John 4
4
Yesuusanne Sammaariyaa Mishiratto
1-3Yesuusi Yohaannisawaappe dariyaa barena kaalliyaawantta barekko shiishsheennee xammaqee giyaawaa Parisaawatuu siseeddawaa Yesuusi ereedda wode, Yihudaa aggiide, Galiilaa beedda; gidooppenne, Yesuusa kaalliyaawanttu xammaqeeddawaappe attin, Yesuusi bare huuphew oonanne xammaqibeenna. 4Galiilaa biidde, Sammaariyaanna aadhdhanawe A ashshennabaa gideedda.
5Hewaa diraw, Yayiqoobi bare na7aa Yooseefoo immeedda gadiyaa matan de7iya Sikaaro geetettiyaa Sammaariyaa katamaa beedda. #Dom 33:19; Iya 24:32 6He sa7an Yayiqooba haathaa ollay de7ee; Yesuusi hametan daaburiide, he haathaa ollaa matan utteedda. He wode sa7ay usuppun saatiyaa heera.
7Sammaariyaa mishiratta haathaa duuqqanaw yeeddawunno Yesuusi, <<Taana haathaa ushshaarikkii!>> yaageedda. 8Yesuusa kaalliyaawanttu qumaa shammanaw katamaa beeddino.
9He Mishiratta zaaraade A, <<Neeni Ayihuda asaa gidaadde, Sammaariyaa macca asa gideedda taana, woota de7uwaa immiyaa haathaa ushsha gay?>> yaagaaddu; ayissi gooppe, Ayihudatoonne Sammaariyaa asaw ittipetethay baynna diraassa. #Ezr 4:1-5; Nah 4:1-2
10Yesuusi zaariide izo, <<Neeni Xoossaa imotaanne qassi neena <Taana haathaa ushsha> giyaawe oonentto eriyaawaa gidintto, A woossanaassa; ikka new de7uwa immiyaa haathaa immana>> yaageedda.
11Mishiratta zaaraade, <<Godaw, new duuqqiyaabay baawa; ollaykka ciimmuwaa. Yaatina, de7uwa immiyaa haathaa haqappe akkani? 12Nuussi ha haathaa ollaa immeedda nu aawuwaa Yayiqoobappe neeni daray? I, A naanaynne A mehii hawaappe usheeddino>> yaagaaddu.
13Yesuusi zaariide, <<Ha haathaappe ushiyaa ooninne laa7enthuwaa saamettanawaa. 14Shin taani immiyaa haathaa ushiyaa ooninne laa7enthuwaa saamettenna. Taani immiyaa haathay he A giddon medhinaa de7uwaassi pulttiyaa pulttuwaa gidanawaa>> yaageedda.
15Mishiratta, <<Godaw, taani saamettenna malanne haathaa tikkanawukka haa yeenna mala, taw he haathaa imma!>> yaagaaddu.
16Yesuusi izo, <<Baade ne asinaa xeesaade haa simma>> yaageedda.
17Mishiratta zaaraade, <<Taw asinay baawa>> yaagaaddu.
Yesuusi, <<Taw asinay baawa giyaawaan tumuwaa gaadda. 18Neeni ichcheshu asinaa gelaadda; ha77i neenanna de7iyaa bitani ne asinaa gidenna. Neeni ha77i taw odeeddawe tuma>> yaageedda.
19Mishiratta qay, <<Godaw, neeni nabiyaa gidiyaawaa ta ha77i eraaddi; 20nu Sammaariyaa asaa aawatuu ha deriyaan #4:20 ha deriyaan, giyaawe deriyaa Geerizaana gidiide Seekeema geetettiyaa katamaa matan de7iyaawaa. goyinneeddino; shin Ayihudatuu hinttenttu asay Xoossaw goyinnanaw bessiyaa sa7ay Yeerusalaamena yaagiita>> yaagaaddu.
21Yesuusi, <<Ha mishirattee, taana ammana; ha deriyaan woy Yeerusalaamen Aawuwaa Xoossaw hinttenttu goyinnenna wodii yaanawaa. 22Hinttenttu Sammaariyaa asay hintte erennabaw goyinniita; Xoossay nuuna Ayihudatuwaa go77ettiide atotethaa ahiyaa diraw, nuuni nu eriyaawoo goyinneetto. 23Shin Aawuwaa Xoossaw tumuwaappe goyinniyaawanttu A, Geeshsha Ayyaanaa wolqqaaninne Xoossaa Xoossaatethaadan goyinniya wodii matatteedda; ubba ha77ikka gakkeedda. Ayissi gooppe, asaa barew goyinnana mala, Aawuu Xoossaykka ha ogiyaan goyinniyaawantta koyyee. 24Xoossay Ayyaanaa; aw goyinniyaawanttukka Geeshsha Ayyaanaa wolqqaani Xoossaa Xoossatethaadan goyinnanaw bessee>> yaageedda.
25Mishiratta, <<Masihiyaa geetettiyaa Okettowe yaanawaa taani eray. I yiyaa wode nuussi ubbabaa odanawaa>> yaagaaddu.
26Yesuusi, <<Ha neenanna haasayiyaawe taani A>> yaageedda.
27Hawaa unttunttu haasayishshin, Yesuusa kaalliyaawanttu beeddasaappe simmeeddino. Yesuusi mishirattinna haasayishshin unttunttu be7iide darissi maalaletteeddino; shin mishiratto, <<Ayaa koyyay?>> woy Yesuusa, <<Iinanna ayissi haasayay?>> giide oochchowe ooninne baawa.
28Hewaappe guyyiyan, Mishiratta bare haathaa otuwaa agga basha guyye katamaa baade asaw, 29<<Taani ootheeddawaa ubbaa taw odeedda bitaniyaa be7anaw denddite; hewe Kiristtoosa gidaanddeeshsha?>> yaagaaddu. 30Asay katamaappe kesiide, Yesuusakko beedda.
31Hewe hanishshin, A kaalliyaawanttu Yesuusa, <<Guuthabaa maarikkii!>> yaagiide woosseeddino.
32Shin I, <<Taw hinttenttu erenna qumay taani miiyaawe de7ee>> yaageedda.
33Hewaa diraw, A kaalliyaawanttu barenttu giddon, <<Aw miyaabaa aheedda asay de7anddeeshsha?>> yaageeddino.
34Yesuusi unttunttussi, <<Ta qumay taana kiitteeddawaa sheniyaa udussaanne A oosuwaa polussaa. 35Hinttenttu, <Oyddu agenaappe guyyiyan, kathay cakettanawaa> giikkiteeyee? Taani hinttenttussi oday; goshshaa loythi xeellite; kathay caka besseedda. 36Zeriyaawenne cakkiyaawe ittippe nashettana mala, cakkiyaawe dirgguwaa akkeenne kathaa medhinaa de7oo shiishshee. 37Ha gaasuwaan, <Ittu zeree; qassi ittu cakkee> giyaa haasayay tuma. 38Hinttenttu daaburibeennawaa cakkana mala, taani hinttentta kiittaaddi; haratuu oothi daabureeddino; hinttenttu haratuwaa daaburan geleeddita>> yaageedda.
39Mishiratta, <<I taani ootheedda ubbabaa odeedda>> gaade markkatteedda diraw, he katamaan de7iyaa Sammaariyaa asaappe coray Yesuusa ammaneedda. 40Sammaariyaa asay Yesuusakko yeedda wode, barenttu mataan gami77ana mala, Yesuusa woossina I yaani laa77u gallassaa utteedda.
41I odiyaa qaalaa diraw, kasewaappe cora asay ammaneedda; 42qassi unttunttu mishiratto, <<Nuuni nu huuphew I giyaawaa sisiide ammaneeddawaappe attin, neeni markkatteedda diraassa gidenna; I tumu alamiyaa asaa ashshiyaawaa gidiyaawaakka nuuni ereeddo>> yaageeddino.
Yesuusi Itti Kaappuwaa Na7aa Patheedda
43Laa77u gallassaappe guyyiyan, Yesuusi Sammaariyaappe kesiide, Galiilaa gadiya beedda. 44Ayissi gooppe, I bare huuphew, <<Nabii bare gadiyan bonchchettenna>> yaagi odeedda. 45Yesuusi Galiilaa gakkeedda wode, Galiilaa asay A mokkeedda; Paasigaa bonchchiya gallassi unttunttu Yeerusalaamen de7iya diraw, I ootheedda ubbabaa be7eeddino.
46Yesuusi haathaa woyiniyaa ushshaa kesseedda, Galiilaan de7iya Qaanaa katamaa beedda. Qifirinaahooman A na7ay sakettiyaa, kaatiyaa gollen oothiyaa itti kaappuu de7ee. 47Yesuusi Yihudaappe Galiilaa yeeddawaa he kaappuu sisiide, aakko yiide hayqqanaw mateedda bare na7aa biide pathana mala, Yesuusa woosseedda.
48Yesuusi he kaappuwaa, <<Xoossay oothiyaa malaataanne hechcho giissiyaabaa be7ennaani de7iidde, hinttenttu ayinne ammanikkita>> yaageedda.
49He kaappuu zaariide, <<Godaw, ta na7ay hayqqennan de7ishshin, taananna baarikkii>> yaageedda.
50Yesuusi, <<Ba; ne na7ay paxa de7anawaa!>> yaageedda.
He kaappuu Yesuusi geeddawaa ammaniide beedda. 51I bare golle biishshin, A qoomatuu aananna ogiyaan gakettiide A, <<Ne na7ay paxa de7ee>> geeddino.
52I bare qoomatuwaa bare na7aw ay saatiyaan keekeeddentto oochchina unttunttu, <<Zino laappu saatiyaan qooxuu A aggeedda>> yaageeddino. 53Na7aa aawuu Yesuusi barew, <<Ne na7ay paxa de7anawaa>> geeddawe he saatiyaana gideeddawaa hassayeedda. Hewaa diraw, inne A soy asay ubbay ammaneeddino.
54Hawe Yesuusi Yihudaappe Galiilaa yiide ootheedda laa7entho malaataa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
John 4: dwrNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Ooratha Caaquwaa ಬಗ್ಗೆ ಇನ್ನಷ್ಟು ತಿಳಿಯಿರಿ
