MATIUS 12
12
Ses Ban Jo atakam
(Mrk. 2:23-28; Luk. 6:1-5)
1Bare. E jofayam ara, Yesus gandum kebun ajaref. E Ses Ban Jo ara. E amamkawi owam amosto aememfes. Ar masirin, gandum eke akokomtanfes. 2E Parisi owam inimas aporfes. Ar masirin, “Jakaperey. A omamkawi ow, a Ses Ban Jo aemamesas, bare Allah Jirmec opowmes.” Inim aefes. 3E Yesus nat, “Car e Daud aemefas, baca bwem opoknew? Aram e akac aemfes owam, amosto aememfesen. 4Aramat ipic e Allah cem afiwemefen. Afiwemef masirin, ar e Allah bipu atatitamfes amos, atewenefen. E nat, aramat ipicam, e akac aemfes owam, e amos aemenfes, karowas aemfes. E amos e Allah atakam mamtaw tugas ow cowok amemenas arawen. E Jirmec inim atakam ara. 5E Allah atakam mamtaw tugas owam, e Allah cem aman, e Ses Ban Jo jirmec aopowmes. E nat, Allah, ‘Eras dosa ara,’ inim atakam opok. Car eras e Musa tulis aeapomef Jirmec aman, baca bwem opoknew? 6Ca nat, jakaperey. Arasan penting awut ipic cowok awamec. E Allah cem nat, penting kanim inim. 7E Alkitab atakam, ‘Dor, ow, kawey ow serow bajiom, jak aseremomamin. Do nat, ow pok dor bacatitam, jak baseremom opok.’ Ca nat, inim atakam camsomnak opok. Inimas car atakam e ow tarowat aotawfokom. “Car ow fasi ara.” Inim aefokom. 8Bare, e Asmat Anakat Ajaworemef Ipic, e Ses Ban Jo aramat ipic aememama” Yesus inim aeef.
Ban sipi ipic
(Mrk. 3:1-6; Luk. 6:6-11)
9Bare. Yesus erasan aewjisosef. Ar masirin, e ow asembahyang cempu ajisosef. 10Erasan ara, ban sipi ipic aemapef. E erasan owam, “Yesus pwicakas aemama,” inim atakam botaw jak aserememfes. Inimas ar jonow Yesus atowfes. “Ow, dam pwicak ow, Ses Ban Jo dam ajaworomtawces, ar Allah Jirmec aopowcemesnew?” Inim aefes. 11E Yesus masirin, “Ca wun ipic cowok, domba cowok omomcokomnew, wunam e domba, Ses Ban Jo, capinmi jof aman aneyfifiacownew, bare car e domba, ban aosomopcomokom, wunam e domba ajimtewcomokom. 12Asmat ow, bare penting awut ara. Domba penting kanim inim ara. Inimas, ow Ses Ban Jo, atakas aemces, ar Allah Jirmec bopow opok aemcemes.” Inim aeef. 13Aramat ipic masirin, atakam e ban sipi ipic aotawef. “E ban bajoromey.” Inim aeef. E ipicam e aban ajoromef. E ban masirin, e poman ban awcawor akatipic aememef. 14Bare, e Parisi ow afisfes. Aram Yesus bacatiw atakam aamsakamfes.
Allah kerja bwemtam ipic
15Yesusam inim atakam jen ajief. Ar masirin, erasan aewjisosef. Ow arkeam aramat ipic fa asoromfes. Aramat ipicam e dam ow takas ajaworomtawef. 16Aram jirmec e ow ajirimef. “Kawey ow botaw arapok.” Inim aeef. 17Er e Allah atakam botaw ipic juwas Yesaya, e atawef atakam jipu bwemas ara. E atakam:
18“Jakaperey. Awamec ipic dokerja bwemtamipic ara. Dor aramat ipic damos ajiomamin. Dor aramat ipic akat aemin.
Doram e doRoh e aramat ipic atetamcimin. Aramat ipicam atakam e capinmiin capinmiin ow, aotawcema. ‘Allah e atakam asakamtiwmaras, bare tarowat ara.’ Inim aecema.
19Aram owen atakam opok aemcema. Aram atakam bafakaytaw opok aemcema. Aram e bokotpu, atakam awut botaw opok aemcema.
20Aram bancu e kumit ow aomcema. Aram jokmenas e jak pwicak ow bwem opok aomcema.
Ar e fasias takas akumimosomkurumcow jofay ajiwar, eras aomcema. 21Ow takasam jirey aramat ipic aecemes.”
Yesaya inim aeefen.
Yesusam, Beelsebulam, atakam
(Mrk. 3:20-30; Luk. 11:14-23)
22Bare, ow jiic cowok Yesus ameromfes. Dat e ipic jak aman aemapawiri. Inimas e ipic, manmok kapiam, okoram, aememawiri. Bare, Yesus e ipic ajaworomtewef. Inimas e ipic atakam epcom aememef. Aram manmok atereyef. 23E ow takasam junum awut aefes. “Awamec ipic Daud urpis aranew?” Inim aefes. 24E Parisi ow nat, e atakam jen ajifes. Ar masirin, “E Beelsebul, dat takas akepala ipic ara. Aram e fakas ewacam ipic atetamama. Inimas cowok, e ipic dat aotewerisimama.” Inim aefes. 25Yesusam e ow bi binip amsom. Ar masirin, atakam e ow aotawef. “Samat cowok owen aramaman aamocesnew, aram aanioscemes. Kota ownew, cem ownew, owen aramaman aamocesnew, aram apacayoscemes. 26Wunam, Iblis, e atiperes aotewerisimcownew, bare owen aramaman amocemes. Inimas e Iblisam, e ajowomam, apacayoscemes. 27Ca nat, ‘Beelsebul e fakas ewamec ipic atetamama. Inimas e ipic dat aotewerisimama.’ Car dot inim atakam atawmokom. E nat, e camamkawi owam dat aotewerisimames. E dat botewerisim fakas e ow ca tetamama? Bare, e camamkawi ow, e atawmokom atakam, atakamnak opok aporomtamcemes. 28E nat, e Allah Roh, e dat botewerisim fakas dor atetamaman. Inimas ara, e Allah Pemerintah carasan emcaenawor.
29Ow, fak ipic cem bafiw, wunam e apok ces bwetew, bare inimas bwemem asan opok. Ar e fak ipic manam atakamjikapomces, ar e acem pok ces bwetew araman.
30E do mamkawi opok ow, doratakam aopowmes. Ow kawey ow dor mamkawi mamememtam opok aeces, ar e kawey ow apacamosomcemes. 31Inimas ara, dor atakam car aotawmin. Allah, ow e adosa takasam, e cemew aatmesas takasam, akokoromosomtamcema. E nat, ow cemew e Roh Kudus aatces, Allah e dosa bakokoromosomtam opokut aemcema. 32Ow, pwicak atakam, e Asmat Anakat Ajaworemef Ipic aotawcesnew, Allah e dosa akokoromosomtamcema. E nat, ow, Roh Kudus pwicak atakam aotawcesnew, Allah e dosa, wowam, e asep jofaynakutam, bakokoromosomtam opokut aemcema.”
Os akat, eke akat apecema
(Luk. 6:43-45)
33Os akat, ekeam akat apecema. Os pwicak, ekeam pwicak apecema. Ow, e os eke aporces, ar e os, akat osnew, pwicak osnew, inimas aporcemes. 34Amer jiwinakasa. Car jokmen ara. Ow e ajak amanas jipu cowok atakam atawcemes. Inimas car atakam akat bwemtaw asan opok. 35Akat ow, e ajak aman, akatas aomomames. Inimas ar atakam akat atawmes. Pwicak ow, e ajak aman, pwicakas aomomames. Inimas ar atakam pwicak atawmes.
36“Ca nat, jakaperey. Jofay ara, Allah, ow dosa, atakam asakamtiwcema. E jofay, ow, e pwicak atakam atawawirisas takas, atakam Allah arma aotawtotorcemes. 37Allah, e atawawirukum atakam, akat aporcow, ar car ow tarowat ara, inim atakam asakamtiwcema. Aram e atawawirukum atakam, pwicak aporcow, ar car ow fasi ara, inim atakam asakamtiwcema.” Yesus inim aeef.
Ow junum bweas baporen
(Mrk. 8:11-12; Luk. 11:29-32)
38Bare, e wun Allah atakam mamememtam owam, Parisi owam, janim Yesus aanimfes. “Guru. Dar, or junum bweas bwem bapor.” Inim aefes. 39Yesus masirin, atep e ow ajitef. “A awaniemames ow, bare fasi ow ara. Aram Allah aotpemames. Inimas ar junum bweas bapor janim aanimames. Allah nat, wun junum bweas, awapes ow baporomtam opok aemcema. Ar e Allah atakam botaw ipic juwas Yunus e aemefas inim cimin junum bweas cowok aporomtamcema. 40E Yunus, bar mamincop e enam awut jak aman aemamesefen. Bare, e Asmat Anakat Ajaworemef Ipic bar mamincop e se aman aemamescema. 41E Niniwe owam, e Yunus e acacapiomefas jen ajifes, wunam e adosa bak apayemfesen. E Yunus bare, kanim ara. Arasan nat, awutnak ipic awamec. Inimas ara, Allah a awaniemames ow adosa atakam basakamtiw jofay aenawcow, e Niniwe owam asitcemes, wunam atakam a ow atawcemes. “Car ow fasi ara,” inim aecemes. 42E selatan capinmi raja cowocam, e Solomo bi binip umuton atakam jen baji, e dawon opok capinmi ewinawefen, E Solomo, bare kanim ara. Arasan nat, awutnak ipic awamec. Inimas ara, Allah, e awaniemames ow, adosa atakam basakamtiw jofay aenawcow, e cowocam asitcema, wunam atakam a ow atawcema. “Car ow fasi ara,” inim aecema.”
Dat, ow jak aman afiwcemes
(Luk. 11:24-26)
43“Dat, ow jak aman afiscow, e wasan acowojarcema. Ar ses ban asan apowcema. E nat, ar e ses ban asan baporomtew opok aemcema. 44Ar masirin, ‘Dor e afisof cem aofiwapcimin.’ Inim aecema. Erasan aofasicow, ar e jak aman afisef ipic, cem awcawor aporcema. E cem, bare fi ara. Owam e cem aman awaramtiwfes. Aram e cem pok takas atawkenemapomfes. 45E dat masirin, aojisoscema, wunam wun dat tujuh ajiwar ametotnawcema. E dat tujuh ajiwar, bare jokmen awutut ara. E bap dat, bare jokmen awut opok. Bare, e dat takas e ipic jak aman afiwcemes. Aram erasan aemapcemes. E ipic masirin, asan pwicaknakut aemapcema. Bap ara, asan pwicak kanim inim aemapawiri. A awaniemames fasi ow, inim cowok aemcemes.” Yesus inim aeef.
Yesus arosowocam, arewcewesam, atakam
(Mrk. 3:31-35; Luk. 8:19-21)
46Yesus inim atakam e ow cowocemotawmepaw, arosowocam, arewcewesam, e cesen aememfes. Aram atakam aramat ipic mamtaw. 47Jipic cowok masirin, atakam aramat ipic aotawefen. “Jakaperey. Orosowocam, orewcewesam, e cesen awamces. Ar atakam or mamtawen.” Inim aeef. 48Yesus nat, atakam e aotawef ipic aotawef. “Dorosowoc cam? Dorewcewesam cam?” Inim aeef. 49Aramat ipicam, e amamkawi ow ban ajoromef. “Awapes ow dorisepesam, dorewcewesam ara. 50E onam op doricipic akat apormaras jipu bwem ow, bare dorewcewesam, dotarsepesam, dorisepesam, aememames.” Inim aeef.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIUS 12: LAICNS
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
LAI 1985
