MATTHEW 10

Matsh gamai gohk am i ha chuhcha g Jesus

An g neid g Mark 3:13-19; Luke 6:12-16

1Ab ad hahawa i t‑wai g Jesus ahchim mach ab si wecho t‑mashcham k ab t‑mah g gewkdag matt gam hu wo i ha wuwhas g jijawul ab ha amjed hegam mo an ha uꞌukch k wo ha dodaj g kokꞌodam.

2Dachd gamai gohk ahchim mach d si chuhchaij. Simon o d wehpegkam ch hab ep chehgig Peter. K g Simon shehpij hab waꞌap d Jesus kehsha ch hab chehgig Andrew. K haꞌi ep d James ch John ch d e‑wepngam. K g ha‑ohg hab chehgig Zebedee. 3K haꞌi ep d Philip ch Bartholomew ch Thomas. Ni ahni hab waꞌap d kehshaj ch hab chehgig Matthew ch wa d ge lial ha kowlantdam. K hema d hegai James mo g ohgaj d Alphias. K hema hab chehgig Thaddaus. 4K hema hab ep chehgig Simon ch d hema hegam mo tatchua matt ahchim Tutuligo hejel wo himchudad g t‑kownaltalig. K hema hab chehgig Judas Iscariot ch d ihda matki wo gagda g Jesus.

Matsh g Jesus chuhchai gam hu ahgachug g haꞌichu ahgaj

An g neid g Mark 6:7-13; Luke 9:1-6

5D g Jesus am hahawa i t‑shelini ahchim gamai gohk matt gm hu wo ahgachugad g haꞌichu ahgaj hab kaijch, “Pi g am hu wo hihim gawul mahs hemajkam ha wui ch Samaria hemajkam ha wui iaꞌi idani. 6Am amt wo waꞌi hihi hegam ha wui e‑wehm Tutuligo. Idam o hab sha masma mo g heb hu hihimkam kahwal. 7Am g wo hihim k id am wo i ha ahgidahi mat am wo i himch g Jiosh g e‑kownaltalig jewed dahm. 8Mt wo ha dodaj g kokꞌodam k ab uhpam wo i ha chechegitoich hegam mat wabsh chum koi k g jijawul ab wo i ha wuwhas ha amjed hegam mo an uꞌukch k wo ha dodaj hegam mo kokꞌo heg hekaj mo g ha‑chuhkug wabsh muhkhim. Ab ant wabsh em‑mah ihda gewkdag. Kumt pi haꞌichu wo ha kowlantad am hab ha junidch.

9-10“K wabshaba ab d ha‑wuikam hegam mat ab wo em‑kaiha mat ab aigo wo i em‑wehmaj k wo em‑dagioꞌi. Mt heg hekaj ab wabsh wo e enigadadch ch wo hihi pi haꞌichu uꞌadch mams hekaj wo e dagioꞌi o ams wo ha namkid. T g Jiosh wo em‑nuhkud. Kumt pi wo uꞌad g cheowikud mamt hekaj wo e nuhkud.

11-14“Mt am wo i wahp kihhim ch ed k an wo i ha gahghi hegam mat hedai s‑ap ab wo i em‑nei k ab ha wui hab wo chei, ‘Jiosh o ab em‑makiog g si geꞌe s‑ap tahhadkam.’ Kut am wo i em‑wahpkid k wo em‑dagioꞌi am hugkam mamt hekid gm hu baꞌich ep wo i hihi. Kutp hems hebai pi ap ab hu wo i em‑nei g kihkam. Kumt am wo si i shahmud g jewed ab e‑tahtad ab k hab wo ha chehgi mamt wo ha dagito. 15Nt wo si shel em‑ahgi mat g Jiosh baꞌich i s‑koꞌokam wo ha namkid hegam mat pi ab hu wo kaiha ihda s‑kehg haꞌichu ahgaj matsh hi hegam hab ha juh pi ap hemajkam mash am kih Sodom ch Gomorra kihhimbad ch ed.

Matsh ab wo i hih g shoꞌigchuda

An g neid g Mark 13:9-13; Luke 21:12-17

16“Neh, am amt wo oiopod ha shahgid g hemajkam. Kut haꞌi wo s‑ta ehbidamak am em‑wehhejed hab sha masma mo g sheshꞌe am ha wehhejed g kahwal. Mt wo si s‑e nenꞌoidad hab masma mo g ban ch wo si s‑hehemajimak hab masma mo g hohohi. 17Ab o him g tash mamt an wo em‑uꞌu k wo em‑lodait k atp hems ep wo em‑gewitta am chechopi ch ed. 18Am amt wo em‑lodai ha tahgio g hahaꞌichu ch kokownal heg hekaj mam ab ni‑hiwig. Kumt wo s‑ni‑mahch k ah am ha tahgio ch am ha tahgio g gawul mahs hemajkam. 19Pi g wo shaꞌi e kudut ab amjed mamt has masma e wehhejed wo neo. 20Hekia S‑apꞌekam Gewkdag at wo em‑ahgi mamt has wo chei.

21“Hahaꞌichu at wo em‑kokda. Kut ab ha wui wo em‑gagda chum hems g em‑wepnag o g em‑jehj o g em‑aꞌaliga. 22Muꞌi hemajkam at wo s‑em‑kehꞌidad ni‑hekaj. Kumt wo sha e nakog k wo gahi wuwha g e‑shoꞌigdag. T g Jiosh am wo i em‑wahpki e‑kihdag ed. 23Neh, mtp hems wo em‑shoꞌigch hasko. Pegih, mt wo ahhio heg amjed kihhim k gam hu baꞌich kihhim wui ep wo hihi. Nt wo shel em‑ahgi mant ep wo jiwia ahni Jiosh si Kehsha mamt koi wo ha chehmo g e‑wehm oꞌodham ha‑kihhim.

24-25“E mashchamdam o ab wabsh wecho hegai mo d ha mashchamdam ch heg hekaj wepo wo nako haꞌichu. T g pion hab waꞌap wepo haꞌichu wo nako g e‑ahmo. Kumt ahpim hab waꞌap ni‑wepo wo nako haꞌichu. Neh, bo ni‑aꞌaga haꞌi mani d ge Jiawul ch wahm s‑koꞌokam has wo em‑ahgad ahpim mam ab si ni‑wecho e mashcham.

Mamtsh hedai wo s‑ha ehbidad

An g neid g Luke 12:2-7

26“Pi g wo shaꞌi ha ehbidad g hemajkam nat pi wehs wo i e maꞌishpiꞌo mo haschu i e maꞌishch ch wehs wo s‑e mai mo haschu s‑e aꞌagchud. 27Si amt tasho wo i ahgahi wehsko mani haschu ab si hejel em‑ahgid. 28Pi g wo shaꞌi ha ehbidad hegam matp hedai wo chum s‑em‑kokdaim. Pi at wo e nako mas baꞌich i s‑koꞌokam has wo em‑juh em‑kokdak. Heg at waꞌi Jiosh wo e nako mat am wo em‑daꞌich Jiawul kih ed mamtp pi am hu wo wohog elidad. Kumt heg ab wo waꞌi si has elidad.

29-31“K wabshaba g Jiosh si s‑hemajima ch pi tatchua mas wo s‑koꞌokam em‑juh. Am g wo oidahim mo chum hems g al uꞌuwhig s‑ap ha nuhkud. K eda chum alo pi haꞌichu namkig idam. Kum ahpim d si haꞌichu am tahgio. Jiosh o wehs haꞌichu s‑mahch ab em‑ab. Mt heg hekaj pi haꞌichu wo shaꞌi ehbidad ab wui e dagitokch.

Mamtsh wo tasho e ah mam ab hiwig g Jiosh si Kehsha

An g neid g Luke 12:8-9

32“Neh, am amt wo s‑ni‑mahch k ah hemajkam ha tahgio mam d ni‑wohochuddam. Kunt ahni hab waꞌap wo s‑em‑mahch k ah am tahgio g ni‑ohg Jiosh. 33Kutp wabshaba hedai pi wo ni‑mahch k ah am ha tahgio g hemajkam, nt ahni hab waꞌap pi wo mahch k ah am tahgio g ni‑ohg Jiosh.

Matsh g hemajkam ab e wui wo gegokiwua heg hekaj Jesus

An g neid g Luke 12:51-53; 14:26-27

34“Pi g hab wo e elidad mat wo dodolimat g hemajkam mant ia jiwia. Ab at em‑wui wo gegokiwua hegam mo pi ab hu has ni‑elid. 35Wihpiop atp hems wo s‑kehꞌidad g e‑ohg ch g chetcha g e‑jeꞌe o g e‑kahkma jeꞌe. 36Em‑wehm kihkam atp hems d wo si em‑obgak.

37“Pi at haꞌichu wo namkigk g em‑wohochudadag mamtp pi baꞌich wo i ni‑tatchua mam hi g e‑ohg ch e‑jeꞌe ch e‑aꞌaliga. 38Mt gam hu wo dagito g hejel hab e elida k ahni hab ni‑elida hab wo junihid ni‑wehhejed e shoꞌigchudch. Heg at wo wa wepok mam ab mohto g kots ch ab ab wo e muhkid. Kut pi haꞌichu wo namkigk g em‑wohochudadag mamtp pi hab masma ab wo i ni‑oi. 39Pi amt wo heki wua g e‑doakag mamtp wo hekaj am ni‑wehhejed. Heg at wo heki wua g e‑doakag matp hedai wo chum s‑daꞌad.

Mash hedai d ha wuikam g s‑kehg mahkigdag

An g neid g Mark 9:41

40“Heg o wa wepo mo s‑ap ab ni‑neid ahni matp hedai ahpim s‑ap ab wo em‑neidad. K hab waꞌap s‑ap ab neid g Jiosh matp hedai s‑ap ab wo ni‑neidad. 41Hegai mat hedai s‑ap ab wo i ha nei g ni‑chuhchai at ha wepo wo bei g s‑kehg mahkigdag. Kut hegai mat hedai s‑ap ab wo i nei g s‑apꞌekam oꞌodham heg wepo wo bei g s‑kehg mahkigdag. 42Kut heg s‑wohom ab wo bei g s‑kehg e‑mahkigdag mat hedai chum hems g s‑hehpi shuhdagi ab wo hema ha wasibi idam al aꞌal am hema em‑wehhejed ahpim mam ab si ni‑wecho e mashcham.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

MATTHEW 10: ood

Highlight

ಶೇರ್

ಕಾಪಿ