Lucas 21

Aso lachetaqtaxanaqte aso pa'ai maye choxoraq

(Marcos 12.41-44)

1Qaq co'ollaq ñaq hueta'a aso no'onaxanaxaqui late'erai So Jesús, nache imeteetac nam sallaxanecpi maye ỹasaqtapiguiñi ana alom, ỹasaqteguengui aso 'oonole anam laỹe' ana nachetaqtaxanaqte. 2Qaq nataqa'en ỹauaachigui aso 'oonole pa'ai maye choxoraq. Asomaye ỹasaxayiñi soua lachetaqtaxanaqtel dos lca'achole maye saq 'amaqtaq ca naigui da qaime'n. 3Nache So Jesús 'enapegalo soua lapaxaguenataqa, 'eeta':

–Aỹem ỹoqta 'eesa de'era shenapec da asa'aso pa'ai maye choxoraq napacalec aso ỹan lachetaqtaxanaqte 'enauac namayepi. 4Cha'aye 'enauac namayepi choche lli'iỹoqte anam ỹasaqtapiguiñi, qaq asomaye qalaxaye na'aictaxa da choxoraq, qalaq imatteuo 'enauac asom hueto'ot maye lhuenec lasheue.

So Jesús ỹa'axata'a da qanlaxaañi aso no'onaxanaxaqui late'erai

(Mateo 24.1-2; Marcos 13.1-2)

5Qaq huo'oi soua ỹa'axattrac aso no'onaxanaxaqui late'erai da ỹataqta qaica ca 'ena'am da llo'oxoyec na coma' maye qaỹo'onataxana co'ollaq qano'oxoosheguem asomaye qataq 'enauac nam laỹe llo'oxoraxatpi maye qalapaqtaua'a. Nache So Jesús 'enapeco':

6–Huo'o qome ca na'a'q, qaq qanlaxaañi 'enauac ne'ena qaumiiñitac nagui, saishet qome da huo'o ca 'oonolec coma' da no'onasheguem da huetalec ca lỹa coma'. 'Enauac nlachiguiñi.

Na na'anecpi maye ỹa'axata'a ca loga'tna

(Mateo 24.3-28; Marcos 13.3-23)

7Huaña, nache soua lapaxaguenataqa inattac So Jesús, 'eeta':

–'Am Napaxaguenataxanaq, ¿chaq lagui, qaq ivita ca laloqo' da qanlaxaañi añi no'onaxanaxaqui late'erai? ¿Chaq negue't ca la'anaxat 'enauac de'era qom ivita da ipacchigui?

8Nache So Jesús 'enapeco':

–Maxatchaxa qome, yaqto' qaica ca qami' ỹatenache't. Cha'aye qalota qome na anac da anactaigui da ỹe'enaxat, nache 'eeta': «Aỹem maye Nachaỹem Lca'aguishec Ñim Lo'onatac 'Enauacna», huo'otaq 'eeta': «Nagui mashe ivita ye naloqnec.» Qalaxaye saishet qome da qauqochiỹa. 9Qaq qom huo'o ca qaua'aqaitapeguelec da nalattega'tpi qataq cam ỹo'ottapeguec ca nta'a maye ilotague' na lauo' le'ecpi, qalaq saishet qome da qayi'i. Cha'aye hua'auñi qome da anac 'enauac namayepi, qalaxaye saxanaxa qome da ivita ca loga'tna.

10Nache So Jesús queta da da'aqtaxaatac, 'eeta':

–Ca ỹotta'a't shiỹaxauapi deloguiỹa't qome, qataq ca lta'alpi ca shiỹaxauapi delogui' ca lỹa nta'a. 11Qataq huo'o qome ca nacholaxanaxa naua pa'aiguelo naua laỹel ana 'alhua qataq ca nqouaxa. Qataq huo'oi qome naua nalolaxaco naua 'aleu'. Qataq qaila'a qome ca qaica ca 'ena'am da lchec qataq caua lta'al na'anqa na piguem.

12Qaq qom saxanaxa da yo'oq 'enauac de'era, nache qami' qaỹaconeua'alo qome, qataq qami' qaicaata'ape. Ime, qaq qami' qaỹauegueua'alo ana napaxaguenaxaquipi na judiopi, nache qami' qaicoñe't. Ime, qataq qami' qaỹauegueua'alo na nta'alpi maye ilotague' naua 'aleu' qataq nam maiche lta'alpi namayepi, souaxat da qami' ỹapaxaguenataqa. 13Huaña qome, nache qauqopitaxañiỹapec da Aỹem qaua'axacheetac da qaua'aqtaxañim namayepi. 14Qataq qami' saishet qome da qauqataxañiitapigui' ca qartaxaỹaxaqui qom qancotaiỹapec. 15Cha'aye Aỹem qome qami' sanema caua qara'aqtaqalli' qataq ca qaraỹaañiqui, da yaqto' saishet da huo'o ca qami' dataỹa'agueta da qami' ncotaỹapegueto. 16Qalaxaye qami' qoỹaareuo qome, ivira'a ca qaralamaxache qarta'ai qami' ỹaareuo, huo'otaq ca qarqaỹai, huo'otaq ca qarhuo'oi le'ec, huo'otaq ca qanauochaxauai. Qataq ivira'a da huo'oi caua qaỹalaua't da qoñiita. 17Qataq 'enauac qome na shiỹaxauapi maye huetalecna qami' nquiỹalo, souaxat da qami' ỹapaxaguenataqa. 18Qalaxaye saishet qome da huo'o ca 'oonolec laue ñi 'oonolec da qoñiita da deqat. 19Qaq cam saishet da huo'o ca iqocha'a, qaq nacheca ca nauec cam nca'alaxa maye qaica ca loga't.

20Qaq qom qauloỹa'a na Jerusalén da na alleppi maye alaataxaicpi saqaỹapeque naqa'en namaye, nache qami' qauaỹaañi da saqaỹaloq da qailaxachigui. 21Nache nam netaña na 'alhua Judea no'on da datauec da ỹe'egueesheguemec qome ana qaỹoqotcheguemec 'alhuapi. Qaq nam netaña na Jerusalén qalaq no'on da ca'ai qome namaye. Qaq cam huetalec na no'onaxa, qalaq no'on qome da saishet da ñe'eguelaxaua'a na nỹecpi. 22Cha'aye que'eca na'a'q laloxoqui da Ñim Lo'onatac 'Enauacna ỹauo'o ca nhuaxanaguec 'enauac na shiỹaxauapi, yaqto' ipacchiguilo naua 'ena'ape naua ñiyigui'she la'aqtaqa Ñim Lo'onatac 'Enauacna. 23Qaq ¡choxoraale qome aca 'alo maye hualaxai qataq acam ña illepaxaatac ca llalec! Cha'aye 'enauac nam huetalec ne'ena 'alhua, huo'o qome ca lta'araic nque'eenaxac qataq ca nhuaxanaguec. 24Qataq huo'o qome na qaỹalauat qaira'a ca ỹeelonec qataq huo'o na qaỹauec ncoñeteguishecpi qaỹauegalo naua ỹotta'a't 'aleu'. Na nỹecpi na Jerusalén qome ỹataqta qailaxachigui qataq noxonec, loxonec na shiỹaxauapi maye chegaqauec, choche ivitta'a qome ca laloqo' da nataqa'en que'eca shiỹaxauapi qailaxachigui.

Da lviraxac qome na Shiỹaxaua Llalec

(Mateo 24.29-35, 42-44; Marcos 13.24-37)

25Nache huo'o qome na la'anaxatpi añi nala' qataq ñi ca'agoxoic qataq ana huaqaañipi. Qataq nam ỹotta'a't shiỹaxauapi maye huetalec ana 'alhua ỹataqta sa ỹaỹaten ca 'eetec, qataq ỹataqta ñi'i, souaxat da lchec da l-lamaxa ana lapaxa aso auaxai. 26Nache na shiỹaxauapi ỹataqta decopchetac qome, souaxat da deuennataxaatapeguelec cam qauem maye ñaq nata'a ana 'alhua, cha'aye ivira'a qome ana huaqaañipi maye hueto'ot na piguem ỹataqta da cholaxan. 27Huaña qome, nache qaila'a Aỹem Shiỹaxaua Llalec, sootalec ca lo'oc na piguem ỹataqta qaica ca 'ena'am da ỹa'añaxac qataq da ỹo'oxoyec. 28Qaq qom ivita da yo'oq 'enauac ne'ena, nache ỹataqta qana'añaxache qataq qanauaxaỹaxañiiyishegue'm naua qarqaigolli', cha'aye mashe saqaỹapeque ca laloqo' da Ñim Lo'onatac 'Enauacna qami' nqateeguesopa da lchec.

29Nataqa'en So Jesús ỹauo'o so daloqnaxana, 'eeta':

–Qauloitagui qome aca higo lcheyec, huo'otaq aca lỹa qo'oipaq. 30Da ivita da qauloỹa'a da nsala, nache qami' qauaỹaañi da mashe sa qaỹapigui naua nta'api. 31Qaq nache 'eetec nataqa'en qom qami' mashe qauloỹa'a da yo'oq 'enauac ne'ena, nache qauaỹaañi da mashe saqaỹapeque da nvi' da lo'onataxanaxac Ñim Lo'onatac 'Enauacna.

32Qaq ỹataqta 'eesa de'era sa'axat da hua'auñi qome da yo'oq 'enauac ne'ena, qom huo'otaq saxanaxa da ileu na shiỹaxauapi maye huetaiguilo ne'enaua na'axa'te. 33Qaq na piguem qataq ana 'alhua imeuo qome, qalaxaye da ỹa'aqtac saishet da imeuo.

34Qalaxaye maxatchaxa, saishet da qaumiiguet da qauennacheetega da qauo'oche ca qarquia'axaqui qataq da qaumiiguet da qartaqai, qataq saishet da qaumachiỹalec nam chochaqna, yaqto' que'eca na'a'q saishet da qami' ique'elaxa't, 35nache qoñiita'am cam nqoiñiguishec. Qaq 'era qome da 'eetec da lviraxac que'eca na'a'q, qom nvita 'enauac na huetalec ana 'alhua. 36Qaq qami' ỹataqta qanaỹamaxacheetai' qome qataq qoquiito'oto naua na'axa'te da qanqouagaxauñiitac, yaqto' ishet da qami' ỹe't, qom ivita da yo'oq 'enauac ne'enapi, qataq yaqto' ishet da qanachaxañeeua'a qom nvi' na Shiỹaxaua Llalec.

37Nache So Jesús dapaxaguenataxaatac ye na'a'q hueta'a aso no'onaxanaxaqui late'erai, qaq ye pe qalaq lo'ochaqa' añi saqaỹoqotcheguemec 'alhua maye nanqa' ana Olivo. 38Nache 'enauac na shiỹaxauapi 'ottaua'a naxa aso no'onaxanaxaqui late'erai, da yaqto' na'axaỹaxana Somaye.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lucas 21: LÑLE13

Highlight

ಶೇರ್

ಕಾಪಿ