ମାତିଉ 8
8
ଜିସୁ ଅରେନ୍ କୁସ୍ଟି ରୋଗିଙ୍ଗ୍ ନେଗେନ୍କିତାନ୍
(ମାର୍କ ୧:୪୦-୪୫; ଲୁକ ୫:୧୨-୧୬)
1ଜିସୁ ଗରନ୍ ମୁସ୍କୁରାନ୍ ରେତାତି ୱେନ୍କା ନାଣ୍ତ ଲୋକୁ ୱାନି ୱେନ୍କା ବୁଲାଦେଙ୍ଗ୍ ଆସ୍ତାର୍ । 2ନାସ୍ତିୱାଲେ ଅରେନ୍ କୁସ୍ଟରୋଗ୍ତି ଲୋକ୍ ୱାନି ଲାକ୍ତୁ ୱାଜି ମାଡ଼ିସ୍ କିଜି ଇର୍ହାନ୍, “ଏ ପ୍ରବୁ, ନିନ୍ ଜଦି ବଦା କିନି, ନାଙ୍ଗିଁ ନେଗେଣ୍ତ୍ କିଦେଙ୍ଗ୍ ଆଟ୍ନି ।”
3ଜିସୁ କିୟୁ ପେର୍ଜି ୱାନିଙ୍ଗ୍ ମୁଟ୍ସି ଇର୍ହାନ୍, “ନାନ୍ ବଦା କିଜିନା, ନେଗେଣ୍ତ୍ ଆଆ ।” ଦାପେ ଦାପେ ଆୟା ଲୋକ୍ତି କୁସ୍ଟରୋଗ୍ ନେଗେନ୍ଆତାତ୍ । 4ଜିସୁ ୱାନିଙ୍ଗ୍ ଇର୍ହାନ୍, “ୱେନ୍ଆ, ଜାଗାର୍ତା, ନିନ୍ ଏଣ୍ତେସ୍ ନେଗେନ୍ଆତି, ଏଙ୍ଗ୍ବା ଇନିକା ଇନ୍ମା; ମାତର୍ ସିଦା ଜାଜକରି ମାନୁ ସଲ୍ସି ନିଜେଦିଙ୍ଗ୍ ତରାଇଆଆ ମାରି ମୋସା ନେଗେନ୍ ଆତିମାନି ଇଜି ୱିଜେରିଙ୍ଗ୍ ସାକି ସିଦେଙ୍ଗ୍ ଇଜି ମୋସାଦି ଆଦେସ୍ ସିତିମାନି ପୁଜା ସିଆ ।”
ଜିସୁ ଅରେନ୍ ରମିୟ ନେତାଦି ପାଣିକିନିୱାନିଙ୍ଗ୍ ନେଗେନ୍କିତାନ୍
(ଲୁକ ୭:୧-୧୧)
5ଜିସୁ କପର୍ନାହୁମ୍ ଗାଡ଼୍ତୁ ଡ଼ୁଗିତି ଦାପ୍ରେ ଅରେନ୍ ରମିୟ ନେତା ୱାନିଙ୍ଗ୍ ବେଟ୍ବୁଡ଼ାଜି ମାଡ଼ିସ୍କିଜି ଇର୍ହାନ୍, 6“ପ୍ରବୁ, ନା ଅରେନ୍ ପାଣିକିନିକାନ୍ ନବ୍ତି ଉଣ୍ତିଙ୍ଗ୍ ଡରିତାମାନାନ୍ । ୱାନ୍ ବୁଲାସାଲାଦେଙ୍ଗ୍ ଆଟ୍ଏଜିନାନ୍, ନାଣ୍ତ ବାଦାଜି ଇଲୁଦୁ ଡରିତାମାନା ।”
7ଜିସୁ ଇର୍ହାନ୍, “ନାନ୍ ୱାଜି ୱାନିଙ୍ଗ୍ ନେଗେନ୍କିନା ।”
8ନେତା ଇର୍ହାନ୍, “ସିଲେ ପ୍ରବୁ” ନିନ୍ ଜେ ନା ଇଣ୍ତ୍ର ପାଦାମ୍ ଇଡ୍ନି ନାନ୍ ଇୟାୱାଜା ଜୋଗ୍ ସିଲେ । ନିନ୍ କେବଲ୍ ଉନ୍ଡ୍ରି ପଦ୍ମାଟାଦି ଆଦେସ୍ ଇନ୍ଆଁ, ନା ପାଣିକିନିକାନ୍ ନେଗେନ୍ ଆନାସନାନ୍ । 9“ନା ପେରିୱାନି ଆଡ୍ଗିମାନ୍ଞ୍ଜି ନାନ୍ ପାଣି କିତିଙ୍ଗ୍ବା ନା ଆଡ୍ଗି ନାଣ୍ତ ସନ୍ୟ ଦଲ ମାନାର୍ । ୱାରି ଲୋଇ ଅରେନ୍ ୱାନିଙ୍ଗ୍ ଜଦି ନାନ୍ ସାଙ୍ଗ୍ଆ ଇଜି ଆଦେସ୍ ସିତିଙ୍ଗ୍, ୱାନ୍ ସନାନ୍ । ଆଇୱାନିଙ୍ଗ୍ ରାଆ, ଇଜି ଇରିଙ୍ଗ୍, ୱାନ୍ ୱାନାନ୍ । ନା ସାକର୍ତିଙ୍ଗ୍ ଇକା କିଆ, ଇଜି ଇନି ଦାପ୍ରେ ୱାନ୍ ଆକା କିନାନ୍ ।”
10ଜିସୁ ଇକା ୱେନ୍ଞ୍ଜି କାବାଆତାନ୍ ମାରି ୱାନି ୱେନ୍କା ୱାଜିମାରି ଲୋକାଙ୍ଗ୍ ଇର୍ହାନ୍, “ନାନ୍ ମିଙ୍ଗିଁ ସତ୍ଇଜିନା, ଇସ୍ରାଏଲ୍ତୁ ବା ଏମେ ଲୋକାମାନୁ ଇୟା ଲୋକ୍ତି ୱାଜା ବିସ୍ବାସ୍ ନାନ୍ ତଏ । 11#ଲୁକ ୧୩:୨୯.ନାନ୍ ସତ୍ ଇଜିନା, ୱେଡ଼ାସନି ତରିଟି ଦେସ୍ତାନ୍ ମାରି ୱେଡ଼ାଆର୍ନି ତରିଟି ଦେସ୍ତାନ୍ ନାଣ୍ତ ଲୋକୁ ୱାଜି ଅବ୍ରାହାମ, ଇସ୍ହାକ୍ ମାରି ଜାକୁବଦି ୱାଲେ ମୁସ୍କୁପୁର୍ତି ରାଜିଦୁ ଅର୍ସେ ବଜିଦୁ ଉଣ୍ତେଙ୍ଗ୍ ବାସ୍ନାର୍ । 12#ମାତିଉ ୨୨:୧୩; ୨୫:୩୦; ଲୁକ ୧୩:୨୮.ମାତର୍ ଏମେକାର୍ ଇୟା ମାପୁରୁଦି ରାଜିଦୁ ମାନି ମାଟା, ୱାରିଙ୍ଗ୍ ଆତ୍ରେ ସିକାଟିଦୁ ପକ୍ନାର୍ । ଆବେ ୱାର୍ ଆଡ଼୍ବାଜି ପାଲ୍କୁ କାତ୍ରେ କିନାର୍ ।” 13ଜିସୁ ନେତେଙ୍ଗ୍ ଇର୍ହାନ୍, “ଇନ୍ଡ୍ର ସାଙ୍ଗ୍ଆ । ନିନ୍ ଆମାକା ବିସ୍ବାସ୍ କିଜିନି, ଆକାନେ ଗଟାନାତ୍ ।”
ଟିକ୍ ଆୟା ସମୟତୁ ନେତାଦି ପାଣିକିନିକାନ୍ ନେଗେନ୍ଆତାନ୍ ।
ଜିସୁ ନାଣ୍ତ ଲୋକାଙ୍ଗ୍ ନେଗେନ୍କିନାନ୍
(ମାର୍କ ୧:୨୯-୩୪; ଲୁକ ୪:୩୮-୪୧)
14ତାନେ ୱେନ୍କା ଜିସୁ ପିତରକା ଇନ୍ଡ୍ର ସଲ୍ସି ସୁଡ଼ୁତାନ୍, ପିତରତି ମିମ୍ସି ନବ୍ଆଜି କାଟେଲ୍ତୁ ଡରିତାମାନାତ୍ । 15ଜିସୁ ତାନି କିୟୁଦିଙ୍ଗ୍ ମୁଟ୍ତି ଦାପ୍ରେ ତାନିଙ୍ଗ୍ ନବ୍ ଡ଼ିସ୍ତାତ୍ ମାରି ୱାଦ୍ ନିଙ୍ଗ୍ଜି ୱାରିଙ୍ଗ୍ ସେବା କିଦେଙ୍ଗ୍ ଆସ୍ତାତ୍ ।
16ମିଲ୍ମିଲିକା ଆତାତ୍ଆକା ଲୋକୁ ନାଣ୍ତ ଦୁବେଙ୍ଗ୍ ଆସ୍ତି ଲୋକାଙ୍ଗ୍ ଜିସୁ ଲାକ୍ତୁ ତାତାର୍ । ଉଣ୍ତ୍ରି ପଦ୍ ମାତର୍ ମାଟାଦାନ୍ ୱାନ୍ ତାଗ୍ଇ ଆତ୍ମେଆଙ୍ଗ୍ଁ ପେରିତାନ୍ ମାରି ରଗ୍ ଲୋକାଙ୍ଗ୍ ନେଗେଣ୍ତ୍ କିତାନ୍ । 17ଇୟାୱାଜା ୱାନ୍ ବାବବାଦି ଜିସାୟଦି ବବିସତ୍ବାଣି ସତ୍ କିତାନ୍ । ଜିସାୟ ଇର୍ହାମାର୍ହାନ୍, “ୱାନ୍ ମା ଦୁକୁକାସ୍ଟୁ ୱିଜୁ ଅତାନ୍ ମାରି ମା ରଗ୍ ନେଗେନ୍କିତାନ୍ ।”
ଜିସୁଦି ସିସୁଆଦେଙ୍ଗ୍ ବଦାକିନି ଲୋକୁ
(ଲୁକ ୯:୫୭-୬୨)
18ୱାନି ସାରିବେଡ଼୍ତି ଲୋକୁ ୱିଜେରେ ଉଣ୍ତାନିକା ସୁଡ଼୍ଜି, ଜିସୁ ୱାନି ସିସୁରିଙ୍ଗ୍ ଗାଡାଦି ଆୟା ପାଡ଼ି ସନ୍ଡ଼୍ରେଙ୍ଗ୍ ଇର୍ହାନ୍ । 19ଅରେନ୍ ଦାର୍ମୁଗୁରୁ ୱାଜି ଜିସୁଙ୍ଗୁଁ ଇର୍ହାନ୍, “ଗୁରୁ, ନିନ୍ ଏମେ ବାଡିଦୁ ସନି, ଆବେ ସନ୍ଡ୍ରେଙ୍ଗ୍ ଇଜି ନାନ୍ ତିଆର୍ଆତାମାନା ।”
20ଜିସୁ ୱାନିଙ୍ଗ୍ ଇର୍ହାନ୍, “ଗଲୁଦିଙ୍ଗ୍ ତେବାଦେଙ୍ଗ୍ ସାରାଆ ମାନାତ୍, ବାଦଡ଼୍ତି ପଟିଦିଙ୍ଗ୍ ତେବାଦେଙ୍ଗ୍ ଜାଲୁ ମାନାତ୍ । ମାତର୍ ଗୁର୍ଦେଙ୍ଗ୍ ନି ରମ୍ଦେଙ୍ଗ୍ ଇଜି ମନୁସ୍ୟପୁତ୍ରଦିଙ୍ଗ୍ ବାଡି ସିଲେତ୍ ।”
21ଜିସୁଦି ମାରି ଅରେନ୍ ସିସୁ ଇର୍ହାନ୍, “ପ୍ରବୁ, ଆଗ୍ଡ଼ି ଡ଼େସି ସଲ୍ସି ନା ବୁବେଙ୍ଗ୍ ମୁସ୍ତେଙ୍ଗ୍ ଇଜି ନାଙ୍ଗିଁ ସାରି ସିଦା ।”
22ଜିସୁ ୱାନିଙ୍ଗ୍ ଇର୍ହାନ୍, “ନା ୱେନ୍କା ୱେନ୍କା ରାଆ, ସାତି ୱାରିଙ୍ଗ୍ ନିଜେ ନିଜେଦି ସାତି ଲୋକାଙ୍ଗ୍ ମୁସ୍ତେଙ୍ଗ୍ ଇଜି ଡ଼ିସ୍ତୁ ।”
ଜିସୁ ଗାଲିପିରୁଦିଙ୍ଗ୍ ତିର୍କିତାନ୍
(ମାର୍କ ୪:୩୫-୪୧; ଲୁକ ୮:୨୨-୨୫)
23ଅର୍ଲେନ୍ ଜିସୁ ଡଙ୍ଗାଁଦୁ ଏକ୍ତି ୱେନ୍କା ୱାନି ସିସୁର୍ ୱାନି ୱେନ୍କା ୱେନ୍କା ସର୍ହାର୍ । 24ଦାପ୍ରେ ଗାଡାଦୁ ଉଣ୍ତ୍ରି ପେରି ଗାଲିପିର୍ରୁ ନିଙ୍ଗିଁତାତ୍ ମାରି ଡଙ୍ଗାଁ ଉଲ୍କାଏର୍ତୁ ମୁଡ଼ୁଗ୍ଦେଙ୍ଗ୍ ଆସ୍ତାତ୍ । ମାତର୍ ନାସ୍ତିୱାଲେ ଜିସୁ ସୁଜିତାମାର୍ହାନ୍ । 25ସିସୁର୍ ଜିସୁଙ୍ଗୁଁ ନିକ୍ସି ଇର୍ହାର୍, “ଏ ପ୍ରବୁ, ମାଙ୍ଗିଁ ରକିୟାକିଆ । ଆଏତିଙ୍ଗ୍ ମାପ୍ ମୁଡ଼ୁଗିନା ସାନାପ୍ ।”
26ଜିସୁ ୱାରିଙ୍ଗ୍ ଇର୍ହାନ୍, “ଏନ୍ଦା ମିର୍ ନିସ ତିଲାଜିନିଦେର୍ ?” ମିର୍ ଇନିକା ନିସ ଅଡ଼ପ୍ ବିସ୍ବାସିର୍ ? “ତାନିୱେନ୍କା ୱାନ୍ ନିଙ୍ଗ୍ଜି ଗାଲି ନି ଉଲକାଏର୍ତିଙ୍ଗ୍ ତିର୍ ଆଦେଙ୍ଗ୍ ଇଜି ଆଦେସ୍ ସିତାନ୍ ।” ଦାପେ ଦାପେ ୱିଜୁ ତିର୍ ଆତାସର୍ହାତ୍ । 27ଆବେଟ୍ ୱିଜେରେ କାବା ଆତାର୍ । ୱାର୍ ନିଜେ ନିଜେମାନୁ ୱାର୍ଗି ସତାର୍, “ଇକାନ୍ ଏଣ୍ତେସ୍ ନାନି ଲୋକୁ ? ଗାଲି ନି ଉଲ୍କା ବା ୱାନି ଆଦେସ୍ ମାନାଜିନେ ।”
ରିଏର୍ ଦୁବାଆସ୍ତି ଲୋକାଙ୍ଗ୍ ଜିସୁ ନେଗେନ୍କିତାନ୍
(ମାର୍କ ୫:୧-୨୦; ଲୁକ ୮:୨୬-୩୯)
28ୱେନ୍କା ଜିସୁ ଗାଡା ଆୟା ପାଡ଼ିଦି ଗାଦରିୟରି ରାଜିଦୁ ଇତି ଦାପ୍ରେ ରିଏର୍ ଲୋକାଙ୍ଗ୍ ବେଟ୍ବୁଡ଼ାତାନ୍ । ୱାର୍ ଆବେ ମାନି ଦୁକିଗୁଟାଦୁ ତେବାଜିମାର୍ହାର୍ । ୱାର୍ ଦୁବେଙ୍ଗ୍ କାସ୍ତିକାର୍ ମାରି ନିସ ତିୟେଲ୍ଜେ ଆୟା ସାରିସିଜି ସନିୱାନିକା କିଦେଙ୍ଗ୍ ଏନ୍ ସାସ୍ କିଏଜିମାର୍ହାର୍ । 29ୱାର୍ ଜିସୁଙ୍ଗୁଁ ସୁଡ଼୍ତି ଦାପ୍ରେ ଆଉଲି ଆଜି ଇର୍ହାନ୍, “ଏ ମାପୁରୁଦି ମାରିସି ! ମାବାଣ୍କୁ ନିନ୍ ଇନିକା ବଦାକିନି ? ମା ବେଡ଼ା ଆଏନ୍ଣ୍ତା ମାଙ୍ଗିଁ ଇନିକା ଦଣ୍ଡ୍ ସିଦେଙ୍ଗ୍ ୱାତିମାନି ?”
30ଆବେଣ୍କୁ ଏସ ଆକଉଣ୍ତ୍ରି ପେରି ପାନ୍ଣ୍ତ୍ରିଙ୍ଗ୍ ମାନ୍ଦା ସାରାଜିମାର୍ଏ । 31ଆୟା ଲୋକାମାନୁ ମାନି ତାଗ୍ଇ ଆତ୍ମେଙ୍ଗ୍ ଜିସୁଙ୍ଗୁଁ ମାଡ଼ିସ୍ କିଜି ଇର୍ଏ, “ମାଙ୍ଗିଁ ଜଦି ପେର୍ଦେଙ୍ଗ୍ ବଦାକିଜିନି, ଆୟା ପାନ୍ଡ୍ରି ମାନ୍ଦା ଲୋଇ ମାଙ୍ଗିଁ ପକ୍ଆ ।”
32ଜିସୁ ଇର୍ହାନ୍, “ସାନ୍ଡ୍ରୁ” ଦୁବେଙ୍ଗ୍ ଦାପେ ଦାପେ ଲୋକାଙ୍ଗ୍ ଡ଼ିସ୍ସି ପାନ୍ଡ୍ରି ମାନ୍ଦା ଲୋଇ ଡ଼ୁଗିତେ । ପାନ୍ଡ୍ରି ମାନ୍ଦା ଉରୁକ୍ସି ସର୍ହେ ମାରି ଗରନ୍ ଟିପୁଦାନ୍ ଉରୁକ୍ସି ସଲ୍ସି ସାମ୍ଦୁର୍ତୁ ଆର୍ଜି ମୁଡ଼ୁଗିତେ ସାତେ ।
33ପାନ୍ଡ୍ରିଆଙ୍ଗ୍ ସାଆରା କିନି ଲୋକୁ ଲାକ୍ତୁରି ଗାଡ଼୍କାଙ୍ଗ୍ ନି ନାର୍କାଙ୍ଗ୍ଁ ସଲ୍ସି ଦୁବେଙ୍ଗ୍ ଆସ୍ତି ଲୋକାଙ୍ଗ୍ ଇନିକା ଗଟାତାମାର୍ହାତ୍ ମାରି ଆଇ ୱିଜୁ ମାଟା ଆବେ ୱେର୍ତାର୍ । 34ଆଦେଙ୍ଗ୍ ଆୟା ଗାଡ଼୍ତି ୱିଜେରେ ଜିସୁଙ୍ଗୁଁ ବେଟ୍ବୁଡ଼ାଦେଙ୍ଗ୍ ସହସି ୱାତାର୍ ମାରି ୱାନିଙ୍ଗ୍ ସୁଡ଼୍ତି ୱେନ୍କା ଆୟା ରାଜିଦାନ୍ ଡ଼ିସ୍ସି ସନ୍ଡ଼୍ରେଙ୍ଗ୍ ଜିସୁଙ୍ଗୁଁ ମାଡ଼ିସ୍କିତାର୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ମାତିଉ 8: NTKoo20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
