataio' 6
6
Evene' Nasahili' O-ngedaa' Monovomu' Izesu' Line' Gamazi
1Lingine mono' lamine' di minaa' nani' nene evenelite di naba i-lingidilizave lisavo' di minamilo. Evenelite ma ningilizahe ningamilizahe li minilizani' nene Okulumoku' metibo ne'mo meni ma nene mo molo-lengedamoloseive.
2Nemu' nene gaza evene' ma nasahili' noo-ngedo ma evene' lu'ine sitakisi velite mono' numungu' nehe maketilo' nehe evene' nasahili' i-ngidilisa evene' ningi lopo'ni lilizave li hoso' izaa' nani' ne'mine nene amilo. Naza lamine' ma lo-lengemeloze: Evene' ningilizahe li evene' soto' nasahili' i-ngidikevo evenelite ningi di naba i-ngidani' ne'mo alinge' daliza meni'ine gidini ma nene mo lolo' ogavo mo dikeve. 3Mo dikeni'za nene ne'mine ami evene' ma nasahili' i-ngidili ma nene lengi' zuho laminelitesi gilikelizaze li minisa 4suno' nasahili' i-ngidilo. Ne'mo nasahili' i-ngidilizani' nene suno' initekisi ningo gelaa' ive metibo O'moso ne'mo meni lengemeleseive.
O'mosola laa' Monovomu' Apize ngimine' Gamazi
(Luka' 11:2-4)
5Ido' lingine O'mosola lili ma evene' lu'ine sitakisi minadite o'moto' nehe mono' numungu' nehe evene' muki' di gese' iga' ani' ebeto' mini ma ningilizahe li O'mosola laa' nani' ne'mine igi lamilo. Naza lamine' ma lo-lengemelove: Ingine evene' mukiliti ve'nido' ne'mine ani' ne'mo alinge' daliza meni'ine mo dikeve. 6Nemu' nene gaza O'mosola lolo ma gasivo' numungau' suno' vo akahe gizo mino a'mine suno' numuno lulou' naningu' minive mahine O'moso nene opo'ni lozo. Ne'mine oganivo suno' inite' ningaa' ive maho O'moso aza meni gemeleseive.
7Ido' lingine O'mosola nilii ma soza O'mosomu' gilavete O'mosotela gohi lo gohi lo univo gele lemelive li gamazi vai' muki' lika' lika' igi laa' nani' ne'mine igi lamilo. 8Nanitekumu' lilisa nahe nemu' metibo nene gomu' gelavosa alinge' nene eita lilisanako nemu' nene gamazi muki' hazamu' lami a'mine O'moso gihilemu' gilamavete iga' nani' ne'mine amilo. 9Lingine O'mosola ne'minisa lilisave:
Okulumoku' meteho,
Okulumokuko iga' nadi'mine ogo laza misubolasi mene a'mine'mine olobo.
Ado' gei' guliveka nene evene' vai' gelekunivo dizosa miniliho.
10Ido' eveneka gizebo o-ledeline' nene lelita mudise soto' iliho.
Ido' gei' lukalokovo' ogo molo minelobo.
11Ido' idise nalone' noso' nitete lemezo.
12Ido' la'lise lihime di li-daveti lihime'ine mo hulo-ngedekune' nenako
a'mine'mine ogo gaza leli' lihimete hulo-ledezo.
13Ido' lemengu' nene lele'mize molamo
goloso melehi anau' voloninguti' nene lele'mize ti'no do lu' izezo lilisave.
14Ido' lingine evene' lihime di-lingidaveti lihime'ine huli-ngidilizani' nene Okulumoku' metibo aza lengi' lihimetinesi hulo-lengedeleseiha 15eveneliti lihime'ine huli-ngidamilizani' nene metibo a'mine'mine ogo lengi' lihimetinesi hulo-lengedamoloseive.
Monokumu' Ve Li Noso' Nite' Malise Igakumu' Line' Gamazi
16Ido' monokumu' ve lii noso' nite' malise ili ma lu'ine sitakisi evenelite iga' nani' ne'mine igi muhele' i minamilo. A'mine ve monokumu' ve li noso' nite' malise igi ma ingine inite' malise ogo none' nene evene' ningi gililizave li ve'ine go'ine di lamine' ami muhele' ahele' igivo' minaa' nave. Naza lamine' ma lo-lengemelove. Ingine evene' mukiliti ve'nido' ne'mine ani' ne'mo meni'ine nene mo dikeve. 17Ido' gaza monokumu' ve lo noso' nite' malise o no ma evene' mukiliti ve'nido' muhele' ogo monamo goka veka noso' izo madungau' uveli holo do lamine' ogo monezo. 18Ne'mine oganivo evene' nete noso' nite' malise o nane li ningi gilamavo suno' ne'mine olosaba suno' mino suno' minine' inite' ningaa' ive maho ne'mo ningo meni gemeleseive.
Okulumokuko Heneni nGaneni Molaloningumu' Line' Gamazi
(Luka' 12:33-34)
19Lingine misubouko mene heneni nganeni mo milamilo. Gi'ningonite hukikevo ido' gaba hitavo ido' gumine ve nete numuno izi ve'vizi dizi daa' naze. 20Nemu' nene heneni nganenitine nene gi'ningonite hukamavo gaba hitamivo gumine vete damilizani' o minine' ebe' Okulumokuko nene milalo. 21Lutine nene henenitine minelida mineline' nenako nemu' nene henenitine Okulumokuko milalo.
Okode'mi Olo' livi' Nemu' Izesu' Line' Gamazi
(Luka' 11:34-36; 16:13; 12:22-31)
22Evene' volone' akate nene vete ne'mo olo' livi' ne'mino mino do soto' o-ledaa' neive. Ido' lukali'mi vele lamine' ha mineline' nene O'moso'mo okonga luka muki' nene hize labana' ele-gedeleseive. 23Ido' lukali'mi vele've goloso o noline' ne'mo nene okonga lukau' nene liti'musovo' ize vai' lo mineleseive. Ee, labana' ele-gedeline' inite' nene goloso ogavo lukau' liti'muso izeline' nene, agae, mo liti'muso gehepeve golosou' minelesane.
24Ido' ve mali'mo gono evene' sitato' ngelo ma damoloseive. A'mine ve sitato' gono dalosa iline' nene ve hamota ma lulo emeleseiha sita' nene lulo ngelo ngemamoloseive. Mala lulo emeline' nene mala lulo emamoloseive. Ido' ma velo' gi'mizo eze gono amuzo molo daline' nene ma vemu' gosele' belavo gono gamazi lo-deline' nene ngelo damoloseive. A'mine'mine ogo gaza monilo' gono do luka a'mine moniu' molo lamine' iline' nene luka O'moso emo gamazi lido' gele do eze gelekele' o-daa' anive ngelo minamolosane.
Gate Muki' Gelaa' Monovomu' Izesu' Line' Gamazi
25Nemu' naza ti' lo nolo-lingimuve: Ga'nali'mo helamo vetesi ha mineloningumu' noso' nite' nene nani nalonivo lii gopo gatine gilaa' nani' nene alamilo. Ido' okodidokumu' nene nanite' ngolalonivo li gopo gatine gilaa' nani' nesi nene mo alamilo. Vetesi minevo' alevo' ogo minaa' ne'mo noso' nite' nene ivile' ogosa inite' naba neivo ido' okode ne'mosi nene okodelo' inite' nene ivile' ogo inite' naba nenaze. Nemu' nene gopo gatine gilamilo. 26Ido' lingine veleta pateli monaa' nani' nama neti monovo nemu' nene ma gatine gili' nalo. Ingine naliza noso' nite'ine nene zuho' isa'mani' nenako nemu' nene noso' nite' dolizi di milaa' numungu' nene milisa'mani'za Okulumoku' metibo ne'mo nene noso' nite' ngemaa' neive. Ne'mine o-ngedaa' neine'za lengi' nete ngivile' igi inite' naba nizanako O'moso'mo lengikumu' nene ha gele minaa' neive. 27Lengikuti' ve zaholi'mo inite' matakumu' gopo gala ma gele do vo minelidi'mo eze mino molo iline've nene do ha'na ilive. Mo ngelo ngomosi ma do ha'na amoloseize. Nemu' nene gopo gatine gilamilo. 28Ido' okodido' initekumu' nene nanimu' gopo gatine gilaa' nave. Guviseu' guvovo inite' nene dizi guvovo iga' nani' nemu' nene ningi gililo. Ingine gono di oko'nido' inite' nene ma ongoti ngilisa'mani'za O'moso'mo do lamine' o-ngedaa' neive. 29Gozopo' guvelesi ve Solomoni' nene oko'nolo' inite' lamine' goloso ngolaa' ine'za naza ma lo-lengemelove. Aza ngolaa' ine' inite' nene lamine' minani'za guvovo iga' nani' inite' nene mo ngivile' isa'mani' ve. 30Ido' a'mine guvovo inite' nene inite' lamine' ne'mine minamo gamene ha'na minesa'mive. Idise ha mineline'za aize' nene goko' lavo evenelite oloku' di gizilisave. Ne'mino neine'za O'moso ne'mo a'mine guvovo inite' nene do lamine' goloso oga' neive. O'moso ne'mo haza inite' a'ne'mine nene ha do lamine' o-ngedaa' neine' nenako lengi' nene guvovo inite' ngivile' igi inite' naba nizani' nenako okodido' inite' nene ma lengemamilido' o neihe. Ha lengemelido' o neive. Nemu' nene lingine amuzo mili O'mosomu' gili ele'vole' ilizanako gili ele'vole' amave. 31Nemu' nene lingine noso' nite' zati' nalone ido' okodelo' inite' zati' dalone li gopo gatine gilamilo. 32Nevo'mine mana'mine ga'ine nene O'moso'mi zuho minamave nete gili a'ne'mine inite' viseto' minaa' nave. Okulumoku' metibo ne'mo nene a'mine dalisa gilani' inite' ne dami haza ma minamilisave lo gele neive. 33Ne neine'za inite' malo' malo' olihe lutine milami O'moso'mo gizebo o-ledeli monovolokisi monovo lisihe'velokisi nene gomu' lutine mili gili' li milalo. Ne'mine igi O'moso'mo gizebo o-ledeli monovolokisi monovo lisihe'velokisi lutine mili viseto' minilizani' nene a'mine inite' nesi lehize-lengedo a'mine okodine losuvo'mi inite' mata' nesi nene ha lehize-lengedeleseive. 34Aize' soto' iline' inite' nene aizekumu' gizebo ha o neinako lingine idise nene a'mine aize' initekumu' gopo gatine gilamilo. Idise soto' iline' initekuti' geni ma soto' iline' nene idise gihiliza votigilelo' o neivo aize' nesi inite' ma soto' iline' nene asi've gamene aize' ne'mo gihiliza votigilelo' lengemelido' o neinaze. Aize' nadolone li gopo gatine gili minavo lingivizalive. O'moso'mo inite' matatine lehize-lengedeleseize. Ne'mine mana'mine initekumu' nene gopo gatine gilamilo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mataio' 6: aso
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
