Ntandiliko 9
9
Nnungu àtenda lilailano na Nuhu
1Nnungu nkum'baliki Nuhu na vana vake wannyaulila kuchidoni, “Velekana, na muyenjejeke mukachiumbaje chilambo. 2Anyama vammalele va pachilambo na vyuni vyammalele na viumbe vyammalele viônga pachilambo na ahomba vammalele va m'bahali, vàkamujijwe mmakono lenu, vanang'o vàmbennyopanga namene mwenu. 3Viumbe vyammalele vivêle na umi vìmbekuva chakulya chenu malinga chinimpelenge dimbowa dya mahamba kuva chakulya chenu. 4Henga munamulye nnyama bila kumwadila myadi yake, kwa kuva umi ùvele mmyadi. 5-6Nangu nìmmumbile munu kwa nfano wangu nimwene, bahi nguchinimwasibu nnyama woheyo au munu woheyo ambemmwalâla munu. Ikàva nnyama àmbemmwalala munu, aneyo nnyama lasima awalalwe. Na ikàva munu àmbemmwalala munu nnyake, aneyo munu lasima awalalwe. 7Bahi mwenu velekanga na muyenjejeke, velekanga namene, muyenjejeke pachilambo.”
Inyingamu
8Bahi Nnungu nkunnyaulila Nuhu pamo na vana vake kuchidoni, 9“Lola, nangu ngùtenda lilailano lyangu na mwenu pamo na vanu va nnukolo lwenu, 10na viumbe vyammalele vivêle na umi, yani vyuni na vanyama va kulangwa pamo na vanyama vammalele va munnyitu, vammalele vahumîle nsafina pamo na mwenu. 11Nangu ngùtenda lilailano lyangu na mwenu kuva, likambehumila kavila livambwe lya kwondonganga chilambo chammalele na viumbe vyammalele. 12-13Na ayi inyingamu inguivikile kumahunde, ìmbekuva chimaiho cha lilailano lingulitenda na mwenu na viumbe vyammalele vya pachilambo. Inyingamu ayi ichiinkumbusange mwenu kuva, pàvele lilailano kati yangu na mwenu, mmivelekwa vyammalele. 14Na ìmbekuva uvila, kila panimbetanda mahunde la imbula kumahunde, na aneyo inyingamu paimbeoneka aneko kumahunde, 15anepo nguchingukumbukile lilailano lyangu língutendìlè pamo na mwenu na viumbe vyammalele. Na pakambekuva na livambwe lya kwondonganga viumbe vyammalele, mwiko. 16Aneyo inyingamu paimbehumila kumahunde, nìmbeyona na kulihimukila lilailano anelyo likee na ntululilo kati yangu na viumbe vyammalele vya pachilambo.” 17Anepo Nnungu nkunnyaulila Nuhu kuchidoni, “Achi njo chimaiho cha lilailano lyangu língutendìlè na viumbe vyammalele vya pachilambo.”
Nuhu pamo na vana vake
18Vana vanga Nuhu vanahumile nsafina nni, Shemu, Yafeti na Hamu. Na Hamu njo anavele atatake Kanaani. 19Anevo njo vana vatatu vanga Nuhu, na kuhalokana na vana anevo, vanu vániyenjejeka na kuyanjala pachilambo chammalele.
20Bada ya livambwe, Nuhu ávele nkúlima, na ávele munu ntandi kulima welu wa mizabibu. 21Liduva limo, Nuhu nkukumbila divayi, nkukalewa, nkulala chihi lukundumwandu mun'gongwe wake wachiikala. 22Bahi Hamu, atatake Kanaani, nkuwona mwandu wa atatake, nkuhuma pawelu nkunavahaulila avala akuluvake vavili. 23Henga Shemu na Yafeti nkutwala inguwo, nkuivika mmavala lavo, nkuhwena chihenganyuma, nkunammimba atatawao. Meho lavo lálola chihi nnyenje, na wala nanga pavanauwene mwandu wa atatawao. 24Bahi Nuhu paunnyamwike wala, nkumala namuna chantendeledile mwanawe n'joko, 25nkuchidoni,
“Kanaani alanike!
Àmbekuva ntumwa wa pahi namene wa akuluvake.”
26Nkuhaula kavila kuchidoni,
“Yahwe, Nnungu wangu am'baliki Shemu!
Na Kanaani ààve ntumwa wanga Shemu.
27Nnungu aidalambule mipaka yanga Yafeti,
na Yafeti akumilane na Shemu na kuikala nawe pamo,
na Kanaani ààve ntumwa wanga Yafeti.”
28Bada ya livambwe, Nuhu nkuikala vyaka myatatu amsini. 29Bahi Nuhu nkuikala vyaka myatisa amsini, nkuhila.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Ntandiliko 9: Chimakonde
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2020 Pioneer Bible Translators