मर्कूस 14
14
येशूह मुवैना योजना
मत्ती २६:१-५; लूका २२:१-२; यूहन्ना ११:४५-५३
1खमिर नैमिलाइल रोटी खैना टिहार ओ मुक्ति-दिवस कना टिहार अइना दुइ दिन बाँकी रह। मुख्य पूजारीहुँक्र ओ शास्त्रीहुँक्र येशूह गुपचुपम पकर्क मुवाइ ख्वाजटलह।#प्रस १२:१-२७ 2हुँक्र असिक कैरख्लह, “टिहारम भीडक आघ नैकरी, नै त हूलदङ्गा मच्जाई।”#१४:२ हूलदङ्गा मच्लसे, रोमी सरकार हुँकन चोरी लगैहीन कना बात यहूदी अगुवन थाहाँ रलहन। उ अवस्थम रोमी सरकार यहूदी अगुवन दण्ड केल नैदेक, प्रधान पूजारीह खारेज फे कर्नेरलहन।
येशूकम वास अइना बहुमूल्य चिज खन्ह्यादेलक
मत्ती २६:६-१३; यूहन्ना १२:१-८
3बेथानिया गाउँक सिमोनक (पैल्ह हुँकहीन कोररोग लागरलहन) घरम येशू रलह। उहाँ खाए बैठल ब्याला एकठो जन्नीमनैया सिङ्गमरमरक शीशीम वास अइना बहुमूल्य चिज#१४:३ वास अइना बहुमूल्य चिज: जटामसिह कना विरुवक जरसे बनल वास अइना बहुमूल्य चिज हो। लेक अइली ओ घ्याँचठेसे शीशी फोर्क येशूक कपारिम खन्ह्यादेली।#१४:३ उ ब्याला वास अइना चिज या त्याल मनैन्हकम खन्ह्यैलसे, आदर करल मानजाए। खासकैक रज्वन ओ बराबरा मनैन ओसिक आदर करँट् (भजनसंग्रह २३:५, ९२:१०)।
4यी देख्क कुई-कुई रिसाक अप्न-अप्न कल, “अत्रा महङ्ग वास अइना चिज काजे खर्बास पारल? 5यी वास अइना चिज तीन सय चाँदीक पैँससे फे धेरम बिक्री कैक गरीबन देलसे हुइनेरह।” तब हुँक्र उ जन्नीमनैयह कर्रसे हप्कैल।#१४:५ उ ब्याला मञ्जोरी कर्ना मनैयक एक दिनिक ज्याला एकठो चाँदीक पैँसा रह।
6तर येशू कल, “छोरदेओ, काजे टुह्र हिँकाहारपर कचकचाइटो? यी म्वार लाग असल काम कैरख्ली। 7गरीबहुँक्र सड्डभर टुन्हकसँग पलरठ, ओ चाहल ब्याला टुह्र जब फे हुँकन सहायता करसेक्ठो। तर टुह्र महीह सड्डभर नैपैबो।#व्य १५:११ 8यी कर सेक्ना काम म्वार लाग कैरख्ली। म्वार शरीर गारक लाग आघहेँ वास अइना चिज खन्ह्याक तयार पाररख्ली।#१४:८ मुवल मनैन गर्यम ढर्नासे आघ मूर्दकम वास अइना बहुमूल्य चिज ओ मसला घँस्ना यहूदी चलन रह। येशू मुव जाइट कना बात ऊ जन्नीमनैया नैजन्लरलही। उहाँह धन्यवाद सहित धेर मानसम्मान देहक लाग, उ जन्नी येशूकम वास अइना चिज खन्ह्यैलही। 9जाट्टीसे मै कहटुँ, सारा संसारम जहाँ-जहाँ खुशीक खबर प्रचार हुई, हिँकहार सम्झनम हिँकहार करल यी कामक बयान कैजाई।”
10यहूदा इस्करियोत बाह्र जन चेलामध्ये एकठो रह। ऊ येशूह ध्वाखा देना विचारले मुख्य पूजारीन्हकठे गैल्। 11वाकर बात सुन्क हुँक्र खुशी हुइल ओ ओहीह पैँसा देना प्रतिज्ञा कर्ल। तबठेसे यहूदा येशूह ध्वाखा देना मौका ख्वाज लागल।
मुक्ति-दिवसक खाना खैलक
मत्ती २६:१७-२५; लूका २२:७-१४,२१-२३; यूहन्ना १३:२१-३०
12खमिर नैमिलाइल रोटी खैना टिहारक पैल्ह दिनम भेँरीक पठ्रूक बलि चह्राजाए। उ दिनह मुक्ति-दिवस फे कैजाए। उ दिनम चेलावँ उहाँह पुछ्ल, “हम्र अप्नक लाग मुक्ति-दिवसक खाना खैना व्यवस्था कहाँ मिलाई?”
13तब येशू आपन चेलनमध्येमसे दुइ जहन असिक कह्टी पठैल, “सहरम जाओ, गग्रीम पानी बोक्ल एकठो मनैया टुँहन भेँटाई। ओक्र पाछपाछ जैहो। 14उ मनैया जौन घरम पैँठी, उह घरक मालिकह कहहो, ‘गुरुजी पुछ पठैल, मै आपन चेलन्हकसँग मुक्ति-दिवसक खाना खैना क्वाठा कहाँ बा?’#१४:१४ यहूदी व्यवस्था अनुसार मुक्ति-दिवसक खाना यरूशलेमम खाइ पर। उहाँ आइल जौन तिर्थयात्री क्वाठा मङ्ग्लसे फे, मुक्ति-दिवस टिहार मनाइक लाग क्वाठा देना यहूदी चलन रलहन। 15तब ऊ टुँहन उप्रक ताल्हक बर्का क्वाठा देखैहीँ। उ क्वाठा छुटीछुटी टेबल ओ बैठ्ना ढैक सब चिज ठीकठाक पारल रही। उहँ हमार लाग खाना बनैहो।”
16हुँक्र यरूशलेम सहरम पुग्ल त, येशूक कहलअस भेँटैल, ओ उहँ मुक्ति-दिवसक खाना तयार पर्ल।
17सन्झ्या हुइल् त, येशू आपन बाह्र जन चेलन्हकसँग उ ठाउँ गैल। 18उहाँहुँक्र खैटिखैटि येशू हुँकन कल, “मै जाट्टीसे कहटुँ, म्वारसँग खउइया टुह्रमध्ये एक जन महीह ध्वाखा देहुइयाबाटो।”#भज ४१:९
19हुँक्र दुःखी होक पालिकपाला येशूह पुछलग्ल, “का ध्वाखा देहुइया मैहे हुइटुँ?”
20येशू हुँकन कल, “म्वारसँग टठ्यक रसम रोटी बिल्बोर्क खउइया टुह्र बाह्र जनमध्ये एक जन हुइटो।”#१४:२० उ ब्याला धेर जन एक्क टठ्यक रसम रोटी बिल्बोर्क खैना यहूदीन्हक चलन रह। ओसिक खैलसे, एकदम लग्घक सम्बन्ध हुइल् मानजाए, ओ डुठा खाइल हिसाबले नैलेजाए। 21धर्मशास्त्रम लिखलअस मै मनैयक छावह त, मुवही परी। तर महीह ध्वाखा देहुइयह धिक्कार बा। बेनसे वाकर जन्म नैहुइटीस त मजा हुइनेरल्हिस।
प्रभुभ्वाज
मत्ती २६:२६-३०; लूका २२:१४-२०; १ कोरिन्थी ११:२३-२५
22उहाँहुँक्र खाइबेर, येशू रोटी लेक परमेश्वरसे आशिष मङ्ग्ल। उहाँ रोटी खन्टाक हुँकन देटी कल, “यी म्वार शरीर हो, लेओ, खाओ।”#१४:२२ लूका २२:१९ ओ १ कोरिन्थी ११:२३-२६ म, चेलन्हक लाग येशूक करल मुक्तिक कामक सम्झनम, हुँक्र रोटी खैना ओ अङ्गूरिक मद पिना काम कर्टीरह्हीँ कना येशूक चाहना रहल बात स्पष्ट लिखल बा। ख्रीष्टियनहुँक्र धेरजसिन मैन्हम एकचो यी विधि आम्ही कर्टिरठ। यहीह प्रभुभ्वाज कठ।
23तबदोस्र उहाँ अङ्गूरिक मद रहल खोर्या लेक परमेश्वरह धन्यवाद देल ओ चेलन देल, त हुँक्र सबजन पिल।
24 #
प्रस २४:८; यर ३१:३१-३४ तब येशू हुँकन कल, “यी त धेर जन मुक्ति पाइक लाग बहाजैना म्वार रगत हो। परमेश्वर मनैनसे कर्लक लौव बाचह यिह रगत क्रियाशील बनैठा।#१४:२४ इस्राएलीहुँक्र परमेश्वर हुँकनसे करल बाचह भङ्ग कैरख्लह ओ हुँक्र लौव बाचक आशम रलह। पुरान बाचा बलि कैगैल् जनावरक रगतले छाप लगाजाए ओ घरीघरी बलिक आवश्यक पर। परमेश्वर मनैनसे करल लौव बाचा येशूक रगतले छाप लगागैल् बा ओ घरीघरी और बलिक आवश्यक नैपरट् (हिब्रू ८:३-६; ९:१५; १०:११:१८)। 25जाट्टीसे मै कहटुँ, आबठेसे परमेश्वरक राज्यम फेदोस्र नैपियतसम, मै यी अङ्गूरिक मद पिबो-पिबो नैकरम।”#१४:२५ उ ब्याला टिहारम खुशी होक अङ्गूरिक मद पिना चलन रलहन। यिहाँ येशू “आबठेसे परमेश्वरक राज्यम फेदोस्र नैपियतसम मै अङ्गूरिक मद पिबो-पिबो नैकरम” कल, काकरकि अप्न मुना दिन पुग्गैल् कना बात उहाँह थाहाँ रलहन।
26तब एकठो भजन गाक ओठेसे उहाँहुँक्र जैतून पर्वत्वम गैल।
पत्रुसक इन्कार
मत्ती २६:३१-३५; लूका २२:३१-३४; यूहन्ना १३:३६-३८
27 #
जक १३:७
येशू हुँकन कल, “टुह्र सबजन महीह छोर्क जाजैबो। काकरकि धर्मशास्त्रम लिखल बा,
‘मै भेँरी चह्रुइयह मुवैबुँ त,
भेँरी तितरबितर हुइहीँ।’#१४:२७ यिहाँ “मै” कलक परमेश्वर, “चह्रुइया” कलक येशू, ओ “भेँरी” कलक येशूक चेलावँ हुइट।
28तर मै मुक फेदोस्र जिएम त, टुँहनसे आघ गालीलम जैबुँ। हमार भ्याँट उहँ हुई।”#मत्ती २८:१६
29पत्रुस येशूह कल, “सबजन छोर्लसे फे, मै अप्नह कबु नैछोरम।”
30येशू पत्रुसह कल, “मै जाट्टीसे कहटुँ, आज्झु रात दुइचो मुर्घा बस्नासे आघ टुँ महीह तीनचो इन्कार कर्बो।”
31तर पत्रुस जिद्दी कर्टी कल, “महीह अप्नकसँग मुवपर्लसे फे, मै अप्नह इन्कार कर्बो-कर्बो नैकरम।”
तब और चेलावँ फे ओसहेँक कल।
येशूक प्रार्थना
मत्ती २६:३६-४६; लूका २२:३९-४६
32तबदोस्र उहाँहुँक्र गेतसमनी कना ठाउँम गैल, ओ येशू आपन चेलन कल, “मै परमेश्वरसे प्रार्थना करटसम अट्ठहेँ पलरहो।” 33पत्रुस, याकूब, ओ यूहन्नह भर आपनसँग लैगिल। येशू बहुत दुःखी होक झङ्खलग्ल। 34तब येशू हुँकन कल, “मनक दुःख सह नैसेक्क म्वार मुटु फुट्नाअस करटा। जागा होक अट्ठहेँ पलरहो।”
35अप्नजुन टनिक दूर जाक भूइँयम ढोक्र्यागैल। ओ असिक परमेश्वरसे प्रार्थना करलग्ल, “हुइसेक्ठा कलसे अइना दुःखक समय हट्जाए। 36अब्बा#१४:३६ अब्बा: आरमाइक भाषम आपन बाबह सम्बोधन करबेर प्रयोग कैजिना शब्द हो।, बाबा! अप्न सब चिज करसेक्ठी। मै मुवपर्ना अवस्था म्वारठेसे हटादी, तर म्वार इच्छा अनुसार नैहोक अप्नक इच्छा अनुसार ह्वाए।”
37येशू घुम्क अइल त, हुँकन निन्दाइल देख्ल। उहाँ सिमोन कैजिना पत्रुसह कल, “सिमोन, का टुँ निन्दारलो? का टुँ एक घण्टा फे जागा रह नैसेक्टो? 38जागा रहो, ओ प्रार्थना कर्टिरहो त परीक्षम नैपर्बो। टुँहार मनम असल कर्ना इच्छा रलसे फे, टुँहार शक्तिऽ नैहो।”
39येशू फेदोस्र जाक परमेश्वरसे उह प्रार्थना कर्ल। 40उहाँ फेदोस्र घुम्क अइल त, हुँकन निन्दाइल देख्ल, काकरकि हुँक्र जातसे डट्करल रलह। हुँक्र जग्ल त, उहाँह का जवाफ देना कैक नैजन्ल।
41उहाँ तीसर फ्यारा घुम्क अइल ओ हुँकन कल, “का टुह्र आम्हीसम निन्दैलबाटो? आब सुत्ना समय ओराइल। मै मनैयक छावा, ध्वाखा पाक पापीन्हक हाँठम पर्ना ब्याला आरहल। 42हेरो, महीह ध्वाखा देहुइया यिहँ आइटा। उठो, हुँकन्हकठे जाई।”
येशूह ध्वाखा देलक
मत्ती २६:४७-५६; लूका २२:४७-५३; यूहन्ना १८:३-१२
43येशू बट्वैटीरलह त, उहाँक एकठो चेला यहूदा आगैल्। वाकरसँग लट्ठी ओ तरवाल लेल्ह-लेल्ह एक बगाल मनै रलह। हुँकन मुख्य पूजारीहुँक्र, शास्त्रीहुँक्र ओ अगुवाहुँक्र पठारख्लहन। 44येशूह ध्वाखा देहुइया, यहूदा, हुँकन एकठो इशारा देरख्लहा, “मै ज्याकर गाल चुमम, उह हो येशू। ओइहेह पकर्क सुरक्षासहित लैजैहो।”
45असिक हुँक्र उहाँ पुग्ल त, यहूदा येशूकठे जाक “गुरुजी” कहल ओ उहाँक गाल चुमल्।#१४:४५ सङ्घारी-सङ्घारी गालम चुमिकचुमा कर्ना यहूदी चलन रह। असिक कर्लसे, एकदम घनिष्ठ हुइल मानजाए। यहूदा पैल्ह येशूक गाल चुम्क ध्वाखा देहल। 46तबदोस्र हुँक्र उहाँह पक्रल। 47ओठे येशूकसँग ठह्र्याइलमध्ये एक जन तरवाल झिँक्क प्रधान पूजारीक कमारह झम्काइल, त वाकर कान च्वाट्टसे काटगैलस।
48येशू हुँकन कल, “का टुह्र महीह डाँका सोँच्क लट्ठी ओ तरवाल लेक पक्र आरलो? 49मन्दिरम सिखाइबेर दिनका दिन मै टुन्हक्केसँग रहुँ, तब टुह्र महीह काजे नैपकर्लो? तर म्वार बारेम धर्मशास्त्रम लिखल बात पूरा हुइक लाग टुह्र महीह पक्र आरलो।”#लूक १९:४७; २१:३७ 50तबदोस्र सक्कु चेलावँ उहाँह छोर्क भाग्गैल।
51सूती लुगा केल लपेट्ल एकठो ज्वान मनैया येशूक पाछपाछ रह। हुँक्र ओहीह फे पक्रल। 52तर उ मनैया आपन लुगालत्ता छोर्क नङ्ग्ट भाग्गैल्।
येशू महासभक आघ
मत्ती २६:५७-६८; लूका २२:५४-५५,६३-७१; यूहन्ना १८:१३-१४,१९-२४
53तब हुँक्र येशूह प्रधान पूजारीकठे लैगिल। उहाँ मुख्य पूजारीहुँक्र, अगुवाहुँक्र, ओ शास्त्रीहुँक्र जम्मा हुइलग्ल। 54पत्रुस दूरऽसे हुँकन्हक पाछपाछ प्रधान पूजारीक अङ्नम जाक डोरपालेन्हकसँग आगी तापलग्ल।
55मुख्य पूजारीहुँक्र समेत, महासभक सारा मनै येशूह मुवाइक लाग, उहाँक विरोधम प्रमाण ख्वाजटलह, तर नैपैल। 56बहुत जन उहाँक विरोधम झूट साक्षी बक्ल, तर हुँकन्हक साक्षी नैमिल्लन।
57कुई-कुई महासभक आघ जाक उहाँक विरोधम असिक झूट साक्षी बक्ल, 58#यूह २:१९“हम्र आपनऽ कानले यहीह असिक कहट् सुन्ली, ‘मनैन्हक बनाइल यी मन्दिर मै अपन्हे बिग्रैम् ओ मनै बनाइ नैसेक्ना मन्दिर तीसर दिनम बनादेहम।’”#१४:५८ येशू जौन मन्दिरक बात बट्वाइट, उ उहाँक आपनऽ शरीर हुइटन। उहाँ मुल ओ तीसर दिनम मुवलमसे जिगैल। 59तर यिहिँम फे हुँकन्हक साक्षी नैमिल्लन।
60तब सबजन्हक सामुन्नेम प्रधान पूजारी उठ्क येशूह पुछ्ल, “का टैँ कुछु जवाफ नैदेहठुइट्या? का ट्वार विरोधम बकल साक्षी ठीक हो?” 61तर येशू चामचुम पलरल, कुछु जवाफ नैदेल।
प्रधान पूजारी उहाँह और प्रश्न पुछ्ल, “का टैँ परमेश्वरक छावा, मनैन मुक्ति देहक लाग आइल ख्रीष्ट हुइट्या?”
62येशू कल, “हुइटुँ नि का! मै मनैयक छावह सारा शक्ति रहल परमेश्वरक दाहिन पाञ्जर बैठल देख्बी। तबदोस्र स्वर्गमसे बद्रीकसँग आइट् देख्बी।”#दान ७:१३
63यी सुन्टीकि, प्रधान पूजारी रिसले आपन झुल्वा फर्ल ओ कल, “आब हमन और साक्षी का चाहल?#१४:६३ आपन झुल्वा फर्ना कलक रिस ओ दुःख व्यक्त कर्ना संकेत हो। प्रधान पूजारीक झुल्वा फराइ “येशू परमेश्वरक बदनाम कर्ल” कना तथ्यह अभिव्यक्त कर्ठा। 64#लेवी २४:१६टुह्र परमेश्वरक बदनाम कर्लक त सुन्डर्लो। टुन्हक विचार का बा?”
तब सबजन उहाँह मृत्युदण्ड देहपर्ना ठह्रैल।#१४:६४ परमेश्वरक बदनाम करुइया जेहीह फे मृत्युदण्ड देहहीपर्ना नियम यहूदी व्यवस्थम बा (लेवी २४:१६)। 65तबदोस्र कुई-कुई येशूह थुकभिर्ल, ओ आँखिम पट्टी बाहान्क उहाँह पिट्टी कल, “टैँ अगमवक्ता हुइट्या कलसे, टोहीह के पिटल? ल्या कोह्!” डोरपालेहुँक्र फे उहाँह कब्जम लेक पिट्ल।
पत्रुस इन्कार कर्लक
मत्ती २६:६९-७५; लूका २२:५६-६२; यूहन्ना १८:१५-१८,२५-२७
66पत्रुस अङ्नम रहलब्याला, प्रधान पूजारीक एकठो कमारी ओठहेँ आइल। 67पत्रुसह आगी तापत् देख्क, हुँकहीन निहार्क हेर्टी, ऊ कहल, “टुँ फे त नासरतसे आइल येशूकसँग रलहो।”
68तर ऊ इन्कार कर्टी कल, “टुँ का कहटो महीह थाहँ नैहो।” तब पत्रुस गेटओर गैल त, मुर्घा बासल।
69उ कमारी पत्रुसह देख्क ओठे ठह्र्याइल मनैनसे फेदोस्र कहल, “यी मनैया त उह बगालक हो।” 70तर पत्रुस फेदोस्र इन्कार कर्ल।
टनिक बेर पाछ ओठे ठह्र्याइल मनै फे पत्रुसह कल, “पक्का फे टुँ उह बगालक हुइटो, काकरकि टुँ फे त गालीली हुइटो।”
71तर पत्रुस कहभिर्ल, “मै किर्या खाक कहटुँ, म्वार बात झूट हुई कलसे, परमेश्वर महीह दण्ड देहहीँ! टुन्हक कहल मनैयह मै चिन्ह्बोचिन्ह्बो नैकर्टुं।”
72तबहेँ मुर्घा द्वासर फ्यारा बासल, त पत्रुस येशूक कहल बात सम्झल, “मुर्घा दुइचो बस्नासे आघ, टुँ महीह तीनचो इन्कार कर्बो।” तब ऊ ह्वाँक्ह्वाँक्-ह्वाँक्ह्वाँक् रुइलग्ल।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मर्कूस 14: thl
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
