Mateo 19
19
Jesús pyrỹmboihe omendava poi ijuhuviva ryheva
1Jesús opa hei kova mbairã, õhẽ Galileaivirã hareka vãhẽ oho yvy Judeape, yy syryva Jordan kyty. 2Kuareta hetava oho haykue, hãrã haipe mynguera ñymbairasyvare. 3Fariseore ñymboja Jesús ẽvape pyahãshu verãrã pyrãndushu: Katura mbaimba reheĩ pente teme poishi hyreko? 4Jesús heishu: Pimbijetãmba Tũpa jykuatiape heiva, Tũpa japo vekua jypyiterã kuimbai hareka taupe? 5Haivi heijy: “Hãrã kuimbai hejapo tuu hareka ishy, hyreko hãndi iko verã, hãrã mõkue'õre penteva tyro'oĩma iko verã”. 6Hãrã kyrãĩ mokueveãma jyre, koñeĩ pente tyro'oĩma verã, hãrã Tũpa omomendavare, kuaretare avy typoi ijuhuvi. 7Haipe fariseore pyrãndushu: Mbaiva rehera akuarã Moisés mẽ'ẽka tyrekope kuatia omendava poishia ryheva, hãmã haipe poi ijuhuvi? 8Jesús heishu reta: Pyndypya tãtaivi Moisés mã'ẽĩmbahe pee pypoishi pyndyreko; õñepỹrũape katy kyrãmbatẽ vekua. 9Tẽvã she hai pee, “Hyreko poishia mbaimba reherã, haivi omendajyhe yngava tauperã, opa myngya omendavare; hejareiipo hyreko, ha'ẽĩ ynga kuimbai ñeno hãndirã rehe”. 10Hãrã mboireare heishu Jesús: Kyrã potarã, hokava kuimbai hareka hyreko hãndi haikavivepo omendãã reta. 11Jesús heijyshu reta: Ha'ẽã kuaretare opaĩ kuaa verã, koñeĩ Tũpa pota meẽshuvãĩpo. 12Hãrã heta mbai rehe rãnga kuimbaire hyrekoã; ĩme'ẽ oarãvãĩ ñymbairã hyrekomba verã, hãrã ĩme'ẽjy yngava omendambava shara kuareta ñymbai jeperã, tẽvã ĩme'ẽ omendambava shara huvisha vasu vate arapy'õ ryhevare mba'aporã. Hãrã ĩme'ẽ katu japovarã, tijapo.
Jesús ñee kaviva ñonohẽ sanjaymire
13Hãrã sanjaymire veruhashu Jesús ẽvãpe, ipo ñono ĩãrẽ verã hareka ñymboihe verã; tẽvã mboireare poshy jyreshu veru'õ retape, 14tẽvã Jesús hei: Pyma'ẽĩhe sanjayre tou shyvache hareka avy pijocha, shara haire rãĩmiva Mburuvisha vasurã vate araivi ouva. 15Hãrã ipo ñono ĩãrẽ sanjaymire, haivi oho.
Pente kunumi iko katuva ijeta hãndi Jesús
16Pente kunumi vãhẽ ou Jesús õpe hãrã pyrãndushu: Pyrỹmboi'ia heko kaviva, mbaiva haikavivara katu ajapo apity verã tykove opambava? 17Jesús heishu: Marã'ĩrãra rereshe heko kaviva? Penteĩ rãnga'ẽ heko kaviva, hokava hai Tũpa. Pota riche tykove opambavaperã, japo ñee japoa verã reta. 18Kunumi heishu: Marãvara? Jesús heishu: Avy puruka; avy jyrekomava pokojyhe, avy manarõ, avy ãñetemba vekua erehe ndapisha. 19Emombaishu nderu hareka ndesy, hãrã haihushu ndapisha rijyhaihuva rãĩmi. 20Hãrã kunumi heishu Jesús: Shyndei airãvãi rãnga opa ajapo hokava, mbaivara ĩmeve'ẽjy ajapo verã? 21Jesús heishu: Pota opa rijapo hekope kavirã, ekua opa ẽvende ĩmeryreare, meẽshu pavete'iare hãrã ĩmepo ryrekui opa mbai vate arapy, haivi ei shimi'ĩrũ. 22Hãrã ko kunumi hendu hokovarã vy'ãã ohojy, shara ikokatu. 23Haipe Jesús heishu mboireare: Ãñete hai pee, javaiposhu hai ikokatuvare iche verã huvisha vasu vate arapy'õ ẽvãpe. 24Hãrã haijy pee, javaiãshu kamello hasa verã ju sakuaipi, kuimbai ikokatuvare iche verã Tũpa huvisharã'õpe. 25Mboireare hendu hokavarã mbyrymaĩ retarã heishu: Mbavara akuarã katu ohojepekui? 26Jesús maĩhe hareka heishu: Kuaretare katuã japo hokava, tẽvã Tũpa ĩmere mbaikatu opa mbai japo verã. 27Haipema Pedro heishu: Ore rãnga opa mbai hejaha nimi'ĩrũha verã. Marãrapo mbyhekoviahajy orekui hokava? 28Jesús heishu reta: Ãñete hai pee, vãhẽma ara opa mbypy'ahuajy verã, hareka kuareta Tay, vapypo vapyhapya hĩmbipevape. Hãrã mĩ'ĩrũ vekua vapyĩpo jyvepy 12 ẽvãpe, mbaikavikue japo verã 12 ñymoñare Israelva retape. 29Hãrã opaite hoo heja vekua hareka tyvyre, hiindyre, tuu, ishy, hyreko, tayre maĩrã jy yvy, shyrehe, hãrã 100 kavipo me'ẽãjyshukui hareka hipitypo tykove opambava. 30Kyrãpo heta tynonde'õre mbytaykueha, hareka taykue'õre mytynõndehapo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 19: TPJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©2023 LETRA Paraguay
