Matyu 17
17
Yesu Sangganoa Sok Xan Tela
(Mak 9:2-13; Luk 9:28-36)
1Xaidap 6 disup, baing Yesu xap Pita, Yems, kixinginoa Yon, saing xai dingtung mahaing bimbi sabanga tela, ne ding ganiding duwa. 2La ba, Yesu xugia maxadingia. Ramramonoa sina bila xaidaba, saing imangindi disok usamang sibuna bila lulianoa. 3Hata sibuna li, Moses Elaitsa tang#17:3 Moses Elaitsa tang—Tang Urana lipuxing suxunguxunguamdi duwa waleu sibuna mana bungina Yesu. Tang dimati waleu, ne mana bungina baguli dima long xaiya ma bu tang daharua rangua Yesu. dowa masok tung maxadingia, tang daharua rangua Yesu.
4Pita harua na Yesu ba, “Toxoratamona, xai sibuna tawa la li. Nabu ung murum, bagula ngatongtongia xahi tuwa—tela naung, tela na Moses, xaung tela na Elaitsa.”
5Pita haruauyu, baing mugap tela luliang sibuna kaudi, saing waxutu tela sok mugabia ma, harua ba, “Alali Garagu sibuna, nga murugu sibuna mana. Angtung galungu haruanganoa!”
6Lipudi dinaxu mana Yesu tung dilungu, baing dimaxuwa sibuna. Tung digung kidingdi mari, dita ramramodingdi titia. 7Ne Yesu ma rangua dingtung saing ringdi. Harua ba, “Angtung gamesa. Labu amaxuwau tai.” 8Tung dibagu mahaing, baing dibagu Yesu ing ganina wa.
9Tauna diyunga bimbia ba, diri malauyu, saing Yesu bilidi ba, “Labu abala lipu tela mana axamana abagu tai, laing kimuya mana Lipua Ma Rangua Urana mesa muli mana matiyua.”
10Baing lipuxindi dinaxu mana duxusunga ba, “Baruta lipu hanaunaunga tubatubainganamdi daharua ba Elaitsa bagula goxoya ma muga mana Urana Lipuxing Mogunganama ma?”#17:10 Ubagu haruanga hawama wa Matyu 11:14.
11Yesu haxuya ba, “Maxung sibuna, Elaitsa ma muga bu hamaringia axamandi to. 12Ne ngabalang ba, Elaitsa ma ba, ne dibagu daxabia te, saing dilibu ding murungadinga mana. Baing bila balau bagula Lipua Ma Rangua Urana xap salaga rimadingia.” 13Baing ina naga, lipudi dinaxu mana tung daxabia rangrang ba harua mana Lipu Suguangama Yon.
Yesu Hamaringia Gananung Tela Xaunga Wa Mana
(Mak 9:14-28; Luk 9:37-42)
14Bimbi namuya Yesu gabu lipuxing tuwa dinaxu mana disok mana burangua, baing lipu tela ma rangua saing gung king tuxundi maxania. 15Harua ba, “Toxoratamona, usinga garagua. Bunging xumana asaxa garanoa haing mana saing xap salak sabanga. Bunging xumana xung mari yabia kimbo langia. 16Binabu ngaxap ma rangua lipuximdi dinaxu maung, ne ding sanga ba dahamaringia te.”
17Haxuya ba, “Ai, ang hatatamdi ahatum haringin te. Kuboluimdi dimaring te. Xaidap baru bagula ngawauyu ranguang saing ngaxap salaga mang? Axap gara ba ma rangua nga to.” 18Yesu bili xaungua, saing sok sangua gara ba, saing hata sibuna li businganoa sup.
19Kimuya lipudi dinaxu mana dima duxusunga hisangia ba, “Baruta am sanga ba am gasuka mala te?”
20-21Haxuya ba, “Hatumingaim haringindi kaxukading buk, binabu ang sanga te. Ahatumia: Mastat xuyandi kaxukang sibuna, ne dahaing disok sabanga sibuna. Bila balau, nabu hatumingaim haringindi ditubu laing maxung sibuna ahatum haringina ba Urana bagula libu bila axusunga ba, bing sanga ba alibu axamang longgalo! Bila aharua na bimbia li ba, ‘Uyunga yabama ula hataina lo’, baing bagula ila.”#17:20 Buninga teladi daharua ba …ila. 21 Ne sabungua xaung saha mana angingua ing ganina sanga mana suka xaunga na bila li. Daxanga tela te.
22Bungina lipudi dinaxu mana digugunia muli titia Galili, Yesu baladi ba, “Bagula dita Lipua Ma Rangua Urana bixuandi rimadingia. 23Bagula dung mati, ne kimuya mana xaidap tuwa, bagula Urana iti mesa muli.” Baing lipudi dinaxu mana dibaxagi mana usingangua.
Yesu Gim Takis Mana Urana Numanoa
24Yesu gabu lipuxindi dinaxu mana dila disok long sabangga Kaperneam, baing lipudi daxap takis mana Urana Numanoa dima rangua Pita saing duxusunga ba, “Bola Lipuxim Tubatubaingam gim takis mana Urana Numanoa, bo?”
25Haxuya ba, “Wane.” Baing Pita ila luxu numia.
Ne Pita harua teguyu, baing Yesu xusunga muga ba, “Saimon, uhatum baru? Xaitamoxi titiamdi daxap takis rangua ding sibuding lipuxidingdi, kimbo daxap rangua lipu titi telamgadi didalidi ba?”
26Pita haxuya ba, “Daxap rangua lipu titi telamgadi didalidi ba.”
Baing Yesu bala ba, “Binabu ding sibuding lipuxidingdi digim te. 27Ning, sanga ba talibu gamodingdi didoa makira te, binabu uri mala lang gamolingania saing uting kaila mala langia. Song mugamugangam uxuni, bing uxaxa suxungunoa, baing bagula ubagu siang silba mukiring tela wa maluxu. Oxop mala ugim kitam takisiradi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matyu 17: met
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
