San Mateo 2
2
Mímixeticheri p'urhemperakua
1Enga Jesusi andajpenupka Beleni enga Judea jaka, imani jurhiatekuechani isï enga irecha Erodesi juramuni jápka. Jerusalenksï niáraspti máru jóskuecheri mímixeticha, tata jurhiata andarakuarhu uératini 2kurhangorheparinksï:
–¿Nani jarhaski ima enga andajpenuka ima enga judiuechani irechekuauaka? Jucha imeri jóskuani tata jurhiata andarakuarhu exeska ka k'éri ambeksï arhini jurhaska.
3Íni ambe irecha Erodesi kurharini ka Jerusaleni anapuechaksï uandanheaspti. 4Ka tánantaaspti iámendu tátecheri urhejtsïkurichani ka juramukua jurhentpirichani ka iretarhu anapuechani ka kurhamarheaspti:
–¿Krístu nanisï andajpenupirinki? 5Ka imaksï arhispti:
–Beleni enga Judea jaka, jimboka Diósïri uandari ísï karaska:
6“Ka t'u Beleni engari Judea jaka,
nóri sánderu sapichueska.
Judea anapu k'érati iretecha jinguni,
jimboka juramuti ma jimini uéraaka,
enga Israeli jucheti iretani urhekupaaka.”
7Jiájkani Erodesi jóskuecheri mímixetichani sïpatekuarhku ióarhiaspti ka sési kurhambeantaaspti na enga jatini ima jóskua xarharapka. 8Ka Beleni axaani jámani arhiaspti:
–Ni je jini ka sési kurhangorhe je charhakueri ambe ka engajtsï exentaakia jújtsïni je aianguni, ka jíjtuni niuaka k'éri ambe arhini.
9Mímixetichaksï irechani kurhajchatini niraspti, ka jóskua engaksï tata jurhiata andarakuarhu exepka urhekupaaxapti ka jima anhaxurhispti nani enga charhaku jápka. 10Mímixetichaksï jóskuani exerini, kánekuaksï tsípespti ka sésiksï p'ikuarheraspti. 11K'umanchekuarhuksï incharini charhakuni xéntaspti, Maria imeri amamba jinguni, ka tinguixurhikutinksï k'éri ambe arhispti. Tátsekuaksï mítaaspti intsïmperakua jatakuechani ka tiripiti ka tióxunhanda ka p'untsumekuaksï íntskuspti. 12Ka tsánharhitanhasptiksï ka ístuksï aiangunhanksï eskaksï no k'uanhatsentapiringa jima enga Erodesi jápka, ka máteru xanhari jimboksï níntaspti.
Ejiptuksï sïpakorhesti
13Engaksï jóskueri mímixeticha níntapkia, Acheri ánjeli ma Joseni tsánharhikuarhu xarhakuspti ka arhispti: “Jauara ka jauata charhakuni ka amambani ka Ejiptu ni sïpakorheni. Jima ja, na engakini jatini jamberi ji arhiaka, jimboka Erodesi charhakuni jirinhantaaka jimboka uándikuni uéksïnga.”
14Jose tsínharhispti ka jauataspti charhakuni ka amambani ka Ejiptuksï niraspti sïpakorheni, 15ka jimaksï irekorhespti enga jamberi Erodesi uarhipka ka ísï úkorhesti enga Acha imeri uandari jimbo uandaka: “Ejiptu uératini uandajpaska jucheti uátsïtini.”
Erodesi sapichani uándikutarkorheasti
16Enga Erodesi mítepka eskaksï jóskuecheri mímixeticha tandosï úntaspka, kánekua ikiaspti ka uándikutarkorheaspti iámendu sapichani, engaksï tsimani uéxurhini jatiripka Beleni ka jimajku isï anapuechani, jimbokaksï jóskuecheri mímixeticha jánhastaspka na enga jatini uénapka ima jóskua xarharani. 17Jiájkani úkorhesti ima enga Diósïri uandari Jeremiasï uandapka:
18“Rama jiuakorhenhaxati,
jurajkutakorhenhantani janhani uenhani
ka k'arhangunhantani;
Rakelisti enga uájpechani uekuajka;
ka no uékasïndi eska sési arhinhantaaka
jimbokaksï uájpecha uarhirixapkia.”
Ejiptu uératini k'uanhatsentskua
19Ka enga Erodesi uarhipka, Acheri ánjeli ma Joseni Ejiptu tsánharhikuarhu xarhakuspti, 20ka arhispti: “Jauara, tataka sapichuni ka amambani Israeli pántsï, jimbokaksï uarhiskia ima engaksï tataka sapichuni uándikuni uékempka.”
21Ka Jose jauaraspti ka tataka sapichu ka amamba jingunksï Israeli k'uanhatsentaspti. 22Ka enga kurhajchpepka eska Arkelao Judea juramuxapka, jima enga tátjemba Erodesi juramuni jápka, chéspti jima niárani. Ka tsánharhikua jimbo aiangukata Galilea isï niraspti, 23ka Nasareti niraspti irekani, ka ísï úkorhesti ima engaksï Diósïri uandaricha uandapka eska Nasareti anapu arhinhapiringa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
San Mateo 2: DKPJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
