لُکَ 10
10
يٜىٰسُ لِلِي تٛکُّٻٜمٛ 27
1غَطَ مَاجُمْ يٜىٰسُ سُٻِ وٛٻّٜ کَمْٻٜ 27، ندٜنْ اٛ لِلِٻٜ طِطٛ‑طِطٛ، ٻٜ اَرْتَمٛ يَاکِ کٛو ندِيٜ غَرِيرِ اٜ وِغٜىٰرٜ تٛ اٛ يِطِ يَحُکِ فُو؞ 2اٛ وِعِٻٜ، «غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞ 3نجَحٜىٰ؞ مِ لِلِيعٛنْ تٛ يِمْٻٜ بٛنٛ مبَالٛيْ حَکُّندٜ شَافَالِ؞ 4تٛع اٛنْ نجَادُ اٜ جَکَارٜ شٜىٰدٜ کٛو جَکَارٜ لِمْشٜ، کٛو ڤَطٜ، ندٜنْ تٛع اٛنْ کٛوْنُ غٛطّٛ کٛوْنٛلْ جُوتُنغٛلْ دٛوْ طَتَلْ؞ 5وُرٛ نغٛ نَتُّطٛنْ فُو، ڤُطّٜىٰ وِعُکِ، ‹اَللَّه حٛکَّ وُرٛ نغٛعٛ جَمْ!› 6تٛ اٜ وٛودِ نٜطّٛ غِطّٛ جَمْ ندٜرْ وُرٛ نغٛنْ، بَرْکَ مٛوطٛنْ جٛوطٛتٛ دٛوْ مَاکٛ، اَمَّا تٛ وَلَا، طُمْ وَرْتَيْ تٛ مٛوطٛنْ؞ 7نجٛوطٜىٰ ندٜرْ وُرٛ نغٛ طُمْ جَٻِّيعٛنْ، ݧَامٜىٰ، نجَرٜىٰ کٛو طُمٜ کٛ ٻٜ کٛکِّعٛنْ، نغَمْ کُوٛووٛ اٜ حَانِ يٛٻٜىٰکِ؞ تٛع اٛنْ کَکِّتٛ دَغَ وُرٛ يَاکِ وُرٛ؞ 8فُو غَرِيرِ ندِ نَتُّطٛنْ، تٛ يِمْٻٜ مَيْرِ نجَٻَّکٜعٛنْ، ݧَامٜىٰ کٛ طُمْ رٜسِ يٜىٰسٛ مٛوطٛنْ؞ 9نجَمْطِنٜىٰ ݧَوْٻٜ وٛنْٻٜ ندٜرْ غَرِيرِ ندِنْ، ندٜنْ مبِعٛنْٻٜ، ‹لَامُ اَللَّه وَرِي حَادٜ مٛوطٛنْ؞› 10اَمَّا، غَرِيرِ ندِ نَتُّطٛنْ فُو، تٛ ٻٜ نجَٻَّاکِعٛنْ، مبُرْتٜىٰ نجَحٛنْ دٛوْ طَتٜ مَيْرِ مبِعٛنْ، 11‹مِنْ ڤِطِّي سٛلَّارٜ غَرِيرِ مٛوطٛنْ دَغَ کٛيْطٜ اَمِنْ، کَنْجُمْ طُمْ حٜٻْتِرْتَ اٛنْ نغَطِي حَکّٜ؞ اَمَّا اَنْدٜىٰ طُعُمْ، لَامُ اَللَّه وَرِي حَادٜ مٛوطٛنْ؞› 12اٜ مِ وِعَعٛنْ، اٜ ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ غَرِيرِ سٛدٛمْ دٛوْ يِمْٻٜ غَرِيرِ ندِنْ طٛنْ؞»
غَرِيجٜ طٜ نجَٻَايِ غٛونغَ نجَرَيْ بٛنٜ
13اٛ وِعِ، «يِمْٻٜ غَرِيرِ کٛرَسِنْ، اٛنْ مبٛنِي! يِمْٻٜ غَرِيرِ بٜتَسَيْدَ، اٛنْ مبٛنِي! دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ 14اَمَّا ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ 15اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ! طُمْ نَتِّنَيْعٛنْ ندٜرْ نغَيْکَ حِيتٜ؞»
16ندٜنْ يٜىٰسُ وِعِ تٛکُّٻٜمٛ، «جَٻُطٛ کٛ مبِيطٛنْ فُو جَٻِي کٛ مبِيمِ، غَݧُطٛعٛنْ بٛو وَݧِييَمْ، ندٜنْ غَݧُطٛيَمْ وَݧِي اٛنْ طٛنْ لِلٛيْطٛيَمْ؞»
سٛعّٛيَاکِ لِلَاٻٜ 27
17سٜيْ تٛکُّٻٜمٛ 27 نغَرْتِ اٜ نَنَ بٜلْطُمْ، ٻٜ مبِعِ، «مٛودِبّٛ، حَا غِنِّ مَا نغَطِي کٛ مِنْ مبِعِطِ فُو ندٜرْ اِنْدٜ مَاطَ!»
18اٛ وِعِٻٜ، «مِ يِعِي شٜيْطَنْ يَنٛيِي بٛ مَپّٜرٜ دَغَ دٛوْ؞ 19رَا، مِ حٛکِّيعٛنْ لَامُ يَاٻُکِ دٛوْ بٛولٜ اٜ جَحٜ اٜ حٜٻُکِ جَالٛرْغَلْ دٛوْ بَوْطٜ غَݧٛ، وَلَا کٛ حٜٻَتَعٛنْ؞ 20اَمَّا تٛع اٛنْ نَنُ بٜلْطُمْ نغَمْ غِنِّ اٜ نغَطَ کٛ مبِيطٛنْ، اَمَّا نَنٜىٰ بٜلْطُمْ نغَمْ اِنْطٜ مٛوطٛنْ مبِنْدَامَ اٜ وُرٛ اَللَّه؞»
يٜىٰسُ نَنِي بٜلْطُمْ
21اٜ شَرٜلْ نغٜلْ، يٜىٰسُ نَنِ بٜلْطُمْ ندٜرْ رُوحُ اَللَّه، اٛ وِعِ، «مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞»
22سٜيْ اٛ وِعِ يِمْٻٜ، «ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ مٛيٜ وٛنِ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞»
23سٜيْ اٛ وَيْلِتِي تٛ تٛکُّٻٜمٛ اٛ وِعِٻٜ کَمْٻٜ تَنْ، «غِتٜ غِعُطٜ کٛ نغِيطٛنْ طٜ بَرْکِطِنَاطٜ! 24نغَمْ اٜ مِ وِعَعٛنْ، اَنَّبٛعٜنْ طُطْٻٜ اٜ لَامِنٛوٻٜ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞»
مِسَالُ دٛوْ سَمَارِيَنْکٜىٰجٛ بٛطّٛ
25سٜيْ غٛطّٛ مٛودِبّٛ دٛوکَ اُمِّي دَرِي نغَمْ فٛوندَ يٜىٰسُ، اٛ وِعِ، «مٛودِبّٛ، کٛ حَانِ مِ وَطَ نغَمْ مِ حٜٻَ يٛنْکِ کِ رٜعَتَا؟»
26سٜيْ يٜىٰسُ وِعِمٛ، «کٛ وِنْدَا ندٜرْ اَتَّوْرَ؟ نٛيٜ نجَنْغِرْتَا؟»
27اٛ نٛوتِي، اٛ وِعِ، « ‹يِطُ جٛومِرَاوٛ اَللَّه مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ سٜمْبٜ مَاطَ فُو، اٜ حَکِّيلٛ مَاطَ فُو،› ندٜنْ، ‹يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞› »
28يٜىٰسُ وِعِمٛ، «اَ نٛوتَکٜ بٛطُّمْ؞ وَطُ نٛنْ، ندٜنْ اَ حٜٻَيْ يٛنْکِ کِ رٜعَتَا؞»
29اَمَّا مٛودِبّٛ دٛوکَ اٛنْ يِطِي وُرْتِنَ حٛورٜ مُوطُمْ، سٜيْ اٛ پَمِ يٜىٰسُ، اٛ وِعِ، «مٛيٜ وٛنِ بَنْدِرَاوٛ اَمْ؟»
30يٜىٰسُ وِعِمٛ، «غٛطّٛ نٜطّٛ اٜ يَحَ دَغَ اُرُشَلِيمَ يَاکِ جٜرِيکٛ، سٜيْ وٛٻّٜ وُيْٻٜ تَٻِّيمٛ؞ ٻٜ ٻٛرْتِمٛ، ٻٜ نجَٻِ کٛ اٛ وٛودِ فُو، ٻٜ ڤِيِمٛ بٛطُّمْ، ٻٜ ندِلِّ، ٻٜ اَلِمٛ حَکُّندٜ يٛنْکِ اٜ مَيْدٜ؞ 31سٜيْ اَرْدِيطٛ دِينَ تٛکّٛيِ طَتَلْ نغَلْ؞ ندٜ اٛ يِعِ نٜطّٛ اٛنْ، اٛ سٜلِ، اٛ پَٻِّي؞ 32کَدِمَا، غٛطّٛ لٜىٰوِيَنْکٜىٰجٛ تٛکّٛيِ طَتَلْ نغَلْ، ندٜ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ سٜلِ، اٛ پَٻِّي؞ 33اَمَّا غٛطّٛ سَمَارِيَنْکٜىٰجٛ اٜ ندٜرْ يَادُ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ يُرْمِنَنِمٛ؞ 34اٛ يَحِ تٛ مَاکٛ، اٛ لٛوتَنِمٛ نَوْنٛوطٜ اٜ نٜبَّمْ اٜ ندِيَمْ اِنَبٛجَمْ، اٛ حَٻَّنِمٛ نَوْنٛوطٜ طٜنْ؞ ندٜنْ اٛ وَطِّنِمٛ دٛوْ مبَبَّ مَاکٛ اٛ يَارِمٛ وُرٛ تٛ طُمْ يٛٻَتَ طُمْ وَالَ، اٛ وَلِّمٛ؞ 35ندٜ وٜىٰتِ، سَمَارِيَنْکٜىٰجٛ اٛنْ اِتِّ شٜىٰدٜ اَجُرْفَارِ طِطِ دَغَ جِيبَ مُوطُمْ، حٛکِّ مَوْطٛ وُرٛ اٛنْ وِعِمٛ، ‹وَلُّمٛ؞ تَا مَجِّنِي شٜىٰدٜ کٛ ٻُرِ طٜعٜ، مِ يٛٻٜتٜ تٛ مِ سٛعّٛيَکٜ؞› »
36سٜيْ يٜىٰسُ پَمِ مٛودِبّٛ دٛوکَ اٛنْ وِعِ، «مٛيٜ ندٜرْ يِمْٻٜ تَتٛ ٻٜعٜ کَمِّطَا وٛنِ بَنْدِرَاوٛ مٛ وُيْٻٜ ڤِيِ اٛنْ؟»
37اٛ وِعِ، «اٛنْ طٛنْ جُرْمِنَنْطٛمٛ؞»
سٜيْ يٜىٰسُ وِعِمٛ، «اَنْ مَا، يَحُ نغَطَا نٛنْ؞»
يٜىٰسُ يَحِي وُرٛ مَرْتَ اٜ مَرْيَامَ
38يٜىٰسُ اٜ تٛکُّٻٜمٛ اٜ ندٜرْ يَادُ، سٜيْ اٛ نَتِّ وٛنْغٜلْ غَرِيٜلْ، غٛطّٛ دٜبّٛ بِعٜتٜىٰطٛ مَرْتَ جَٻِّيمٛ تٛ وُرٛ مُوطُمْ؞ 39مَرْتَ اٛنْ اٜ وٛودِ مِݧِرَاوٛ بِعٜتٜىٰطٛ مَرْيَامَ؞ مَرْيَامَ جٛوطِي حَادٜ يٜىٰسُ اٜ مٛ نَنَ اٜکِّتِنٛلْ مَاکٛ؞ 40اَمَّا مَرْتَ وَنِّي نغَمْ اٜ حُوَ کُوطٜ طُطّٜ؞ سٜيْ اٛ وَرِ تٛ يٜىٰسُ، اٛ وِعِ، «مٛودِبّٛ، اَ وَنَّايِ ندٜ مِݧِرَاوٛ اَمْ اَلْدِيَمْ اٜ کُوغَلْ نغَعَلْ مِنْ تَنْ؟ وِعُمٛ اٛ اُمّٛو اٛ وَلَّيَمْ!»
41اَمَّا يٜىٰسُ نٛوتِي، وِعِ، «مَرْتَ، مَرْتَ، اَ وَنِّي حٛورٜ مَاطَ دٛوْ فِي طُطُّمْ؞ 42اَمَّا فِي غٛعٛ تَنْ يِطَا؞ مَرْيَامَ بٛو سُٻِي کٛ ٻُرِ وٛوطُکِ، طُمْ جَٻْتَتَاکٜ تٛ مَاکٛ؞»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
لُکَ 10: fuv
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2011, Bible League, All rights reserved.
