Лукастар 12

Меркіненпес ле буджяндіпнастар

1Андре оди овра іскіндепес іґєн бут нийпос авка, гой кікіденас єкг аврес. Ісус кєздиндя те вакєрен єкгвар ко Пескєре сікаде:

— Меркіненпес фарісєйсько закваскатар, саві гіні буджяндіпе.

2Нане ніч ґарудо, со паліш те на увлягас пгутердо, ані нане ніч, со човрал пес кєрел, гой паліш те на пгутерелпес аврі. 3Ода, со тумен вакєрен андре цма, шунена про шветлос, а со ціхонес пгендян андре андруні соба, ейла розвакєрдо пало кгєрескєре пади.

Даранпес чак ле Девлестар

4Пгенав туменґє, Мійре баратенґє: на даран одалендар, ко мурдарел тєлос, і бутер ніч на бійрінел те кєрен. 5Ме пгенава туменґє, Кастар те даран: даран Одалестар, кє Касте гін влада те мурдарен і те чівен андре ґєєна. Га, пгенав туменґє, Лестар даран. 6Чі на панч цікне чірікле бікєнен важо дуй цікне копейкі? Та ані єкг лендар нане бістердо ле Девлега. 7А кє туменде те о бала про шейро гіне прееґєнде! На даран, бо тумен кучедер ле буте чіріклендар.

На ладжянпес ле Ісусостар

8Пгенав туменґє: саконес, ко пгутердонес прінджярел Ман анґлал о мануша, одалес те о Ча ле Манушенґєро прінджярела анґлал анґєла ле Девлескєре, 9а ко отпгенелапес Мандар анґлал о мануша, одалестар те Ме отпгенавапес анґлал анґєла ле Девлескєре. 10Саконескє, ко пгенела хоч єкг лав налачо про Ча ле Манушенґєро, одмукєлапес. А одалескє, ко вакєрела джюнґіпе про Свентно Духос, одалескє на одмукєлапес.

11Кана анена тумен про судос андре сінаґоґі, ко пгуредера те ко владара, на думінен пало ода, сар туменґє кампел те заачен важ песте або со туменґє те вакєрен. 12Свентно Духос андре оди овра сікавела тумен, со кампел те вакєрен.

Вакєрібе пало наґодявер барвало мануш

13Вареко ле нийпостар пгендя Лескє:

— Танітов, пген мійре пгралескє, гой ов те розулавел манца ода, со мукляпес аменґє амаре дадестар.

14Та Ов лескє отпгендя:

— Манушея, ко Ман тгодя, гой Ме те авав судзас туменґє або те розулавав варесо машкар туменде?

15І Ов пгендя ленґє:

— Дикгєн, гой тумен те на авен бокгмарде. Сар те на увлягас барвало о мануш, лескєро джівіпе одалестар нане завісімо.

16Ов розвакєрдя ленґє єкг вакєрібе:

— Ко єкг барвало мануш есас баро увліпен пре маля. 17Ов думінелас андре песте: «Со манґє те кєрен? Нане ман, кай те іскідав саворо увліпе». 18І пгендя: «Кєрава авка: пгаґєрава мійре шопі і кєрава баредер, і акор іскідава одя мійро саворо дів і саворо мійро барваліпе. 19Акор пгенава пескє: "Джівіпе мійро, канакє кє туте бут барваліпе про бут берша! Кгіню, ха, пій і радисалю!"» 20Та о Дейл лескє пгендя: «Ту наґодявер! Дадіве раті залена тутар тийро джівіпе. Акор каскє ачела саворо, со ту кійсітиндял?» 21Авка ейла саконега, ко іскідел барваліпе прекал песте, а на барвальол пріґ о Дейл.

На даран пал тумаро джівіпе

22Паліш пгендя Ісус Пескєре сікаденґє:

— Важ ода пгенав туменґє: на даран пал тумаро джівіпе, со туменґє те хан, ані пал пескєро тєлос, андре состе туменґє пес те кіден. 23Джівіпе кучедер ле хавібнастар, і тєлос важнедер голмендар. 24Дикгєн про човкі: оне на шіїнен ані на іскіден; нане лен коморі ані о шопі, та о Дейл дел лен те хан. Та тумен кучедер одале чіріклендар! 25Ко тумендар, сар те на пережівінел, бійрінел те доден ко пескєро джівіпе хоча єкг оврі? 26Те тумен на бійрінен минґ када те кєрен, акор, со тумен думінен пало авер?

27Дикгєн про лілії, сар оне барон: оне бувті на кєрен, ані на сівен. Та пгенав туменґє, со минґ о Соломон андре саворі пескєрі слава на кіделаспес авка, сар єкг лендар. 28Те о Дейл авка кідел е чар пре маля, саві дадіве гіні, а тайса ла чівена андре яґ, та чі на кідела Ов те тумен, фріма патябнаскєре? 29На думінен пало ода, со туменґє те хан, со те пієн, на пережівінен пало ода. 30Бо када саворо роден нийпа светоскєре, а тумаро Дад джянел, со тумен нуждиненпес андро ода. 31Єкг федер роден Лескєро Краліпе, і ода саворо доделапес минґ туменґє.

32На дара, цікно стадос! Бо тумаро Дад коркоро камля те ден туменґє Краліпе! 33Бікєнен тумаро барваліпе і розден ле чоренґє. Кєрен пескє айсе тарці, саве на гординенпес тейле, барваліпе саво на фрімісальол, одя, кай о човрашіс кє ленде на подджял, а о кірме на хана лен опре. 34Бо одя, кай тумаро гіно барваліпе, одя ейла те тумаро їло.

Вакєрібе пало лачо совґас

35Авен міндик кійсітиме: голмі про дерекос препганле, і тумаре лампі мі лабон. 36Авен сар мануша, саве ужарен ле хулай, кана авела пало біяв, і кана авела і дуркінела, акор єкгваресте лескє пгутерена. 37Бахтале одала совґі, каскєро хулай, кана вісальола, аракгєла лен, со оне на совен. Чачібе пгенав туменґє, ов коркоро препгандела дерекос і сікавела ленґє тган пажо скамін і кєздинела ленґє те совґалінен. 38Бахтале одала, ко на совела акор, кана ов авела про єпаш рат, чі анґлал ода, сар дівісальол. 39Джянен, гой те джянлялас о хулай ле кгєрескєро, андре саві овра авела човрашіс, ов на домуклялас лескє те заджян андро пескєро кгєр. 40Те тумен маїнен тейн кійсітиме, бо о Ча ле Манушенґєро авела андре айсі овра, кана тумен на ужарена пре Лесте.

41Акор пгучля Лестар о Петро:

— Раєя! Ту вакєрес када вакєрібе чак аменґє вай саворенґє?

42Рай лескє отпгендя:

— Акор ко ейла патівало і ґодявер управітеліс, савес о хулай тгодя про саворе авер совґі, гой кана авела овра те роздел ленґє о маро? 43Бахтало ода совґас, савес лескєро хулай, кана авела, аракгєла, со кєрел авка. 44Чачібе пгенав туменґє, со ов допатяла лескє саворо пескєро хулаїпе. 45Та те ода совґас пгенела андро пескєро їло: «На сіґ авела мійро хулай», — і кєздинела те марен ле совґен те ле совґалкінєн, те хан, те пієн і те мулатинен, 46авела лескєро хулай андро ода дівес, кана ов на ужарел, а те андре оди овра, кана ов на джянел. Акор чінґєрела лес про єпаш і опреділінела лескє тган біпатябнаскєренца.

47Ода совґас, саво джянелас хулаєскєрі воля і на есас кійсітиме, і на кєрелас ода, со камелас хулай, мардьола іґєн бут. 48А ода, саво на джянел, а кєрел айсо, со засовґалінел, гой лес те покарінен, ейла мардо фрімедер. Одалескє, каскє есас дино бутередер, одалестар бутередер пгучена. І каскє есас бут допатянло, кадалестар бутередер те пгучена.

Мануша враждинен машкар песте важо Ісус

49Ме авльом яґ те анен пре пгув, і сар Ме камльомас, гой ов іма те розлабол! 50Та Манґє минґ кампел те преджян болавіпе; і сар Манґє пгарес, адик ода на ачела! 51Тумен думінен, со Ме авльом те анен мірос пре пгув? Наа, пгенав туменґє, на мірос, но розулавіпе. 52Чаладос панч манушендар розулавелапес, трінджяне некі дуєджяненґє, дувджяне некі трінджяненґє. 53Розулавелапес о дад ле чага і о ча ле дадега; а е дай — ле чайорага, а е чай — ле даяга; сасуй — боврага, а е боврі — ле сасага.

На прінджярен векоскєро знаменіє

54Ісус пгендя те ле нийпоскє:

— Кана тумен дикгєн, со вазделпес хмара западостар, тумен єкгваресте пгенен: «Ейла брішинд», — і чачес, перел брішинд. 55А кана пгурдел барвал югостар, тумен пгенен: «Ейла іґєн татес», — і ачел авка. 56Буджянде! Ода, со ачел пре пгув а те про нєбос, тумен прінджярен, акор соске тумен на джянен, сар те прінджярен оди оврі? 57Соске тумен коркоре на розсудзінен, андре состе чачібе? 58Кана ту джяс тийре врагога ко начальнікос, постарінтут те пріміріненпес лега, адик сал лега минґ про дром, а те на, та акор ов анела тут ко судзас, а о судзас отдела тут сторожіскє, а ода чівела тут андре тюрма. 59Пгенав тукє: на авега одарік аврі, адик на отдега лескє саворо джі кє єкг копейка.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Лукастар 12: ЗРБ

Highlight

ಶೇರ್

ಕಾಪಿ