Luk 13
13
Sumba kad deg tɔrrɨn ndid
1Kaglot'n non deg madg ɗen ɔrrɨn hoita 'nten Jeju anan: Pilat tɔl deg kɨ Galilet lon ndɨ lan ne kadkari adɨn Luwah. 2Jeju turd an: Oo a anan deg kɨ dɔning Galile'n non ĩn ngéɗamajal tɔi ndeg deg kɨ dɔning Galilet tube la oin ne kɔ titbe yo? 3Ã ã, m'ndɨ m'elsɨ: Ĩla i tɔrrɨn ndisɨ al a ne, a oin kɔ tube titbe tɔ. 4Ke deg kɨkɨlah gidaijijoo'n non ĩgɨn kuj kɨ ngal kɨ dõ kɨ Siloet so dɔdt tɔld ye, oo a anan ĩn deg kɨmajal, girra i dɔdt kɨ tɔi deg tube ngendɨ ɓebo Jerusalemt e? 5M'ndɨ m'elsɨ: Ãã, na ĩla i tɔrrɨn ndisɨ al a ne, a oin kɔ tube tɔ ho.
Terrta dɔ kag mbaiɓoodt kɨ kanda goto
6Jeju eld terrta 'nten an: De mad ad hɔn kag mbaiɓood kam ndɔɔt lon; la ɗe sah kanda tit, na ngah al. 7Kamla el ngengom ndɔɔ an: Oo, ɓal mɨta la m'ɗe m'sah kand kag mbaiɓood'n ɗan, na m'ngaa al; i gaa kɔ, kɨtɔɗi ɗa utɨn dɔning kɨ ndang kari a? 8Ngengom ndɔɔ tura an: Bɨraɓe i nyàa ɓalt'n ɗan ɓaitɔ ad m'ur nang gug nja, na mũ ɓirɓit't. 9I titbe la, nẽbe kɨnõt a and maj, na ĩla and al a ne, a i gaa i laa kɔ.
Jeju yoot dekɨdẽ mad ndɔ taakòt
10Jeju ndɨ ndoo deg kam kuj kawnat mad lo Juipg kɨ ndɔ taakò. 11Dekɨdẽ mad ndɨ nõ, ndil kɨmajal i kamat; ndaa tõt ɓal kɨlah gidaijijoo, ad gɔkɨ ngãibe, asɨ sɨra ron kɨ dõ al. 12Lon Jeju ooa ye, kuna an: Dekɨdẽ i yoot dɔ mõit loi. 13Nda jin dɔat, tentenbe dekɨdẽ sɨra ron kɨ dõ, ad ɔsɨgon Luwah. 14Na kɨbo kɨ kuj kawnat lo Juipg ɓawong, kɨta yootɨn Jeju yoot de kɨ ndɔ taakò ye, ad el deg koosɨg an: Ndɔ kɨbojidet ton nõ'n sumba kad deg ɗan kɨla kamt; kam ndɔgt'n non i ɗen ad yootsɨn, na kɨ ndɔ taakò al. 15Na Bɨraɓe tura an: Ĩn ngéndookumdeg; dekɨɗen kusɨt la hã tut mang lon ke korro lon dɔ belat a sia ad ãi man kɨ ndɔ taakò al a? 16Dekɨdẽ'n ndɨn, ĩn i ngon Abraham'n Sɨtan dɔa ɓal kɨlah gidaijijoo ten ye, kad m'tuta dɔ mõit 'nten kɨ ndɔ taakò ale? 17Lon ɗa eltag'n non ɓaitɔ ye, ro ngéndoorag sɔld tube. Koosɨdeg tube rod neld dɔ nyagt kɨmajmaj tube'n Jeju ndɨ ɗa.
Terrta dɔ kum mutardt
(Oo Mat 13:31-33; Mrk 4:30-32)
18El tɔ an: Kõɓe lo Luwah taan na kɨ ɗi a? Kɨ ɗi m'a m'ɔjan a? 19I tit kum mutard. De mad un dub kam ndɔɔt lon. Kum nya ɓa tɔg, tel kag kɨbo, ad yelg kɨ dõ hɔn londɨd dɔjiagt. 20Tel elta mad tɔ an: Kɨ ɗi m'dan kõɓe lo Luwah a? 21I titberrkasɨ'n dekɨdẽ mad un bur kɨ nduj kɨ tɔrr ngo nya mɨta mbã ad berrkasɨ asɨ nduj kɨ loi tube.
Ta nyandoo lo Jeju dɔ tabit kand koɓet lo Luwah
(Oo Mat 7:13-14,21-23; 8:11-12)
22Jeju ndɨ aw, a tɔi kɨ goɓebog kɨ nganɓeg a ndoo deg, awɨn kɨ nont ɓebo Jerusalemt. 23De mad ndɨjea ta an: Bɨraɓe ĩgɨn ndɨ ajɨn ye ĩn tẽbe e? Jeju turd an: 24I lan rosɨ kɨ nat kad andɨn tabit't kɨ ngunɨn kɨta m'ndɨ m'elsɨ, deg ngãibe a ndigɨn kɨ n'andɨnt, na a asɨn al. 25Lon ngeɓe ɓai woi, ut tabit, na i ɗan tɨga i mbã girr ga tabit, anan kɨ Bɨraɓe tee adsɨ. A tursɨ an: M'ger ko lon i ɓaint al. 26Kamla a i mbã girr kel kan: kɨ sa ho, kɨ j'ãi sei nat, na i ndoo deg dɔ ɗobt loj ho. 27Na a el an: M'ndɨ m'elsɨ m'ger ko lon i ɓaint al. I tɔrrɨn rosɨ romt kɔ ĩn ngéɗanya kɨgoɗobat al. 28Nu la a i nont kɨ dɔngang ye, lon oon Abraham kɨ Isaak kɨ Jakob kɨ ngékelta kɨ ta Luwaht tube kam kõɓet lo Luwah, na in kɨɓeg kɨ dɔsɨ lasɨn kɨ tɨga. 29Deg a ɗen ko loɓakàdt kɨ ko lo kud kàdt, kɨ ko dɔɔ kɨ ko ɓodo a ndɨn ta nyasat kam kõɓet lo Luwah. 30Oon tɔ, kɨ dɔboit a telɨn deg kɨdasa, na deg kɨdasa a telɨn deg kɨ dɔboit.
Deg kɨ Jerusalem oon dɔ ta lo Jeju al
(Oo Mat 23:34-39)
31Kaglot'n non parisɨ madg awɨn ro Jejut elɨna anan: I tee nẽbe kɔ, aw kɨta Herod Antipas ndig tɔli. 32Jeju eld an: Awɨn elɨn de kɨ ngegool deg tit tal'n non. Ɓone kɨ loti, m'ndɨ m'tuɓa ndilg kɨmajal kɔ, m'ndɨ m'yoot deg, na dɔ ndɔt kɨkõmɨta a ne, m'a m'tɔl kõn kɨla lom. 33Kari, na m'a m'aw kete ɓone kɨ loti, kɨ loti kɨ nu tɔ. Kɨtɔ i root al kad ngekelta kɨta Luwaht oi tɨga na sumba kad oi kam ɓebo Jerusalemt tã. 34A Jerusalem, Jerusalem ngetɔl ngékelta kɨ ta Luwaht, ngékelta kɨta Luwaht'n land kɨ rosɨt, na i ndɨ i tɨlad kɨ mbal. Nja bãi m'ndig kɨ m'kaw ngani kɨ nat tit'n kɨnja ndɨ kawɨn nganɨn kɨ girr bɔgɨnt na i ndigɨn al. 35Kam kuj losɨ a todɨla; m'ndɨ m'elsɨ kɨ ndim tɔ. Labekɨnõt a oomɨn gog al ta, mbã kaglo asɨ, lon a anan: Ngemajkurr la i ĩn ndɨ ɗe kam tɔ Bɨraɓet.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk 13: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
