Matiye 15

Hukumnigeetee Mellayi o aadaŋgeeco giimo

(Elloŋ Mark 7.1-13)

1Guu lekkiɗo pe pa Pariziyennigee o aalimnigee ku Kitamniti Muusa ma ase min geegar ka Zerizalem, gu asiyya gassa Iisa. Guu inniyya goo: 2«Ayme gu jobookeecam alɗica jobokka ɗa aadane tee ta kookuweetine gu tewɗo bala apilco picco aleŋ maa gu kookuweetine gaarinee?» 3Gaa Iisa tiiliyyoo gaa: «A kuŋ pa, ayme ku alɗiy jobokka ɗa hukumnigeetee Mellayi, kuu magaɗɗiy ma aadantoŋ? 4Mella pa beneyye gaa: “Cipiliy semeetee taccum o ku yaacum#15.4 Elloŋ Oomiti min Masir 20.12 o Ɗillico Hukumnigeyyo 5.16..” Gaa beneyyiɗe payya gaa: “Ma beneyya miɗɗa oko tatti e baŋ ga oko yaati ga ay kee ka diyaawi#15.4 Elloŋ Oomiti min Masir 21.17 o Soƴoowee ku Saɗikaŋgeyyo 20.9..” 5A kuŋ soopa garkayyay giimi kuu: Gaa gimu beneyyiyee oko tatti e baŋ ga oko yaati gaa: “Lawwi maa na aŋka ampane kee na moogiɗum na duweegu oko Mellayi”, 6ga ay guu ɗa payya ga gimu kaaka cipilɗiy semeetee tatti e baŋ gu ku yaati ma biraw tee ta maatiki. Ma giraanitoŋ teete pa, ga beneyti Mellayi ku duwiyee, kuu magiyya ma aadantoŋ. 7Kuŋ ay giimi ma beneyya ma beneetoŋ ka, ka galbigeetoŋ pa kayti. Beneyti Mellayi maa ga beneyye ma nabiinice Esaya min tippa ma gaartoŋ ay tirta. Mella pa gaa:

8“Giimi kooko cepelliy uwwa semeetaw ma beneeco ka,

ma galbigeeco pa gu aaye arro min oko naa.

9Aabidico kulla gayee ɗa maatiki

asan gi giraane maa gu garaayo oko giimo ay hukumnigee

maa gu giimi cemekka min kayyeeco ka#15.9 Elloŋ Esaya 29.13..”»

Latta ma negekkaa gimu unti Mellayi

(Elloŋ Mark 7.14-23)

10Gaa Iisa beneyyiyyoo oko giimi ku maani koo ma temekkiyee gaa gu sappu katta. Gaa beneyyiyyoo gaa: «Giyyoŋga o ku ibinoŋga samaane beneytu keeke! 11Ay ma on̰aa ɗa ma biiti gimi ma negekkaa gimu unti Mellayi, innasoo ga ma negekkaa ay ma okomma min biiti.» 12Maa gu jobookeetee giyyiyya beneyti kaaka, guu sappiyyee saripti guu beneyyiyyee goo: «Ki lekka aɗɗe kabarre kadar ga beneycum keeke raɗɗiyoo oko Pariziyennigeyyo?» 13Gaa Iisa tiiliyyoo gaa: «Kulla tappa aɗe maa ga Tattu ma aaye samaani tomokke ɗa akka dee bitenta. 14Duwaaniyo ka, guta ay koor̰ee ma ɗan̰akka gicco koor̰ee. A gaa koor̰ ɗan̰akka giiti koor̰ pa, ga serco appe gu solokka beenati.»

15Gaa Piyer beneyyiyyee oko Iisa gaa: «Gaaraniica ƴa masal teete maa ki gemme ma gaari ma negekkaa gimu unti Mellayi.» 16Gaa Iisa pa tiiliyyee gaa: «Kuŋ kulla gi giraanitu on̰owwitoŋ ɗa missa kayyeetoŋ e? 17Ku lekka ɗa kabarre kadar ga latta parattí ma on̰aa ma biiti gimi ƴelaa aatti, gaa palliyya e? 18A ma okomma soopa min biiti gimi asaa min galbanti o ga ay kaaka appe ma negekkaa gimu unti Mellayi. 19A gata pa, ay min galbanti appe gu moyoowi ku miɗɗa okomɗo, o diyaw ma aaniyo, o un̰n̰o oko daatti gimi e baŋ ga oko mittí daatti, o diyyo ta daato e baŋ pa ta miɗaayo bala paate, o maaso, o arɗo, o n̰ilaaki. 20Ay kooko appe ay gaari ma negekkaa gimu unti Mellayi. A innasoo gi tiyaw bala apilo ta pisso aleŋ ta aadanco Pariziyennigeyyo negekkaa ɗa.»

Daate ma ay Yawudiŋga ɗa amanna oko Iisa

(Elloŋ Mark 7.24-30)

21Gaa Iisa waciɗe min iŋaa, gaa kaatiɗe kiɗa ta Tir o ta Sidon. 22Gii daate kaƴi aɗe ma ay Yawudiŋga ɗa ma ay min balco giimi ku Kanaan koo ku kiɗa taata asiyyee. Gii cayyakɗo gee: «Miltu, Runti Dawud, ellu saamuwtu. Runtú ga aarinne deegeyyica ta tirta.» 23Iisa soopa tiiliti ɗa ya beneyyi kaƴi. Guu jobookeetee sappiyyee saripti. Guu beneyyiyyee goo: «Pittica maaƴi, asan gi jobokkane ma cayyiko.» 24Gaa Iisa pa tiiliɗe gaa: «Naa, ga Mella n̰akamminoo oko giimi ku Isirayel ka, guta ma ay aleŋ tamee ku masilenta.» 25Gaa ma kaaka aɗe gi daate taata pa asiɗe darsa unti, gii beneyyiyyee gee: «Miltu, moogino!» 26Gaa Iisa pa tiilitti gaa: «Ay tirta ɗa ki iccicca tiyawco miico, kii uwwiyyooca oko ronco kan̰n̰o.» 27Gii gita pa tiiliyyee gee: «Beneycum keeke ay tirta appe, miltu. Innasoo gu ronco kan̰n̰o kulla son̰son̰n̰aca aɗe tiyaw ta rootta ma sobaa min taabulti milco.» 28Gaa Iisa tiilitti gaa: «Daate, amannite yaata. Ga deete aleŋ maa ka aŋka.» Gaa oko wikinne kaaka saa, gi runtí rayyidiɗe.

Iisa rayyadda giimi maani

(Elloŋ Mark 7.31)

29Gaa min iŋaa ga Iisa yookiɗe biití baharre ta yaata ta Galilee. Gaa kalpiɗe jappiti ga deeɗe nunta. 30Guu giimi maani maani asiyyee. Guta pa eterriyee mugulee, o koor̰ee, o giimi ma lekka ooraŋgee zeneeco, o giimi ma gederra ɗa gu beneyɗo o paraayee daare maani. Guu gagaɗɗeegu unti, gaa Iisa rayyaɗɗiy. 31Guu giimi ku maani kotti ajjibiɗe ta tirta maa gu elelɗiy ma gederra ɗa gu beneyɗo guu beneyya, o ma lekka ooraŋgee zeneeco rayyide, o mugulee tan̰aa, o koor̰ee ella ta car̰aŋ. Guu giimi ku maani kotti pa logoɗɗiya Miltine, Mella ka Isirayel.

Iisa beraayo tiyaw oko alpaŋgee pooɗi miɗi

(Elloŋ Mark 8.1-10)

32Gaa Iisa kolliɗiy jobookeetee gaa gu sappu katta. Gaa beneyyiyyoo gaa: «Na elle saamuwco oko giimi ku maani kooko, asan gu lekka paaɗe meeni subba maa gu alɗo ma naa, guu alɗo lekka ɗa maatiki ka tiyaawi. Naa pa aŋka ɗa na pittiɗiy mayyeeta goneka kee gu kelbenna butuuli.» 33Guu jobookeetee pa tiiliyyee goo: «A iŋee appe kayni gonek ka ke gasakka ŋa pe tiyaw ma ayay giimi ku maani kooko?» 34Gaa Iisa inniɗiy gaa: «Ku lekka mappa minaw?» Guu tiiliyyee goo: «Ni lekka mappa paysara o buusi minnaw rootta ka goŋŋakite.» 35Gaa Iisa beneyyiyyoo oko giimi ku maani kotti gaa gu nuntu kiɗaati. 36Gaa maa gu nuntiɗe gaa icciɗiy mappa ka paysara kaaka o buusi kotti, gaa leeɗiyee barkinti oko Mellayi. Gaa erriɗiy, gaa biriyyoogu oko jobookeetee. Guta pa ɗeddiyoogu oko giimo. 37Gaa paracco gu teeɗe gu ayyiɗe. Guu ma kollee ma mare, gu jobookeetee Iisa onniɗe laŋgee paysara. 38Giimi ma teero kotti pa gu koo ku alpaŋgee pooɗi ay miɗi, daati o miici soopa gemmenta ɗa. 39Gaa maa gu gaamiɗe tiyaw ga Iisa beneyyiyyoo oko giimo gaa: «Haŋka pa ku taciloŋ paaɗe.» Gaa maa gu tacilɗe, ga Iisa kalpiɗe markabati. Gaa kaatiɗe kiɗa ta Magadan.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 15: mmy

Highlight

ಶೇರ್

ಕಾಪಿ