Mataayo 6

Imanyiiso tsa kulongwi tsa kʉvatanga avagatsu

1“Muve miiho, muleke ʉkwɨvɨɨka mulɨ vagolosu va Ngʉlʉve pamiiho ga vaanu pakʉta vavavone. Mungave muvomba ewo, namukʉʉpɨlɨle ʉlwokelo ʉkʉhʉma kwa Dadajiinyo ʉvɨ alɨ kʉkyanya. 2Lɨno, wʉ vuhʉmya isyavʉpe, ʉleke ʉkwɨvoniavonia pakʉta ʉmanyikike ndʉwʉ avagelʉngʼania vivomba mu masinagogi na mu mitawa pakʉta avaanu vavaginie. Tsa jɨlweli ndikʉvavʉʉla ʉkʉta, vamalile ʉkwʉpɨlɨla ʉlwokelo lwa veene. 3Lɨno ʉve wʉ vuhʉmya isyavʉpe, ɨkɨvoko kyako kya kʉngʼɨgɨ kɨleke ʉkʉlʉmanya ɨkyʉ kivomba ɨkɨvoko kya kʉndyo, 4pakʉta isyavʉpe syako sive sya kʉvʉtiitu. ɄDadaajo ʉvɨ ilola itsʉ tsivombeka kʉvʉtiitu, alakwokela.

Imanyiiso tsa kulongwi tsa kwɨsaja kwa Ngʉlʉve

(Luuka 11:2-4)

5“Lɨno ʉnyie wʉ mukɨsaja kwa Ngʉlʉve, muleke ʉkʉva nda vagelʉngʼania, manya aveene vinogwa ʉkwɨsaja vɨmile mu masinagogi na mu nguto tsa mitawa pakʉta avaanu vavavone. Tsa jɨlweli ndikʉvavʉʉla ʉkʉta, vamalile ʉkwʉpɨlɨla ʉlwokelo lwa veene. 6Lɨno ʉve wʉ vunogwa ʉkwɨsaja kwa Ngʉlʉve, ingila mu kɨjumba kya kʉgati nʉ kʉdɨnda ʉndyango. Ɨsaje kwa Dadaajo ʉvɨ nivoneka. ɄDadaajo ʉvɨ ilola ʉgwʉ givombeka kʉvʉtiitu, alakʉhomba.

7“Ikange, wʉ mukɨsaja kwa Ngʉlʉve, muleke ʉkʉtsiga mupwata nʉ kʉtsova amamenyu ga mongosu ndʉwʉ avanyapanzi vivomba, manya aveene vimanya ʉngʉlʉve va veene jiikʉvapʉlɨka vangave vitsova amamenyu mongosu mu nyɨsajo tsa veene. 8Kwʉ baako ʉkʉlɨngʼaana navo. ɄDadajiinyo atsimanyile itsʉ mulonda muve natso, wʉ ʉnyie mukaanale namunʼdoovili.

9Lɨno ʉnyie wʉ mukɨsaja muteetsage,

‘Daada viitu va kʉkyanya,

ɨlitaawa lyako lɨvalatsiwaagwe.

10ɄLʉdeeva lwako lwitsage.

Ʉvʉnogwe waako vʉkongiwaagwe paasi apa,

nda kʉkyanya.

11Ʉtʉpeetsage isiinu siitu isyɨ leelo ɨjɨ.

12Ʉtʉsyɨkɨlage inongwa tsiitu,

ndʉwʉ ʉwe tukʉvasyɨkɨla avalɨ ni nongwa kwawe.

13Ʉlatʉvɨɨkaga ndʉgelo,

apeene ʉtʉpoke kʉ ntavangwa,

manya ʉLʉdeeva lwako, na maka gaako nʉ vʉdwadwa waako sikutsooni!

Ameni!’ ”#6:13 Manya ʉLʉdeeva lwako, na maka gaako nʉ vʉdwadwa waako sikutsooni! Ameni! Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga.

14ɄYɨɨsʉ aatsovile ikange akata, “Ɨngave mukʉvasyɨkɨla avaanu imbiivi tsa veene, namwene ʉDadajiinyo va kʉkyanya ikʉvasyɨkɨla najyʉnyie imbiivi tsiinyo. 15Lɨno, mungave namukʉvasyɨkɨla avaanu imbiivi tsa veene, pwʉ najyʉ Dadajiinyo va kʉkyanya nakavasyɨkɨle imbiivi tsiinyo.

Imanyiiso tsa kwɨdɨnda ʉkʉlya ɨkyakʉlya

16“Wʉ mukɨdɨnda ʉkʉlya ɨkyakʉlya, mulekage ʉkʉsʉsʉvala kʉmiiho ndʉwʉ avagelʉngʼania vivomba, manya aveene vivonia ʉlʉsʉsʉvalo kʉmiiho pakʉta avaanu vavavone ʉkʉta vɨdɨndile ʉkʉlya ɨkyakʉlya. Tsa jɨlweli ndikʉvavʉʉla ʉkʉta, avo vamalile ʉkwʉpɨlɨla ʉlwokelo lwa veene. 17Apeene ʉve ʉngave wɨdɨndile ʉkʉlya ɨkyakʉlya, ʉpuguhe kʉmiiho nʉ kʉbaka amafuta kʉ ntwe, 18pakʉta avaanu valeke ʉkʉlʉmanya ʉkʉta ʉlɨ mu kwɨdɨnda ʉkʉlya ɨkyakʉlya. ɄDadaajo ʉvɨ nivoneka mu miiho, vɨ mwene alʉmanye mwene. Ikange ʉDadaajo ʉvɨ igendelela ʉkʉlola ʉgwʉ givombeka kʉvʉtiitu, alakʉhomba.

Imanyiiso tsa kulongwi tsa vʉmosu

(Luuka 12:33-34; 11:34-36; 16:13)

19“Muleke ʉkwɨvɨɨkɨla ʉvʉmosu mu kɨlʉnga ʉmʉ, ʉmwʉ ʉmehe nɨ ngʼusu sinanga nʉ mwʉ avahɨɨtsi vimamula isibaana nʉ kʉhɨɨtsa. 20Lɨno mwɨvɨɨkɨlage ɨkɨbaana kʉkyanya ʉkwʉ ʉmehe nɨ ngʼusu nasinanga nʉ kwʉ avahɨɨtsi navimamula nʉ kʉhɨɨtsa, 21manya ʉpwʉ kɨlɨpwo ɨkɨbaana kyako, pwʉ peene najɨ numbula jyako jɨlatsiiva.

22“Ɨliiho lyʉ nyaale jya mmana. Ɨngave ɨliiho lyako linonu, pwʉ ʉmmana gwako gwoni gwiva nʉ lʉmuli. 23Lɨno ɨngave ɨliiho lyako lɨboswe, ʉmmana gwako gwoni gwiva mu ngʼiisi. Ikange, ɨngave ʉlʉmuli ʉlʉlɨ nʼgati mwave lʉvye ngʼiisi, pwʉ ɨngʼiisi jiiva mbaha siitso!

24“Nakʉli ʉmuunu ʉvɨ iweesa ʉkʉvavombela avatwa vavɨlɨ kʉ nsɨkɨ mpamato. Lola, wʉ ikʉnʼgana nʉ kʉmbombela vʉnonu ʉntwa mpamato, pwʉ ikʉnsʉʉla nʉ kʉmʼbeda ʉjyʉnge ʉlya. Namukaweese ʉkʉmbombela ʉNgʉlʉve nɨ kyʉma#6:24 Namukaweese ʉkʉmbombela ʉNgʉlʉve nɨ kyʉma Mu mamenyu aga ʉYɨɨsʉ niita lʉviivi ʉkʉva nʉ vʉmosu evo ʉkʉlonda ɨkyʉma, apeene imanyiisa iita lʉviivi ɨngave ʉvʉmosu evo ɨkyʉma syʉ siiva silʉti ʉkʉlʉtɨɨlɨla ʉkʉmbombela ʉNgʉlʉve. kʉ nsɨkɨ mpamato!

Imanyiiso tsa kulongwi tsa kʉdwada

(Luuka 12:22-31)

25“Pwʉ ndikʉvavʉʉla, mwɨlekelwe ʉkʉtʉngʉtsiima pa kulongwi tsa wʉʉmi wiinyo ʉkʉta mulitsaga kɨki, evo munywetsaga kɨki, evo ɨmihana giinyo, muswalaga kɨki. Ndeeti ʉwʉʉmi nawʉ vʉlʉti pa kyakʉlya, nʉ mmana nagwene nagwʉ ndʉti pa misabwa? 26Lolelagi kʉ sidege. Nasivyala, nasibena nʉ kʉvɨɨka isiinu mu sibaana, napeene ʉDadajiinyo ʉvɨ alɨ kʉkyanya, ikʉsiliisa. Lɨno, ʉnyie namusaagɨlɨlwa siitso nʉ Ngʉlʉve ʉkʉlʉtɨɨlɨla isidege isyo? 27Veeni pagati paanyie ʉvɨ iweesa atʉngʉtsiime oongeletse ʉwʉʉmi wa mwene ndajɨve akavalɨlo kapamato?

28“Kɨki mutʉngʉtsiima ni sya kʉswala? Lolelagi kʉ vʉlʉva wa mu kɨlʉnga ʉmwʉ vukʉlɨla. Ʉweene navuvomba ɨmbombo pange kʉhona ɨmisabwa gya weene gya kʉswala. 29Lɨno ndikʉvavʉʉla ʉkʉta najyʉ Solomoni mu wɨɨmɨkiwa wa mwene wooni naswalage vʉnonu ndʉ vʉlʉva ʉwa! 30Ɨngave ʉNgʉlʉve ikʉlʉswɨka ewo ʉlʉhamba ʉvʉlʉva, nʉpwʉ jɨngave lunogela kʉ nsɨkɨ nʼdebe vʉvʉle, akasɨkɨ akikonga lukwʉma nʉ kʉnyianywa, ndeeti, ʉNgʉlʉve nakalʉtɨɨlɨle ʉkʉvaswɨka ʉnyie, mwe vaanu va lwɨdɨko lʉdebe?

31“Pwʉ mulekage ʉkʉtʉngʉtsiima ʉkʉta, ‘Tulitsaga kɨki, evo tunywetsaga kɨki, evo tuswalaga kɨki.’ 32Isiinu isyo syʉ vitʉngʉtsiima nasyo avaanu ʉwʉ navammanyili ʉNgʉlʉve, nʉ Dadajiinyo ʉvɨ alɨ kʉkyanya, alʉmanyile vʉnonu ʉkʉta najyʉnyie mulonda ʉkʉva ni siinu isyo. 33Lɨno ʉnyie londagi taasi ʉLʉdeeva lwa Ngʉlʉve#6:33 Londagi taasi ʉLʉdeeva lwa Ngʉlʉve Ɨkɨtsovo ɨkɨ nakilotsa kwita ʉLʉdeeva lwa Ngʉlʉve lʉjagile evo lʉsihamiike pakʉta tʉlʉlonde, apeene kwʉ kʉta tʉnogye ʉkwɨhʉmya nʉ kʉmwɨdɨkɨla ʉNgʉlʉve ʉnsɨkɨ gwoni mu wʉʉmi wiitu. Ʉvʉlʉvʉlʉ ʉvʉnge kwʉ kʉta ʉYɨɨsʉ ikʉtʉmanyiisa ʉmwʉ tʉnogye ʉkʉtaama twɨ vɨɨdɨki va Ngʉlʉve. nʉ kʉvomba ʉgwʉ ganogelanie pamiiho ga mwene, pwʉ isyo syoni mukwongeletsiwaagwa.

34“Pwʉ mulekage ʉkʉtʉngʉtsiima ni tsa kɨlaavo ʉlwakʉva itsa kɨlaavo jʉtsiiva nʉ lʉtʉngʉtsiimo lwa tsyene. Ɨkɨgono ɨkɨveetsaga kɨlɨ nʉ vʉpala wa kyene ʉvʉkwɨlanie.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mataayo 6: zga

Highlight

ಶೇರ್

ಕಾಪಿ