Иоанн 5
5
Иисус пчкафтсы алять Вифездань эшеляма вастса
1Сяда меле ульсь еврейхнень иласна, и Иисус сась Иерусалиму. 2Иерусалимса Учань ортатнень маласа ули эшеляма васта, кона евреень кяльса лемневи Вифезда. Тоса ульсть вельхкс мархта вете ётама вастт, 3коса матфоль пяк лама сярядида, сокорда, шаморда, параличса колафта, конат учсезь ведть комболдоманц. 4Шкаень ангелсь пингонь-пингонь сувсесь эшеляма вастти и шорсезе ведть; и кие васенцекс сувсесь ведти шорямдонза меле, ся пчксесь, кодама урмаса афоль сяряде.
5Тоса ульсь ломань, кона сярядсь колмогемонь кафксува киза. 6Иисус няемок сонь веляда и содамок: сон сяряди ни куватьс, корхтай тейнза: «Ули мяльце пчкамс?» 7Сярядись каршезонза мярьгсь: «Ули, пара ломань; аньцек аш ломанезе, кона сувафтолемань эшеляма васту ведть шорявомста; а мзярс мон пачкотькшнян, лиясь ни сувси тоза». 8Иисус корхтай тейнза: «Стяк, сявк ацамцень и якак». 9Ся эстокиге пчкясь, сявозе ацамонц и ушедсь якама.
Тя ульсь ваймамань шиня, 10сяс еврейхнень оцюнясна мярьгсть пчкафти: «Тячи ваймамань ши, койть коряс аф мярьгови тейть кандомс ацамце». 11Сон каршезост корхтай: «Кие монь пчкафтомань, Ся мярьгсь тейне: "Сявк ацамцень и якак"». 12Сонь кизефтезь: «Кие Ся Ломанць, конац мярьгсь тейть: "Сявк ацамцень и якак"?» 13Но пчкафсь ашезе сода, кие Сон, сяс мес Иисус кяшевсь тостонь ломаттнень ёткс.
14Сямольде Иисус васьфтезе сонь Шкаень кудса и азозе тейнза: «Вов, тон пчкять; оду тят сувсе пежес, афоль лисе мархтот мезевок сяда кальдяв». 15Ся ломанць тусь и пачфтезе еврейхнень оцюняснонды: сонь пчкафтыец – Иисус.
16Оцюнятне кармасть панцемонза Иисусонь, мяльсноль шавомс Сонь, сяс мес Сон тиендсь тяфтама тефт ваймамань шиня. 17Но Иисус корхтась тейст: «Алязе фалу тевса, стане Монга тевсан». 18Эста еврейхнень оцюняснон нинге сяда пяк кемокснесь мяльсна шавомс Сонь, сяс мес Сон аф аньцек колсезе ваймамань шить, но и Шкайть лемнезе Эстейнза Алякс, тянь мархта латцезе Эсь прянц ряцок Шкайть мархта.
Шкаень Цёрать азорксшиц
19Тянь каршес Иисус мярьгсь: «Видеста корхтан тейнть: Цёрати мезевок аф тиеви Эсьстонза, кда аф няйсы, мезе тии Аляц. Вдь мезе тии Алясь, сянь тисы Цёрацка. 20Алясь кельгсы Цёранц и няфнесы Тейнза семботь, мезть тиендьсы Сонць. Сон няфти Тейнза нинге сяда оцю тефт, и тинь эздост дивас пратада. 21Вдь кода Алясь вельмафнесыне кулофнень и максы тейст эряф, стане Цёрацка максы эряф сянди, кинди ули мялец максомс. 22Алясь киньге аф судендасы, но судендамань сембе тефнень максозень Цёранцты, 23сембе ванондолезь Цёрать мяленц, кода ванондсазь Алятьке мяленц. Кие аф ванцы Цёрать мяленц, ся аф ванцы Алятьке мяленц, кона Сонь кучезе. 24Видеста корхтан тейнть: кие кулхцондсы Монь валозень и кемай Монь Кучиезти, сянь ули пефтома эряфоц. Сон аф ули судендаф, сон ни ётась куломать эзда эряфти.
25Видеста корхтан тейнть: сашенды пингсь, и сась ни, мзярда кулофне марясазь Шкаень Цёрать вайгяленц, и кит марясазь вайгяленц, сят кармайхть эряма. 26Вдь кода Алясь эряфонь максы лихтибря, стане Цёранцка Сон тиезе эряфонь максы лихтибрякс, 27и макссь Цёранцты азорксши ётафтомс судтьке, сяс мес Сон – Ломанень Цёрась. 28Тяда диванда тянди; вдь сай пинге, мзярда сембе кулофне марясазь Сонь вайгяленц 29и лисихть калмостост: паронь тиендихне вельмайхть эряфти, а кяжень тиендихне – судс.
30Тейне мезевок аф тиеви Эсьстон. Кода кошардсамань Алязе, стане судендан, и Монь судендамазе виде: вдь Мон тиендян аф Эсь мялезень, а Кучиезень, Алязень мяленц коряс».
Иисусонь колга няфтематне-азондоматне
31«Кда азондан Эсь колган Монць, эста азондомазе аф ули афкуксонь. 32Ули колган лия азонды: и Мон содаса – сон азондсы видеть. 33Тинь кучседе Иоаннонди ломатть; и сон азондозе видеть. 34Сембе сяка Тейне аф эряви ломанень пяльде азондомась; тянь корхтаса аньцек тинь идемантень инкса. 35Иоанн ульсь кода палы и вандолды валдоптома; а тинь мялентель аньцек аф ламос кеняртькшнемс сонь валдонцты.
36Но Монь ули лия няфтемазе-азондомазе, кона сяда оцю Иоанноннеть коряс: ся тефне, конатнень путозень лангозон Алязе и конатнень Мон тиендьсайне. Ня тефне няфнесазь – Монь кучемань Алязе. 37И Алязе, кона кучемань Монь, Сонць азондсь колган. А тинь Сонь вайгяленц мзярдовок ашесть куле, шаманцка ашесть няе. 38И аф кирдьсасть седисонт Сонь валонц, сяс мес тинь аф кематада Кучфонцты. 39Тинь тонафнесасть Сёрматфксть, сяс мес арьсетяда вельденза пачкодемс пефтома эряфти; а сон корхтай Монь колган. 40Но тинь аш мяленте самс Тейне эряфонкса.
41Тейне аф эряви шнама ломаттнень эзда. 42Содатядязь тинь: потмосонт аш Шкайти кельгома. 43Мон сань Алязень лемса и тинь аф васьфнесамасть; а кда сай лия эсь лемсонза, сянь васьфтьсасть. 44Кода тинь карматада кемама, кда фкя-фкянь кядьста учсетяда шнама, а фкя-тяка Шкайть эзда шнама аф вешенттяда?
45Тяда арьсе, бта Мон карман муворгофнемонт Алязень инголе; ули тинь муворгофтыенте – Моисей, конань лангс тинь надиятада. 46Кда тинь кемаледе Моисеенди, эста тинь кемаледе Тейненге, сяс мес сон сёрмадсь Монь колган. 47Кда ни сонь сёрматфонзонды аф кематада, кода карматада кемама Монь валненди?»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Иоанн 5: ОС16
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Библиянь ётафтома институтсь, 2016
