CAWA'TA TUNITA 44
44
Yosef wak guro-biyomna
1Yosef ka di sa ma hay ziyna valamna ala: Sumun lakŋi naŋ ma hob birimna visi hiɗi wana, asam goy ŋaa'a a nisi ziyimu, cuk gurjuna vi gigekaw hay birimna valamu valamu. 2Naŋ ma tun tasata van ta wayna hay kaw, tasat ta cuk gurjun haya'ta, naŋ ma tuna' hay birimna vi ma joriyo suwsi kafna, tuna' hiɗi gurju ta nam co gus wa-alkamarena hiɗi na'ta. Sa ma sunda li ki Yosef dum nala.
3Hay buurta ka'ta, hay li ma liyn fo goyo, sumun kayni nisi gisi irsi hiɗi kurona visiya. 4Hay li ma nisi bay kal goy tam ziyn gine tuwa kayni, Yosef di tam sa ma sunumna: Fokaŋ kulo'o, jaŋaŋ kuɗ sumun kayni; hay li ma naŋ coowa tisiya, naŋ ma di tisiya: Nigi li joot baŋal ŋaat kay mige? 5Tasa-wayta ta mulanna ci niy haya'ta, ta nam wi sle ma ŋayayn hiɗi na'ta nigi may sla'ayɗi su? Nigi lum kayn mi law ma joo'o. 6Sa ma sunda co katsiya, nam disi sle ma mulamna dumtina. 7Nisi hot dum ala: Mulma'na, naŋ di sle ma ki kayn nala kay mige? Numa sa sunda vaŋ lakŋi Lawn hinma li law ma kayn naɗige. 8Humaŋu, gurjut ta numa fa' hay birimna vumat kaw numa hotaŋgi ay kuma'a hay nagat Kanaan pa, nala numa as kul gurjuta lebo or ma hay ziyna vi mulaŋŋa ɗawn kultige? 9Jarma lakŋi sa ma fi gurjutawa hay ɓalamuna, nam ma ti mitta, numa segen naŋ ma yawma gorvo kafe. 10Nam di'e: Van ma li'e ki nigi di nala, sa ma nan fi tasa-waytawa hay ɓalamuna, ma li mi gorvona vanu, nigi segen law may kigiɗi. 11Wulini wulini nisi yaw birim ma kay kuron gaa kaf, gigekaw mal vun birimna valam goyo goyo. 12Sa ma sunda vi Yosef ɗuw hay birimna, tun caw ay tam ma ŋolla pa ta-ta tam ma goora, nam fi tasa-wayta hay birimna vi Benyamin. 13Nisi jet sligar ma tisin goyo, gigekaw yaw wa-alkamare ma kulo kay kurona valamu valamu, nisi hot hay hoyok-ziyna.
14Yuda hiɗi guro-biyomna co hay ziyna vi Yosef, hay liyn ma nisi ays jewna. Nisi girif gaa vokomu. 15Yosef disiya: Nigi lum na kayn mi law mige? Nigi may wi ala san ki nan nala gaŋeraŋa valam ka'a kay wi law ma ŋayayna ɗisu? 16Yuda hot dumu: Mulanna, numa daŋgi ɗawn mi meloge? Numa da wulin ɗawn anige? Numa wulin but tuwma goy vokaŋ ɗawn hiɗi mige? Lawn pat dir sulukŋa vuma'awa goyo tuta. Mulma'na, numa lakŋi si gorvona vaŋu tuta, numa segena hiɗi ma fi tasa-wayt hay ɓalamna kaf. 17Yosef di'e: Lawn hinan li law ma ki kayn naɗige. Sa ma nan fi tasa-wayt hay ɓalamna nan vum gorvo ɗawn mi namu, may nigi segena, hotgi tam bugi hiɗi toyta.
18Nala Yuda co goboy tam Yosef, nam di'e: Lan slugota, mulanna. Nan ma sunda vaŋ zawni naŋ humaŋ dita van neɗe, may naŋ ma muɗ ɦiy katanɗi, kay naŋ ŋray ca ki Farawn nala kaw. 19Naŋ job sa sunda vaŋ ala bugi ka su? Lebo goor-bugi ka su? 20Numa hot dit ala buma ma maar ka'a, goor joriyo ma nam vuɗum hay maarta valam ka kepe, goor namna ɓasulum ma susi kepn mitiya, nam hini kepe, bulum minim ŋolo. 21Naŋ ka duma ala numa maramay kuɗma'a, kay naŋ min wum hiɗi iraŋu. 22Numa hotaŋ dit ala: Goor kayni as hin bulumɗi; la nam hin bulumiyawa, bulum ɗawn ma mit waŋ'. 23Naŋ duma' ala, la goor-bugi ma goor co kuɗgiɗi, nigi as co vok iran tanɗi. 24Hay li ma numa co tam buma'a ma sunda vaŋŋa, numa vum labar ma naŋ duma'tina. 25Buma duma' ala numa ma hotaya gar va ma tin neeɗa. 26Numa hotom dit ala: La goor-buma ma goor may kuɗmaɗi, numa as co tanɗi, may la nam ka kuɗma'a, numa as co'o, kay la goor-buma ma goor may kuɗmaɗi, numa as waŋ iraŋɗi. 27Buma'a ma sunda vaŋu duma ala: Nigi wi ala cata van vuɗan guron ma', 28ma kepna bay goyo, nan var ala nam jeti goyo kay sle ma fulla kla, kay ta-ta wulini iran may wumɗi. 29La hen zawni nigi vum kan lo, la law ma joo'o fumawa ɗawni, nan mit gaa hay zulda hiɗi ŋus ma haɓn kan ɗawni hiɗi yorta. 30Wulin kayni, goor namna bunu dikam juni talam dono'o, la nan hot tam bunu bay nam kuɗanu, 31bun ma mita, hay li ma nam ma wi ala goor mayɗi ɗawni; nala numa sa sunda vaŋ lakŋi, numa hin buma mit gaa hay zulda hiɗi ŋus haɓn kalam ɗawn hay yorta. 32Nan kay tuwan zawni vurna tuwan baŋal goora, kay nan di mi bun ala la nan hotomi talamɗi, nam ma tun suluk namna kanu ta-ta hay vatɗita. 33Kay na'ta mulanna, nan siɗawaŋu kay naŋ ma hinan mus baŋal goor kayni, ki gorvona vaŋ nala; goora tuɗ malam kuɗ guro-biyomna. 34La goor may kuɗanɗi, nan co tam bun ɗawn co tige? Hay! Yorta vi bun na'ta ɗawni nan min wa' hiɗi iranɗi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
CAWA'TA TUNITA 44: Massana
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001