Matɨyo 2

Ka-sɔlɛ hɨnga ɨrgage sol Jesu

1Jesu le wooyge na a cay ƴaa di Bɛdɨlɛhɛm di woy a cay gɨsəŋ ga Jude gaŋ. Boy ɨlgedi gɨ nee le, na kɨlma Ɛrɔd ma na ba-dɔɔ cay ƴaa di nee le. Bɨ ga ma, ka-sɔlɛ hɨnga boy dɛsɨɗɛŋn̰əŋ gaŋ saygage te kumu ɨrgage bugoŋ a cay ƴaa-di-gumu di Jerusalɛm dɨŋ. 2Ɨni na, kan ɨngɨrge yege hɨn̰: «Kɛ kɨlma gɨ da Jubɨn̰əŋ gɨ ba wooyge haw kɛ ƴee le, woy na a ani ga? Kɨya gɨ ni sɨlga dɛsɨɗɛŋ toyi te kumu gɨŋ, na hɨn̰ wo̰ ma mani ɨrga kɨya sa n̰irii.»

3Kɨɗɨn̰ ga kɨlma Ɛrɔd je kɔl gɨ nee le ɨni na, ban bɨ kalaŋ ga Jerusalɛm nɔm bɨ, gusɨge joɗɨge bɛrɛ. 4Ɨni na, ban day cay ka-cay ka-bɔgɛ kɨbar nɔm bɨ, day cay ka-gɨlɨn̰ kalaŋ gasɨn̰-kɔl gɨ da Moyis daa bɨ, ɨngɨrge yege hɨn̰ kɛ Kɨris ban gɨ Kumu dorii le, kan kɨya wooyge na kɨɗɨn̰ ga ani gaŋ ga? 5Kan dɨbiige cay nee yeyige hɨn̰: «Na a cay ƴaa-di-gumu di Bɛdɨlɛhɛm di woy a cay gɨsəŋ ga Jude gaŋ, kɨya gɨ ba-yɔɔ-kɔl-gɨ-Kumu-ba-yɔɔ naa wal duroy magtubu dɨŋ naa yege hɨn̰:

6“Me-hɨndi Bɛdɨlɛhɛm cay ƴaa-di-gumu di a cay gɨsəŋ ga Jude gaŋ,

Na me-hɨndi mana cay gulɔŋ gɨ dḛ ɗɨn̰ te cay ƴaan̰əŋ ga boy cay gɨsəŋ ga Jude gaŋ nɔm naŋ,

Kɨya wa kɨlma gɨ kɨya abe te Wɨn̰je gɨ Ɨsɨrayɛl gɨ na te kalaŋ kange le, kɨya sɔ na guse me-hɨndi.”#2:6 Ayge na duroy: Michée 5:1.»

7Ɨni na, Ɛrɔd te ka-sɔlɛ hɨnga boy dɛsɨɗɛŋ gaŋ le dan̰ wɔsɛ bɨ, ɨngɨrge yege hɨn̰: «Kɛ na boy wɔlɛ gɨ ani gɨŋ ma, dɛsɨɗɛŋ da kɨlma le, andɨn̰ nee ga?» 8Kardi nee ɨni na, ban gɨyge Bɛdɨlɛhɛm bɨ yege hɨn̰: «Ɨragɨŋ ɨngɨre kɔl gɨ ojɨ cay kɨye le dan̰ gɨyəŋdi bɨ, hɨn̰ gɨ kɨŋ na wayay ɨni na, kɨŋ ɨre yaŋ, ɗe ɨŋ-bandi kalɨn̰ ma aŋ or n̰ɨrii bɨ.»

9Kɨɗɨn̰ ga kan jege kɔl gɨ da kɨlma le ɨni na, kan say orge. Bɨ ga ma dɛsɨɗɛŋ di kan solge tumɔ a te kumu le, andaŋ or tumoyge tumoyge, bɨ or ɨre a cay kɨɗɨn̰ ga kɨye le won̰ nee. 10Kɨɗɨn̰ ga kan solge dɛsɨɗɛŋ le ɨni na, gusɨge mooge gɨɗaŋ. 11Kan andaŋge ƴen̰ ɨni na, kan solge kɨye le dan̰ ƴoyi di ni Mari. Kan poyge gɨbayge dugo tumoyi dɨbiige gusi halɨwa a cayi. Kardi nee ɨni na, kan hangɨdege kɨbɨ sandugu da hɨnga wɔɔdɨge bɨ, donge lɔr bɨ, hɨnga ka-gasɨm bɨ, ɨleledi mir bɨ, bɨn̰ge kɨye le. 12Ɨni na, Kumu andaŋ cayge duroy sɔndɛ gɨŋ gɨ kan na gɨ jɔgɛ ɔrɛ gusi Ɛrɔd naŋ. Lee gɨ kan jogɨge ɨndi tage dan̰ te gɨyəŋ gɨ doŋ.

Jɨsɛb dan̰ Mari gɨrɨn̰ge dan̰ Jesu

13Kɨɗɨn̰ ga ka-sɔlɛ hɨnga duroy dɛsɨɗɛŋ dɨŋ say orge coŋ bɨ ga ma, ba-ƴɔbɛ gɨ daa nii gɨ da Ba-gulɔŋ andaŋ cay Jɨsɛb duroy sɔndɛ gɨŋ bɨ yey hɨn̰: «Sa daa, aya kɨye bɨ, ƴoyi bɨ, gɨrɨn̰ ɨran̰ danage a cay gɨsəŋ ga Ejɨpt gaŋ. Bɨ sɨman̰ nee bɨrɨŋ gɨsɨn̰ gɨ ɨŋ na yan̰ pa dɨm ma man̰ jɨgan̰ danage ƴee. Kɨya gɨ Ɛrɔd mal gɨ ni dɨɗe kɨye le coŋ.» 14Jɨsɛb say dan̰ son̰do, ay dan̰ kɨye le bɨ, ƴoyi bɨ, orɨn̰ danage Ejɨpt. 15Ban somɨn̰ nee bɨrɨŋ gɨ Ɛrɔd marɨn̰. Lee gɨ kɔl gɨ Ba-gulɔŋ yen̰ ba-yɔɔ-kɔl-gɨ-Kumu-ba-yɔɔ le or kɨɗɨn̰di gaŋ. Ban ye hɨn̰: «Ɨŋ te kɨyenɨ ɗe andaŋ boy cay gɨsəŋ ga Ejɨpt gaŋ coŋ.»#2:15 Ayge na duroy: Osée 11:1.

Ɛrɔd gey dɨɗe karɨn̰aŋ ga n̰en̰əŋ

16Kɨɗɨn̰ ga Ɛrɔd sol gɨ ka-sɔlɛ hɨnga boy dɛsɨɗɛŋ gaŋ dɨbiige dɨngale ɨni na, kuduroy mundoŋ gɨɗaŋ. Lee gɨ karɨn̰aŋ ga ban̰aŋ nɔm ga kan wɔɔge ɓal ɨlge sɔɔ bɨ, kan ga ɨlgedɨge ɓala sɔɔ naŋ ƴee bɨ le, ban gey dɨɗedɨge coŋ a cay ƴaadi Bɛdɨlɛhɛm dɨŋ bɨ, boy karɨn̰ ƴaa ga boy cay gɨsəŋ ga Betɨlɛhɛm gaŋ bɨ. Ban lee hɨnga ga nee le dan̰ gɨyəŋdi wɔlɛ gɨ ka-sɔlɛ hɨnga boy dɛsɨɗɛŋ gaŋ ba yeyige le. 17Lee gɨ kɔl gɨ Jeremi ba-yɔɔ-kɔl-gɨ-Kumu-ba-yɔɔ ba ye le, or kɨɗɨn̰di gaŋ. 18Kɔl le ba kɔ:

«Jege noy ɨle a cay ƴaa-di-gumu di Rama dɨŋ.

Ɨle bɨ n̰age di gumu bɨ,

Na Rasel ba-ɨle kol cay karɨndo,

Kan gayooge dɔ dɔ kalɨn̰ ma, hɨndi ja naŋ, kɨya gɨ kan mage.»#2:18 Ayge na duroy: Jérémie 31:15.

Jɨsɛb dan̰ Mari jɨgan̰ge dan̰ Jesu

19Kɨɗɨn̰ ga Ɛrɔd ma bɨ ga ma, ba-ƴɔbɛ gɨ daa nii gɨ da Ba-gulɔŋ andaŋ cay Jɨsɛb duroy sɔndɛ gɨŋ a cay gɨsəŋ ga Ejɨpt gaŋ bɨ yey hɨn̰: 20«Sa daa, aya kɨye bɨ ƴoyi bɨ jɨgan̰ danage a cay gɨsəŋ ga Ɨsɨrayɛl gaŋ, kɨya wa ka-male dɨɗe kɨye le mage coŋ ɨni.»

21Ɨni na, Jɨsɛb say daa, ay kɨye bɨ ƴoyi bɨ, jogɨn̰ danage a cay gɨsəŋ ga Ɨsɨrayɛl gaŋ. 22Ama kɨɗɨn̰ ga ban je gɨ Argelawɨs naa ba-dɔɔ cay gɨsəŋ ga Jude ban̰di bay Ɛrɔd na, ban hɨndar ɔrɛ a cay gɨsəŋ ga Jude gaŋ. Kumu yeyi duroy sɔndɛ gɨŋ gɨ ban na ɨra a cay gɨsəŋ ga Galile gaŋ. 23Ban or sɔmɛ a cay ƴaa-di-gumu di pɨna wo̰ di toge na Najarɛt, lee gɨ kɔl gɨ ka-yɔɔ-kɔl-gɨ-Kumu-ba-yɔɔ ba yege le or kɨɗɨn̰di gaŋ. Kan yege hɨn̰: «Kan kɨya togii na ungo gɨ Najarɛt.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matɨyo 2: gab

Highlight

ಶೇರ್

ಕಾಪಿ