Mateo 4

Ri k'amb'al upa ri Jesús

(Mr. 1:12-13; Lc. 4:1-13)

1Tek'uchiri', ri Jesús xk'am b'i ruma ri Ruxlab'ixel ri Dios pa jun luwar katz'intz'otik cha' kak'am upa ruma ritzel winaq. 2Ri Jesús xk'oji' chila' yey cuarenta q'ij y cuarenta aq'ab' k'u ri' na jinta k'o xutijo. K'isb'al re wa' xpe numik che.

3Xqib' k'u ritzel winaq ruk' ri Jesús re kuk'am upa cha' katzaq pa mak, jewa' xub'i'ij che:

—We qatzij at Uk'ajol ri Dios, chat-taqan che cha' taq wa'b'aj ku'an wa —xcha'.

4Ri Jesús xuk'ul uwach:

—Jewa' tz'ib'ital kan chupa Rutzij Upixab' ri Dios:

Na xew ta ruma ri wa e k'as ri tikawex,

ma e k'aslik ruma ronoje taq ch'a'tem kel lo puchi' ri Dios Dt. 8:3

—xcha'.

5Ek'uchiri', ritzel winaq xuk'am b'i pa ri santowilaj tinamit Jerusalem k'a chikaj che ruwi ri Rocho Dios. 6Xub'i'ij k'u che:

—We qatzij at Uk'ajol ri Dios, chak'aqa b'i awib' k'a chu'lew y na jinta k'o kak'ulumaj, ma jewa' tz'ib'ital kan chupa Rutzij Upixab' ri Dios:

Ri Dios keb'utaq lo ru ángeles awuk'

cha' katkichajij.

Katkichap k'u ruk' ri kiq'ab'

cha' na ka'chiqa ta rawaqan che juna ab'aj Sal. 91:11-12

—xcha'.

7Ri Jesús xuk'ul uwach:

—Jewa' tz'ib'ital kan chupa Rutzij Upixab' ri Dios:

Mak'am upa ri Dios Qajawxel#4:7 Na utz taj kamin uwach ri Dios cha' kuk'ut ruchuq'ab'. Dt. 6:16

—xcha'.

8Ek'uchiri', ritzel winaq xuk'am tanchi ub'i ri Jesús chutza'm jun nimalaj juyub' y xuk'ut k'u chwach, ronoje ri taqanik ka'an puwi taq ri tinamit che ruwachulew ruk' ronoje ruchomalil taq wa'. 9Xub'i'ij k'u che:

—Ronoje taq wa' kanya paq'ab' we kaxukub'a' awib' chinuwach y kaloq'nimaj nuq'ij —xcha'.

10Ek'u ri Jesús xub'i'ij che:

—Chatela chinuwach Satanás, ma jewa' tz'ib'ital kan chupa Rutzij Upixab' ri Dios:

Lik chaloq'nimaj uq'ij ri Dios Qajawxel

y xew Rire chanimaj uq'ij Dt. 6:13

—xcha'.

11Ek'u ritzel winaq xuya kan ri Jesús y xel b'i chiri'. Xek'un k'u lo jujun ángeles y xkijeqo kakinimaj ri Jesús.

Ri Jesús kujeq kak'utun chwi rutaqanik ri Dios

(Mr. 1:14-15; Lc. 4:14-15)

12Ri Jesús, echiri' xuto k'o ri Juan pa cárcel, xe'ek tanchi Galilea. 13Xel b'i pa ri tinamit Nazaret y xe'jeqela pa ri tinamit Capernaúm. Wa' jun tinamit k'o chuchi' ri mar pa ri luwar re Zabulón y re Neftalí. 14Xu'an k'u wa' cha' e ku'ana janipa rutz'ib'am kan ri q'alajisanel Isaías echiri' xub'i'ij:

15Pa ri luwar re Zabulón y re Neftalí,

ri k'o pa rub'eyal ri mar,

ch'aqa ya' che ri nimaya' Jordán,

pa taq ri luwar re Galilea pa ejeqel wi

uk'iyal winaq na e ta aj judi'ab';

16ri tikawex ejeqel pa q'equ'm xkil ri Q'ijsaq

yey ri ejeqel pa ri q'equ'm re kamik,

xwon ri Q'ijsaq pakiwi' Is. 9:1-2

xcha'.

17Chwi k'u lo ri' xujeq ri Jesús katzijonik, jewa' kub'i'ij: «Tzelej tzij alaq chwach ri Dios, ma rutaqanik ri Dios petinaq chila' chikaj lik xa naqaj chi k'o wuloq» kacha'.

Ri Jesús keb'usik'ij kajib' e aj chapal kar

(Mr. 1:16-20; Lc. 5:10-11)

18Echiri' kab'in ri Jesús chuchi' ri mar re Galilea, xril pan kiwach keb' achijab' kichaq' kib', jun Simón rub'i' (Pedro kecha che) y ri jun chik Andrés rub'i'. Rike e aj chapal kar, yey e ri' ketajin che uk'aqik ri ki atarraya pa ri mar.

19Ek'u ri Jesús xub'i'ij chike:

—Chixpetoq, chixterej lo chwij, y ri'in kan'an chiwe ix aj molol tikawex,#4:19 “Ix aj molol tikawex”: Ri chak xya' chike e kekitzukuj tikawex re keb'u'an utijo'n ri Jesús. jela' pacha' i'anom lo chike ri kar —xcha chike. 20Y na jampatana xkiya kan ri ki atarraya y xeterej b'i chirij ri Jesús.

21Xb'in k'u pan jub'iq' chik y xeril chi pan keb' achijab' kichaq' kib', jun Jacobo rub'i' y ri jun chik Juan rub'i'. Wa ka'ib' e uk'ajol ri Zebedeo. Rike e k'o chupa jun barco junam ruk' ri kiqaw y ketajin che uk'ojoxik ri ki atarraya. Ek'u ri Jesús xeb'usik'ij b'i. 22Y na jampatana rike xkiya kan ri kibarco y ri kiqaw, y xeterej k'u b'i chirij ri Jesús.

Ri Jesús kak'utun chikiwach uk'iyal winaq y lik e k'i ri keb'ukunaj

23Ri Jesús xik'ow che ronoje tinamit re Galilea. Kak'utun pa taq sinagogas chujujunal tinamit, kutzijoj ri Utzilaj Tzij re rutaqanik ri Dios y kukunaj ronoje uwach yab'il k'o chike ri winaq.

24Konoje ri e k'o pa taq ri tinamit re Siria xketa'maj taq ri ku'an ri Jesús. Xekik'am k'u lo chwach Rire konoje ri tikawex ruk' taq uk'iyal k'axk'olil. Wa' e ri e k'o pa yab'il, ri k'ax kik'ulumam, ri e k'o pakiq'ab' itzel uxlab'ixel, ri keb'umaj tew y ri e sik. Ek'u ri Jesús xeb'ukunaj konoje.

25Lik e k'i k'u ri xeterej b'i chirij. Wa' e petinaq Jerusalem y che jujun chik luwar re Judea, kuk' ri e petinaq pa taq ri tinamit re Galilea, re Decápolis y che jujun chik tinamit e k'o ch'aqa ya' che ri nimaya' Jordán.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mateo 4: acrN

Highlight

ಶೇರ್

ಕಾಪಿ