Dzwan 4
4
Idzəŋì i Yesù nə̀ wìyəŋi ə Sàmaliyà.
1Fôŋ tìy kə dzwàbə̀ wày aghee Falàsî yiy yə ghu zuw nə̀ Yesù kwu ndə̀mə̀ tsə̀təndii, nyə̀ sòʼò ghu nə̀ mwi m-à-zə̀ mìy tsìy fyi tsə Dzwan, 2(Də̀ ghii nə̀ Yesù kə ba nyə̀ dzə̀ wày aghê nə̀ mwi m-à-zə̀ mìy, à kə nyə̀ tsə̀təndii tə we). 3Yəə i kə də nəniy ghii, Yesù ə ŋwò tsə a mbwòʼ ə̀ Dzùdiyà zù iwe yiy a mbwòʼ ə̀ Galìlî. 4Ù kə kwu ani tsìy yə̀ dzəd anə inaʼ i Sàmalìyà.
5Anə yiə yə ù kwùm tsə a Sàmalìyà anə nàʼà fə Sikà fə̀ fə kə kwulì də nəniy akə̀lə̀ lòʼo kə Dzàkôb kə nyiə̂ ŋwô dzə̂ nəniy â wà we ghu kə twoŋə nəniy nə də Yùsə̂f. 6Bwoʼ kə mwi kə Dzàkôb kìy kə də̀ awote. Yesù ə̀ bù dòʼò zwày tsə awote nə̀ ù mə ŋgee bwii ani bwìy. À kə də̌ nə̀ inyi yiy nyiə̂ tyimə kwoʼo bə̀ tsitsi.
7Wìyəŋə̀ Sàmaliyà ùlìy wìy ə bù anə lòʼo kə twukə kə mwi kiy, Yesù mee awe nə, “Nyə̀ miə nə̀ mwi tə̀ mə mu yə̂.” 8A də̀ ghi nə̀ tsə̀təndii tə we tiy mə zù anə bekəivən a lòʼo kə̀ zwe kə ufànyiə kiy.
9Wìyəŋi wə̀ bə̀lì kə we nə, “Wò də̌ wè Dzû, mə də yəŋə̀ Sàmaliyà, wò də̌ mə̀yiə ani ŋwa mwi mə̀ mwuə̀ mìy awò mìə̀ ə?”#4.9 Aghee Dzû nə̀ àghě Sàmaliyà yìy kə dzwə anə iwè (Aghê Dzû yìy kə way dzə ani mu fwumi kòʼ dzə̀ mwi anə bwam, moo anə kəkaŋ kəmòʼ nə̀ Àghě Sàmaliyà yìy).
10Yesù ə bə̀lì kə a we nə, “Abu wò mə̀ kwu nəniy fyiə kə Zə̀kìy nyiə̀ nəniy, moo wù wə̀ ù ŋwaa nəniy mwi mə̀ mwuə̀ mìy awò wò, wò ə mə ŋwa yə̂ mwi mə̀ mwuə̀ mìy â we, u mə nyiə̀ wò nə̀ mwi mə ìn kwu nəniy imuə̀ itsà yìy.”
11Wiyəŋi wə mee â we nə, “A Mwe, wò kwu way kaŋ kə mwi kiy, bwôʼ kə mwi kə̀ ntswam də̀ ŋwô, wò kì nìy bə̀ yə̌ mwi mə ìn nyə̀ nəniy imuə̀ itsà yiy ə? 12À kə bwôʼ kə mwi kə â ghə̀d nyiə̀ tè təli ghələ ghu kə tyoŋə nəniy nə̀ à də̀ Dzàkôb, ù kə mwi muə tsə̀ fə̀ nə̀ àwa we yiy nə̀ ùsaʼ u təndzwù u we wiy, wò dzìy nə̀ wò tsìy fyi ŋwô we ə̀?”
13Yesù ə bə̀lì kə we nə, “Aghû yə̀ àdzə̀m ghu muə nəniy ndzòʼò mwi mə, fòŋə̀ mwi kî namə swəə ŋwǒ ghu. 14A kwuni bû wù wə̀ mə kî nyiə̀ nəniy we nə̀ mwi nə̀ ù mwu, fòŋə̀ mwi kî kàm swəə way we. Ìn ki də azoŋə̀ we, yəə à də dzwî fə̀ fə də zwumə koʼò dzə̀ wày, fə nyiə̀ nəniy imuə̀ itsà yìy awò we nsòŋə̀ indzə̀m.”
15Wiyəŋi wə̀ mee a we nə, “A Mwe, Nyə bə̀ miə nə̀ ndzòʼò mwi mə̀ ghà mə̀, kəə fòŋə̀ mwi nə̀ kamə̀ swəə miə, moo mə nə̀ kamə̀ bê fə ani bù twuli mwi.”
16Yesù ə dzày yə̀ a we nə “Zu twoŋə bə̌ ŋəm yə̂, wò bû nə̀ we.”
17Wiyəŋi wə̀ mee â Yesù nə̀, “Mə kwu way ŋəm.”
Yesù ə bə̀lì kə we nə, “Wò də tsitsi yə wò dzày nəniy nə̀ wò kamə nîy dzə̂ ŋəm. 18Wò mə nìy fyi aŋəm yìy àtà, wù wə̀ wò də nəniy nyiə nə̀ we, à baa wày dzə ŋəm yiə̀. Wò mə dzày ayiə àsoŋə̀ yìy â miə.”
19Wiyəŋi wə̀ mee a we nə “A mwe mə koʼò yəə wò də wè ntwùm ə̀ Kəzə̀.” 20“Nə̀ tě nə̀ təli yamə fə anə inaʼ Sàmaliyà kə Zə̀kìy fwulə̀ tsə̀ fə̀ anə ukàʼ, abu gha Aghě Dzû ghaa dziy nə̀ à mày kə̀ a Yèlusalèm aghê kwu nəniy ani fwùlì Kə̀zə̀.” 21Yesù mee a we nə, “A niə̀ wə̀, bɛmə kə ayiə yam à dziy yiy, soŋə fiy kî bè ŋwò aghê ni də fwulə̀ təŋə dzə̀ way Təli fə anə ukàʼ, moo a Yèlusalèm.
22Gha aghee Sàmaliyà, ghà baa kwu dzə̀ way wù wə̀ ghà fwulə̀ nəniy we, a kwuni bû ghə̀d aghee Dzû, ghè kwu ŋwô wù wə̀ ghè fwulə̀ nəniy aŋwòə Zə̀kìy bii fyi aghù abidzəmə̀ àghě Dzû yìy. 23Soŋə fiy kwunə kpe bə̀ ŋwò, fə mə bòʼ kpe nyiə, awò àghù yə̀ ghu fwulə̀ nəniy Zə̀kiy anə dzə̀d ìdzòŋə̀ yìy, ani fwùlì Kə̀zə̀ anə dzəd yə Zwàykə̀zwekiy dzîy nəniy nə̀ anə ayiə àsoŋə̀ yìy. À yù də ndzòʼò aghù yə̀ Təli khuu tsə̂ nə̀ ghu bû fwulì ighe. 24A way ani kòʼ dzə̀ Kə̀zə̀, aghû yə̀ ghu fwulə̀ nəniy we ghu kwu ani fwùlì we anə yiə yə Zwàykə̀zwe kiy dê bə̂, nə̀ anə̀ ayiə àsoŋə̀ yìy soʼo.”
25Wìyəŋi wə̀ mee a we nə, “Mə kwu nə̀ Wù wə̀ Zə̀kìy sûw kyili na, ù kì bè ŋwò ani bu ù bù nəniy, ù nî tòʼò bày dzày bə̀ ayiə yə awò ghəd.”
26Yesù ə dzày yə̀ a we nə, “A də miə we mə dzəŋə̀ nəniy nyiə nə̀ wò.”
27Soŋə fə ghè fə̀, tsə̀təndii tə Yesù tìy dyaŋi kway bə̀ we, bù zuw kway bə̀ àyiə yə ù dzə̀ŋə̀ nəniy nə̀ wìyəŋi wə, adzwə ŋge zwum ghu, wù ùmòʼ ə kə̀ mboʼò bəb dyaŋi soʼò nəway a we nə, “Wò dzìy nə̀ìndiə awò wìyəŋi wə ə? Moo wò dzə̀ŋə̀ nə̀ we a iyîkìə̀?”
28Wiyəŋi wə dyaŋi na sə tsə ntwà mwi ə̀ we nyi yə̀ anə inaʼ zù dzày yə̀ awò aghè a ghu nə, 29“Bu kòʼo nənìy wù wə̀ ù dzày mây bə̂ nəniy ayiə̀ yə mə zəŋi kôʼ dzə̂ nəniy, à sì də wù wò Zə̀kìy suw kyili na moo?” 30Aghê zù tə̀ŋì fyi mày bə̀ anə inaʼ ani zù kòʼ Yesù.
31Anə soŋə fə ghè fə̀, tsə̀təndii tə̀ we tiy mee a we nə “A àtyi dè, ghè bwoʼ kəwo nə̀ wò nyi yə̂ kəfyiə!”
32Yesù mee a ghu nə, “Mə kwu ŋwô ufânyiə wiy ani nyi nə̀ ghà way dzə ani kəli ndzòʼò ùfànyiə u ghè wə̀.”
33Tsə̀təndii tə we tiy kaʼ tsə ani bəb anə iwè nə̀, “Wù lìy sə̀ bù nyə̀ dzə̀ ŋwòə we nə̀ ùfànyiə moo.” 34Yesù ə dzày yə̀ aghu nə, “Ufânyiə wam wiy də ani fàʼ yə̀ fàʼ kə wû wə̀ ù twum nəniy miə, nə̀ ani mày kə sòʼò fàʼ kə ghè kə̀. 35Ghà taw dzìy tsə nə̀, ‘À nyìə̀ dòʼò sə təndzoŋə ikyàʼì tə̀ soŋə fə̀ kpîy fə ufyiə fiy kpe.’ Mə dzîy bə̀ aghà nə̀ ghà liay tsîy yə̂ akə̀lə̀ ghà, ghà kôʼ yəə ufyiə wiy biy doʼò dzə̂ ani kpiy. 36Bəə ghà fây nəniy ani zəŋi tsə nə̀ aghê bɛmə kə ntwum yam, mə nî niamə ŋwòə gha, yəə à də̀ mwe ə̀ ùswum ù tsəə nəniy aghû yə̀ ghu fî nəniy we ani kpìy ùfyiə. Aghê kî kyilə ŋwò imuə̀ itsà yìy bòʼ fàʼ kəli, ani zəŋi tsə nə̀ miə wə mə də nəniy yəə à də̌ wù wə̀ ù zuu nəniy, mə ki də ani kəli kədwiʼi nə̀ ghà, ghà də nəniy yəə à də̀ aghê kpiy yiy. 37À yù də̀ ighe idzəŋì yə̀ də nəniy ìsoŋə̀ yìy nə̀ ‘Wù lìy zee ŋwò, wù lìy wiy sì kpìy.’ 38Mə nyiə̀ twumə yə̀ ghà nə̀ ghà zû kpîy ùfyiə wə ghà kə də kə̀ zu nəway. Aghê liy mə zuu ghà kwuni zè kə ani zù kpìy ghà kəli kənamə bòʼ fàʼ kə ghu.”
39Ndə̀mə̀ àghě Sàmaliyà anə inaʼ i ghà yə̀ ə bɛmə yə̀ awò Yesù, aŋwòə wìyəŋi wə̀ kə zù dzày yə̀ a ghu nə̀ “Wù wə̀ mə dzày mà bə̀ àyiə yə mə zəŋi kôʼ dzə̂ nəniy.” 40À yù də ighe yə aghě Sàmaliyà kə bû nəniy akə̀lə̀ Yesù, ghu bwoʼ tsə we nə̀ wokiy nə̀ ù dzə̀ dòʼò tsə nə̀ ghu. Yesù ə̀ dòʼò tsə nə̀ ghu mə̀ntsukə imbè.
41Ndə̀mə̀ àliy yiy soʼo ghu maa bɛmə awò Yesù bòʼ ntwum yə ghu kə zuw ù nìʼà nəniy. 42Ghu dzày yə̀ awò wìyə̀ŋi wə awe nə̀ “Ghě kə̀ mâŋ byemə dzə̂ way bòʼ àyiə yə wò dzày nəniy â ghə̀d, iwee nələ mə kwuni zuw sòʼò anə idzwə i we, À ndzə̀m də̀ ìsoŋə̀ yìy nə̀ wù wə̀ ndzə̀m də Kə̀litò wə̀ ù bù nəniy ani bii fyi aghê ə mbyi.”
Yesù ə zəŋi taw kə wà wù ù nè wìy
43Yəə Yesù dòʼò tsə nəniy ntsukə imbè awote, u ŋwò tsə zù a Galìlî. 44Də̀ ghi nə̀ ù maa dzây nə̀ ìdzwə i we yiy nə̀ “Àghê taw twe myàʼà tsə̀ ŋwò wè ntwùm ə̀ Kə̀zə̀ anə inaʼ i we.” 45Abù ù zù kwûm tsə nəniy a Galìlî, aghee Galìlî yə̀ ə ŋgwam na tsə we awo, aŋwòə ghu maa kòʼ ayiə yə ù kə zəŋi nəniy anə inaʼ i Yèlusalèm anə sòŋə fə inyi i ŋkàmə̀tâzaʼà mìy.
46Yesù ə ŋwò tsə a Dzùdiyà zù anə inaʼ i Kanà a mbwòʼ ə̀ Galìlî anə lòʼò kə ù kə kyemì kə nəniy mwi ate anə mə̀nlwù. Wù ùsòŋə̀ ùlìy wìy kə də̀ awote, wà we kə dzaŋə̀ nəniy a Kàpanùm. 47Abù wù ù nè wə̀ zuw tsə nə̀ Yesù mə ŋwò bə̀ a Dzùdiyà bù dzwoŋi a Galìlî, u zù akə̀lə̀ Yesù bwoʼ we nə̀ wokiy nə̀ ù bù a Kàpanùm ù zəŋi taw kə wà we, aŋwòə wà ù ghè wə̀ nyiə̀ də̀ kə anə yiə pfəə yiy. 48Yesù bə̀lì kə a we nə, “Ghà liə tsə̀ kə ani kòʼ tsə dzə̀ mali tə ayiə, gha way ani kəli ibɛmə ə?”
49Wù wə̀ mee â Yesù nə̀, “A mwe, mə bwoʼ kəwo ŋgà ə ŋwô fwumi yə̂ wa nam fə̂ nə̀ pfə.”
50Yesù ə dzày tsə awò wù wə̀ nə̀, “Zù wa niə kì pfə dzə̀ wày.”
Wù ù ghè wə̀ ə bɛmə kə ayiə yə Yesù dzày nəniy, dyaŋi ŋwò yə̀. 51Anə yiə yə ù zè nəniy, u kpe yə̀ nə̀ àghè ə̀ kəfàʼ ə we yiy anə dzəd, aghû yə̀ mee a we nə “Wa niə̀ mə taw.”
52U bəb tsə aghu nə̀ uwe u ghè wə̀ kə̀ mày zəŋi? Ghu bə̀lì kə a we nə “À kə̀ də̌ a zwa anə ufwa uwùŋ ùmòʼ.” 53Tè wa nə ŋwò tà mòʼ tsə soŋə fə Yesù kə̀ dzây nəniy â we nə, “Wa niə̀ kì taw ŋwò.” À yù də ighe ù kə bɛmə nəniy awò Yesù nə̀ ìsəd i ndaw i we yiy.
54À kə yù zəŋə yə̀ mali tə ayiə ibè Yesù kə zəŋi nəniy anə yiə yə ù ŋwò tsə a Dzùdiyà zù a mbòʼò Galìlî.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Dzwan 4: isu
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© CABTAL 2023
