ଜୋହନ 8
8
ଦାରିପାଣି କିତି ଆଇମା
1ମାତର୍ ଜିସୁ ଜିତ ଗରନ୍ତୁ ସର୍ହାନ୍ । 2ଆୟା ମାରାନାଣ୍ତିଙ୍ଗ୍ ସାଲ୍ଦିନେ ଜିସୁ ମାରିଡ଼େସି ମନ୍ଦିର୍ତୁ ୱାତାନ୍, ମାରି ୱିଜେରେ ଲୋକୁ ୱାନି ଲାକ୍ତୁ ଉଣ୍ତାତାର୍ଆକା, ୱାନ୍ ବାସ୍ତାନ୍ନୋ ୱାରିଙ୍ଗ୍ ସିକିୟା ସିଦେଙ୍ଗ୍ ଆସ୍ତାନ୍ । 3ମାରି, ସାସ୍ତ୍ରିର୍ ମାରି ପାରୁସିର୍ ଦାରିପାଣି କିତିମାନି ଅରେତ୍ ଆଇମାଦିଙ୍ଗ୍ ଆସ୍ତାତାତାର୍ ତାନିଙ୍ଗ୍ ୱିଜେରିନାଣ୍ମି ନିଲ୍ପ୍ତାରୋ ଜିସୁଙ୍ଗୁଁ ଇର୍ହାର୍, 4“ଏ ଗୁରୁ, ଇୟା ଆଇମା ଦାରିପାଣି କିନିୱାଲେ ଦରାପଡ଼ାତାମାନାତ୍ । 5ଇୟାୱାଜା ଆଇମେକାଙ୍ଗ୍ଁ କାଲ୍କାଣୁ ପୋକ୍ସି ଡାକ୍ତେଙ୍ଗ୍ଁ ମୋସା ମାଙ୍ଗିଁ ସାସ୍ତ୍ରଦୁ ଆଦେସ୍ ସିତାମାନାନ୍; ଆରିଙ୍ଗ୍ ନିନ୍ ଇନିକା ଇଜିନି ?” 6ୱାର୍ ଏଣ୍ତେସ୍ ୱାନି ବିରଦ୍ତାନ୍ ଦୋସ୍ ପୟ୍ଦେଙ୍ଗ୍ ଆଟ୍ନାର୍, ଆୟାଉଣ୍ତିଙ୍ଗ୍ ୱାର୍ ୱାନିଙ୍ଗ୍ ପରିକା କିନି ଉଣ୍ତିଙ୍ଗ୍ ଇକା ଇର୍ହାର୍ । ମାତର୍ ଜିସୁ ପାଡ଼୍ଗିତାନ୍ନୋ ଡ଼ାସ୍କେଣ୍କୁ ବୁମିଦୁ ରାସ୍ତେଙ୍ଗ୍ ଆସ୍ତାନ୍ ।
7ମାତର୍ ୱାର୍ ୱାନିଙ୍ଗ୍ ଡ଼େସି ଡ଼େସି ୱେନ୍ବାତାର୍ଆକା, ୱାନ୍ ତାଲା ପେର୍ଜି ୱାରିଙ୍ଗ୍ ଇର୍ହାନ୍, “ମି ଲୋଇ ଏନ୍ ପାପ୍ ସିଲିକାନ୍, ୱାନ୍ ଆଗିଡ଼ି ତାନିଙ୍ଗ୍ କାଲୁ ପକିନ୍ ।” 8ମାରିଡ଼େସି ଜିସୁ ପାଡ଼୍ଗିଜି ବୁମିଦୁ ରାସ୍ତେଙ୍ଗ୍ ଆସ୍ତାନ୍ । 9ଆକା ୱେନ୍ଜି ୱାର୍ ପେରି ଲୋକାମାଣ୍କୁ ୱିଜେରେ ଅରେନ୍ ଅରେନ୍ ଆଜି ସହସି ସନ୍ଡ଼୍ରେଙ୍ଗ୍ ଆସ୍ତାର୍, ମାରି କେବଲ୍ ଜିସୁ ନି ମଜାୟ୍ ନାଡ଼୍ମି ଆୟା ଆଇମା ତେବାତାର୍ । 10ମାରି, ଜିସୁ ତାଲା ପେର୍ଜି ତାନିଙ୍ଗ୍ ଇର୍ହାନ୍, “ଏ ଆଇମା, ୱାର୍ ଏମେ ? ଏନ୍ ନିଙ୍ଗିଁ ଦୋସ୍କିଦେଙ୍ଗ୍ ସିଲେନ୍ ନୋ ?”
11ଆଇମା ଇର୍ହାତ୍, “ଏନ୍ ସିଲେ, ପ୍ରବୁ ।” ଆବେଟ୍ ଜିସୁ ଇର୍ହାନ୍, “ନାନ୍ ବା ନିଙ୍ଗିଁ ଦୋସ୍ କିଏଜିନା; ସାଙ୍ଗ୍ଆ, ନେର୍ଆନ୍ ମାରି ପାପ୍ କିମା ।”
ଜିସୁ ଦୁନିଆଦି ଜାୟ୍
12 #
ମାତିଉ ୫:୧୪; ଜୋହନ ୯:୫. ଜିସୁ ମାରିଡ଼େସି ପାରୁସିରିଙ୍ଗ୍ ଇର୍ହାନ୍, “ନାନ୍ ଦୁନିଆଦି ଜାୟ୍; ଏନ୍ ନା ୱେନ୍କା ୱାନାନ୍, ମାତର୍ ଜିବନ୍ତି ଜାୟ୍ ପଇନାନ୍ ୱାନ୍ ଏସାଙ୍ଗ୍ ବା ସିକାଟିଦୁ ବୁଲାଏନ୍ ।”
13 #
ଜୋହନ ୫:୩୧. ଆବେଟ୍ ପାରୁସିର୍ ଜିସୁଙ୍ଗୁଁ ଇର୍ହାର୍, “ନିନ୍ ନିଜେ ନିଜେଦି ବିସୟ୍ତାନ୍ ସାକି ସିଜିନି, ନି ସାକି ସତ୍ ସିଲେ ।”
14ଜିସୁ ୱାରିଙ୍ଗ୍ ଇର୍ହାନ୍, ସିଲେ, “ନାନ୍ ନିଜେଦି ଉଣ୍ତିଙ୍ଗ୍ ସାକି ସିତିଙ୍ଗ୍ବା ନାନ୍ ଆମାକା ଇଜିନା, ଆକା ସତ୍, ଇରିଙ୍ଗ୍ ନାନ୍ ଏମେଣ୍କୁ ୱାତାମାନା ମାରି ଏମେମାନୁ ସଲ୍ସିନା, ଆକା ନାନ୍ ନେସ୍ନା, ମାତର୍ ମିର୍ ନାନ୍ ଏମେଣ୍କୁ ୱାତାମାନା ମାରି ଏମେମାନୁ ସନା, ଆକା ମିର୍ ନେସ୍ଇଦେର୍ । 15ମିର୍ ଲୋକା ୱାଜା ବିସାର୍ କିନିଦେର୍, ନାନ୍ ଏ ବିସାର୍ କିଏ । 16ମାତର୍ ନାନ୍ ଜଦି ବିସାର୍ କିନା, ଆରିଙ୍ଗ୍ବା ନା ବିସାର୍ ଟିକ୍; ଇରିଙ୍ଗ୍ ନାନ୍ ଅରେନେ ସିଲେ, ମାତର୍ ନା ପକ୍ତିମାନିବୁବା ନା ୱାଲେ ମାନାନ୍ । 17ମାରି, ରିଏରି ସାକି ସାମାନ୍ ଆତିଙ୍ଗ୍, ୱାର୍ ଆମାକା ଇଜିନାର୍ ଆକା ସତ୍, ଇକା ମି ନିୟମ୍ତୁ ବା ରାସାତାମାନାତ୍ । 18ନାନ୍ ନିଜେ ନିଜେଦି ସାକି, ମାରି ନା ପୋକ୍ତିମାନି ବୁବା ନା ବିସୟ୍ତାନ୍ ସାକି ସିଜିନାନ୍ ।”
19ଆବେଟ୍ ୱାର୍ ୱାନିଙ୍ଗ୍ ୱେନ୍ବାତାର୍, “ମି ବୁବା ଏମେ ?” ଜିସୁ ଇର୍ହାନ୍,
“ମିର୍ ନାଙ୍ଗିଁ ନେସ୍ଇଦେର୍ ମାରି ନା ବୁବେଙ୍ଗ୍ ବା ନେସ୍ଇଦେର୍; ଜଦି ନାଙ୍ଗିଁ ନେସ୍ତିଙ୍ଗ୍, ଆରିଙ୍ଗ୍ ନା ବୁବେଙ୍ଗ୍ ବା ନେସ୍ତିଦେର୍ମାନ୍ଦି ।”
20ମନ୍ଦିର୍ତି ଦାନ୍ ଉଣ୍ତାକିନି ପେଡ଼େଙ୍ଗ୍ ଇଟ୍ତିମାର୍ଇ ବାକ୍ରାଦୁ ଜିସୁ ଇୟାୱିଜୁ ବିସୟ୍ ସିକିୟା ସିଜିମାର୍ହାନ୍, ମାତର୍ ଏନ୍ ୱାନିଙ୍ଗ୍ ତର୍ଏତାର୍, ଇରିଙ୍ଗ୍ ୱାନି ୱେଡ଼ା ଆୟାସାନ୍ଧି ରେଏତ୍ ମାର୍ହାତ୍ ।
ଜିସୁ ୱାନି ସନି ବିସୟ୍ତାନ୍ ବବିସତ୍ ମାଟା ଇର୍ହାନ୍
21ଆବେଟ୍ ଜିସୁ ମାରିଡ଼େସି ୱାରିଙ୍ଗ୍ ଇର୍ହାନ୍, “ନାନ୍ ସୋଲ୍ସିନା, ମାରି ମିର୍ ନାଙ୍ଗିଁ ପୋୟ୍ନିଦେର୍ ମାତର୍ ମିର୍ ନିଜେ ନିଜେଦି ପାପ୍ତାନ୍ ସାନିଦେର୍, ନାନ୍ ଏମେମାନୁ ସୋଲ୍ସିନା, ମିର୍ ଆବେନୁ ସନ୍ଡ଼୍ରେଙ୍ଗ୍ ଆଟ୍ଇଦେର୍ ।”
22ଆବେଟ୍ ଜିହୁଦି ନେତାର୍ ଇନ୍ଡ୍ରେଙ୍ଗ୍ ଆସ୍ତାର୍, ୱାନ୍ ଇଜିନାନ୍, ୱାନ୍ ଏମେମାନୁ ସଲ୍ସିନା, “ମାପ୍ ଆବେ ସନ୍ଡ଼୍ରେଙ୍ଗ୍ ଆଟ୍ଏପ୍ । ୱାନ୍ ସାଦେଙ୍ଗ୍ ସଲ୍ସିନାନ୍ ନୋ ?”
23ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ମିର୍, ଦୁନିଆଦାନ୍ ଜନମ୍ ଆତିମାନିଦେର୍, ମାତର୍ ନାନ୍ ମୁସ୍କୁରାନ୍ ୱାତାମାନା; ମିର୍ ଇୟା ଦୁନିଆଦାନ୍ ୱାତିମାନିଦେର୍, ନାନ୍ ଇୟା ଦୁନିଆଦାନ୍ ରେଏ । 24ଆରିଙ୍ଗ୍ ମିର୍ ଜେ ନିଜେ ନିଜେଦି ପାପ୍ତାନ୍ ସାନିଦେର୍, ନାନ୍ ମିଙ୍ଗିଁ ଇକା ୱେର୍ତା; ଇରିଙ୍ଗ୍ ନାନ୍ ଜେ ନିଜେ ଆୟା ଲୋକୁ, ଇକା ମିର୍ ବିସ୍ବାସ୍ କିଇତିଙ୍ଗ୍ ନିଜେ ନିଜେଦି ପାପ୍ତାନ୍ ସାନିଦେର୍ ।”
25ଆବେଟ୍ ୱାର୍ ୱାନିଙ୍ଗ୍ ୱେନ୍ବାତାର୍, “ନିନ୍ ଏନ୍ ?” ଜିସୁ ୱାରିଙ୍ଗ୍ ଇର୍ହାନ୍, “ଆୟା ମାଟା ନାନ୍ ଆଗ୍ଡ଼ିରାନ୍ ଇଜି ୱାଜିନା । 26ମି ବିସୟ୍ତାନ୍ ମାଟା ଇନ୍ଡ୍ରେଙ୍ଗ୍ ମାରି ବିସାର୍ କିଦେଙ୍ଗ୍ ନାଙ୍ଗିଁ ଗାଦି ବିସୟ୍କୁ ମାନେ; ଆମାକାଆପିତ୍; ନା ପୋକ୍ତାତିମାନିକାନ୍ ସତ୍, ମାରି ନାନ୍ ୱାନିମାଣ୍କୁ ଆମା ଆମାକା ୱେର୍ଆମାନା, ଆୟାୱିଜୁ ଦୁନିଆଦିଙ୍ଗ୍ ୱେର୍ସିନା ।”
27ଜିସୁ ୱାନି ବୁବାଦି ବିସୟ୍ତାନ୍ ୱାରିଙ୍ଗ୍ ୱେର୍ସି ମାର୍ହାନ୍, ଇକା ୱାର୍ ବୁଜାଏତାର୍ । 28ମାରି, ଜିସୁ ଇର୍ହାନ୍, “ଏସ୍ତିୱାଲେ ମିର୍ ମନୁସ୍ୟପୁତ୍ରଙ୍ଗ୍ ମୁସ୍କୁ ପେର୍ନିଦେର୍, ନାସ୍ତିୱାଲେ ନାନ୍ ଜେ ନିଜେ ଆୟା ଲୋକୁ; ମାରି ନାନ୍ ନିଜେଦି ଅଦିକାର୍ତାନ୍ ଇନିକା କିଏ ମାତର୍ ଆମାକା ନା ବୁବା ନାଙ୍ଗିଁ ଏଣ୍ତେସ୍ ସିକିୟା ସିତାନ୍, ଆୟାୱାଜା ଇୟାୱିଜୁ ମାଟା ଜେ ୱେର୍ସିନା, ଇକା ମିର୍ ବୁଜାନିଦେର୍ । 29ନା ପୋକ୍ତାତିମାନିକାନ୍ ନା ୱାଲେ ମାନାନ୍; ୱାନ୍ ନାଙ୍ଗିଁ ଅରେନ୍ୱାନିଙ୍ଗ୍ ଡ଼ିସ୍ଏନ୍, ଇରିଙ୍ଗ୍ ନାନ୍ ୱିଜୁୱାଲେ ଆମାକା ୱାନି ୱେଡ଼ିକାଦି ପାଣି କିନା ।”
30ଜିସୁଦି ଇୟା ମାଟା ୱେନ୍ଞ୍ଜି ନାଣ୍ତ ଲୋକୁ ୱାନିଙ୍ଗ୍ ବିସ୍ବାସ୍ କିତାର୍ ।
ସତ୍ ମିଙ୍ଗିଁ ମୁକୁଡ଼ା କିନାତ୍
31ମାରି, ଜିସୁ ୱାନିଙ୍ଗ୍ ବିସ୍ବାସ୍ କିତିମାନି ଜିହୁଦିରିଙ୍ଗ୍ ଇର୍ହାନ୍, “ଜଦି ମିର୍ ନା ସିକିୟାଦୁ ମାନାନିଦେର୍ କିନିଦେର୍, ଆରିଙ୍ଗ୍ ମିର୍ ସତ୍ତାନ୍ ନା ସିସୁର୍, 32ମାରି ମିର୍ ସତ୍ ନେସ୍ନିଦେର୍ ମାରି ଆୟା ସତ୍ ମିଙ୍ଗିଁ ଡ଼ିସିସ୍ କିନାତ୍ ।”
33 #
ମାତିଉ ୩:୯; ଲୁକ ୩:୮. ୱାର୍ ଜିସୁଙ୍ଗୁଁ ଇର୍ହାର୍, “ମାପ୍ ଅବ୍ରାହାମତି କୁଟୁମ୍, ମାରି ଏସାଙ୍ଗ୍ ବା ଏମେୱାନି କଟିସାକର୍ ଆଏପ୍, ଆରିଙ୍ଗ୍ ମିର୍ ଡ଼ିସାଇ ଆନିଦେର୍ ଇଜି ଏଣ୍ତେସ୍ ଇଜିନିଦେର୍ ? ତେନି ଅର୍ତ ଇନିକା ?”
34ଜିସୁ ୱାରିଙ୍ଗ୍ ଇର୍ହାନ୍, “ସତ୍ ସତ୍ ନାନ୍ ମିଙ୍ଗିଁ ଇଜିନା, ଏନ୍ ପାପ୍ କିନାନ୍, ୱାନ୍ ପାପ୍ତି ସାକର୍ । 35ସାକର୍ ୱିଜୁଦିନ୍ ଉଣ୍ତିଙ୍ଗ୍ ଇଲୁଦି ଅରେନ୍ ଆଜି ତେବାଏନ୍, ମାତର୍ ଇଲୁଦି ମାରିନ୍ ୱିଜୁଦିନ୍ ତେବାନାନ୍ । 36ମାରିନ୍ ଜଦି ମିଙ୍ଗିଁ ଡ଼ିସିସ୍ କିନାନ୍, ଆତିଙ୍ଗ୍ ମିର୍ ସତ୍ତାନ୍ ଡ଼ିସାଇ ଆନିଦେର୍ । 37ମିର୍ ଜେ ଅବ୍ରାହାମତି କୁଟୁମ୍, ଆକା ନାନ୍ ନେସ୍ନା; ମାତର୍ ନା ସିକିୟା ମି ଜିବନ୍ତୁ ବାଡି ମାନାଏଦେର୍ଆକା ମିର୍ ନାଙ୍ଗିଁ ଡାକ୍ତେଙ୍ଗ୍ ବଦା କିଜିନିଦେର୍ । 38ନା ବୁବାମାନୁ ଆମା ଆମାକା ନାନ୍ ସୁଡ଼ୁତାମାନା, ଆୟାୱିଜୁ ନାନ୍ ୱେର୍ନା; ମାତର୍ ମି ବୁବା ଇନି ଇସାବ୍ତାନ୍ ପାଣି କିଜିନିଦେର୍ ।”
39ଜିହୁଦିର୍ ଜିସୁଙ୍ଗୁଁ ଇର୍ହାର୍, “ଅବ୍ରାହାମ ମା ବୁବା ।” ଜିସୁ ୱାରିଙ୍ଗ୍ ଇର୍ହାନ୍, “ଜଦି ମିର୍ ଅବ୍ରାହାମତି ମାରିସିର୍ ଆତିଦେର୍ମାନ୍ଦି, ଆରିଙ୍ଗ୍ ଅବ୍ରାହାମ କିତିମାନି ପାଣି କିତିଦେର୍ମାନ୍ଦି; 40ମାପୁରୁମାଣ୍କୁ ୱେର୍ଇମାନି ସତ୍ ଡ଼ିସ୍ତିଙ୍ଗ୍ ମିଙ୍ଗିଁ ମାରି ଇନିକା ଇନ୍ଏ, ଆରିଙ୍ଗ୍ବା ମିର୍ ନାଙ୍ଗିଁ ଡାକ୍ତେଙ୍ଗ୍ ବଦା କିଜିନିଦେର୍; ଅବ୍ରାହାମ ଇୟାୱାଜା ପାଣି କିଏନ୍ ମାର୍ହାନ୍ । 41ମିର୍ ମି ବୁବାଦି ପାଣିୱିଜୁ କିଜିନିଦେର୍ । ୱାର୍ ୱାନିଙ୍ଗ୍ ଇର୍ହାନ୍, ମାପ୍ ଦାରିପାଣିଦାନ୍ ଜନମ୍ ଆଏପ୍, କେବଲ୍ ମାପୁରୁ ଅରେନ୍ନେ ମା ବୁବା ।”
42ଜିସୁ ୱାରିଙ୍ଗ୍ ଇର୍ହାନ୍, “ମାପୁରୁ ଜଦି ମି ବୁବା ଆତାନ୍ମାନ୍ଦି, ଆରିଙ୍ଗ୍ ମିର୍ ନାଙ୍ଗିଁ ଜିବନ୍ ନତିଦେର୍ମାନ୍ଦି; ଇରିଙ୍ଗ୍ ନାନ୍ ମାପୁରୁ ମାଣ୍କୁ ୱାଜି ଇଲେଇ ଇବେ ମାନା; ନାନ୍ ନିଜେଦି ଅଦିକାର୍ତାନ୍ ରେଏ, ମାତର୍ ୱାନ୍ ନାଙ୍ଗିଁ ପକ୍ତାନ୍ । 43ନାନ୍ ଆମାକା ଇଜିନା, ମିର୍ ଏନ୍ଦା ନା ମାଟା ବୁଜାଏଜିନିଦେର୍ ? ଇରିଙ୍ଗ୍ ମିର୍ ତୋ ନା ବାକ୍ୟ ୱେନ୍ଜି ମାନାଦେଙ୍ଗ୍ ଆଟ୍ଇଜିନିଦେର୍ । 44ମିର୍ ମି ବୁବା ସୟତାନ୍ ମାଣ୍କୁ ଜନମ୍ ଆତିମାନିଦେର୍, ମାରି ମି ବୁବାଦି ପାଣି କିଦେଙ୍ଗ୍ ମି ବଦା । ୱାଦ୍ ଆଗ୍ଡ଼ିରାନ୍ ଲୋକାଙ୍ଗ୍ କାତ୍ନିକାତ୍, ମାରି ୱାଦ୍ ସତ୍ତୁ ତେବାଏତ୍, ଇରିଙ୍ଗ୍ ତାନେମାନୁ ସତ୍ ସିଲେତ୍ । ଏସ୍ତିୱାଲେ ୱାଦ୍ ମିସ୍ ଇନାତ୍, ନାସ୍ତିୱାଲେ ୱାଦ୍ ନିଜେଦି ମାଣାନ୍ ଇନାତ୍; ଇରିଙ୍ଗ୍ ୱାଦ୍ ନିଜେ ମିସ୍ଇନିକାତ୍ ନି ମିସ୍ ୱେର୍ନି ଲୋକା ବୁବା । 45ମାତର୍ ନାନ୍ ସତ୍ ଇର୍ହାମାନାଆକା ମିର୍ ନାଙ୍ଗିଁ ବିସ୍ବାସ୍ କିଇଜିନିଦେର୍ । 46ନାବାନ୍ ପାପ୍ ମାନାତ୍ ଇଜି ମି ବାଣାନ୍ ଏନ୍ ପାର୍ମାନ୍ ସିଜିନାନ୍ ? ନାନ୍ ଏସ୍ତିୱାଲେ ସତ୍ ଇନା, ଆରିଙ୍ଗ୍ ମିର୍ ଏନ୍ଦା ବିସ୍ବାସ୍ କିଇଜିନିଦେର୍ ? 47ଏନ୍ ମାପୁରୁ ମାଣାନ୍ ଜନମ୍ ଆତାମାନାନ୍, ୱାନ୍ ମାପୁରୁଦି ବାକ୍ୟ ୱେନାନ୍; ଇୟାଉଣ୍ତିଙ୍ଗ୍ ମିର୍ ନା ବାକ୍ୟ ୱେନ୍ଇଦେର୍, ଇରିଙ୍ଗ୍ ମିର୍ ମାପୁରୁଦି ମାଣାନ୍ ଜନମ୍ ଆଇଦେର୍ ।”
ଜିସୁ ନି ଅବ୍ରାହାମ
48ଜିହୁଦି ନେତାର୍ ଜିସୁଙ୍ଗୁଁ ୱେନ୍ବାତାର୍, “ନିନ୍ ଜେ ଅରେନ୍ ସମିରୋଣିୟ ମାରି ନିଙ୍ଗିଁ ଜେ ଦୁବା ଆସ୍ତାମାନାତ୍, ଇକା ଇନିକା ମାପ୍ ଟିକ୍ ଇନ୍ଏପ୍ ମାର୍ହାପ୍ ?”
49ଜିସୁ ଇର୍ହାନ୍, “ନାଙ୍ଗିଁ ଦୁବା ଆସ୍ଏତ୍, ନାନ୍ ନା ବୁବେଙ୍ଗ୍ ମାନାଜିନା, ମାତର୍ ମିର୍ ନାଙ୍ଗିଁ ମାନାଇଜିନିଦେର୍ । 50ମାତର୍ ନାନ୍ ନିଜେଦି ଗୌରବ୍ ପୟ୍ଏ; ଏନ୍ ପଇନାନ୍ ମାରି ବିସାର୍ କିନାନ୍, ଇୟାୱାଜା ଅରେନ୍ ମାନାନ୍ । 51ସତ୍ ସତ୍ ନାନ୍ ମିଙ୍ଗିଁ ଇଜିନା, ଜଦି ଏନ୍ ନା ସିକିୟା ମାନାନାନ୍, ଆତିଙ୍ଗ୍ ୱାନ୍ ଏସାଙ୍ଗ୍ ବା ସାଏନ୍ ।”
52ଜିହୁଦିର୍ ଜିସୁଙ୍ଗୁଁ ଇର୍ହାର୍, “ଇଲେଇ ମାପ୍ ନେସ୍ତାପ୍ ଜେ ସତେନେ ନିଙ୍ଗିଁ ଦୁବା ଆସ୍ତାମାନାତ୍, ଅବ୍ରାହାମ ମାରି ବାବବାଦିର୍ ସାତା ମାନାର୍, ମାରି ନିନ୍ ଇଜିନି, ଜଦି ଏନ୍ ନା ସିକିୟା ମାନାନାନ୍, ଆତିଙ୍ଗ୍ ୱାନ୍ ଏସାଙ୍ଗ୍ ବା ସାଏନ୍ । 53ନିନ୍ ଇନିକା ମା ବୁବା ଅବ୍ରାହାମତି ମାଣାନ୍ ପେରିକିନ୍ଦା ? ଅବ୍ରାହାମ ତୋ ସାତା ମାନାନ୍, ବାବବାଦିର୍ ବା ସାତାମାନାର୍; ନିନ୍ ନିଜେଦିଙ୍ଗ୍ ଏନ୍ ଇଜି ଅଡ଼୍ବିଜିନି ?”
54ଜିସୁ ଇର୍ହାନ୍, “ନାନ୍ ଜଦି ନିଜେଦି ଦନ୍ୟବାଦ୍ କିଦେଙ୍ଗ୍ ବଦା କିତାମାନ୍ଦି, ଆରିଙ୍ଗ୍ ତେନି ଦାରା ତେବାଏତାତ୍ମାନ୍ଦି; ଏନ୍ ନାଙ୍ଗିଁ ଗୌରବ୍ କିନାନ୍, ୱାନ୍ ନା ବୁବା ଏମେୱାନିଙ୍ଗ୍ ମିର୍ ମି ମାପୁରୁ ଇଜି ଇଜିନିଦେର୍ । 55ମାରି, ମିର୍ ୱାନିଙ୍ଗ୍ ନେସ୍ଇଦେର୍, ମାତର୍ ନାନ୍ ୱାନିଙ୍ଗ୍ ନେସ୍ନା । ମାରି, ନାନ୍ ୱାନିଙ୍ଗ୍ ନେସେଏ ଇଜି ଜଦି ଇନା, ଆତିଙ୍ଗ୍ ନାନ୍ ବା ମି ୱାଜା ମିସ୍ବାଦି ଆନା, ମାତର୍ ନାନ୍ ନେସ୍ନା ମାରି ୱାନି ବାକ୍ୟ ମାନାନା । 56ମି ବୁବା ଅବ୍ରାହାମ ନା ଦିନ୍ ସୁଡ଼ୁନି ଆସାଦାନ୍ ୱେଡ଼ିକା କିନାନ୍, ମାରି ୱାନ୍ ଆକା ସୁଡ଼ୁଜି ୱେଡ଼ିକା କିତାନ୍ ।”
57ଆବେଟ୍ ଜିହୁଦିର୍ ଜିସୁଙ୍ଗୁଁ ଇର୍ହାର୍, “ନିଙ୍ଗିଁ ତୋ ଇୟାସାନ୍ଦି ପସାସ୍ ବାର୍ସେକ୍ ଆଏଦେ, ନିନ୍ ଇନିକା ଅବ୍ରାହାମ୍ତିଙ୍ଗ୍ ସୁଡ଼ୁତିମାନି ?”
58ଜିସୁ ୱାରିଙ୍ଗ୍ ଇର୍ହାନ୍, “ସତ୍ ସତ୍ ନାନ୍ ମିଙ୍ଗିଁ ଇଜିନା, ଅବ୍ରାହାମ ଜନମ୍ ଆନି ଆଗ୍ଡ଼ିରାନ୍ ନାନ୍ ମାନା ।”
59ଆବେଟ୍ ୱାର୍ ଜିସୁଙ୍ଗୁଁ ଡାକ୍ତେଙ୍ଗ୍ ଇଜି କାଲ୍କୁ ପେର୍ତାର୍, ମାତର୍ ଜିସୁ ମାର୍ଗିଜି ମନ୍ଦିର୍ତାନ୍ ସତାସର୍ହାନ୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ଜୋହନ 8: NTKoo20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
