मती 13

बिहान वेरराः कहड़ी

(मरकूस 4:1-9; लूका 8:4-8)

1हनानाः दिन ईसू ओड़ाः अते उडुंगनेनखन हुडिंग समुंदर धरीरेय दुड़ुःनेना। 2अरू ईसू एचेरे मुरुक बगरा होड़कू जुमावयान दो, हाँय डोंगारे देगनेनखने दुड़ुःयान अरू जमा होड़कू समुंदर धरीरेकू चड़ाँकुःआ। 3अरू हनमेला ईसू हँकुःआ होड़कू मुरुक अउल-तउल कहड़ीकूने कता उदुःवाकुःआ।

अरू ईसू कतातेड, “मी होड़ बिहान वेर लगाय उडुंगनेना। 4दो वेवेर मेला अदोम बिहान दूर धरीरे लोजोरनेना अरू हना बिहान तितीगकू हलंग जोम एंडागोतेड। 5अरू अदोम बिहान दररी ओतरे लोजोरनेना। हंडा हुनुडिंग हास दोहोना। हनालगा हान हनालू राबनेनखन ओत अते उडुंगयान। 6मनदो मुरुक सितोंग परावनेन अते गोसोयान अरू जेर गुन लकन दोहोन अते असलावयान। 7अरू अदोम बिहान जनुम बुदारे लोजोरनेना अरू हान जनुम बुदा हरानेनखन तेन एंडागोतेड। 8अदोम बिहान नपाय ओतरे लोजोरनेना अरू नपाय ओमोननेना। हना बिहान तोनोंगाः तीस मन, तोनोंगाः साठ मन अरू तोनोंगाः मी सव मन होयानेना। 9अयूम अवेयता हाँयग होड़, नपायतेय अयूम ठुड़ावागे।”

अउल-तउल कहड़ीकूनराः मतलोब

(मरकूस 4:10-12; लूका 8:9-10)

10हना तयोमरे ईसूरिकुःआ चेलाकू ईसू एचेरे वेगवाडखनकू होंबोरतिडिग, “आम चिला लगा होड़कू एचेरे अउल-तउल कहड़ीम कतायता?”

11दो ईसू कतातेड, “भगवानराः राइजराः ओकोत कताकून सुदी लगा अपे लगा भगवान कनहूने एमेकेरा, मनदो हँकुःआ होड़कू लगा कोवान। 12तोनोंगीग एचेरे तोनोंगाः इदा दो हाँयके भगवान अरूय एमेवायता, अरू हाँय एचेरे मुरुक बगरा होया जुवाःता। मनदो तोनोंगीग एचेरे तोनोंगाः कोवानेःआ दो, हाँय एचेरे गुनमिन हों इदा, हना हों हाँय अते भगवान गोःयाता। 13अरू अउल-तउल कता नाःआ लगायिंग कतायता,

होड़कू ञेनेल मेडतेकू ञेलता, मनदो मेरकू सुदी अवेयता,

अरू अयुमेताकू हना हों हँकू मेरकू बुझाव अवेनता।

14हँकुःआ होड़कूराः बदीरे भगवानराः बड़रा कतायीग होड़ एसयाह उदुःगेता हनन इया होयाःता

अपे लुनुतूरतेपे अयुमेता,

मनदो ओरोपे बुझाव अवेनेना।

अपे मेडतेपे ञेलता,

मनदो ओरोपे ञेल ञाम अवेतेरा।

15हँकूराः जीव केटेगयना;

अरू लुतूर मोटावयना,

अरू हँकू मेड टिपी रेडकिया।

हनालगा हँकू ओरोकू सुदी अवेतेरा,

अरू ओरोकू बुझाव अवेतेरा।

नाःआ इया मेर होयाःकुः दो

हँकू कसूर अते जीवकू कुदाकेःआ अरू ईंग हँकूयिंग नपायकेःआ।”#एस 6:9-10

16“मनदो अपे ईंग एचेयतना हनापे ञेलतना अरू ईंगराः कतापे अयुमेतना। हनालगा भगवान अपेराः जीवे नपायकेरा। 17अपे ईंगपे अयूम! भगवानराः बड़रा कता होड़कू अते मुरुक होड़कू अरू बेगर गारबार होड़कू, अपे ञेञेलतना हना ञेलगे लगा अरू अपे अयुमेतना हना बड़रा अयुमे लगाकू चहाःआ, मनदो हना हँकू मेरकू ञेल अयूम अवेगाड।”

18हनते ईसू अरूय कतातेड, “नुँहू अपे, मी होड़ बिहाने वेरतेड हना अउल-तउल कहड़ीराः मतलोबपे अयूम। 19भगवानराः राइज बदीराः सरवन अयूमकेडखन मेरेय बुझाःता हाँय, दूर धरीरे लोजोरनेना हना बिहान इयायीग होड़ हवे। अरू हाँय अयूमतेरा हना सरवन कलउ वेगवाडखने गोःयाता। 20दररी ओतरे लोजोरनेना हना बिहान, भगवानराः सरवन अयूमकेडखन बहालतेकू मनाःता हँकुःआ होड़कू हवे। 21मनदो हँकू गुनमिन जेरगुःता अरू हुडिंग बेला वरी दोहोनता हना दूब इया इदानकुःआ। हँकुःआ होड़कू तोनोंग तोनोंग इयाःआ कटसियारे सहे संतावरेकू पराःतान मेला, भगवानराः दूरकू अड़ाःगोडता। 22अरू जनुम बुदारे लोजोरनेना हना बिहान, भगवानराः सरवनकू अयुमेता हँकुःआ होड़कू हवे, मनदो हना सरवन चउंदीसराः ओंगोल अरू आन-धानराः ओंगोलते तेन जुवाःता। हनालगा हान मेर जो अवेनता। 23अरू नपाय ओतरे लोजोरनेना हना बिहान, सरवन नपायते अयूमकेडखन अँननकूराः जीवरे दोहोकेडखनकू जोःता हँकुःआ होड़कू हवे। तोनोंगीग मी सव मन, तोनोंगीग साठ मन अरू तोनोंगीग तीस मने अदरेता।”

पहाड़राः बीर बिहानराः अउल-तउल कहड़ी

24हनते ईसू चेलाकूतेन एचेरे अरू मीटोंग अउल-तउल कहड़ीय कतातेरा, “भगवानराः राइज अनँयग दोहोड़रे नपाय बिहाने वेरतेरा, हाँयग होड़ इया इदा। 25मनदो हाँय अपीगाय हनमेला हाँयरीग मी होड़ मुदइ होड़ वेगनेनखन गोहोम तलारे पहाड़राः बीर बिहाने वेर अटूड। 26तयोमरे गोहोम नपायते ओमोन उडुंगनेना अरू बलीनेन दो पहाड़राः बीर हों दोहोना।

27नाःआ ञेलतेडखन हड़वाहाकू मालिकतुकू एचेरे सेनेकियानखनकू कताया, ने मालिक आम दोहोड़रे वेर लगा नपाय बिहान मेरेम गोःगतेरा जा? हंडा पहाड़ बीर करेःआ वेगकिया?”

28दो मालिक कतातेड, “नान दो तोनोंगीग मुदइ होड़ नाःआ इयाय एचेकेरा।”

दो हड़वाहाकू हाँय एचेरेकू होंबोरतेरा, “अले हनाले रवीग एंडागे लगा आम चहाःतना जा?”

29दो मालिक कतातेड, “इकाहापे। पहाड़ बीर रवीग मेला गोहोम हों रवीग उडुंग जुवाःता। 30हनालगा बनर मिनीरेपे हरा ओवा अरू इईर मेला इईर होड़कूयिंग कतावाता पहाड़ बीर उडुंगकेडखन बाल लोगे लगा बोझागोडपे अरू गोहोम ईरकेडखन ईंगराः पलारेपे अगू जुमावगोड। माःआन।”

ढड़हा बिहान अरू सेबेल सोड़ाराः अउल-तउल कहड़ीकून

(मरकूस 4:30-32; लूका 3:18-21)

31ईसू हँकू एचेरे अरू मीटोंग एटाःआ अउल-तउल कहड़ीय कतातेरा, “भगवानराः राइज ढड़हा बिहान इया इदा। हना मी होड़ होड़ गोःकेडखन अनँयगराः दोहोड़रेय वेरगोतेड। 32हना जमा एटाः इयाःआ बिहान अते हुडिंग बिहान दोहोनता। मनदो हान हराकियानखन जमा बुदाकूनते मरंग होयाःता अरू दूब जुवाःता, जेमहा तितीगकू वेगवाडखन हनाराः डइड़रे तुकाकू तुला।”

33हनते ईसू हँकू एचेरे अरू मीटोंग अउल-तउल कहड़ीय कतातेरा, “भगवानराः राइज सेबेल सोड़ा इया इदा। मी होड़ अइमी मुरुक बगरा गोहोम गुंडारे सेबेल सोड़ाय सुवेडतेड अरू हना दोहो दोहो जमा गुंडा पुड़सूड़यान।”

34नाःआ जमा कहड़ीकून ईसू अउल-तउलते होड़कू एचेरेय कता उदुःगेःआ, 35जेमहा भगवानराः बड़रा कतायीग होड़ कतातेरा हना सरवन होया जुवाः,

“ईंग अपे सुदा अउल-तउल कहड़ीकूनिंग कतायता,

चउंदीसराः बुँहड़ीन अते ओकोत इदा हना कताकून अपेयिंग उदुःवापेता।”#सेरेंगकून 78:2

पहाड़ बीर बिहान अउल-तउल कहड़ीराः मतलोब

36हनते ईसू होड़कू अटूतेडखन ओड़ाःए कुदा वेजेडा। दो हनमेला ईसूरिकुःआ चेलाकू हाँय एचेरे सेनेडखनकू कतातेड, “ने गुरुजी, पहाड़ बीर बिहान बदीरे अउल-तउल कहड़ीराः मतलोबमे उदुःवाले।”

37दो ईसू हँकूय कता उदुःवातेड, “नपाय बिहान वेवेरीग होड़ मनुवारीग बेटात हवे। 38दोहोड़ नाःआ चउंदीस हवे अरू नपाय बिहान भगवानराः राइजरिकुःआ होड़कू हवे। पहाड़ बीर बिहान कलउरिकुःआ होड़कू हवे। 39अरू हना बिहाने वेरतेरा हाँयग मुदइ होड़ कलउ हवे। इरुः चउंदीस टुटीगगुःता हना बेला हवे अरू इईरकुःआ होड़कू सेरमो देसरिकुःआ बराहीलकू हवे। 40पहाड़राः बीरकून होड़कू गरोम ठुड़ीकेडखनकू बाल लो एंडागोडता, हनन इया चउंदीस टुटीगगुः मेला होयाःता। 41मनुवारीग बेटात, सेरमो देसरिकुःआ बराहीलकूय वारकूता अरू हँकू, हाँयराः राइज अते, होड़कू एचे कसूरकूता हना जमाकून अरू बेलूर बुताकूनकू बुताता हँकुःआ होड़कूकू उडुंग एंडागोडकूता, 42अरू हँकू नरगराः सेंगेलरेकू तेके बोलोकूता। हना ततेररे होड़कू मुरुक इयाम घड़ीन रेटेग-रेटेग तिरिंगकू कड़रावता। 43मनदो भगवानराः ओंगोलरे बेगर गारबार होड़कू अँनकूरीग अपांग भगवानराः राइजरे बेर इयाकू विड़चेड़ता। अयूम अवेयता हाँयग होड़, नपायतेय अयूम ठुड़ावागे।”

ओकोत धन अरू मुतीराः अउल-तउल कहड़ीकून

44ईसू अरू अउल-तउल कहड़ीकूने कतातेरा, “भगवानराः राइज, दोहोड़रे तीलतो इदा हना धन इया इदा। हना धन तोनोंगीग होड़के पवावनेन दो हाँय ओहेन हना धाने ओकोगोतेड अरू मुरुक बहालते सेनेकियानखन अनँयगराः जमा जिनिसकूने अकिरिंगगोतेड अरू हना दोहोड़े किजातेरा।

45अरू भगवानराः राइज ननन इया इदा। मी होड़ फेरवइत होड़ दोहोना। हाँय मुरुक नपाय मुतीकूने सपाआ। 46दो हाँय मुरुक नपाय अरू किमइताः मुतीय पवावयान दो सेनेकियानखन आँयगराः जमाय अकिरिंगगोतेड अरू हना मुतीय किजातेरा।”

मरंग जालराः अउल-तउल कहड़ी

47ईसू अरू मीटोंग अउल-तउल कहड़ीय कतातेरा, “भगवानराः राइज समुंदरेकू एनेगता हना मरंग जाल इया इदा। हना जाल दाःरेकू तेकेगोडता दो जमा इयाकुःआ हकूकू गरोम जुमावगोडकूता। 48अरू जालरे हकूकू दाः पेरेग जुवाःतान दो, हँकुःआ केंवटा होड़कू हना जाल, धरीरेकू ओर उडुंगेता अरू दुड़ुःकियानखन नपाय हकूकू अँननकूराः कुचूरेकू सोलोंगगोडकूता अरू बेनेलूरकू दोहोनता हँकुःआ जमा हकूकूकू रेमगे एंडागोडता। 49नाःआ जूग टुटीगगुः मेला ननानाः इया होयाःता। सेरमो देसरिकुःआ बराहीलकू भगवानराः ओंगोलरे बेगर गारबार होड़कू, कसूर होड़कू अतेकू हिगारगोडकूता, 50अरू हँकुःआ कसूर होड़कू हितकाःतो सेंगेलरेकू तेके बोलोगोडकूता। हँकूके हंडा तिरिंग रेटेग-रेटेग कड़राव घड़ीन इयाम पराःता।”

51अरू ईसू हँकूय होंबोरतेड, “अपे नाःआ जमा कताकूनपे बुझाःतना जा?”

दो चेलाकूतेन कतातेड, “हाव, अले बुझाःतनाले।”

52हनते ईसू अरूय कतावाडकू, “भगवानराः राइज बदीरेय चेडकिया हाँयग नियम चेडदार होड़, अनँयग ओड़ाः अते नँवा अरू जुना जिनिसकूने उडुंगगोडता हाँयग मी होड़ ओड़ाः मालिक इया इदानिया।”

नसरतरे ईसू मेरकू मान मरजइतगडीग

(मरकूस 6:1-6; लूका 4:16-30)

53ईसू नाःआ जमा अउल-तउल कहड़ीकून चेडतेडकूखन हना ततेर अते सलावयाने। 54अरू अनँयगराः छतररे सोदोरनेनखन भगवानराः अरजी ओड़ाःरे होड़कूय चेडा। दो होड़कू बयावनेनखनकू कतातेड, “नाँयग होड़ नाःआ इयाःआ कनहून अरू मुरुक जंगरराः बुता करतेय पवावकिया? 55नाँय काट मिसतिरीरीग बेटात ना लवे जा? नाँयरीग एंगात मरियम अरू नाँयरिकुःआ बोपोहकूतेन एकूब, उसूप, सिमोन अरू जूदा ना लवे जा? 56अरू नाँयरिकुःआ मेमेसकूतेन हों अबू सुदा मेरकू दोहोनता जा? दो नाँय नाःआ इयाःआ कनहून इयेतेय चेडकिया?” 57दो ननन इया हँकुःआ होड़कू हाँयकू आड-बेकारवातिरिया।

दो ईसू हँकू एचेरेय कतातेरा, “तोनोंगीग भगवानराः बड़रा कता होड़ अनँयगराः सहररे सहे अनँयग ओड़ाःरिकुःआ होड़कूते मान मरजइत मेरेय पवाःता।” 58हना सहररिकुःआ होड़कू हाँय एचेरे मेरकू बिसवासगाड अते हाँय हंडा मुरुक बयाव जुवाः इयाःआ बुताकून मेरेय एचेगाड।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

मती 13: kfp

Highlight

ಶೇರ್

ಕಾಪಿ