التكوين 22
22
بركة النبي إبراهيم
مولانا يبارك النبي إبراهيم اعلى أساس طاعتو للتضحية بولو إسحاق
1وبعد يلين اسكن النبي إبراهيم فارض الفلسطينيين، ڮام مولانا وأمتحن النبي إبراهيم وعيطلو: يا إبراهيم ! وڮال النبي إبراهيم: اراعيني يا مولانا. 2وڮال مولانا للنبي إبراهيم: اڮبظ ولك إسحاق اللي امعاك واللي تبغي، وامشي شور ارض المُريا، وذبحو فم، وحرڮو، وڮدمو كيفت قربان اعلى وحدة من ذوك لكدة اللي لاهي انعتلك. 3وانهار من غد اوعا النبي إبراهيم امع الصباح واحزم اعلى احمارو، وامشا امعاه بإثنين من اعبيدو وامعاهم ولو إسحاق، وجهز لحطب اياك يحرڮ اعليه القربان، وامشا اعلى جيهة لبليدة اللي ڮالّو مولانا. 4وانهار الثالث رڮب النبي إبراهيم وجهو وشاف لبليدة اللي ڮالّو مولانا من ابعيد. 5وڮال النبي إبراهيم للعبيد اللي امعاه: ابڮاو هون امع لحمار اياك نمشي آنا امع الطفيل وانصلو لمولانا، ومن فم نرجعولكم. 6وڮام النبي إبراهيم ورفّد إسحاق لحطب، وارفد النبي إبراهيم مشعل النار والموس، وامشاو فبلد. 7وڮال إسحاق لبوه النبي إبراهيم: يا بويَ! وڮالّو النبي إبراهيم: اراعيني يا ولي. وڮالّو: وينهو لخروف اللي لاهي ينحرڮ كيفت قربان؟ بيهلي إسحاق شاف النبي إبراهيم عندو النار والموس يغير ما شاف لخروف. 8وڮال النبي إبراهيم لإسحاق: مولانا لاهي يدبر لخروف اللي لاهي ينحرڮ كيف قربان، لا يشطنك شي. وواصلو مشيهم فبلد.
9وإلين لحڮو لبليدة اللي ڮال مولانا للنبي إبراهيم، ڮام النبي إبراهيم وابنا فم مذبح، واجمع لحطب، وكتف النبي إبراهيم ولو إسحاق ودارو فوڮ المذبح فوڮ لحطب. 10ومد النبي إبراهيم ايدو واڮبظ الموس اياك يذبح ولو إسحاق. 11وفذا عيطلو ملاك الله تعالى من السما: إبراهيم إبراهيم! وڮال النبي إبراهيم للملاك: اراعيني. 12وڮال الملاك للنبي إبراهيم: لا اترڮب ايدك اعلى الطفيل، ولا اتعدلّو أي شي. آنا ظرك اعرفت اعلنك خايف من مولانا، ولا ابخلت ابولك الوحيد اعلى مولانا. 13وخرص النبي إبراهيم اوراه وشاف كبش متعلڮ باعراش الصدر. وڮام ڮاسو وجابو وذبحو وحرڮو القربان بل ولو. 14و سما النبي إبراهيم ذيك لبليدة بأسم يَهْوَه يَرأَه اللي معناه الله تعالى يدبر. ولهاذا السبب ينڮال اليوم: فكدية الله تعالى يدبر. 15وعيط ملاك الله تعالى للنبي إبراهيم من السما مرة اخرا 16وڮال: راعيني نحلفلك بيكلي عدلت ذا اللي اطلبت منك ولا احكمت عني ولك الوحيد . 17لذاك لاهي انباركك وانكثر ذريتك ويعود عددهم كيفت انجوم السما وكيفت احصي التراب لبحر، ولاهي تورث ذريتك مدن اعدائها. 18وبذريتك تتبارك جميع أُمم لارض بيك اللي اسمعتلي. 19وعاڮب ذاك ارجع النبي إبراهيم شور اعبيدو الثنين ورجعو كاملين شور بئر السبع بل امنين ساكن النبي إبراهيم.
20وانڮال للنبي إبراهيم عاڮب يلين خلڮت هاذو لمور: اراعيها مِلْكَةُ خلڮولها أولاد لخوك ناحور: 21عوصا هو لبكر وخوه بوزا وقموئيل بو أرام 22وكاسد وحزواَ وفلداش ويدلاف وبتوئيل . 23واخلڮ لبتوئيل رفقة. هاذو الثمانية خلاتهم مِلْكَةُ لناحور خو النبي إبراهيم. 24واملي خلاتلو خادمو اللي أسمها رؤومة: طابح وجاحم وتاحش ومعكة.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
التكوين 22: الحسانية
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/