Dzwan 7
7
Awizə ə Yesù yìy kə kə̀ bɛmə nəway awò Yesù
1Abù ayiə yə̀ tsìy ŋwò tsə, Yesù ŋwò zù a mbwòʼ ə̀ Galìlî. Ù kə liə dzə̀ wày ani zù a Dzùdiyà, aŋwòə ŋgəd tə ghě Dzû tìy kə liə ani wiy màʼà we. 2À kə də̌ nə̀ soŋə fə inyi i kəfwòə#7.2 À kə yù də̀ inyi aghee Dzû kə nyiə tsə̂ nəniy ani myìŋì bə̀ ayiə yə nə̀ tee ghu a səsə yiy kə muə tsə nəniy anə umfwùə anə sòŋə fə ghu kə də tsə nəniy a mbvə̀nə̀ kə̀sisi nə̀ ghu ŋwô bə̀ anə inaʼ i Idzìp. yiy nyiə̀ kpe kyoŋə mìà bə̀ ŋwò. 3A yù də̀ ighe awizə̂ ə Yesù yìy kə dzây yə̂ awe nə, “Ŋwǒ tsə fə a Galìlî wò zû a mbwòʼ ə̀ Dzùdiyà yə̀ tsə̀təndii tiə̀ tìy də nəniy awote ghu nì də ani kòʼ àyiə yə wò zəŋə nəniy. 4Abu wù liə nəniy nə̀ aghee mbyi yiy kəli tsə we, u nè zəŋə dzə̀ wày ayiə we à zəŋə yiy. Yəə wò zəŋə nəniy ayiə yə, zəŋi tsə nə̀ aghee àdzə̀m anə mbyi kəli tsə wô.” 5(Awizə̂ we kə kə̀ boʼò bɛmə dzə̀ wày ayiə we à dziy yiy moo à zəŋə yiy.) 6Yesù dzày yə̀ a ghu nə, “Soŋə fam fiy kamə kə̀ kpe dzə̂, a kwuni bû ghà, soŋə indzə̀m kpe doʼò ŋwò. 7Aghê mbyi yiy way dzə ani bà ghà, ghu kwuni bà mìə̀, aŋwòə mə tsə̂ŋ kwu kə ani dzày a ghu nə, ayiə ghu à zəŋə yiy dzwâbə̀ dzə̀ wày. 8Ghà zû nənìy anə lòʼo kə inyi, mə zê dzə̀ wày anə lòʼo kə inyi, aŋwòə soŋə fiy kamə kpe dzə̂.” 9Abù Yesù dzày tsə nəniy ayiə yə, ù dòʼò səə tsə iwe yiy a Galìlî.
Yesù zù anə lòʼo kə inyi ùmfwùə
10Abù awizə̂ Yesù yìy ŋwò tsə nəniy zù anə lòʼo kə inyi, Yesù ə ŋwò dzwùmì yə̀ ghu. Ù kə kə̀ zəŋi dzə̂ nə̀ wù lìy kəli nə̀ ghè zê ŋwò awote anə lòʼo kə inyi. U kə kwuni nyad zù ŋwò. 11Anə sòŋə fə inyi, ŋgəd tə ghě Dzû tìy khu tsə we anə lòʼo kə inyi, ghu bəbə nə̀, “Ù də̀ yiə?”
12Aghee tsoŋə dzìy kyabə tsə̀ à yiə anə ŋwàâ kə ghù kə̀. Aghê àliy yiy dzìy nə̀, “Ù də̌ wù ùdzoŋə̀ wìy.” Àliy kwuni dziy nə̀, “Hàay, ù guw kyabə tsə̀ aghù.” 13Wè lìy kə kwuni dzìy fyiə kə dzə̀ wày iyiə ìliy yiy idoŋ, aŋwòə ghu kə tsəŋə ŋgəd tə ghě Dzû.
14Abù inyi zû kwùm tsə nəniy anə ntɛmə̀ntɛ̀mə̀, Yesù ə zù a ndàw Kə̀zə̀ kaʼ yə̀ ani tyi dè ayiə awote awò aghù yìy. 15Adzwə ŋge zwum ŋgəd tə aghě Dzû tə̀, ghu kaʼ ani bəb anə iwè nə̀, “Wù wə̀ kaʼ mə̀yə ani kəli ndə̀mə̀ àyiə ghi nə̀ ù kamə zû kôʼ nəway ndàw kə̀ŋwàʼà ə?”
16Yesù bə̀lì kə a ghu nə̀, “Mə tyi dè dzə̀ wày ayiə unìə̀ yamə, ayiə yə mə tyiə dê nəniy a ŋwò bə̀ awò Zə̀kìy, Zə̀ kə̀ kə twum nəniy miə. 17Abu à də kə ndiə ù liə ani zəŋi ayiə yə Zə̀kìy liə nəniy, ù kì kyilə tsə ŋwò nə̀ ayiə yə mə dzîy nəniy a ŋwô bə̀ â Zə̀kìy, moo mə dzîy anə daʼa kam yə. 18Aghû yə̀ ghu dzîy nəniy ayiə yìy anə daʼa kə ghu, ghu liə ani kəli məŋkwiʼi anə iwè i ghu. A kwuni bû wù wə̀ ù dzìy nəniy ayiə yiy anə daʼa kə wû wə̀ ù twum nəniy we, ù ghi dzìy àyiə àsoŋə̀ yìy, iyiə ìliy yiy way nə̀ à də̌ ìguw yiy anə ayiə yə ù dzìy nəniy. 19Musîs ma nyiə̀ gha nə̀ ùlàŋ wìy. Wè lìy kamə kə̀ na kôʼ dzə̂ lâŋ kə̀mòʼ ate. À də̌ kiə̀ ghà sî liə nəniy ani wiy màʼà mìə̀ ə?”
20Ŋwàâ kə ghù kə̀ ə bə̀lì kə a we nə, “Usîy ùbɛbə wiy də ŋwô azoŋə̀ wò. À də̌ ndiə ù dziy wiy wô ə?”
21Yesù ə bə̀lì kə a ghu nə, “Mə zəŋi tsə mali kə iyiə kəmòʼ, adzwə yiy zwum nây yə̂ ghà ate ghii zù kwùm yə̀. 22Musîs kə dzày na awò ghà nə̀ ghà ki gwumə tsə utu awa iŋə̀mə̀ ghii yiy. À kə ba wày dzə Musîs ù kə dzây na nəniy ayiə ghè yə̀, à kə àyiə ghè yə̀ dzày na nə̀ təli ghi a səsə yiy. Ghà boʼò zè gwùmə̀ dyaŋə àwa ghi anə tsuk fə̀ zwaa fiy soʼo. 23Bəə ghà kə də ani nìy kə awa ghi ùŋəmə̀, zù gwùmì anə tsuk fə̀ zwaa fiy, nə̀ ghà liə way ani zaʼ lâŋ kə Musîs, à də̌ kìə̀ fôŋ tìy sî ŋə̀mə̀ nəniy gha nə̀ mə zəŋi taw kə wù a tsuk fə̀ zwaa fiy ə? 24Ghà bwi na tsə ani saʼa wù nə̀ ghà we maŋə̀ kòʼò yə̀ kə anə asə, ghà kwuni kwu ani saʼa tsə wù anə iyiə yə i də nəni tsitsi.”
Aghê kə bəbə nə̀ Yesù də̀ kə ŋwò Kə̀litò ə?
25Aghê liy yiy a Yèlusalèm kə bəbə nə̀, “À yù wày wù wə̀ aghee Dzû yìy kə dziy wiy maʼà ə̀? 26Kə̀litò nyiə̀ də̀ fə dzìy àyiə nə̀ ndaa, ŋgəd tə ghè Dzû tìy də dzìy wày iyiə ìliy yiy awò we, Ghà moʼò nə̀ ghu ndzə̂m kwu ŋwô nə̀ ù də̀ tiy ŋwô wù wə̀ Zə̀kìy sûw kyili na nəniy ə̀? 27Ghè kwuni kwu ŋwô loʼo kə wù wə̀ ŋwò bə̂ nəniy ate. Ani bu wù wə̀ Zə̀kìy sûw kyili na nəniy, ù nì bû nəniy, wù lìy nì kəli dzə̀ wày loʼo kə ù nì ŋwò bə̂ nəniy ate.”
28Abù Yesù tyi dè nəniy ayiə yiy a ndàw Kə̀zə̀, u dzày tsə anə dzə̂ ìtâw yìy nə̀, “Ghà moʼò nə̀ ghà ndzə̂m kwu ŋwô miə ə̀, kwu sòʼò loʼo kə mə ŋwô bə̂ nəniy ate ə̀? Mə kə̀ bû dzə̂ fəə anə daʼa kam. Wù wə̀ ù twum nəniy miə, ù də̌ wù wə̀ ù dzìy nəniy ayiə àsoŋə̀ yìy. Ghà kwu way we. 29Mə kwuni kwu ŋwô we, aŋwòə mə ŋwô bə̀ akə̀lə̀ we. À twum sòʼò we mìə.”
30Ghu də̀m kè tsə ani kwi we anə sòŋə fə ghà fə̀, aŋwòə soŋə fiy kə kamə kə̀ kpe dzə̂ awò ghu ani kwi we. 31Ndə̀mə̀ àghù yə̀ ghu kə kwu nəniy ibɛmə yiy azoŋə̀ Yesù anə ŋwàâ kə ghù kə̀, ghu mee, “Ani bu wù Zə̀kìy sûw kyili naa ù nì bù nəniy, ù nì zəŋə ŋwò mali tə yiə tiy tsìy fyi ayiə yə wù wə̀ zəŋi nəniy ə̀?”
Sǔgôʼ tìy bù kwi Yesù
32Aghee Falàsî yìy zuw tsə ayiə yə ŋwàâ kə ghù kə̀ kə tsoŋə dzîy nəniy kwùmə̀ yə̀ nə̀ Yesù, ghu nə̀ ŋgəd tə aghè àlwaʼa tiy twum yə̀ tə̀sǔgôʼ nə̀ ghu zû kwi Yesù. 33Yesù dzày tsə a ghu nə, “Mə kwu kə kəmə̀ fə fə sòŋə ani dòʼò nə̀ ghà, mə ki kâm dzwoŋi zû akə̀lə̀ wù wə̀ ù kə twum nəniy miə. 34Ghà ki kaw miə, ghà ki də kə̀ kwuni kôʼ aŋwòə ghà way dzə ani zù a lòʼo kə mə kî də nəniy ate.”
35Ŋgəd tə ghè Dzû tiy dzìy anə iwè ighu nə̀, “U dziy zû yə̀ ŋgà də wày ani kòʼ we ə? Ù dziy zû anə nàʼà tə̀ ŋwò tìy aghee ŋgàŋə̀ muə nəniy awote ə̀? Ù dziy zû tyi dê àyiə awò àghě Glìîk ə̀? 36Ù myìŋə̀ nə̀ìndiə anə ayiə yə ù dzìy nəniy nə̀ ŋgà ki kaw ighe, a ki də kə̀ kôʼ nəway we? Dzìy sòʼò nə̀ Ŋgà way dzə ani zù a lòʼo kə ù kì zê nəniy ate ə?”
Mwi mə in nyiə̀ nəniy imuə̀ i tsà yìy
37Ntsuk fə ghu nyiə gwuŋə̀ tsə nəniy inyi ufwùə wiy ate à kə də̀ tsə̀ ntsuk fə̀ soŋə̀ fìy. A tsuk fə ghè fə̀ Yesù kə ŋwò təmi kə idoŋ dzày tsə anə dzə̂ ìtaw yìy nə̀. “Abu à də kə ndiə fòŋ swəə nəniy we, u bù akə̀lə̀ mìə̀, 38wù wə̀ ù bɛmə nəniy â mìə̀, u bù mu mwi anə yiə yə ŋwàʼà k-a-zə̀ kìy dziy nə̀, ‘Abu à də kə ndiə ù bɛmə nəniy â mìə̀, Zə̀kìy ki zəŋi tsə nə̀ mwi mə ìn nyə̀ nəniy aghê nə̀ ìmuə̀ yìy ìn fyi bə̀ anə fòŋ ə we.’ ” 39Yesù kə ghii myìŋə̀ Zwàykə̀zwe kə, kə kə kwu nəniy ani bù ibàm azoŋə̀ aghù yə̀ ghu bɛmə nəniy â we. À kə də nə̀ Zə̀kìy kamə twum bə̂ dzə̂ Zwàykə̀zwekiy anə sòŋə fə ghè fə̀, aŋwòə ù kə kamə kə̀ zɛ̂m ŋwò dzwoŋi bə̂ dzə̂ Yesù anə ipfə ani dè ŋkwiʼi mə Yesù kwu nəniy.
Aghê kə byemə dzəŋə way kwùmə̀ yə̀ nə̀ wù wə̀ Yesù də nəniy we
40Aghê liy yiy anə ŋwàâ kə ghù kə̀, ghu zuw tsə yə Yesù dzày tsə nəniy ayiə yə, ghu mee, “Wù wə̀ ndzə̀m də̌ wè ntwùm ə̀ Kə̀zə̀ wə̀ ŋgǎ kə̀ lyimə nəniy.”
41Àliy yiy dzìy nə̀, “Ù də̌ wù wə̀ Zə̀kìy sûw kyili na nəniy.”
Àliy yiy kwuni dzìy nə̀, “Wù wə̀ Zə̀kìy sûw kyili na nəniy, ù kî fyi bə̀ dzə̀ wày a Galìlî.” 42I twâ dòʼò anə ŋwàʼà k-a-zə̀ nə̀, “Wù wə̀ Zə̀kìy sûw kyili na nəniy, ù kì fyiə bə̀ anə tuu kə Devìd wə̀ ù kə də nəniy dòŋ kìy. Ù ni də wè ìnaʼ i Betlèhêm. Inaʼ yə Devìd kə fyi nəniy ate.” 43Yəə i kə də nəniy ghi, ŋwàâ kə ghù kə̌ byemə dzəŋə way anə iyiə imòʼ kwùmə̀ yə̀ nə̀ wù wə̀ Yesù də nəniy we. 44Aghê liy yiy liə ani kwi zù nə̀ we a ndàw ntsaʼ, wè lìy kə kwuni mwàmə̀ yə̀ dzə̀ way we nə̀ àwo yiy.
Ŋgəd tə ghě Dzû tə̀liy tiy kə kə̀ bɛmə dzə̂ â Yesu
45Abù sǔgôʼ tə ndàw Kə̀zə̀ tìy dzwoŋi yə̂, ŋgəd tə aghè àlwaʼa tiy nə̀ àghě Falàsî yìy ə bəbə a ghu nə, “Ghà kə̀ bû nə way nə̀ we anə iyîkìə̀?”
46Sǔgôʼ tə̀ ə bə̀lì yə̀ a ghu nə, “Ghè kamə kə̀ kôʼ kôʼ nəway wù lìy ù dzìy nəniy ayiə yiy anə yiə yə wù wə̀ dzìy nəniy ate!”
47Aghê Falàsî yə̀ ə bəb dzwoŋi yə̀ a ghu nə̀, “Ù mâ nɛb sòʼò gha ə̀?” 48Ghà kwu kə ŋwô nə̀ wù ùmòʼ anə ŋgəd tə inaʼ tiy, moo wè Falàsî ùmòʼ kwu way ibɛmə yiy azoŋə we ə? 49Ŋwàâ kə ghù kə̀ kə kwu way ayiə yə lâŋ kìy dzîy. Yəə i də nəniy ghii, Zə̀kìy kî zəŋə ŋwò nə̀ ghu kəli utswə̂d.
50Nikə̀dəmə̀ wə̀ ù kə bòʼ zù kòʼ nəniy Yesù, ù kə də̌ wè Falàsî. U dzìy awò àghê Falàsî aliy yə a ghu nə, 51“Anə làŋ kə ŋgàŋ, ŋgà kwu way ani saʼ wiy aghû nə̀ ŋgà kamə zuw nəway idzwə i ghu yiy, nə̀ ŋgà kamə kaw kəli fyi kə soʼò ìyiə yə ghu zəŋi bɛb nəniy.”
52Ghu bə̀lì kə a we nə, “Wò də̌ we Galìlî soʼo ə? Toŋə kə ŋwàʼà k-a-zə̀kìy, wò kî zwiʼi kəli fyi kə nə̀ wè ntwùm ə̀ Kə̀zə̀ kamə fyi kôʼ bə̂ dzə̂ a Galìlî.” 53Aghê àdzə̀m ə ŋwò zù dzwoŋi anə ndaw tə ghu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Dzwan 7: isu
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© CABTAL 2023
