Акълова 5
5
5 къаьм
Хъаьгьбаябли аьдамлидой гьицака̄къа
1Йе дие оьжо, энекзи ахъ диела аᵸкълолахъа,
до нисоцала жойлас маьънана бова.
2Гьолълъоъкьа̄ ми бичӀи-лъай гаьгьийо ахъас,
дибола сикӀала каламлиъ илмо-лъайна бахъас.
3СукӀола ахъала сикӀаъкьа̄ нуцо гӯс, йеᵸлъ йеᵸхеллаълъийо бахъца гьолълъо нисоцас хабарна.
4Амма гьолълъодда̄ла йахъцас жона хаьчӀи-бохлъийо никъа̄йо йахъца,
балъайлъийо тушойона йахъца.
5Гьолълъола хаьбала̄ хеллиъ бейажеш,
журжагьлиъ йеᵸйакьецас йа̄хъца гьолълъос хаьба̄на.
6Гьинила оьмролала гьинолис пикрона боваъас гьолълъо,
чӀикӀ-чӀекӀдийа̄ гьинода̄кьа йеᵸкьецас гей гьоло гьинилзу йикъечӀе.
7Гьаᵸже, дие оьжда, миже дӣхъа энекзи ба̄хъ,
диела сикӀаъкьа̄ гувагьийа̄ йаьжбона ата̄ йоваха̄къа.
8Гьолълъо аьдаьмлидойс ата̄кӀа дибо гьино,
гьолълъола аᵸцлидойна гьицака̄къа,
9дибо къуват сукӀол мекьечӀе гьихлъанна,
гургьел гаьччал дибо оьмролаш лӀӣбо йеᵸйакьечӀе гьихбалъанна йадда;
10дибола боцӀи-ризкъила сукӀола аьдамла̄ш оᵸха йовацӀлечӀе гьихлъанна,
дул загьматлъи йегана йо̄йо жо сукӀола билӀоъ йеᵸкьечӀе гьихлъанна йатӀна зогъда.
11Бетана ми угъаллакьа зигардизи ахъца –
къуватна гикьа мокъова, магъона заип бахъийа мехлаъ.
12Бета ми нисас: «Малъ-хъайна аᵸкълона дил ригьзи бахъийас куц,
кантӀизи ахъийолъина диела йакӀи гьаькъир йогьцас зукъойо куц!
13Дил малъ-хъай богьцала̄с калам аьᵸдалаъ мейэш до,
аᵸкъло-насигьат ниццала̄хъана энекзи ахъеэш.
14Халкъиладойна жамаъатлидойна аьᵸйда̄
дӣкьа букъо балагь мокъал бахъца».
15Дибола лъикьас гугьцасна,
гьула̄зу дибола таьгьризлиъис йоᵸкъоцасна лъи хулӀа.
16Дибола мокӀиъис лъи къатӀла̄ъ йеᵸкьал нуцӀаъас,
майдалла̄кьа, эᵸхейа йа̄хъна, тор йеᵸкьал нуцӀаъас гьули.
17Гьоᵸс ми бетӀергьанаб йахъал нуцӀос гьули лъи,
бадлос къацӀос йахъал нуцӀаъас.
18-19Дибо лъи гуцӀова мицал баркат гулала,
анталаъ йоᵸкъова ахъа рази овала.
Дул хирияб билъона гьоло,
гьайбатаб жайранна гьоло!
Гьолълъола берцинлъила нитоназу йакӀо йоцӀлала дибо,
гьолълъола рокьиланна нитоназу мутӀиъ ахъна гьихлъала ми.
20Ми суд, дие оьжо, сукӀола ахъал мутӀиъ ахъал нуцӀона,
сукӀола ахъал аᵸлъо йоцӀал нуцӀона.
21БетӀергьаллила гьаьйда̄дой аьᵸйда̄ гей инсаллис оьмро,
инсаллис къацӀцӀа̄ гьинодана йийакъеш гьолцол.
22Лъаькъейо сукӀо гьинила чикейа ишла̄ къази огьна охца,
гьинила мунагьла̄ гьули кӀиц гунна иᵸцос.
23Нисойо йоваъалъ гьули угъас,
гьинила аьнтлъила къоссина овас.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Акълова 5: KapPROLUK
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)