ଜୋହନ 5
5
ଜିସୁ ସେରୁ ଲାକ୍ତୁ ରୋଗ୍ ଲୋକତିଙ୍ଗ୍ ନେଗେନ୍ କିତାନ୍
1ଇୟା ୱେନ୍କା ଜିହୁଦିର୍ ଉଣ୍ତ୍ରି ପଣ୍ତୟ୍ ୱାତାତ୍, ମାରି ଜିସୁ ଜିରୁସାଲମ୍ତୁ ସର୍ହାନ୍ । 2ଜିରୁସାଲାମ୍ତି ମେଣ୍ତାସେର୍ଲା ଲାକ୍ତୁ ଉଣ୍ତ୍ରି ସେରୁ ମାର୍ହାତ୍; ଏବ୍ରି ବାସାଦାନ୍ ତାନିଙ୍ଗ୍ ବେତେସ୍ଦା ଇଜି ଇନାର୍, ତାନି ପାସ୍ଗୋଟା ଗୁଡିକାଲ୍କୁ ମାନେ । 3ଆୟା ଗୁଡିକାଲ୍କାଙ୍ଗ୍ ମୁସ୍କୁ ନାଣ୍ତ ନବ୍ଆତିକାର୍, କାଣାର୍, ସଟାର୍ ମାରି କିକୁକାଲ୍କୁ ୱାର୍ତିକାର୍ ମାନ୍ଜିମାର୍ହାର୍ । ୱାର୍ ଏର୍ଦୁଙ୍ଗ୍ଁନିକା କାପ୍କିଜି ମାନ୍ଜିମାର୍ହାର୍ । 4ଇରିଙ୍ଗ୍ ଏସୋ ଏସୋ ସମୟତୁ ପ୍ରବୁଦି ଅରେତ୍ ଦୁତ୍ ଇସ୍ରିଗାଡା ରେତାଜି ଏର୍ତିଙ୍ଗ୍ ଦୁକ୍ସିମାର୍ହାତ୍, ମାରି ଏର୍ ଦୁଙ୍ଗ୍ଁତି ୱେନ୍କା ଏନ୍ ଆଗ୍ଡ଼ି ଆବେ ଡ଼ୁଗୁଜି ମାର୍ଆନ୍, ୱାନ୍ ଏମେ ରୋଗ୍ତୁ ଆସ୍ତିମାରିଙ୍ଗ୍ ବା ନେଗେନ୍ ଆଜିମାର୍ହାର୍ । 5ଆବେ ତିରିସ୍ଆଟ୍ ବାର୍ସେକ୍ ସାନ୍ଦି ରୋଗ୍ଆସ୍ତି ଅରେନ୍ ଲୋକୁ ମାର୍ଆନ୍ । 6ଜିସୁ ୱାନିଙ୍ଗ୍ ଆବେମାନିକା ସୁଡ଼ୁଜି ନାଣ୍ତ ବାର୍ସେକ୍ତି ରୋଗି ଲୋକୁ ଇଜି ନେସ୍ସି ୱାନିଙ୍ଗ୍ ୱେନ୍ବାତାନ୍, “ନିନ୍ ଇନିକା ନେଗେନ୍ ଆଦେଙ୍ଗ୍ ବଦା କିଜିନି ?”
7ରୋଗ୍ ଲୋକୁ ଜିସୁଙ୍ଗୁଁ ଇର୍ଆନ୍, “ଆଜ୍ଞା, ଏର୍ ଦୁଙ୍ଗିଁନିୱାଲେ ନାଙ୍ଗିଁ ସେରୁ ଲୋଇ ଅତେଙ୍ଗ୍ ଇଜିନା ଏନ୍ ସିଲେନ୍; ମାରି, ନାନ୍ ସଲ୍ପୁ ସଲ୍ପୁ ଆଇକାନ୍ ନା ଆଗ୍ଡ଼ି ଡ଼ୁଗ୍ଜିନାନ୍ ।”
8ଜିସୁ ୱାନିଙ୍ଗ୍ ଇର୍ଆନ୍, “ନିଙ୍ଗ୍ଆ, ନି ଟାଟି ଆସ୍ସି, ମି ଇଣ୍ତ୍ରସାଙ୍ଗ୍ଆ ।” 9ଆୟାଦାପ୍ରେ ଆୟା ଲୋକୁ ନେଗେଣ୍ତ୍ ଆତାନ୍ ମାରି ନିଜେଦି କାଟେଲ୍ ଆସ୍ସି ବୁଲାଦେଙ୍ଗ୍ ଆସ୍ତାନ୍ । ଆୟାଦିନ୍ ରମ୍ନିଦିନ୍ ମାର୍ହାତ୍ । 10ଆୟାଉଣ୍ତିଙ୍ଗ୍ ଜିହୁଦିର୍ ନେଗେଣ୍ତ୍ ଆତି ଲୋକ୍ତିଙ୍ଗ୍ ଇନ୍ଡ୍ରେଙ୍ଗ୍ ଆସ୍ତାର୍, ନେର୍ ରମ୍ନିଦିନ୍, କାଟେଲ୍ ପିଣ୍ତ୍ଜି ସନ୍ଡ଼୍ରେଙ୍ଗ୍ ନି ନିୟମ୍ ସିଲେତ୍ ।
11ମାତର୍, ୱାନ୍ ୱାରିଙ୍ଗ୍ ଇର୍ଆନ୍, “ଏନ୍ ନାଙ୍ଗିଁ ନେଗେଣ୍ତ୍ କିତାନ୍, ୱାନ୍ ନାଙ୍ଗିଁ ଇର୍ଆନ୍, ନି କାଟେଲ୍ ଆସ୍ସୋ ବୁଲାଆ ।”
12ୱାର୍ ୱାନିଙ୍ଗ୍ ୱେନ୍ବାତାର୍, “ନି କାଟେଲ୍ ଆସ୍ସୋ ବୁଲାଆ ଇଜି ଏନ୍ ନିଙ୍ଗିଁ ଇର୍ଆନ୍, ଆୟା ଲୋକୁ ଏନ୍ ?”
13ମାତର୍ ଜିସୁ ଏନ୍, ଆକା ଆୟା ନେଗେଣ୍ତ୍ ଆତିମାର୍ଇ ଲୋକୁ ନେସ୍ଏପ୍ ମାର୍ଆନ୍, ଇରିଙ୍ଗ୍ ଆୟା ବାଡିଦୁ ଲୋକୁ ଗଲି ମାର୍ହାର୍ଆକା ଜିସୁ ୱେର୍ଏ ଏର୍ଜି ସର୍ହାମାର୍ଆନ୍ ।
14ତାନିୱେନ୍କା ଜିସୁ ମନ୍ଦିର୍ତୁ ୱାନିଙ୍ଗ୍ ତରାଜି ୱାନିଙ୍ଗ୍ ଇର୍ଆନ୍, ସୁଡ଼ୁଆ, ନିନ୍ ନେଗେଣ୍ତ୍ ଆତିମାନି, ମାରି ପାପ୍ କିମା, ସିଲ୍ତିଙ୍ଗ୍ ନି ଉଣ୍ତିଙ୍ଗ୍ ମାରି ନାଣ୍ତ କାସ୍ଟୁ ୱାନାତ୍ ।
15ଆୟା ଲୋକୁ ସୋଲ୍ସି, ଏନ୍ ୱାନିଙ୍ଗ୍ ନେଗେଣ୍ତ୍ କିତାମାର୍ଆନ୍, ୱାନ୍ ଜିସୁ ଇଜି ଜିହୁଦିର୍ ପେରିୱାରିଙ୍ଗ୍ ଇର୍ହାନ୍ । 16ଆବେଟ୍ ଜିସୁ ରମ୍ନିଦିନ୍ତୁ ଇକା କିତାମାର୍ହାନ୍ଆକା ଜିହୁଦିର୍ ୱାନିଙ୍ଗ୍ ନିଦା କିଦେଙ୍ଗ୍ ଆସ୍ତାର୍ । 17ମାତର୍ ଜିସୁ ୱାରିଙ୍ଗ୍ ଇର୍ଆନ୍, “ନା ବୁବା ୱିଜୁୱାଲେ ପାଣି କିଜିନାନ୍, ମାରି ନାନ୍ ବା କିଜିନା ।”
18ଇୟାଉଣ୍ତିଙ୍ଗ୍ ଜିହୁଦିର୍ ପେରିକାର୍ ୱାନିଙ୍ଗ୍ କାତ୍ତେଙ୍ଗ୍ ଇଜି ମାରି ନାଣ୍ତ ବଦା କିଦେଙ୍ଗ୍ ଆସ୍ତାର୍, ଇରିଙ୍ଗ୍ ୱାନ୍ ଜେ ରମ୍ନିଦିନ୍ତି ନିୟମ୍ ମାନାଏଜିମାର୍ହାନ୍, କେବଲ୍ ଆକାନେ ସିଲେ, ମାତର୍ ମାପୁରୁଙ୍ଗୁଁ ନିଜେଦି ବୁବା ଇଜି ଇନ୍ଞ୍ଜି ୱାନ୍ ନିଜେଦିଙ୍ଗ୍ ମାପୁରୁୱାଲେ ସାମାନ୍ କିଜିମାର୍ହାନ୍ ।
ମାରିନ୍ଦି ଅଦିକାର୍
19ଆବେଟ୍ ଜିସୁ ୱାରିଙ୍ଗ୍ ଇର୍ଆନ୍, ସତ୍ ସତ୍ ନାନ୍ ମିଙ୍ଗିଁ ଇଜିନା, ମାରିସି ନିଜେ ଇନିକା କିଦେଙ୍ଗ୍ ଆଟ୍ଏନ୍, ୱାନି ବୁବା ଆମାକା କିନାନ୍, ମାରିସି ବା ଆକା ସୁଡ଼ୁଜି ଆୟାୱିଜୁ କିନାନ୍ । 20ଇରିଙ୍ଗ୍ ବୁବା ମାରିସିଙ୍ଗ୍ ଲାଡ୍ କିନାନ୍, ମାରି ନିଜେ ଆମାକା କିନାନ୍, ଆୟାୱିଜୁ ୱାନିଙ୍ଗ୍ ତର୍ନାନ୍, ମାରି ୱେନିମାଣାନ୍ ମାରି ପେରି ପାଣିଙ୍ଗ୍ୱିଜୁ କିନି ଉଣ୍ତିଙ୍ଗ୍ ୱାନ୍ ୱାନିଙ୍ଗ୍ ତର୍ନାନ୍, ମାରି ମିର୍ ୱିଜେରେ କାବା ଆନିଦେର୍ । 21ମାରି ବୁବା ଏଣ୍ତେସ୍ ସାତିୱାରିଙ୍ଗ୍ ନିକ୍ସି ଜିବନ୍ ସିନାନ୍, ଆୟାୱାଜା ମାରିସି ବା ଆମାୱାନିଙ୍ଗ୍ ବଦାକିନାନ୍, ୱାନିଙ୍ଗ୍ ଜିବନ୍ସିନାନ୍ । 22ମାରି, ବୁବା ନିଜେ ଏଙ୍ଗ୍ ବିସାର୍ କିଏନ୍, ମାତର୍ ନିଜେ ମାରିସିଙ୍ଗ୍ ୱିଜୁ ବିସାର୍ କିନି ଅଦିକାର୍ ସିତାମାନାନ୍ । 23ଆୟାଉଣ୍ତିଙ୍ଗ୍ ଏଣ୍ତେସ୍ ବୁବେଙ୍ଗ୍ ମାନାନାର୍, ମାରିସିଙ୍ଗ୍ ବା ଆୟାୱାଜା ୱିଜେରେ ମାନାନାର୍ । ମାତର୍ ଏନ୍ ମାରିସିଙ୍ଗ୍ ମାନାଏନ୍, ୱାନିଙ୍ଗ୍ ପୋକ୍ତିମାନି ବୁବେଙ୍ଗ୍ ବା ୱାନ୍ ମାନାଏନ୍ ।
24ସତ୍ ସତ୍ ନାନ୍ ମିଙ୍ଗିଁ ଇଜିନା, ଏନ୍ ନା ବାକ୍ୟ ୱେନ୍ଜି ନା ପୋକ୍ତାତିୱାନିଙ୍ଗ୍ ବିସ୍ବାସ୍ କିନାନ୍, ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୟ୍ତାମାନାନ୍, ମାରି ୱାନ୍ ବିସାର୍ ଆଏଣ୍ତା ମାତର୍ ୱାନ୍ ସାନିତାନେଙ୍ଗ୍ ଜିଣାଜି ଜିବନ୍ତୁ ଡ଼ୁଗିତାମାନାନ୍ । 25ସତ୍ ସତ୍ ନାନ୍ ମିଙ୍ଗିଁ ଇଜିନା, ଇୟାୱାଜା ସମୟ ୱାଜିନାତ୍, ମାରି ଇଲେଇବା ଇଗା ୱାତାତ୍, ଏମେୱାଲେ ସାତିକାର୍ ମାପୁରୁଦି ମାରିସିଦି ବଲ୍ ୱେନାର୍, ମାରି ଏମେକାର୍ ୱେନାର୍, ୱାର୍ ଜିବନ୍ ଆନାର୍ । 26ଇରିଙ୍ଗ୍ ବୁବା ଏଣ୍ତେସ୍ ଜିବନ୍ତି ମୁଲ୍, ମାରିସିଙ୍ଗ୍ ବା ଆୟାୱାଜା ୱାନ୍ ଜିବନ୍ତି ମୁଲ୍ କିତାମାନାନ୍; 27ମାରି, ୱାନ୍ ମନୁସ୍ୟପୁତ୍ର ଆକା ୱାନ୍ ୱାନିଙ୍ଗ୍ ବିସାର୍ କିଦେଙ୍ଗ୍ ଅଦିକାର୍ ସିତାମାନାନ୍ । 28ଆବେ କାବା ଆମାଟ୍, ଇରିଙ୍ଗ୍ ଇୟାୱାଜା ସମୟ ୱାଜିନାତ୍, ଏସ୍ତିୱାଲେ ସାତିକାର୍ ୱିଜେରେ ୱାନି ବଲ୍ ୱେନାର୍ 29ମାରି ଦୁକିଦାନ୍ ମାରିଡ଼େସି ନିଙ୍ଗିଁଜି ୱାନାର୍, ଏମେକାର୍ ନେଗି ପାଣି କିତାମାନାର୍, ୱାର୍ ଜିବନ୍ ପୟ୍ଜି ନିଙ୍ଗିଁନାର୍ ମାରି ଜିନାର୍ ମାରି ଏମେକାର୍ ତାଗ୍ଇପାଣି କିତାମାନାର୍, ୱାର୍ ନିଙ୍ଗିଁଜି ଦଣ୍ତ୍ ପୟ୍ନାର୍ ।
ଜିସୁ ତରିନ୍ ସାକି
30ନାନ୍ ନା ନିଜେଦି ସାକ୍ତିଦାନ୍ ଇନିକା କିଦେଙ୍ଗ୍ ଆଟ୍ଏ; କେବଲ୍ ମାପୁରୁଦି ଆଦେସ୍ତାନ୍ ବିସାର୍ କିନା, ମାରି ନା ବିସାର୍ ଟିକ୍, ଇରିଙ୍ଗ୍ ନାନ୍ ନିଜେଦି ବଦା ସାଲାକିଦେଙ୍ଗ୍ ବଦା କିଏନ୍ଣ୍ତା ନାଙ୍ଗିଁ ପୋକ୍ତାତିୱାନିନ୍ଦି ବଦା ସାଲାକିଦେଙ୍ଗ୍ ବଦାକିନା ।
31ଜଦି ନାନ୍ ନା ନିଜେଦି ବିସୟ୍ତାନ୍ ନିଜେ ସାକି ସିନା, ଆରିଙ୍ଗ୍ ନା ସାକି ସତ୍ତି ପାର୍ମାଣ୍ ଆଏତ୍ । 32ନା ତରିନ୍ ଏନ୍ ସାକି ସିନାନ୍, ୱାନ୍ ମାରି ଅରେନ୍; ମାରି ନା ବିସୟ୍ତାନ୍ ୱାନି ସାକି ଜେ ସତ୍, ଆକା ନାନ୍ ନେସ୍ନା । 33#ଜୋହନ ୧:୧୯-୨୭; ୩:୨୭-୩୦.ମିର୍ ଜୋହନତି ଲାକ୍ତୁ କାବୁର୍ ଅନିୱାରିଙ୍ଗ୍ ପୋକ୍ତିମାନିଦେର୍ ମାରି ୱାନ୍ ସତ୍ ତରିଟାନ୍ ସାକି ସିତାମାନାନ୍ । 34ମାତର୍ ନାନ୍ ଲୋକାମାଣ୍କୁ ସାକିୟ ଅଏ, ମାତର୍ ମିର୍ ଏଣ୍ତେସ୍ ରକିୟା ପୟ୍ନିଦେର୍, ଆୟାଉଣ୍ତିଙ୍ଗ୍ ଇୟାୱିଜୁ ଇଜିନା । 35ଜୋହନ୍ କାସ୍ସି ମାରି ଜାୟ୍ଆନି ଦିୱାୱାଜା ମାର୍ହାନ୍, ମାରି ମିର୍ ସାଣେକ୍ତି ୱାନି ଜାୟ୍ତୁ ୱେଡ଼ିକା କିନି ଉଣ୍ତିଙ୍ଗ୍ ବଦା କିତିଦେର୍ । 36ମାତର୍ ଜୋହନତି ସାକି ବାଦ୍ଲୁ ନା ନାଣ୍ତଅଦିକାର୍ତି ସାକି ମାନାତ୍, ଇରିଙ୍ଗ୍ ବୁବା ନାଙ୍ଗିଁ ଏମେ ଏମେ ପାଣି ୱିସ୍ତେଙ୍ଗ୍ ସିତାମାନାନ୍, ଆୟାୱିଜୁ ପାଣି ନାନ୍ କିଜିନା, ବୁବା ନାଙ୍ଗିଁ ପକ୍ତାମାନାନ୍ ଇଜି ଆୟାୱିଜୁ ନା ବିସୟ୍ତାନ୍ ସାକି ସିଜିନିଦେର୍ । 37#ମାତିଉ ୩:୧୭; ମାର୍କ ୧:୧୧; ଲୁକ ୩:୨୨.ମାରି, ଏମେ ବୁବା ନାଙ୍ଗିଁ ପକ୍ତାନ୍, ୱାନ୍ ନା ବିସୟ୍ତାନ୍ ସାକି ସିତାମାନାନ୍ । ମିର୍ ଏସାଙ୍ଗ୍ ବା ୱାନି ବଲ୍ ୱେନ୍ଇଦେର୍ କି ୱାନି ମକମ୍ ସୁଡ଼ୁଇଦେର୍ । 38ମାରି ୱାନି ବାକ୍ୟ ଉଣ୍ତିଙ୍ଗ୍ ମି ଜିବନ୍ତୁ ବାଡି ସିଇଦେର୍, ଇରିଙ୍ଗ୍ ୱାନ୍ ଆମାୱାନିଙ୍ଗ୍ ପକ୍ତାନ୍, ୱାନିଙ୍ଗ୍ ମିର୍ ବିସ୍ବାସ୍ କିଇଜିନିଦେର୍ । 39ମିର୍ ଦାର୍ମୁସାସ୍ତ୍ର ପୟ୍ଜିନିଦେର୍, ଇରିଙ୍ଗ୍ ଆବେଟ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୟ୍ନାପ୍ ଇଜି ଅଡ଼୍ବିଜିନିଦେର୍, ମାରି, ଆୟା ଦାର୍ମୁସାସ୍ତ୍ର ନା ବିସୟ୍ତାନ୍ ସାକି ସିଜିନାତ୍ । 40ମାତର୍ ମିର୍ ଜିବନ୍ ପୟ୍ଦେଙ୍ଗ୍ ଇଜିନା ଲାକ୍ତୁ ୱାଦେଙ୍ଗ୍ ବଦା କିଇଜିନିଦେର୍ ।
41ନାନ୍ ଲୋକାମାଣ୍କୁ ଗୌରବ୍ ପୟ୍ଦେଙ୍ଗ୍ ବଦାକିଏ । 42ମାତର୍ ନାନ୍ ମିଙ୍ଗିଁ ନେସ୍ନା, ମିର୍ ଏଣ୍ତେସ୍ ନାନି ଲୋକୁ ମି ଜିବନ୍ତୁ ମାପୁରୁଦି ଉଣ୍ତିଙ୍ଗ୍ ଜିବନ୍ନୋନିକା ସିଲେତ୍ । 43ନାନ୍ ନା ବୁବାଦି ଦର୍ତାନ୍ ୱାତାମାନା, ମାରି ମିର୍ ନାଙ୍ଗିଁ ଆସ୍ଇଜିନିଦେର୍; ଆଇକାନ୍ ଜଦି ନିଜେ ଦର୍ତାନ୍ ୱାନାନ୍, ଆରିଙ୍ଗ୍ ମିର୍ ୱାନିଙ୍ଗ୍ ମାନାନିଦେର୍ । 44ମିର୍ ଏଣ୍ତେସ୍ ନାଙ୍ଗିଁ ବିସ୍ବାସ୍ କିଦେଙ୍ଗ୍ ଆଟ୍ନିଦେର୍ ? ମିର୍ ତୋ ନିଜେନିଜେମାଣ୍କୁ ଗୌରବ୍ ପୟ୍ଜିନିଦେର୍, ମାରି ଅରେନ୍ ମାପୁରୁମାଣ୍କୁ ଏମେ ଗୌରବ୍, ଆକା ପୟ୍ଦେଙ୍ଗ୍ ବଦା କିଇଜିନିଦେର୍ । 45ନାନ୍ ଜେ ବୁବାଦି ଆଗ୍ଡ଼ି ମି ବିରଦ୍ତାନ୍ ଦୋସ୍ କିନା, ଇକା ଅଡ଼୍ବିମାଟ୍; ଏମେ ମୋସାମାନୁ ମିର୍ ଆସା ଇଟ୍ତିମାନିଦେର୍, ୱାନ୍ ମି ବିରଦ୍ତାନ୍ ଦୋସ୍ କିଜିନାନ୍ । 46ଇରିଙ୍ଗ୍ ମିର୍ ଜଦି ସତ୍ତାନ୍ ମୋସାଦିଙ୍ଗ୍ ବିସ୍ବାସ୍ କିତିଙ୍ଗ୍ମାନ୍ଦି, ଆରିଙ୍ଗ୍ ନାଙ୍ଗିଁ ବିସ୍ବାସ୍ କିତିଦେର୍ମାନ୍ଦି, ଇରିଙ୍ଗ୍ ୱାନ୍ ନା ବିସୟ୍ତାନ୍ ରାସ୍ତାମାନାନ୍ । 47ମାତର୍ ମିର୍ ଜଦି ମୋସା ରାସ୍ତିମାନି ବାକ୍ୟ ବିସ୍ବାସ୍ କିଇଜିନିଦେର୍, ଆରିଙ୍ଗ୍ ଏଣ୍ତେସ୍ ନା ବାକ୍ୟ ବିସ୍ବାସ୍ କିନିଦେର୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ଜୋହନ 5: NTKoo20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
