Yohane 14
14
Yecho ndi ndela jha kwa Tate
1Yecho ajhakwalobholela bhabholwa bhake, “Nkotoko kubhehe ngolongondi kumiojho jhino, munyeketii Chapanga na unyeketela nenga helahela. 2Nkate pa nyumba jha Tate gwango, ibhii chumbe twe anda nahijhe, nganinnobholile jhe nyenda kunenganikiya mangota yumbe hino. 3Nenga pumbala kujhomolela kunenganikiya mangota pwache jhino, nahika kuntolangana, pumii nenga na mangota ntama papa. 4Mangota mwiimanye ndela jha kuhika kwenio kunijhenda.”
5Bhahe, Tomache ajhakunkonya Yecho, “Bhambo, tukumanyi jhe kumijhenda, ngoheno natumanya bhole ndela jhene?”
6Yecho ajhakunyanguu, “Nenga ndi ndela na uchakaka na ughome. Abhii jhe mundo najhenda kwa Tate changapete kwa nenga. 7Ngaumanya nenga, helahela ngaumanye Tate gwango. Kutumbulii ngoheno mumanyite na umwene.”
8Filipu ajhakunnobholela, “Bhambo, mutulangiye Tate gwino na jwenio jhutumpala.”
9Yecho ajhakunnobholela, “Filipu nikibha na mangota kwa machiko ghoha, bho, umanyite jhe nenga? Mundo jhojhoha jwamwene nenga amwene Tate. Nhwalo gwa nike mulonge, ‘Mutulangiye Tate?’ 10Bho, Filipu unyekete ndeka Tate nkate jhango na nenga nkate jhake? Malobhe gheniya ghuninnobholela chi kwa ukindendeke gwango, nhwalo Tate jwatama nkate jhango ndi jwahenga lihengo lyake. 11Unyeketele puninnobholela nenga mii nkate jha Tate na Tate abhii nkate jha nenga. Anda minyekete jhe malobhe bhahe, nnyeketele kwa mahengo ghinihenga. 12Ninnobholela chakaka, mundo jwanyeketela nenga nahenga mahengo ngita ghunihenga nenga. Chakaka, nahotola kuhenga kupeta ghanga, nhwalo nenga nijhenda kwa Tate gwango. 13Bhahe, nnyope chochoha chumipala kwa liina lyango nahenga, Tate alombwe kupete Mwana. 14Anda unyopite kilebhe chochoha kwa liina lyango, chanihengela.”
Yecho ilonge nantuma Uhuke gwa Chapanga
15“Anda naumbala, nakamula malaghalikilo ghango. 16Nenga naninyopa Tate gwango, Jwenio nampela ntumiche jhonge, jwapala kutama na mangota machiko ghoha. 17Jwenio ndi Uhuke gwa Chapanga, jwatuyekula uchakaka panane jha Chapanga. Bhando bha nnema bhihoto ndeka kumpokela, nhwalo bhahoto ndeka kummona hilu kuumanya. Nambo mangota muumanye nhwalo atama na mangota na abhii nkate jhino.”
18“Pumbala kubhoka nanineki jhe mangota ngita makakebha, nanimujhila kabhele. 19Pahighalii pandina bhando bha pannema nabhammona jhe kabhele, nambo mangota naumona. Nhwalo nenga mii na ughome, na mangota helahela mmii maghome. 20Mu machiko gheniya, naumanya nenga mii nkate jha Tate gwango, na mangota mmii nkate jhango, na nenga nkate jhino.
21“Mundo jhola jwaghapokela malaghilo ghango na kughakamula, mundo jwenio ndi ambahile. Tate gwango nampala mundo jhola jwambahi nenga, helahela nenga nanikilangiya kwa jwenio.”
22Yuda, chi Yuda Chikaliote ajhakunnobholela, “Bhambo, nhwalo ghane mukilangiya kwa twenga tugha na chi kwa bhando bha pannema ghoha?”
23Yecho panyangwila, “Mundo anda ambahi nenga nabhaha chokochoko na mabholo ghango. Tate gwango napala, Tate na nenga natuhika na kutama nkate jhake.” 24Mundo jhojhoha jwangambala aghakamuu ndeka mabholo ghango. Mabholo ghunyohina gha ne jhe, ghahumi kwa Tate gwango jwandumita.
25“Ninnobholela malobhe ghanga punikibha pamonga na mangota mwenga. 26Tate gwango nantumila Ntumiche kwa liina lyango ndi Uhuke gwa Chapanga, namolangana umanya kila kilebhe na kunkombocha ghoha ghuninnobholila.
27“Niuleka uteeke kwino, nimpela uteeke gwango. Nimpela ndeka uteeke ngita bhando bha nnema chibhatenda. Nkotoka kubhehe ngolongondi kumiojho jhino hilu bwaghaliya. 28Mukajhohine puninnobholila, ‘Ndenda kukibhokela, nambo namujha kabhele.’ Anda ngaumbala ngauhanganile nenga nijhenda kwa Tate, nhwalo Tate gwango nkolongwa kuliku nenga. 29Ninnobholile gheniya ngoheno kabula jha kupitila, nambo pughapala kupitila nnyeketela. 30Nanongela ndeka malobhe ghamahele na mangota, nhwalo limbembela kilongoche jwa nnema ghongo abhii kuhika kwa nenga akwete jhe likakala lyolyoha, 31nambo mbala bhando bha nnema bhamanye anda nimpala Tate. Nenga nihenga chechelachela ngita chanaghalikiye Tate gwango.
“Ngoheno nnyemengane tubhoke!
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohane 14: NTNdeBL2020
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Ndendeule Language @The Word for the World International and Ndendeule Language Translation. All rights reserved
