Mateo 14
14
Lufu lwa Yoano Mubatishi
(Mako 6:14-29; Luka 9:7-9)
1Mu oa moba mfumu Heloda waumvwine nkuwa ya Yesu. 2Wa ambijile bamwingilo banji amba, “Ao iye Yoano Mubatishi, wasanguka mu bafu, kyo kyo aikeela na buno bulume bubena kwingila mwi aye.”
3 #
Lu 3:19,20 Mambo Heloda wamukwachile Yoano ne kumukasa, wamutayile mu kaleya na mambo Heloda wasongwele Helodiasa muka Filipa mulongo wanji. 4#Levi 18:16; 20:21Mambo Yoano wamwambijile amba, “Kizhila anweba kumusongola Helodiasa!” 5Kabiji wasakile kumwipaya, bino wachiine jibumba ja bantu mambo abo bamutelele amba, “Ngauzhi wa Lesa.” 6Kabiji byo jafikile juba joasemekejilwemo Heloda, mwana wakwa Helodiasa, wamukazhi wazhileenga mukachi, ne kumutokesha pa muchima Heloda. 7Ponkapo Heloda wachipile amba, “Kyonka kyo usa kungipuzha nsakukupakyo!”
8Kabiji monka mwamubujiile inanji wa ambile amba, “Bampe mutwe wa kwa Yoano Mubatishi pa muchiba!” 9Ne aye mfumu kyamubile bingi bulanda, bino na mambo onka a kuchipa kwanji, ne na mambo aboba bo aikajile naabo na kuja, wakambiizhe amba, “Kamupai.” 10Ponkapo wibatumine na kumuchiba mutwe Yoano monka mu kaleya. 11Kabiji waletele mutwe wanji pa muchiba, ne kumupa awa kamwale, ne aye wamutwajile kwi inanji. 12Ponkapo baana banji babwanga baishile na kusenda mubiji wanji ne kumuzhiika, kabiji bayile na kumubuula Yesu.
Kwibajisha bantu biumbi bitanu
(Mako 6:30-44; Luka 9:10-17; Yoano 6:1-14)
13Kabiji Yesu pa kwikyumvwa wafumineko, kaye mu bwato ne aye watuntukijile mungye mwa bunke bwanji. Ponkapo mabumba a bantu pakumvwa byobyo, bamulondejile ja panshitu bafumine mu mizhi. 14Byo afumine mu bwato wamwene jibumba jikatampe, wibobijile lusa, kabiji wibabukile bakolwa.
15Ponkapo juba pakufika mabanga, baana banji babwanga baishile ko aji amba, “Muno mungyetu, kabiji bwaila kala, mwibambile bantu baye mu mizhi, bakepotele bene bya kuja.”
16Kumvwa Yesu amba, “Kechi kyafwainwa baye ne, yenka anweba mwibape bya kuja.”
17Kumvwa baana babwanga amba, “Kuno tujitu na bashinkwa batanu ne masabi abiji.”
18Ponkapo aye amba, “Ndetelaibyo kuno.”
19Kabiji wakambiizhe mabumba amba, ikalai pa nsono. Ne pa kushikula bashinkwa batanu ne masabi abiji, watajile mwiulu ne kwibipesha. Kepo atebawile bashinkwa ne kupana ku baana banji babwanga, ne baana babwanga nabo ke bapane ku mabumba. 20Ne bonsetu bajiile, ne kwikuta baikuchile. Kabiji batolawile bibese byashajilepo bilukwa jikumi na bibiji byayula. 21Aba bajiile bajinga kampe biumbi bitanu bya banabalume bya kubula kubikako banabakazhi ne banyike.
Yesu byo a endele pa mema
(Mako 6:45-52; Yoano 6:15-21)
22Ponkapo Yesu wa ambijile baana babwanga amba, bakanjile mu bwato babukile ku bushiya, aye kasa akimanya mabumba amba ayenga. 23Byo apwishishe kwiemanya mabumba, wakanjijile ku mutumba kwa bunke na kulomba. Ne juba pakufika mabanga, wakijingatu konka bunke bwanji. 24Kabiji bwato bwafikile pakachi ka kizhiba kufuma ku kitulu, ne manyaki ebakatezhe; mambo lubesha wapupilenga ku bwato.
25Kabiji mu kilo kya buna kya kumakya Yesu waishilenga ko baji, kasa enda pa mema. 26Kabiji baana babwanga byo bamumwene kasa enda pa mema, ba akaminwe bingi amba, “Kipuku!” Ke batame miteto na moyo.
27Ne Yesu wibambijile amba, “Kechi mube moyo ne, ye amiwa bano, kuchiina ne.”
28Kumvwa Petelo amba, “Nkambo kana ye anweba, ng'ambilai ngiye ko muji kasa ng'enda pa mema.”
29Kumvwa aye amba, “Iyainga.”
Kabiji Petelo wafumine mu bwato, kaende ne pa mema kaye kuji Yesu. 30Bino byo amwene lubesha kabiji aye ke moyo, watatwile kwibila, ponkapo witamina amba, “Nkambo, mpulushaiko!”
31Ponkapotu Yesu watanyikile kuboko kwanji, ne kumukwata amba, “Anweba ba kalwitabilo kacheche mwazhinaukila ka?”
32Kabiji byo bakanjijile mu bwato, ponkapo lubesha wikilekele. 33Ne abo bajinga mu bwato bamupopwejile amba, “Kine, anweba mwi Mwana Lesa.”
Kubukwa kwa bakolwa mu Ngenesaleta
(Mako 6:53-56)
34Byo ba abukile ku bushiya, bayile ku ntanda ya Ngenesaleta. 35Ne banabalume ba konkakwa byo bamuyukile, batumine jiwi monse mu oa mande ne kuleeta bonse bakolwa. 36Ne kumusashijila amba, bakwatengatu nangwa kunsa ya kivwalo kyanji, kabiji bonse mobavujila bakwachileeko, babukilwe ke batuntulu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 14: KNTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
