Matta 5
5
Tsahad Yeeso ha aten parka a wumnda
1Hǝrǝmna Yeeso na fiya wumnda hai hangga, tǝrgha wumnda sǝ tsauka hai. Ɓagha fatsahayighǝn thlǝmadghǝn ɓa, 2katǝranggǝn tsahang kanda ha.
Parka r (Luka 6:20-23)
3Fa parkayani nafiya sǝnggasǝ fa yamiya ni a mbed Faara,
ƙǝsǝr Kutǝryid Talara yi ndanni.
4Fa parkayani nafiya na a tǝrha nanǝnya,
ƙǝsǝr na nda a nggab kanda.
5Fa parkayani nafiya mbuwagha tǝrang tendan sǝ,
ƙǝsǝr na nda a har langad ƙǝshiirha.
6Fa parkayani nafiya na miirha a ƙǝsa tǝ kushim nggayirha;
ƙǝsǝr nun a nggaala!
7Fa parkaya ni nafiya na fiya a haɗang kanda fa,
ƙǝsǝr na nda a haɗang Faara fa.
8Fa parkayani nafiya na hurndan chahal,
ƙǝsǝr na nda ana Faara.
9Fa parkayani nafiya na ɓang tsau ɗǝɗemnggirha,
ƙǝsǝr na nda aah kanda wangya Faara.
10Fa parkayani nafiya na a sǝsaarha ka nggayirha,
ƙǝsǝr Kutǝryid Talara yi ndanni.
11Fa parkayani kun, ana fiya a ˈyar kun, sǝsangganda kun, kanda a nggaɓa kun tǝ ndaarha fa mbǝlfeeya ni kun, ƙǝsǝr ka nggi. 12Ənama wutsǝfayirha tǝ tǝk mbǝnda fa, nun wal ƙǝnaghǝn hangga a talara. Ƙǝsǝr annabiya na ƙǝtǝm sǝsangganda kanda kee.
Tsahad Yeeso ha aten fǝsa tǝ kukwaryirha
(Markus 9:50; Luka 14:34-35)
13Kunni fǝs ƙǝshiirha. Amma a tǝr mbǝnda fǝsa ɗǝ, ƙǝƙǝn nǝm nggǝr nggǝrang ɓa? Ɓalwa targhǝn sǝ wa, ƙǝl iraɗǝ kee ishangga fiya hai.
14Kunni kukwaryid ƙǝshiirha. Wupǝri na a mbǝrha na ɗangkam mbǝ ɓǝɓeerha hai wa. 15Tǝ ƙǝm mbǝm njang patilla tsǝɓang nggǝm tǝ tǝɓa wa. A meghedghǝn nǝm ɗǝfang nda a mbǝd wagrǝghǝn tǝnǝn fǝrang kukwaryirha fiya na a hur mindǝɗi. 16Nǝghǝn kee ƙǝm, ngwa njargha kukwaryid nun hai a mbed fiya naghǝn nda, tǝna kowunni fal Chinun na a talara. #1 Mbiturus 2:12
Tsahad Yeeso ha aten ngyakhrha
17A numaɗun ndon ɓani ɓa ka ɓi weleng ngyakhrha Musa ɗǝ tǝ yi annabiya wa. Ɓawi ɓa ka ɓi weleng kanda ɗǝ wa, amma ka ɓi lǝɗang nda kanda. 18Niya pǝrang ƙǝkafek kun, ƙǝl ma ngwala ƙǝshiirha tǝ talara hai, mbǝ ˈyasǝ na ngguchit a ƙǝtta ɗǝ hu ngyakhrha wa, ƙǝl ma lǝghǝdɗǝ heu. 19Kala niifa tǝɗangga yanɗi na ngguchit a hu ngyakhkini teena ya, tsahang nggǝnǝn fiya ha ƙǝm, nǝn a tsaurha ngguchit hu Kutǝryid Talara. Kala niifa ƙǝm ǝnagha taara tǝ ngyakhkiniya tsahanggǝn nǝn fiya ha ƙǝm nǝn a tsaurha manggǝn hu Kutǝryid Talara. 20Niya ndang nda kun, a kalwa nggayid nun yi fasǝngya ngyakhrha Musa tǝ yi Farisaya wa, mbun tam kyarha hu Kutǝryid Talara ɗǝ wa.
Tsahad Yeeso ha aten sǝbrha hura
(Luka 12:57-59)
21“Sǝkɗun ˈya ndang nanda chichiyinǝm kaar tǝ ndaarha, ‘A ɓǝlɗun farha wa, kala niifa ɓǝlgha farha na a nda a ngwang kumaarha sǝ.’ 22Amma nggi ƙǝm niya ndang nda kun, kala niifa sǝbna hurghǝn ɗǝ tǝ shadghǝn na nda a ngwang kumarha sǝ. Niya nggǝr ndang nda kun niifa ndangga shadghǝn, ‘Ka wuɗe,’ na nda ɗǝrha tǝghǝn mbed fa ngwa kumaaya ɗǝ. Amma niifa ndangga shadghǝn, ‘Nura!’ na nda a muwang nda hu waarha ɗǝ mbuwa mǝra hai.”
23“Tsaunǝn kee, a nanna a fǝr ǝn fǝrrǝwa a Faara a mbǝd sataka, a ɗalna teena hai sǝɓang na hur shadwa ɗǝ, 24malu ǝn fǝrrǝwa a mbǝd sataka. Ɗuwa ɗǝ ˈwan ɗun tangsang pathlang nun tǝ shadwa, tǝrgha a ɓana ɓa, ɓa ɗǝrha mbeeɗǝ tǝ fǝrrǝwa. 25Ana mid niifa huhwa sa, kaɗu kwamana na a tangsanggun pathlang nun ƙǝkar kapa nun sǝla kǝn ngwa kumarha ɗǝ. A karna fa, ɗǝnǝn tǝsa a mbed tǝngwa kumarha ɗǝ. Tǝ ngwa kumarha ƙǝm nǝn fǝrang sa wan sǝsalya. Wan sǝsalya ƙǝm na nda muworha hu porsǝna. 26Niya pǝro ƙǝkafek, mba kyarhaɓa wa ƙǝl tiina ǝnɗi kyo nanda heu.”
Tsaharha Yeeso ha aten kulafayirha
27“Sǝkɗun ndǝn tǝ ndaarha, ‘A ǝnanna kulafayirha wa.’ 28Amma nggi ƙǝm niya ndang nda kun kala niifa ƙǝlangga nuneefa sunaghǝnǝn ˈwaɗǝ teena ǝnaɗǝ kulafayirha tǝghǝn a hurghǝn. 29A kyo yidwa yisǝma hu ɗimiyirha hai, kutethleng sǝ muwangga ɗǝ. A nggushi ƙǝɗeng na patu tal a fadwa ma muwangganda fadwa heu a hu waarha ɗǝ mbuwagha mǝra hai. 30Ana harwa yisǝma a kyorha hu ɗimiyirha hai, kyathlang ɗǝ muwangga ɗǝ. A nggushi ƙǝɗeng na patu tal a fadwa ma muwangganda fadwa heu a hu waarha ɗǝ mbuwagha mǝra hai.”
Tsahad Yeeso ha aten mǝrra kakhrha
(Matta 19:9; Markus 10:11-12; Luka 16:18)
31“Thlǝk ndan tǝ ndaarha, ‘Kala niifa kalgha nukkun hai tsawang ɗafa tǝta a chireethleng ɗeleewar nǝn sǝ yi kala hai.’ 32Amma nggi ƙǝm niya ndang nda kun kala niifa kalgha nukkun hai a mbǝ aten ɗimid kulafayirha wa, kyang nǝn hu kulafayirha hai. Kala niifa ƙǝm kakhka nuneefa kal nanda hai ǝnanǝn kulafayirha.”#Matta 19:9; Markus 10:11-12; Luka 16:18; 1 Korontiyaya 7:10-11
Tsahad Yeeso ha aten ɗǝfmee
33“Nggǝr ɗun sǝkƙǝn a mii chichiiyi nǝm kaar tǝ ndaarha, ‘A tǝɗang ɗun ˈya in ndaanun a Faara wa, amma ƙǝsaama ɗǝfmii nun ha ǝna nun a Chinǝm.’ 34Amma nggi niya ndang nda kun, a ɗǝf ɗun mee tǝ thlǝm talara wa, ƙǝsǝr mbǝd tsawud Faara ni. 35A ɗǝf ɗun mee tǝ thlǝm hweeɗe wa, ƙǝsǝr ndǝna mbǝd yiɓǝd sar Faara. A ɗǝf ɗun mee tǝ thlǝm Urshalima wa, ƙǝsǝr wupǝri ni yi Faara, kutǝra na manggǝn. 36A ɗǝf ɗun mee tǝ thlǝm ten nun wa, ƙǝsǝr mbun mbang nggǝrang was nun hai tsauka pǝpet nduwa iˈim wa. 37ˈYa kamngga kee, ‘Yoo’ tsauka ‘Yoo,’ tǝ ƙǝm ‘Awo’ tsauka ‘Awo.’ Kala laɓaara kalgha yanɗamu ya kyaghǝn ɓa a mii tǝmbǝlfedɗi.”
Tsahad Yeeso ha aten nggǝr haara mu
(Luka 6:29-30)
38“Sǝkɗun ndǝn tǝ ndaarha, ‘Yirha a meghed yirha, thlaana a meghed thlaana.’ #Kyarhaɓa 21:24; Livitikus 24:20; Ɗeleewar fa ngwa kumaya 19:21 39Amma niya ndang nda kun, a karɗun tǝ mbǝlfeerha fa wa. A mbi niifa sa hu ƙǝmeng wa yisǝma, kyakhrang man patu ɓa ƙǝm. 40Ana mid niifa huhwa sa ka a thlanggǝn luwudwa, fǝrang kaɓad wa ƙǝm. 41A ngyaɓo niifa hu wiirha hai mel tal, weema ɗǝ kyab mel sǝri. 42Kala niifa hwanowa ˈya, fǝrang, kala niifa kaɗagha kumaarha a harwa a ˈyaɗang na wa.”
Nggǝmama fa tsangginun
(Luka 6:27-28,32-36)
43“Sǝkɗun ndǝn tǝ ndaarha, ‘Nggǝmama tula yinun kar fatsangginun nun.’ #Livitikus 19:18 44Amma niya ndang nda kun, nggǝmama fa tsangginun, hwana man Faara nafiya teena na a sǝsang kun. 45A naɗun kee, nun tsaurha wangya Faara na a talara, ƙǝsǝr nǝn fǝr yanfaara a ka nafiya tǝ fambǝlfeeya. Nǝn ɓa ˈyaara a nafiya na tǝ nggayirha fa tǝ fingya mbuwagha tǝ nggayirha fa. 46Ana ɗun a nggǝm nafiya na a nggǝm kun kee, ƙǝƙǝn nun wal parka? Ko fathlǝ tsamngya ma mbǝna nda ǝnaarha kee wa? 47A naɗun a ǝna nggayirha a pashiyi nun kee, ma nun a ǝnaarha kalgha fingya mu? Mbǝna faɗahaya ǝnaarha kee wa? 48Amma tsawama lǝlǝgɗa ƙǝla nana Chinun na a talara lǝlǝgɗa.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matta 5: HWO
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
