Матфей 7
7
Судендамать колга
(Лук. 6:37-42)
1«Тяда суденда, эста тиньге аф ульхтяда судендафт; 2сяс мес кодама судса судендатада, Шкайсь стама судса тиньге судендатядязь. И кодама унксса ункстатада, стама унксса тиньге ункстатядязь. 3Кода тон няйсак сардть кемай ялгацень сельмоса, но аф няйсак шочкть эсь сельмосот? 4Кода тон мярьговат кемай ялгацти: "Макск, таргаса сардть сельмостот", мзярда тоньцень сельмосот шочка? 5Шамафксонь канни! Васенда таргак шочкть эсь сельмостот, и эста няйсак, кода таргамс ялгацень сельмоста сардть.
6Тяда макссе пинетненди мезевок иняру – синь комотихть лангозонт и сязенттядязь. Тяда ёря тувотнень инголи питни ожнат – синь тапсесазь ожнатнень пильгалост».
Анада, вешеда, чакада
(Лук. 11:9-13)
7«Анада, и тейнть максови; вешендеда, и мутада; чакада, и тейнть панжеви. 8Эрь анайти максови, вешендись муй и чакайти панчсазь. 9Кие эздонт эсь цёранцты максы кев, кда сон анай кядьстонт кши? 10И анандяряй кал, максы тейнза куй? 11Кда тинь, кяжи ломатть, машттада шабантенди паронь максома, эста сядонга Менелень Алянте максы парот сятненди, кит анайхть Сонь кядьстонза.
12Тяфта, сембоса тиендеда ломаттнень мархта стане, кода мяленте синь тиендельхть мархтонт. Тяса койть и пророкнень тонафтомаснон смузьсна».
Тяйня ортась
(Лук. 13:24)
13«Сувседа тяйня ортава, сяс мес кели ортась и оцю кись вятихть аду, и ламотне молихть эзгаст; 14а тяйня ортась и тяйня кись вятихть эряфти, и аф ламотне мушендсазь тя кить».
Шуфтсь содави иможензон коряс
(Лук. 6:43,44; 13:25-27)
15«Пеледа прорококс прянь тиендида, конат сашендыхть тейнть учань кедьса, а потмоваст синь – пяляз врьгаст. 16Тевснон коряс содавихть синь. Дяряй кочксихть сялги тишеста виноград али кумбаравста инжир? 17Цебярь шуфтсь максы цебярь имошт, а кальдяв шуфтсь – кальдяфт. 18Цебярь шуфтть лангса аф эрсихть кальдяв имошт, а кальдяв шуфтть лангса – цебярьхть. 19Эрь шуфтть, кона аф максси цебярь имошт, керсесазь и ёрясазь толс. 20Сяс иможснон коряс содасасть синь.
21Аф эрсь, кона корхтай Тейне: "Азор! Азор!", пови Менелень Оцязорксшити, а ся, кона пяшкотькшнесы Менелень Алязень мяленц. 22Ся шиня ламотне мярьгихть Тейне: "Азор! Азор! Дяряй аф Тонь лемсот минь пророчендаме? Аф Тонь лемсот панцеськ кяжи ваймопожфнень ломаттнень эзда? Аф Тонь лемсот тиендеме лама лия вии тевда?" 23И эста азса тейст: "Мон мзярдовок тинь ашедязь сода; ворьда маластон, коень колайхть"».
Валвеляфкс кафта кудонь путыхнень колга
(Лук. 6:47-49)
24«Тяфта, кие кулхцондсыне Монь ня валнень и тии синь коряваст, ули ёню ломань лаца, кона путозе эсь кудонц кев лангс. 25Тусь пизем, лиссть трвастост ляйхне, уфазевсть варматне и эрьхтсть ся кудть лангс; но сон ашезь калада, сяс мес путфоль кев лангс.
26А кие кулхцондсыне Монь ня валнень и аф тии синь коряваст, ули ёньфтома ломань лаца, кона путозе эсь кудонц шувар лангс. 27Тусь пизем, лиссть трвастост ляйхне, уфазевсть варматне и эрьхтсть ся кудть лангс, и сон каладсь, и марнек срадсь».
28Мзярда Иисус аделазе корхтаманц, ломаттне дивандакшнесть Сонь тонафтоманцты, 29сяс мес Сон тонафтозень синь аф стане, кода койти тонафтыхне и фарисейхне, а кода ломань, конань ули азорксшиц.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Матфей 7: ОС16
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Библиянь ётафтома институтсь, 2016
