यूहन्ना 1
1
शुरुवाती बोक
(1:1-18)
परमेश्वर त शब्द
1जे शब्द असा, से ब्रह्माण्ड त धरती बणुण केआं पेहले थिआ। से परमेश्वर जुए रेही अओ असा। त सेईंए परमेश्वर भो। 2ब्रह्माण्ड त धरती बणुण केआं पेहले से परमेश्वर जुए थिआ। 3परमेश्वरे तसे बेलि ईं सम्हाई कुछ बणाउ। ईं कोई बि चीज नेईं जे तसे बेलि ना बणु। 4जे शब्द असा तस केईं जीवन देणे शक्ति असी। त तसे जीवने मनख जे परमेश्वरे सच्चाई टगड़ियार ईं हराली। 5मनख अन्हारे अन्तर असा। त टगड़ियार तेन्हि केईं पुजती, पर से टगड़ियार कदी समझ ना बटते।
यूहन्ने टगड़ियारी बारे उगाह
6परमेश्वरे यक मेह्णु तेन्हि केईं लंघा, जेस नओं यूहन्ना#1:6 “यूहन्ना” इठि यीशु चेला ना भो, जेन ई कताब लिखो असी। बल्कि ए मेह्णु चुसुणे बाड़ा यूहन्ना भो। तेस जमाने ज्यादातर लेखक अपु कताब अन्तर अपु नओं ना लिखतेथ। थिउ।#मत्ती 3:1; मरकुस 1:4; लूका 3:1,2 7से परमेश्वरे लंघो टगड़ियारे बारे उगाह देण जे ओ थिआ ताकि मेह्णु तस टगड़ियार पुठ विश्वास करियेल। 8यूहन्ना अपफ से टगड़ियार नेओथ, पर से तेस टगड़ियारी बारे उगाह देण जे अओ थिआ। 9किस कि परमेश्वरे लंघो से टगड़ियार, जे यीशु असा, से धरती पुठ एण बाड़ा थिआ। से परमेश्वरे सच्चाई मेह्णु हरालता।
टगड़ियार धरती पुठ एण
10पता, यीशु धरती पुठ आ। तसे बेलि सम्हाई कुछ बणु, तोउं बि मेह्णु से ना पिछाणा। 11से अपु देश जे आ पर मेह्णु से ना मना। 12पर जेन बि से मना तेन तेन्हि सम्हाई जे परमेश्वरे गभुर भुणे हक दिता। 13से सम्हाई ना मेह्णु के ऊड़ी केईआं, ना जिसमे इच्छाई बेलि, होर ना ई बोउए इच्छाई बेलि परमेश्वरे गभुर भुन्ते, पर परमेश्वरे इच्छाई बेलि भुन्ते।
14-15जे शब्द असा से मनखे रूप नी कइ असी बुच रेहा। यूहन्ना बि तसे बारे ईं उगाह दी कइ जोरी जुए बोलु “ए सेईंया भो, जेस बारे मेईं बोलो थी कि जे में पता एन्ता से मोउं केआं बि बोडा असा, किस कि मोउं जमुण केआं पेहले ईं से थिआ।”#लूका 1:30-35 असी अपफ परमेश्वरे इकलौते कोईये महिमा काई छो असी जे परमपिता परमेश्वर केईआं अओ असा। तेन असी परमेश्वरे पूरी दाह हरालो असी त परमेश्वरे सच्चाई असी जे बोलो असी। 16किस कि तसे कृपादृष्टि असी पुठ सुआ असी, तोउं त असी रज्जि अशुश मेती। 17ई सच्चु असु कि परमेश्वरे मूसा केईआं हें धे नियम दिता, पर सच्चाई त कृपादृष्टि असी यीशु मसीह केआं मेई। 18परमेश्वरे इकलौते कुआ छड़ दी कइ केनि बि कदी परमेश्वर ना का। किस कि सेईंए ईं परमपिता परमेश्वर जुए उई मी कइ रिहो असा, त सद तेन ईं मेह्णु परमेश्वर गुण हराला।
यीशु सेवाई कम शुरु करण
(1:19-51)
मसीहे बारे यूहन्ने उगाही
19यक रोज, यहूदी जाति के कुछ नेते यरुशलेम केआं केहि पुजारी त कारखानी#1:19 मूल भाषा अन्तर “लेवी” लिखो असु। “लेवी” यक ऊड़ी नओं असु जे कि याकूबे बाराह कुआ बुछ यक थिआ। परमेश्वरे सद लेवी ऊड़ी मेह्णु अपु देहेर अन्तर सेवा करण जे चुणो थिए। त सम्हाई पुजारे त कारखानी इस ऊड़ी भुन्तेथ। से देहेर अन्तर त बाहर सेवा कतेथ। यूहन्ना केईं ई पुछुण जे लंघाए कि “तुस कोउं भीन्थ”। 20त यूहन्ने मनु त सिधे सिधे बोलु कि “अउं मसीह#1:20 इब्रानी भाषा अन्तर “मसीह” मतलब “जेसे राजाभिषेक भो असा”। इस जे यूनानी भाषा अन्तर “ख्रिस्तुस” बोतेथ। परमेश्वरे दुतो जुबानी मुताविक यहूदी मेह्णु तेस टेम मसीह भाड़ बिशो थिए। से सोचतेथ कि मसीह एई कइ तेन्हि रोमी मेह्णु के राज केआं छुड़कान्ता। तोउं त से यूहन्ने केईं मेह्णु लंघाई कइ पुछुण लगो असे। ना भो”। 21त तेन्हि तस केआं पुछु, “त तुस कोउं भो, तुस की भविष्य वक्ता एलिय्याह#2 राजा 2:11 भो ना?” यूहन्ने तेन्हि जे बोलु, “ना, अउं से ना भो।” त यहूदी तस केआं दुबारी पुछु, “त कि तुस से भविष्य वक्ता भो ना जेस अस भाड़ बिशो असे?” तेन बोलु, “ना।” 22त तेन्हि तस जे बोलु, “त तुस कोउं भीन्थ? असी जे बोलीण दे कि असी अपु लंघाणे बाड़ी जे की बोलुण। तुस अपु बारे की बोते?” 23यूहन्ने बोलु, “यशायाह भविष्य वक्ता कताब अन्तर जे मेह्णु अरुणि धार ‘प्रभु जे बथ बणाण दिए’ हक देन्ता, अउं से मेह्णु भो।”#यशायाह 40:3 24ए मेह्णु फरीसी नओएं यहूदी मेह्णु के यक धार्मिक दले लंघो थिए। 25त तेन्हि तस केईआं पुछु, “अगर तुस मसीह ना भो, होर ना एलिय्याह भो, होर ना से भविष्य वक्ता#विधि 18:15 भो त किस मेह्णु चुसता#1:25 जपल यूहन्ने परमेश्वरे वचने प्रचार किआ त सुआ जेईं अपु अपु पापे कमी केआं मन बदला। ईं हरालण जे से यूहन्ने केईं गे त तेन से पाणि अन्तर चुसे। ई करणे बेलि तेन्हि होरे मेह्णु हरालु कि तेन्हि सच्चे बि अपु अपु पाप कम छड़ दुतो असे त तेन्हि परमेश्वरे इच्छाई मुताविक जीण जे मन बड़ाई छोओ असा।?” 26यूहन्ने तेन्हि जे बोलु, “अउं त सद पाणि अन्तर चुसता। पर तुसी बुच यक ईं मेह्णु असा, जे तुसी पिरियाणोरा नेईं। 27से में पता एन्ता, तोउं बि तसे सेवा करणे त तसे प्युले बि खुआणे लेएक अउं नेईं।”
28ई सोब घटना यरदन दरेउए पूरब दिशा बैतनिया ग्रां अन्तर भुई, जेठि यूहन्ना पाणि अन्तर चुसताथ।
परमेश्वरे किएऊ
29होउस, जपल यूहन्ने यीशु अपु ए जे एन्ते का त बोलु, “हेरे, हेरे! एस हेरे! ए परमेश्वर जे यक किएऊ ईं असा; जे सम्हाई के पाप लिए अपु भकत देन्ता।#पुजारोठि 4; 5; 6 30ए से भो जेसे बारे मेईं बोलो थिउ कि ‘जे में पतोती एणे बाड़ा असा, से मोउं केआं बोडा असा, किस कि से मोउं केआं पेहले थिआ’। 31पेहले अउं तस ना पिछाणताथ, पर अउं तोउं पाणि अन्तर मेह्णु चुसुण लगा, ताकि से इस्राएले मेह्णु के अगर खड़ी घियाल।” 32तोउं यूहन्ने ईं उगाही दिती कि “मेईं शुची आत्मा अलणी वेश अन्तर स्वर्ग केआं एन्ते त यीशु पुठ बिश्ते काई। 33मोउं पता ईं नेओथ कि ए से भो। पर परमेश्वर, जेन अउं पाणि अन्तर मेह्णु चुसाण जे लंघा, तेन मोउं जे बोलु कि जेस पुठ तु परमेश्वरे आत्मा एन्ती त बिश्ति केईयेल, सेईंए ईं शुची आत्मा अन्तर चुसुणे बाड़ा भो। 34मेईं ई सोब यीशु पुठ भुन्ते काउ त अउं सोह कता कि ए परमेश्वरे कुआ भो।”
यीशु पेहले चेले
35तढ़िया होउस, दुबारी यूहन्ना अपु दुई चेली जुओई तठि खड़ खड़ थिआ। 36जपल यीशु तेनबाई घेण लगा त तस हेर कइ यूहन्ने बोलु, “ईये हेरे, परमेश्वरे किएऊ!” 37तेन्हि दुई चेली यूहन्ने शुणु त यीशु पतोती घेण लगे। 38जिखेईं यीशु पतूं खिरक कइ हेरु कि से दुहिए तसे पतोती एण लगो असे, त तेन्हि केआं पुछु, “तुसी की लुओ?” तेन्हि बोलु, “रब्बी, तुस कोठि बिश्ते?” (इब्रानी भाषा अन्तर “रब्बी” मतलब “गुरुजी” असा।) 39त तेन तेन्हि जे बोलु, “हंटे, त पता लग घेन्ता!” त से गे त तसे बिशणे जगाह हेरी। तपल तकर ब्यादि चोउर बज गो थिउ त से ब्यादि तकर तस जुए बिशे।
40जेन्हि दुहि यूहन्ने बोक शुणो थी त यीशु पतोती गो थिए, तेन्हि बुचा यक अन्द्रियास थिआ, जे शमौन पतरसे भाई थिआ। 41तेन पेहले अपु सक्के भाई शमौन जुएई मी कइ तस जे बोलु, “असी ‘ख्रिस्तुस’#1:41 यूहन्ना 1:20 पाद टिप्पणी हेरे। मतलब ‘मसीह’ मेओ असा।” 42तोउं से शमौन यीशु मीण जे घिन आ। यीशु तसे धे हेरु त बोलु, “तु यूहन्ने कुआ, शमौन भो। पर अभेईं केआं खड़ तु ‘कैफा’ बोलिन्ता।” (कैफा मतलब “पलण” भो। यूनानी भाषा अन्तर एस जे “पतरस” बोते)।
43दोके रोज, यीशु गलील राज्य जे घेणे ठीक किउ त घेन्ते घेन्ते बथ तस फिलिप्पुस मेआ। त तेन तस जे बोलु, “में पतोती आई त में चेला बण!” 44फिलिप्पुस, अन्द्रियासे त पतरसे ग्रां बैतसैदे थिआ। 45पता, फिलिप्पुसे नथानयेल तोपा त तस जे बोलु, “ओ यारा, तोउ पता असा ना असी मसीह मेओ असा, जेस बारे मूसे नियमे कताब अन्तर त भविष्य वक्ते अपु अपु कताबी अन्तर लिखो असु। से नासरत ग्रांए यूसुफे कुआ यीशु भो।” 46त नथानयेले हैरान भोई कइ तस जे बोलु, “नासरत ग्रां केआं कि कोई अब्बल चीज एई सकती ना? कदी बि ना!” फिलिप्पुस तस जे बोलु, “मोजी कने, हेरिण दे”।
47जीं यीशु नथानयेल अपु कना जे एन्ता का त तसे बारे बोलु, “ई भो यक सच्चा इस्राएली जाति मेह्णु, जेस अन्तर कोई दुरबुध नेईं।” 48नथानयेल तस केआं पुछु, “तेईं अउं कीं पिछाणो असा?” यीशु तस जे बोलु, “फिलिप्पुसे तोउ हक देणे केईआं पेहले ईं जपल तु अंजीरे बुटे पड्डे थिआ, तपल मेईं तु काओ थिआ।” 49त नथानयेल बोलु, “ए गुरु, तुस सच्चे परमेश्वरे कुआ भो त तुस इस्राएले राजा भो।” 50यीशु तस जे बोलु, “तु मोउं पुठ तोउं विश्वास करण लगो असा किस कि मेईं बोलु कि तु अंजीरे बुटे पड्डे का। अउं तोउ जे बोता कि तु एस केआं बि ज्यादा बोडे बोडे कम हेरता।” 51तोउं यीशु सोबी जे बोलु, “तुस स्वर्ग खुला त जेठि अउं ‘मनखे कुआ’#1:51 “मनखे कुआ” यक नओं असु, जेसे बेलि यीशु अपफ जे बोताथ। तेन अपु मनखे रूप नी कइ इस धरती पुठ बिशणे टेम जे बोलुण लोओ असु। इसे मतलब “परमेश्वरे जेन मनखे रूप नीआ त मनखेरी ईं मनखे बुछ बिशा।” भुन्ता, तठि परमेश्वरे स्वर्गेदूत स्वर्ग एन्ते घेन्ते#शुरुवात 28:12 हेरते।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 1: pgg
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
