Matiye 16

Pariziyennigee o Saduseyennigee cokokkaa Iisa

(Elloŋ Mark 8.11-13, Lik 12.54-56)

1 Pariziyennigee o Saduseyennigee asiya gassa Iisa ku maa gu cokkiyya. Ay kaaka appe gu inniyya goo ga leyyo latta ka ajjibiti ma garaa kadar ga Mella n̰akammiya. 2Gata pa tiiliyoo gaa: «Gaa ma pootimooko ga samaane deero binta ciw, ku beneyya kuu ga were deewa daana#16.2 Oko kiɗa ta Isirayel maa ga samaane deero binta ma pootimooko ga garaa kadar ga sokkoŋ were deewa daana.. 3E baŋ pa ma sossoko ka gaa samaane deero binta pisisi, ku beneyya kuu gu ammi n̰akaa meente. Ku ibina pe passilti samaani. A passilco gaari ma asaa dunuuniti pa ku gederra ɗa ku ibinɗiy. 4Giimi ku haŋka kooko maa gu gaarco miɗɗa, o gu jobokka ɗa ka Mellayi, enaa latta ka ajjibiti ma garaa kadar ga ay Mella ma n̰akamminoo. Mella soopa oyaa ɗa ga gaariyyoo ya kaƴi, illa ay latta ma deyyee oko nabiinice Yuunus.» Gaa cappiyyoo iŋaa, gaa ƴiiliɗe.

Muɗigico Pariziyennigeyyo o ka Saduseyennigeyyo

(Elloŋ Mark 8.14-21)

5Gaa maa ga Iisa ma jobookeetee tapaɗɗo ma ta nussantí baharre ta yaata katik, gu jobookeetee rawtiɗe gu alɗe icca ɗa mappa. 6Gaa Iisa beneyyiyyoo gaa: «Warroŋ maaƴi min oko muɗigico Pariziyennigeyyo o ka Saduseyennigeyyo.» 7Guu jobookeetee beneyɗo aacco goo: «Ay asan ke icce ɗa soo mappa ga beneyɗine goŋŋa e?» 8Gaa Iisa leeɗiyee kabarre oko beneyco kaaka. Gaa beneyyiyyoo gaa: «Kuŋ gi amannitoŋ paalta ka missa. Ayme ku melewɗo kuu ga ay asan ku alɗe ecekke ɗa ka mappa na beneyɗo goŋŋa? 9On̰owwitoŋ ɗa missa kayyeetoŋ ga keeke e? Ku moyaa ɗa mappa ka beeƴa maa gu alpaŋgee beeƴa miɗi teero e? A laŋgee minaw maa ku onne ma kollee? 10A ku moyaa ɗa mappa ka paysara maa gu alpaŋgee pooɗi miɗi teero e, o laŋgee minaw maa ku onne ma kollee ma mare? 11Ku ebenniya ɗa pe soo kuu me kadar na beneyyatoŋ ɗa ma gaari ku mappayi, maa na beneyɗitoŋ naa ku warroŋ maaƴi min muɗigico Pariziyennigeyyo o ka Saduseyennigeyyo?» 12Maa ga beneyyiɗe goŋŋakite, guu jobookeetee ibiniyya beneyti kaaka kadar ga beneyyayo ɗa ma gaari ku muɗugu ka mappayi, innasoo gaa gu warru maaƴi min oko giraanico Pariziyennigeyyo o ta Saduseyennigeyyo.

Piyer beneyya kadar ga Iisa ay Masi

(Elloŋ Mark 8.27-30, Lik 9.18-21)

13Gaa Iisa ma jobookeetee asiɗe kiɗa ta Sezaree ta Pilip#16.13 Sezaree ta Pilip, ay geegar ma aaye balti dambu ka Hermon. Lekka giimi maani ma ay Yawudigee ɗa. Sawa ɗa ma geegar ka Sezaree ma aaye biití baharre ta yaata.. Gaa inniɗiy jobookeetee gaa: «Oko beneyco giimo ka, goo ga Runti Gimi ay we?» 14Guu jobookeetee tiiliyyee goo: «Giimi daare ƴa goo ki ay Yaaya ma batasayya giimi, o daare pa goo ki ay nabiinice Eliyas, o daare payya pa goo ki ay nabiinice Zeremi e baŋ pa ki ay kaƴi min oko nabiinigee daare.» 15Gaa Iisa inniɗiy guta pa gaa: «A kuŋ pa, oko kantoŋ ka kuu na ay we?» 16Gaa Simo Piyer tiiliyyee gaa: «Kii ay Masi gata appe maa ga Mella aparre, Runti Mellayi, Mella ma ay Miltí hayaatanti.» 17Gaa Iisa pa beneyyiyyee gaa: «Simo runti Yuunus, ki baarikenta, asan gi seene teete ay gimu ɗa ma gaaramca, ay Tattu ma aaye samaani ma gaaramca. 18Naa pa beneyyam naa gu semeecam ay Piyer ma goo ‘termel’, o ga kayaati oko termel keeke appe na asiɗiy gaga mak gimtaw, o gi gudirane ta muuti saa kulla leewayo ɗa ya maatiki. 19Na akkamgu bira kilenigee ku biití burgo ta un̰n̰ití mulunniti Mellayi. Latta paratti maa ki akka pooca iŋee kiɗaati ay gata ma akka dee poocenta samaani, o latta paratti maa ki akka oyya iŋee kiɗaati ay gata ma akka dee oyyenta samaani.» 20Gaa Iisa uwwiyyoo atarre oko jobookeetee gaa gu addo beneyya ɗa ya oko gimi kadar ga ay Masi.

Iisa tasaa muutti o naɗawti min muuti

(Elloŋ Mark 8.31–9.1, Lik 9.22-27)

21Gaa min oko wikinne kaaka appe, ga Iisa diiliɗe ga beneyɗiyooca purta oko jobookeetee gaa: «Aŋka na kaatiɗo geegar ka Zerizalem. Iŋaa pa gu ajaawaŋgeeco Yawudigeyyo o taattuweeco soƴoowee ku saɗikaŋgeyyo o aalimnigee ku Kitamniti Muusa deeɗino diigiya ta tirta. Guu deeɗino, gaa oko meene ma daa ta subba pa na naɗiɗo min muuti.» 22Gaa Piyer tirriyiyya paalta, gaa diiliɗe ga beneyɗe ma makko gaa: «Ga Mella tarum, Miltu. Keeke tuk akkam asa ɗa.» 23Gaa Iisa pa ribiliyyee oko Piyer, ga makkiyyee gaa: «Yooku ta taartu, Seetanne! Ki deewaw botol ma esekkano zunubgeyyo, asan gi mooyicum ta gaaro ay ta Mellayi ɗa, innasoo gi ay ta giimo ka.»

24Gaa Iisa beneyyiyyoo oko jobookeetee gaa: «Gaa gimu aŋka ga jobbinno, ga meelu mooyo ta gaari ku kayaati ka, o ga icciya kuruwati#16.24 Icco ta kuruwayi pa ay oyyo ta diiganti o ta muuti aleŋ ta Iisa. gaa joboɗɗino. 25A gata pa, gimu ma aŋka ga najjiyicca hayaatanti akkica misila. A gimu soopa ma mesellaca hayaatanti saanantu akkica gassa. 26Gaa gimu gasakka ayaawi paratti ka dunuuniti, gii hayaatanti pa ga meselɗica, gi gayawwiyee pe ini me? Gaa gimu misilca hayaatanti ga gederra ɗa ga birɗo ya maatiki ku maa ga gassicca payya. 27Mooyoŋ oko beneyyi keeke asan ga Runti Gimi akka yooka ma malaykatnigeetee ma darjanti Tatti, gaa kulla kee aɗe ga asiyyeega yooka kanti maa ga leewe iŋee dunuuniti. 28Na beneyyatoŋca seene: Min oko kuŋ keeke ma aaye iŋee, gu daare matakka ɗa namma gu asiyya ella Runti Gimi gaa asaa aleŋ sultan.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 16: mmy

Highlight

ಶೇರ್

ಕಾಪಿ