Jovano 6
6
O Isus pravarel majbut katar pandž milje manuša
1Pale godova o Isus boldape ande Galileja pa đelo pe istočno rig katar o Galilejsko jezero, (savo akhardol vi Tiverijadsko jezero). 2A pale leste teljardas o silno o them, kaj dikhline e čudesne znakurja save ćerdas kana sastardas e nasvalen. 3A o Isus lijapes opre pe gora thaj okote bešlo pire učenikonenca. 4A avelas paše e Pasha o židovsko prazniko. 5Kana o Isus vazda pire jakha thaj dikhlas e silno themes sar avel leste, phučlas e Filipe: “Kaj šaj te ćinas mangro pale sa akala manuša te han?” 6Godova phendas te probil les, kaj već džanglas so ćerela.
7A o Filip phendas lešće: “Ni duj šela rupune lovora či avilosas dosta te ćinelpe dosta mangro te svako dobil barem kotororo!”
8A jek aver učeniko savo akhardolas Andrija, o phral katar o Simon Petar, phendas e Isusešće: 9“Akate si jek čhavro saves si pandž mangre katar o ječam thaj duj mačhora. Ali so si godova pale gadići them?”
10O Isus phendas lenđe: “Neka o them bešel tele!” Pe godova than sas but čar, pa e manuša bešline. Sas okote varekaj katar pandž milje muškarcurja. 11Askal o Isus lijas godola mangre, zahvalisardas e Devlešće thaj podelisardas e themešće save bešenas pe čar. A gajda ćerdas vi e mačhenca, thaj savora haline kozom kamline. 12Kana savora čaljile, o Isus phendas pire učenikonenđe: “Ćiden e kotorora save ačhiline, te khanči či propadnil.” 13Gajda e učenikurja ćidine dešuduj korpe kotorora save ačhiline katar okola pandž ječmene mangre save o them halas.
14Kana o them dikhlas o čudesno znako savo o Isus ćerdas, phendine: “Akava si čače o Proroko savo trubul te avel po them!”
15A o Isus džanglas kaj kamen te aven, te astaren les thaj pe sila te čhonle te avel lengo caro, pa palem crdape ande gora te avel korkoro.
O Isus phirel po paj
16Kana peli e rjat, e Isusešće učenikurja fuljistine dži ko jezero. 17Ali sar peli e rjat, a o Isus još či boldape, dine andre ande lađica thaj teljardine pe okoja rig e jezerošći, karingal o Kafarnaum. 18Phurdelas e bari balval thaj vazdenaspe e bare talasurja. 19Kana e učenikurja otplovisardine varekaj katar pandž džike šov kilometrja katar e obala, dikhline e Isuse sar phirel po paj thaj avel sa majpaše ke e lađica, a len astarda dar. 20A o Isus phendas lenđe: “Me sem! Na daran!” 21Askal line les ande lađica, thaj e lađica ande data arakhadili pe obala prema savi plovinas.
O Isus si mangro e trajosko
22Thejara o đes o them savo ačhilo pe okoja rig e jezerošći primetisardine kaj si pe okoja rig samo jek lađica thaj kaj o Isus či dijas ande lađica pire učenikonenca, nego kaj von đeletar korkore. 23A varesave lađice andar e Tiverijada avile paše dži ke okova than kaj haline o mangro nakon so o Gospod zahvalisarda e Devlešće. 24Kana o them dikhlas kaj ni o Isus a ni lešće učenikurja naj okote, dine ande lađice thaj teljardine ando Kafarnaum te roden e Isuse. 25Kana arakhline les pe okoja rig e jezerošći, phučline les: “Sikavneja, kana avilan akate?”
26A o Isus phendas lenđe: “Čače, čače phenav tumenđe: Či roden tumen man zbog godova kaj haćardine e čudesne znakurja, nego zbog o mangro savo haline thaj čaljile. 27Ćeren bući, ali na palo habe savo si propadljivo, nego ćeren bući palo habe savo ačhel palo večno trajo, a les dela tumen o Čhavo e manušesko, kaj les ovlastisardas o Dad o Del.”
28Von phučline les: “So trubul te ćeras, a te avel okova so o Del kamel te ćeras?”
29A o Isus phendas lenđe: “Akava si o delo savo o Del kamel te ćeren: te paćan ande okova saves vo bičhaldas.”
30Von askal phučline les: “Savo tu čudesno znako ćereja, te kana dikhas les paćas ande tute? So dakle ćereja? 31Amare pradada haline mangro ande pustinja savo akhardolas mana, sago kaj si ramome ando Sveto lil: ‘Dija len mangro andar o nebo te han.’”
32O Isus phenda lenđe: “Čačes, čače phenav tumenđe. Či dija tumen o Mojsije mangro andar o nebo, nego mungro Dad, a akana del tumen o čačutno mangro andar o nebo. 33Kaj, o mangro savo del o Del si o okova savo avel andar o nebo thaj del trajo e themešće.”
34Askal phendine lešće: “Gospode, de amen uvek godova mangro.”
35A o Isus phendas lenđe: “Me sem o mangro e trajosko. Ko avel mande, či bokhavola thaj ko paćal ande mande nikada či trušavola. 36Ali sago kaj phendem tumenđe, dikhline man, ali ipak či paćan. 37Sa saven o Dad del man, avena mande, a okolen save aven mande či odbaciva. 38Kaj, či fuljistem andar o nebo te ćerav mungri volja, nego e volja okolešći savo bičhalda man. 39A akava si e volja okolešći savo bičhalda man: te či hasarav ni jećhe katar okola saven vo dija man, nego te vazdav len andar e mule ando Poslednjo đes. 40Kaj, akava si e volja mungre Dadešći: ko god dićhel man, e Čhave thaj paćal ande mande, te avel les večno trajo thaj te me vazdav les andar e mule ando Poslednjo đes.”
41Askal e Židovurja počnisardine te mrmljin protiv o Isus zato kaj phendas: “Me sem o mangro savo fuljisto andar o nebo.” 42Phenenas: “Zar godova naj o Isus, e Josifesko čhavo? Zar či pindžaras lešće dade thaj lešće deja? Sar akana phenel: ‘Fuljistem andar o nebo’?”
43Pegodova o Isus phendas lenđe: “Na mrmljan maškar tumende! 44Khonikal naštik avel mande ako či crdel les o Dad savo bičhalda man, a me vazdava len andar e mule ande Poslednjo đesa. 45E prorokurja ramosardine: ‘O Del sikavela sa e themen.’ Svako ko čhol kan ko Dad thaj sićol lestar, avel mande. 46Ipak, khonikal či dikhlas e Dade, osim okova savo avilo katar o Del. Vo dikhlas e Dade.
47Čačes, čačes phenav tumenđe: ko paćal ande mande, si les večno trajo. 48Me sem o mangro e trajosko. 49Tumare pradada haline e mana ande pustinja thaj ipak muline. 50A akava si o mangro savo fuljel andar o nebo te kogod hal lestar či merel. 51Me sem o džudo mangro savo fuljisto andar o nebo. Ko hala katar akava mangro, traila zauvek. O mangro savo me dava si mungro telo, savo dava te e manuša po them šaj trajin.”
52Askal e Židovurja počnisardine maškar peste te raspravin pes e alavenca: “Sar akava šaj del amen piro telo te has?”
53O Isus phendas lenđe: “Čačes, čačes phenav tumenđe, ako či han o telo e manušešće Čhavesko thaj či pijen lesko rat, naj tumen večno trajo ande tumende. 54Ko hal mungro telo thaj pijel mungro rat, si les večno trajo thaj me vazdava les andar e mule ando Poslednjo đes. 55Kaj mungro telo si čačo habe thaj mungro rat čačo pipe. 56Ko hal mungro telo thaj pijel mungro rat, ačhel ande mande thaj me ačhav ande leste. 57Sago kaj man bičhaldas o džudo Dad, thaj me traiv zbog o Dad, gajda vi okova savo man hala traila zbog mande. 58Akava si o mangro savo fuljisto andar o nebo, thaj vo naj sago okova saves haline tumare pradada ande pustinja thaj muline. Ko hal akava mangro, traila zauvek.” 59Akava o Isus phendas dok sikavelas ande sinagoga ando Kafarnaum.
Zbog e Isusesko sikavipe but džantar lestar
60Kana akava ašundine, but lešće učenikurja phendine: “Phare si akala alava. Ko šaj prihvatil len?”
61O Isus korkoro pestar džanglas kaj lešće učenikurja mrmljin thaj phendas lenđe: “Dali akava sikavipe navodil tumen te odustanin? 62A so phendinesas kana dikhlinesas man, e Čhave e manušešće sar džav opre ando nebo, okote kaj semas vi majsigo? 63O Duho e Devlesko si okova savo del o trajo, a o telo naštik te del les. E alava save me phendem tumenđe, von si o Duho thaj o trajo. 64Ali si maškar tumende okola save či paćan manđe.” O Isus katar o početko džanglas save si okola save či paćana thaj savo si okova savo izdaila les. 65Askal phendas: “Pale godova vi phendem tumenđe kaj khonik našti avel mande ako naj lešće dino katar o Dad.”
66Askal but lešće učenikurja mukline les thaj či majbut džanas pale leste. 67Askal o Isus phučlas e dešuduje učenikonen: “Te či kamen vi tumen te džantar?” 68A o Simon Petar phendas lešće: “Gospode, kaste te džas? Samo tut si alava palo večno trajo. 69Amen paćas thaj džanas kaj san tu o Sveco e Devlesko!”
70A o Isus phendas lenđe: “Zar či me losardem tumen dešudujen? A palem jek tumendar si o beng.” 71O Isus phendas godova palo Juda savo sas čhavo e Simonesko andar o gav Kariot, kaj vo sas godova savo izdaila les, vi ako sas jek katar e dešuduj učenikurja.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jovano 6: RČB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
